(vovworld) - ເຊື່ອມຕໍ່ການສຶກສາແມ່ນພາກສ່ວນຈຸດສຸມໃນການສ້າງປະຊາຄົມວັດທະນະທຳສັງຄົມ ອາຊຽນ ໃນປີ 2015. ຈຸດໝາຍແມ່ນສ້າງເປັນພື້ນຖານ ແລະ ກາລະໂອກາດໃຫ້ປະຊາຊົນ ອາຊຽນ, ສຳພັດກັບຂໍ້ມູນຂ່າວສານ, ພູມປັນຍາ. ຜ່ານນັ້ນປະກອບສ່ວນຍົກສູງຄວາມເຂົ້າໃຈກ່ຽວກັບອາຊຽນໃຫ້ແກ່ປະຊາຊົນທຸກຊັ້ນວັນນະ, ຊຸກຍູ້ວິວັດທະນາການລົບລ້າງຄວາມອຶດຫິວຫລຸດຜ່ອນຄວາມທຸກຍາກ, ຮັດແຄບຊ່ອງຫວ່າງການພັດທະນາ.
ຄວາມຈິງແລ້ວ, ການປະຕິບັດຂໍ້ລິເລີ່ມຫັນ ອາຊຽນ ເປັນຫນຶ່ງດຽວບໍ່ແມ່ນເລື່ອງງ່າຍດາຍ ຍ້ອນວ່າ ອາຊຽນແມ່ນປະຊາຄົມມີຫລາຍພາສາ. ເພາະສະນັ້ນ ເລື່ອງເຊື່ອມຕໍ່ການສຶກສາ ແລະ ເຕັກໂນໂລຊີຂໍ້ມູນຂ່າວສານມີຄວາມໝາຍສຳຄັນ. ກ່ຽວກັບບັນຫານີ້, ທ່ານ Gwang jo Kim, ຜູ້ອຳນວຍການຫ້ອງການສຶກສາຂອງ UNESCO ປະຈຳພາກພື້ນ ອາຊີ ປາຊີຟີກ ກໍຢືນຢັນວ່າ: ໃນວິວັດການປະຕິບັດການເຊື່ອມໂຍງເຂົ້າກັບປະຊາຄົມອາຊຽນໃນປີ 2015, ການສຶກສາ ແລະ ເຕັກໂນໂລຊີຂໍ້ມູນຂ່າວສານແມ່ນຫນຶ່ງໃນບັນດາເຄື່ອງມືທີ່ມີປະສິດທິຜົນເພື່ອໃຫ້ປະຊາຊົນອາຊຽນ ທຸກຄົນ ສາມາດເຊື່ອມຈອດນຳກັນ, ຊ່ວຍເຂົາເຈົ້າສຳພັດກັບບັນດາກາລະໂອກາດໃນການຮ່ຳຮຽນທີ່ມີຄຸນນະພາບຜ່ານການເຊື່ອມຕໍ່.
“ຄວາມຫຍຸ້ງຍາກສຳລັບບັນດາປະເທດອາຊຽນ ໃນປະຈຸບັນ ແມ່ນບັນຫາພາສາ ແລະ ພູມີປະເທດ. ວັດທະນະທຳເປັນຫລາຍຮູບຫລາຍແບບ, ມີຫລາຍສາສະຫນາ ແລະ ຫລາຍຊົນເຜົ່າໃນອາຊຽນໄດ້ເຮັດໃຫ້ຜູ້ທຸກຍາກ, ເປັນຕົ້ນແມ່ນຊາວຊົນເຜ່ົາສ່ວນຫນ້ອຍຢູ່ເຂດຫ່າງໄກສອກຫລີກ ຍາກທີ່ຈະໄດ້ສຳພັດກັບພາຫະນະເພື່ອຮ່ຳຮຽນ ແລະ ຮັບເອົາຄວາມຮູ້ຈາກພາຍນອກໄດ້. ນອກນັ້ນ ເຂົາເຈົ້າຍັງໃຊ້ພາສາແຕກຕ່າງກັນ. ດ້ວຍການຊ່ວຍເຫລືອຕ່າງໆ, ພວກເຮົາສາມາດຊ່ວຍໃຫ້ເຂົາເຈົ້າສຳພັດກັບປະຊາຄົມອາຊຽນ. ຂ້າພະເຈົ້າອາດຈະຢືນຢັນໄດ້ວ່າ ປະຊາຊົນອາຊຽນ ທຸກຄົນ ລ້ວນແຕ່ໄດ້ຮັບຜົນປະໂຫຍດຈາກການເຊື່ອມຕໍ່ການສຶກສາກໍຄືການພັດທະນາເຕັກໂນໂລຊີຂໍ້ມູນຂ່າວສານ.”
