(vovworld)- ປີ 2012 ພາຍໃຕ້ຫົວຂໍ້ວ່າ: “ອາຊຽນ: ປະຊາຄົມຫນຶ່ງ, ຊາຕະກຳດຽວ”, ປະຊາຄົມບັນດາປະເທດອາຊີຕາເວັນອອກສຽງໃຕ້ (ອາຊຽນ) ບັນລຸໄດ້ໝາກຜົນຈຳນວນຫນຶ່ງຢ່າງຕັ້ງຫນ້າ. ບັນດາໝາກຜົນນີ້ເຮັດໃຫ້ ອາຊຽນ ກ້າວເຂົ້າສູ່ໄລຍະພັດທະນາໃຫມ່, ມຸ່ງໄປເຖິງຈຸດໝາຍສ້າງປະຊາຄົມອາຊຽນ
ໃນປີ 2015. ໃນລາຍການຊາຍຄາ ອາຊຽນ ພາກນີ້, ພວກເຮົາຂໍແນະນຳບັນດາຜົນງານຂອງ ອາຊຽນ ກໍຄືການປະກອບສ່ວນຂອງ ຫວຽດນາມ ໃນປີຜ່ານມາ.
ອາດຈະເວົ້າໄດ້ວ່າ ປີ 2012 ອາຊຽນ ບັນລຸໄດ້ຜົນງານຫລາຍຢ່າງທີ່ເປັນຫນ້າສົນໃຈ. ໃນປີນີ້, ອາຊຽນ ສືບຕໍ່ສະຫງວນບຸລິມະສິດສູງໃຫ້ແກ່ການຜັນຂະຫຍາຍການສ້າງປະຊາຄົມໃນ 3 ເສົາຄ້ຳຕົ້ນຕໍຄື: ການເມືອງ, ຄວາມໝັ້ນຄົງ, ເສດຖະກິດ ວັດທະນະທຳ, ດ້ວຍເວລາກຳນົດແມ່ນປະຕິບັດສຳເລັດບັນດາຄາດໝາຍທີ່ໄດ້ວາງອອກໃນວັນທີ 31/12/2015. ກ່ຽວກັບປະຊາຄົມການເມືອງຄວາມໝັ້ນຄົງທາງດ້ານເສດຖະກິດ, ໃນໄລຍະຜ່ານມາ ອາຊຽນ ແມ່ນຫນຶ່ງໃນບັນດາປັດໄຈສຳຄັນຕົ້ນຕໍໃນການຮັບປະກັນສະພາບແວດລ້ອມແຫ່ງສັນຕິພາບ, ຄວາມໝັ້ນຄົງ ແລະ ການຮ່ວມມື ເພື່ອການພັດທະນາຂອງພາກພື້ນ. ບົດບາດສຳຄັນຕົ້ນຕໍນີ້ ໄດ້ສະແດງໃຫ້ເຫັນຢ່າງມີຊີວິດຊີວາຜ່ານຄວາມມານະພະຍາຍາມອັນໃຫຍ່ຫລວງຂອງ ອາຊຽນ ໃນການຍູ້ແຮງການຮ່ວມມືດ້ານການເມືອງ, ຄວາມໝັ້ນຄົງ ແລະ ສ້າງບັນດາຂໍ້ກຳນົດການປະພຶດ, ຜ່ານນັ້ນ ເພີ່ມທະວີຄວາມເຂົ້າອົກເຂົ້າໃຈ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນ, ສະກັດກັ້ນການປະທະກັນລະຫວ່າງບັນດາປະເທດໃນພາກພື້ນ. ກ່ຽວກັບປະຊາຄົມເສດຖະກິດ, ປີ 2012 ສະພາບການເສດຖະກິດມະຫາພາກຂອງ ອາຊຽນ ມີສັນຍານອັນຕັ້ງຫນ້າ. ລະດັບຈະເລີນເຕີບໂຕ GDP ຂອງອາຊຽນມີທ່າອ່ຽງໃນປີ 2012 ບັນລຸກວ່າ 5% ເມື່ອທຽບໃສ່ປີກາຍແມ່ນ 4,7%. ກ່ຽວກັບການລົງທຶນໂດຍກົງຂອງຕ່າງປະເທດເຂົ້າ ອາຊຽນ ກໍມີທ່າອ່ຽງເພີ່ມຂຶ້ນເມື່ອທຽບໃສ່ປີກາຍ. ກ່ຽວກັບປະຊາຄົມວັດທະນະທຳສັງຄົມ: ອາຊຽນ ໄດ້ຮັບຮອງເອົາແຜນການດຳເນີນງານ ອາຊຽນ ກ່ຽວກັບການປ່ຽນແປງຂອງດິນຟ້າອາກາດ ແລະ ມະຕິບາງກອກກ່ຽວກັບການຮ່ວມມືດ້ານສິ່ງແວດລ້ອມ ອາຊຽນ. ພ້ອມກັບການຍູ້ແຮງການຜັນຂະຫຍາຍບັນດາແຜນການສັງລວມກ່ຽວກັບການເຊື່ອມຈອດ ອາຊຽນ ແລະ ຮັດແຄບຊ່ອງຫວ່າງການພັດທະນາ, ອາຊຽນ ກໍເອົາໃຈໃສ່ເປັນພິເສດເຖິງການຍົກສູງສະຕິຄວາມຮັບຮູ້ຂອງປະຊາຊົນ ແລະ ໂຄສະນາກ່ຽວກັບ ອາຊຽນຢູ່ພາຍໃນ ແລະ ນອກພາກພື້ນ, ເພື່ອລະດົມການເຂົ້າຮ່ວມ ແລະ ປະກອບສ່ວນຢ່າງຕັ້ງຫນ້າຂອງປະຊາຊົນກໍຄືຂອງບັນດາຄູ່ຮ່ວມມືຫນູນຊ່ວຍວິວັດການສ້າງປະຊາຄົມ.
