(vovworld)- ປະຈຸບັນ ຈຳນວນນັກສຶກສາຫວຽດນາມ ໄດ້ຮັບການບຳລຸງສ້າງພາຍໃນປະເທດ, ຊອກວຽກເຮັດງານທຳຢູ່ບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້ ຍັງບໍ່ທັນມີຫລາຍ.ໃນສະພາບການປະຊາຄົມ ອາຊຽນໄດ້ຮັບການສ້າງຕັ້ງຢ່າງເປັນທາງການ, ອະນຸຍາດໃຫ້ຄົນງານມີລະດັບຄວາມຮູ້ສູງໃນພາກພື້ນໄປມາຢ່າງເສລີ ແລະ ຊອກຫາວຽກເຮັດງານທຳ, ບໍ່ຮູ້ຈັກວ່າ ຄົນງານຫວຽດນາມ ຍາດແຍ່ງກາລະໂອກາດນີ້ໄດ້ຫລືບໍ່?.
ຄົນງານຫວຽດນາມ ໄປເຮັດວຽກຢູ່ໄທ
|
ວັນທີ 31/12/2015, ທົ່ວກຸ່ມອາຊຽນໄດ້ສ້າງຕັ້ງເປັນປະຊາຄົມຫນຶ່ງ ເປັນ“ເອກະພາບໃນຫລາຍຮູບຫລາຍແບບ”. ປະຊາຄົມອາຊຽນ ອະນຸຍາດໃຫ້ຄົນງານມີລະດັບຄວາມຮູ້ສູງໃນພາກພື້ນ ອາຊີຕາເວັນອອກສ່ຽງໃຕ້ໄດ້ໄປມາຢ່າງເສລີ ແລະ ຊອກຫາວຽກເຮັດງານທຳຜ່ານຂໍ້ຕົກລົງຮັບຮູ້ເຊິ່ງກັນ ແລະ ກັນ(Mutual Recognition), ກ່ອນອື່ນໝົດແມ່ນ ໃນ 8 ຂະແຫນງອາຊີບ ລວມມີ: ປົວແຂ້ວ, ພະຍາບານ, ເຕັກນິກ, ກໍ່ສ້າງ, ບັນຊີ, ສະຖາປັດຕະຍາກຳ, ສຳຫລວດ ແລະ ທ່ອງທ່ຽວ. ໂດຍແມ່ນພົນລະເມືອງໃນປະຊາຄົມ ອາຊຽນ, ບັນດານັກສຶກສາ ຫວຽດນາມ ມີຄວາມໄຝ່ຝັນກ່ຽວກັບວິຊາຊີບສະເພາະຂອງຕົນ. ເພື່ອນ ຫວໍຈີແທ່ງ, ໂຮງຮຽນອາຊີວະຊັ້ນກາງເຕັກນິກ ຮຸ່ງເວືອງ ນະຄອນ ໂຮ່ຈິມີນ ແລະ ເພື່ອນ ຫວູຮ່ວາຍນາມ, ນັກສຶກສາໂຮງຮຽນວິທະຍາໄລທ່ອງທ່ຽວຮ່າໂນ້ຍແບ່ງປັນກ່ຽວກັບຈຸດໝາຍຮ່ຳຮຽນ ແລະ ຄວາມໄຝ່ຝັນຂອງຕົນວ່າ.
“ສິ່ງສຳຄັນນັ້ນແມ່ນ ຕົນເອງຕ້ອງປັບປຸງທັກສະຂອງຕົວເອງສາກອ່ນ. ເມື່ອປະເທດຊາດເຊື່ອມໂຍງເຂົ້າກັບ ອາຊຽນ, ຕົນເອງຕ້ອງຍົກສູງລະດັບພາສາອັງກິດ ແລະ ຄວາມຊຳນານງານ.”
“ເມື່ອປະເທດຊາດເຊື່ອມໂຍງເຂົ້າກັບອາຊຽນ ຈະຊ່ວຍໃຫ້ນ້ອງມີເງື່ອນໄຂຊອກຫາວຽກເຮັດງານທຳຢູ່ບັນດາປະເທດໃນພາກພື້ນ ອາຊີຕາເວັນອອກສ່ຽງໃຕ້. ນ້ອງມັກໄປເຮັດວຽກຢູ່ຕ່າງປະເທດ ເພາະວ່າ ທັງມີໂອກາດໄປທ່ອງທ່ຽວ ທັງໄດ້ຮ່ຳຮຽນເອົາບົດຮຽນຈາກບັນດາປະເທດອື່ນ.”