ທ່ານາຍົກລັດຖະມົນຕີ ຫວຽດນາ ຫງວຽນເຕີນຢູ໋ງ ເຂົ້າຮ່ວມກອງປະຊຸມ ອສຊຽນ +3
ພາບ:internet
|
ໃນປີ 2012, ການພົວພັນການຕ່າງປະເທດຂອງ ອາຊຽນ ສືບຕໍ່ໄດ້ຮັບການເປີດກວ້າງ ແລະ ເຂົ້າສູ່ລວງເລິກ. ຄຽງຄູ່ກັບການຜັນຂະຫຍາຍບັນດາໂຄງການແຜນການຮ່ວມມືທີ່ມີຢູ່ແລ້ວກັບບັນດາຄູ່ເຈລະຈາຢ່າງມີປະສິດທິຜົນ, ອາຊຽນ ກໍຕັ້ງຫນ້າຍົກອອກຂໍ້ລິເລີ່ມຮ່ວມມືໃຫມ່ໃນບັນດາຂົງເຂດບຸລິມະສິດຄື: ເສດຖະກິດ, ການເງິນ, ການຄ້າ… ອາຊຽນ ພ້ອມກັບ ອາເມລິກາ ແລະ ອິນເດຍ ໄດ້ເຫັນດີຕໍ່ເລ່ືອງຍົກການພົວພັນຂຶ້ນສູ່ລະດັບຄູຸ່ຮ່ວມມືຍຸດທະສາດ. ເມື່ອຕີລາຄາກ່ຽວກັບບົດບາດຂອງ ອາຊຽນ ໃນປີ 2012,ຮອງສາສະດາຈານ, ດຣ, ພົນຈັດຕະວາ ເລວັນເກື່ອງ, ອະດີດຫົວຫນ້າສະຖາບັນຄົ້ນຄ້ວາຍຸດທະສາດ ສັງກັດກະຊວງຕຳຫລວດ ຫວຽດນາມ ຖືວ່າ:
“ອາຊຽນ ໄດ້ສະແດງໃຫ້ເຫັນບົດບາດຂອງອົງການຮ່ວມສຳພັນດ້ານເສດຖະກິດພາຍໃນກຸ່ມຢ່າງແຮງ. ຈາກນັ້ນຊີ້ໃຫ້ເຫັນວ່າ, ອາຊຽນ ພວມຫັນບັນດາຈຸດໝາຍສ້າງປະຊາຄົມໃນປີ 2015 ໃຫ້ປະກົດຜົນເປັນຈິງເທ່ືອລະກ້າວ. ຄຽງຄູ່ກັນນັ້ນ ເລື່ອງອາຊຽນ ປະຕິບັດນະໂຍບາຍການຕ່າງປະເທດຢ່າງສະເໝີກັນ, ໝາຍຄວາມວ່າ ການພົວພັນກັບບັນດາປະເທດມະຫາອຳນາດຢູ່ພາຍໃນ ແລະ ນອກພາກພື້ນ ບົນຫລັກການ 2 ຝ່າຍ ຕ່າງມີຜົນປະໂຫຍດ ຍັງຄົງແມ່ນກຳນົດທິດທີ່ຈຳເປັນຂອງ ອາຊຽນໃນໄລຍະຈະມາເຖິງ.”
ການເຂົ້າຮ່ວມ ອາຊຽນ ຂອງ ຫວຽດນາມ ໃນປີ 2012 ກໍເປັນການປະກອບສ່ວນຢ່າງຕັ້ງຫນ້າເຂົ້າໃນຜົນສຳເລັດຂອງ ອາຊຽນ. ຫວຽດນາມ ປະກອບສ່ວນຢ່າງແທດຈິງເຂົ້າໃນການເພີ່ມທະວີການພົວພັນຄູ່ຮ່ວມມືຍຸດທະສາດ ອາຊຽນ - ຈີນ ເວົ້າລວມ, ພ້ອມກັນນັ້ນ ຊຸກຍູ້ການຜັນຂະຫຍາຍຖະແຫລງການອາຊຽນ - ຈີນ ກ່ຽວກັບການປະພຶດຢູ່ທະເລຕາເວັນອອກຢ່າງຄົບຖ້ວນ ແລະ ຊຸກຍູ້ເພື່ອໃຫ້ບັນດາປະເທດ ອາຊຽນ ກ້າວໄປເຖິງຄວາມເຫັນດີກ່ຽວກັບບັນດາປັດໄຈພື້ນຖານຂອງຂໍ້ກຳນົດການປະພຶດບົນທະເລຕາເວັນອອກ, ເປັນພື້ນຖານເພື່ອປຶກສາຫາລືໂດຍກົງກັບຈີນໃນໄລຍະຈະມາເຖິງ. ເມື່ອຢືນຢັນບົດບາດຂອງ ຫວຽດນາມ, ທ່ານ ຫງວຽນຕຽນມີນ, ຫົວຫນ້າກົມອາຊຽນ, ສັງກັດກະຊວງການຕ່າງປະເທດ ຫວຽດນາມ ເວົ້າວ່າ:
“ໃນປີ 2012 ຜ່ານມາ, ຫວຽດນາມ ໄດ້ມີຄວາມມານະພະຍາຍມຫລາຍຢ່າງເພື່ອປະຕິບັດບົດບາດປະເທດສະມາຊິກ ທີ່ເປັນເຈົ້າການ, ຕັ້ງຫນ້າ. ຫວຽດນາມ ໄດ້ສົມທົບກັບ ອາຊຽນ ເພື່ອຊຸກຍູ້ວິວັດການສ້າງປະຊາຄົມຢ່າງວ່ອງໄວ, ຮ່ວມສຳພັນ ແລະ ເຊື່ອມຈອດໃນອາຊຽນ, ມານະພະຍາຍາມຍົກສູງສະຕິຄວາມຮັບຮູ້ຂອງປະຊາຊົນກ່ຽວກັບ ອາຊຽນ, ໂຄສະນາພາບພົດ ອາຊຽນ ແລະ ປະຊາຄົມ ອາຊຽນ ອອກສຸ່ວົງຄະນາຍາດ ຜ່ານບັນດາການເຄື່ອນໄຫວລະນຶກ 45 ປີ ແຫ່ງວັນສ້າງຄັ້ງ ອາຊຽນ ແລະ ສັບປະດາອາຊຽນ ຈັດຂຶ້ນຢູ່ ຮ່າໂນ້ຍ. ນອກນັ້ນ ຫວຽດນາມ ມີການປະກອບສ່ວນຫລາຍຢ່າງເຂົ້າໃນການສ້າງບັນດາເອກະສານຮ່ວມມືສຳຄັນຂອງ ອາຊຽນ ຄື: ຖະແຫລງການ ອາຊຽນ ກ່ຽວກັບສິດທິມະນຸດກໍຄືຖະແຫລງການ ອາຊຽນ - ຈີນ, ລະນຶກ 10 ປີແຫ່ງວັນເຊັນ DOC. ສຸດທ້າຍໃນປີ 2012, ຫວຽດນາມ ໄດ້ກະກຽມເປັນຢ່າງດີໃຫ້ແກ່ພົນລະເມືອງຫວຽດນາມ ດຳລົງຕຳແຫນ່ງເປັນເລຂາທິການໃຫຍ່ ອາຊຽນ.”
ໃນພາຍພາກຫນ້າຍັງປະສົບກັບຄວາມຫຍຸ້ງຍາກ, ສ່ິງທ້າທາຍບໍ່ແມ່ນຫນ້ອຍ ແຕ່ດ້ວຍບົດຮຽນ ແລະ ການເຕີບໃຫຍ່ພາຍຫລັງ 45 ປີແຫ່ງການສ້າງຕັ້ງ ອາຊຽນ ນັ້ນ, ດ້ວຍນ້ຳໃຈສາມັກຄີ ແລະ ຄວາມສາມາດແກ້ໄຂຢ່າງມີໄຫວພິບນັ້ນ, ປາດຖະຫນາວ່າ ອາຊຽນ ຈະຜ່ານຜ່າສິ່ງກີດຂວາງ ແລະ ການທ້າທາຍທຸກຢ່າງ, ປະຕິບັດບັນດາຈຸດໝາຍທີ່ວາງອອກສຳເລັດຜົນ ນັ້ນແມ່ນ ສ້າງປະຊາຄົມອາຊຽນ ໃນປີ 2015.