ເຖິງຢ່າງໃດກໍຕາມ, ກ່ຽວກັບທ່າໄດ້ປຽບໃນການແກ້ງແຍ້ງ, ຄົນງານຫວຽດນາມ ຍັງຈຳກັດຢູ່. ປະຈຸບັນ ຈຳນວນນັກສຶກສາຫວຽດນາມໄດ້ຮັບການກໍ່ສ້າງຢູ່ພາຍໃນປະເທດ ໄປຊອກຫາວຽກເຮັດງານທຳຢູ່ຕ່າງປະເທດບໍ່ທັນມີຫລາຍ. ສ່ວນຫລາຍບັນດາເພື່ອນຫນຸ່ມຫວຽດນາມ ຢາກເຮັດວຽກຢູ່ບໍລິສັດນາໆຊາດ ຫລືໄປເຮັດວຽກຢູ່ຕ່າງປະເທດ ແມ່ນຕ້ອງໄປຮຽນຢູ່ຕ່າງປະເທດ ຫລື ເຂົ້າຮ່ວມບັນດາຫລັກສູດກໍ່ສ້າງໄລຍະສັ້ນຢູ່ບັນດາສູນຕ່າງປະເທດ. ນອກນັ້ນ ຄວາມຈິງ ລະດັບຄວາມຮູ້ດ້ານພາສາອັງກິດຂອງຄົນງານຫວຽດນາມ ຍັງຕ່ຳຢູ່ ໃນຂະນະນັ້ນ ຄົນງານ ຮຽນພາສາ ບັນດາປະເທດໃນອາຊຽນຄື: ພາສາໄທ, ລາວ, ກຳປູເຈຍ ບໍ່ມີຫລາຍ … ນັ້ນແມ່ນບັນດາຮົ້ວກີດຂວາງສຳລັບການສົ່ງອອກຄົນງານຄຸນນະພາບສູງ. ທ່ານ ຫງວຽນເຊີນ, ຮອງຫົວຫນ້າຫ້ອງການຄະນະຊີ້ນຳລະຫວ່າງຂະແຫນງ ການເຊື່ອມໂຍງເຂົ້າກັບເສດຖະກິດສາກົນ, ກະຊວງອຸດສາຫະກຳ ແລະ ການຄ້າ ໄດ້ແບ່ງປັນວ່າ:
“ພວກເຮົາຕ້ອງສັບຊ້ອນວຽກງານສຶກສາ ແລະ ບຳລຸງສ້າງ ເພື່ອຍົກສູງຄຸນນະພາບຄົນງານຂອງຫວຽດນາມ. ບໍ່ພຽງແຕ່ສະເພາະດ້ານພາສາຕ່າງປະເທດ ດ້ານຄວາມຮູ້ ເທົ່ານັ້ນ ຫາກນັບທັງຄຸນສົມບັດ, ທັກສະໃນການດຳລົງຊີວິດ. ພວກເຮົາຕ້ອງສ້າງຖັນແຖວຄົນງານມີຄຸນນະພາບສັງລວມ”
ພາບປະກອບ:baomoi.vn
|
ເພື່ອຍົກສູງຄຸນນະພາບການບຳລຸງສ້າງຢູ່ຫວຽດນາມ, ມີມະຫາວິທະຍາໄລຫລາຍແຫ່ງໄດ້ເພີ່ມທະວີການຮ່ວມມືກັບສາກົນ, ຊ່ວຍນັກສຶກສາຕອບສະຫນອງໄດ້ຄວາມຮຽກຮ້ອງຕ້ອງການ ຮັບສະໝັກຄົນງານໃນພາກພື້ນ ອາຊີຕາເວັນອອກສ່ຽງໃຕ້. ດຣ ຫງວຽນແອງທູ, ຮອງອະທິການບໍດີ ມະຫາວິທະຍາໄລເສດຖະກິດ, ມະຫາວິທະຍາໄລແຫ່ງຊາດ ຮ່າໂນ້ຍ ຖືວ່າ:
“ບັນດາມະຫາວິທະຍາໄລປະຈຸບັນ ປາດຖະຫນາຢາກປະກອບໃຫ້ນັກສຶກສາບໍ່ພຽງແຕ່ຄວາມຮູ້ເທົ່ານັ້ນ ຫາກນັບທັງດ້ານທັກສະອີກດ້ວຍ ເພື່ອສຳຜັດກັບວຽກງານຕົວຈິງ. ຄຽງຄູ່ກັບການຮ່ຳຮຽນບັນດາວິຊາຕ່າງໆແລ້ວ, ພວກຂ້າພະເຈົ້າ ຍັງຈັດການພົບປະແລກປ່ຽນຄັ້ງຕ່າງໆກັບບັນດານັກສຶກສາຕ່າງປະເທດຄື ຍີ່ປຸ່ນ, ອົດສະຕາລີ ແລະເຊີນບັນດານັກປາຖະກະຖາຢູ່ນອກໂຮງຮຽນມາໂອ້ລົມກັບນັກສຶກສາ. ນອກນັ້ນ ຍັງສົ່ງນັກສຶກສາໄປທັດສະນະສຶກສາ, ເຮັດວຽກທົດລອງຢູ່ບັນດາວິສາຫະກິດ, ອົງການຈັດຕັ້ງຕ່າງໆ ເພື່ອອັບເດັດສະພາບຕົວຈິງ.”
ເມື່ອເວົ້າເຖິງບັນດາກາລະໂອກາດສຳລັບຄົນງານຫວຽດນາມ ເມື່ອເຊື່ອມໂຍງເຂົ້າກັບປະຊາຄົມ ອາຊຽນ, ເພື່ອນ ເລຮ່ວາຍແທງ, ເຮັດວຽກຢູ່ບໍລິສັດ ANT Engineering, ປະຈຸບັນ ພວມຮັບຜິດຊອບລູກຄ້າຢູ່ພາກພື້ນ ອາຊີຕາເວັນອອກສ່ຽງໃຕ້ ຢືນຢັນວ່າ: ກາລະໂອກາດໃຫ້ແກ່ຄົນງານຫວຽດນາມມີລະດັບຄວາມຮູ້ສູງ ຍັງຫລາຍຢູ່.
“ປະຈຸບັນ ຄົນງານເຮັດວຽກດ້ານເຕັກນິກຢູ່ບັນດາປະເທດຄື: ສິງກະໂປ, ມາເລເຊຍ ແມ່ນຂາດເຂີນຫລາຍ. ຖ້າຫາກມີໂອກາດໄດ້ໄປເຮັດວຽກຢູ່ ບັນດາປະເທດເຫລົ່ານັ້ນ ພຽງໃນເວລາ 6 ເດືອນ ຄົນງານຫວຽດນາມສາມາດທັດທຽມກັບເຕັກໂນໂລຊີຂອງເຂົາເຈົ້າໄດ້ ແລະ ເງີນເດືອນທີ່ຄົນງານຫວຽດນາມໄດ້ຮັບແມ່ນເທົ່າກັບເຄິ່ງຫນຶ່ງເງິນເດືອນຂອງຄົນງານສິງກະໂປ, ສະນັ້ນ ກາລະໂອກາດຂອງຄົນງານຫວຽດນາມ ຈະຫລາຍກວ່າ.”
ດ້ວຍບັນດາການປ່ຽນໃຫມ່ໃນຂົງເຂດການສຶກສາບຳລຸງສ້າງ ພ້ອມກັບຄວາມມານະພະຍາຍາມຂອງບັນດານັກສຶກສາຫວຽດນາມ, ຫວັງວ່າ “ການຮ່ຳຮຽນຢູ່ຫວຽດນາມ ແຕ່ໄປເຮັດວຽກໃນປະຊາຄົມ ອາຊຽນ”ຄວາມໄຝ່ຝັນຂອງຄົນງານຫວຽດນາມ ຈະປະກົດຜົນເປັນຈິງສຳລັບຄົນງານຫວຽດນາມຫລາຍຄົນ.