ນັກສຶກສາ ຫວຽດນາມ ໄດ້ຮັບທຶນສຶກສາຈາກລັດຖະບານ ສິງກະໂປ
ພາບ: internet
|
ເພື່ອຫັນປະຊາຄົມວັດທະນະທຳສັງຄົມປະກົດຜົນເປັນຈິງເທື່ອລະກ້າວ, ບັນດາປະເທດສະມາຊິກ ອາຊຽນ ພວມພະຍາຍາມຍົກສູງຄວາມຮັບຮູ້ຂອງນັກຮຽນກ່ຽວກັບປະຊາຄົມ ອາຊຽນ ດ້ວຍຫລາຍຮູບການທີ່ອຸດົມສົມບູນ. ຕົວຢ່າງ ຢູ່ ຫວຽດນາມ, ບັນດາໂຮງຮຽນມັດທະຍົມມີຫລັກສູດສິດສອນຕື່ມກ່ຽວກັບບັນດາປະເທດສະມາຊິກ ອາຊຽນ, ລວມມີ: ພູມີປະເທດ, ພົນລະເມືອງ, ອາກາດ, ຕົວເມືອງ, ນະຄອນຫລວງ, ການນຳລັດ, ລັດຖະບານ, ອາຫານການກິນ ແລະ ພາສີຂອງແຕ່ລະປະເທດ. ຫວຽດນາມ ຍັງສົ່ງນັກຮຽນໄປຮຽນພາສາຢູ່ບັນດາປະເທດບ້ານໃກ້ເຮືອນຄຽງ. ສຳລັບໄທ, ບັນດາການເຄື່ອນໄຫວສະຫນອງຄວາມຮູ້ກ່ຽວກັບ ອາຊຽນ ໄດ້ຮັບການຜັນຂະຫຍາຍຢູ່ໂຮງຮຽນທຸກແຫ່ງໃນທົ່ວປະເທດ. ມີໂຮງຮຽນຫລາຍແຫ່ງໄດ້ກະກຽມແຜນການເຊື່ອມຕໍ່ການສຶກສາ ອາຊຽນ ກັບປະເທດບ້ານໃກ້ເຮືອນຄຽງ ແລະ ບັນດາປະເທດ ອາຊຽນອື່ນທີ່ມີຄວາມຕ້ອງການເຊື່ອມຈອດການສຶກສາກັບບັນດາໂຮງຮຽນຢູ່ໄທ, ພິເສດ ແມ່ນພ້ອມກັນສ້າງ ແລະ ປະຕິບັດບັນດາໂຄງການສຶກສາໃນນັ້ນ ເອົາໃຈໃສ່ເປັນພິເສດເຖິງການສິດສອນພາສາຂອງກັນ. ໂຮງຮຽນມັດທະຍົມຕອນປາຍ St Margaret ປະເທດສິງກະໂປ ໄດ້ສິດສອນເນື້ອໃນກ່ຽວກັບ ອາຊຽນ ໃນບັນດາວິຊາສັງຄົມສາດ ແລະ ມີໂຄງການແລກປ່ຽນນັກຮຽນກັບ ອິນໂດເນເຊຍ ເພື່ອຊ່ວຍເຂົາເຈົ້າເຂົ້າໃຈເຊິ່ງກັນ ແລະ ກັນຫລາຍກວ່າ. ສຳລັບ ລາວ, ເຖິງວ່າ ໂຮງຮຽນຫລາຍແຫ່ງບໍ່ທັນມີໂຄງການສິດສອນກ່ຽວກັບອາຊຽນໃຫ້ແກ່ນັກຮຽນກໍຕາມ ແຕ່ລັດຖະບານ ລາວ ໄດ້ສ້າງຄວາມສະດວກທີ່ສຸດ ດ້ວຍການສະຫນອງ, ຫນູນຊ່ວຍດ້ານການເງິນໃຫ້ແກ່ນັກຮຽນໄປເຂົ້າຮ່ວມການຕັ້ງຄ້າຍພັກແລ້ງ ອາຊຽນ ແລະ ເຂົ້າຮ່ວມການແຂ່ງຂັນກິລາເພື່ອຊອກຮູ້ກ່ຽວກັບບັນດາປະເທດສະມາຊິກ ອາຊຽນຕື່ມອີກ. ເພ່ືອປະກອບສ່ວນຊ່ວຍ ອາຊຽນ ຊຸກຍູ້ການປະຕິບັດຈຸດໝາຍຢ່າງມີປະສິດທິຜົນ, ຫ້ອງການສຶກສາຂອງ UNESCO ປະຈຳພາກພື້ນ ອາຊີ ປາຊີຟີກ ພວມຜັນຂະຫຍາຍບາງວຽກງານເພື່ອຊ່ວຍສະຫນອງບົດຮຽນ, ເຕັກນິກ, ເຕັກໂນໂລຊີໃຫ້ ອາຊຽນ ຫັນບັນດາຈຸດໝາຍທີ່ວາງອອກໃຫ້ປະກົດຜົນເປັນຈິງ. ທ່ານ Gwang Jo Kim ຜູ້ອຳນວຍການຫ້ອງການສຶກສາຂອງ UNESCO ປະຈຳ ພາກພື້ນ ອາຊີ - ປາຊີຟີກ ໃຫ້ຮູ້ວ່າ:
“ຫນຶ່ງໃນບັນດາວຽກງານນັ້ນແມ່ນຫນູນຊ່ວຍຄູອາຈານ ແລະ ບັນດາຮາກຖານການສຶກສາສຳພັດກັບເຕັກໂນໂລຊີຂໍ້ມູນຂ່າວສານໃຫ້ຫລາຍກວ່າ. ຄຽງຄູ່ກັນນັ້ນ, ພວກຂ້າພະເຈົ້າ ກໍຈັດຕັ້ງບັນດາເວທີປາໄສເພື່ອແບ່ງປັນບົດຮຽນ ແລະ ຈັດກອງປະຊຸມສຳມະນາເພື່ອໃຫ້ນັກສ້າງນະໂຍບາຍ, ນັກຮຽນຮູ້ມາຈາກບັນດາປະເທດສະມາຊິກ ອາຊຽນ ຮ່ຳຮຽນເຊິ່ງກັນ ແລະກັນ. ປະຈຸບັນ, ເຕັກໂນໂລຊີຂໍ້ມູນຂ່າວສານນັບມື້ນັບພັດທະນາຢ່າງວອ່ງໄວ ສະນັ້ນ ບັນດານັກສ້າງນະໂຍບາຍຕ້ອງກຳແຫນ້ນຄວາມກ້າວຫນ້ານີ້ ເພື່ອນຳເຂົ້າບັນດານະໂຍບາຍຂອງຕົນ.”
ເບິ່ງລວມແລ້ວ, ການເຊື່ອມຕໍ່ການສຶກສາສາມາດສ້າງກາລະໂອກາດຊ່ວຍເຊື່ອມຈອດມະນຸດນຳກັນ ແຕ່ມາດຕະການຫນຶ່ງດຽວ ແມ່ນບໍ່ສາມາດແກ້ໄຂບັນຫາໄດ້. ມັນອີງໃສ່ສະພາບຕົວຈິງຂອງບັນດາປະເທດສະມາຊິກ ອາຊຽນ ແລະ ຄວາມານະພະຍາຍາມຂອງທຸກປະເທດ. ສິ່ງສຳຄັນ ແມ່ນການເຊ່ືອມຕໍ່ນີ້ ຈະສ້າງພື້ນຖານໝັ້ນຄົງໃຫ້ແກ່ພົນລະເມືອງໃນອະນາຄົດຂອງອາຊຽນເມື່ອກ້າວເຂົ້າສູ່ສັງກາດໃຫມ່, ສັງກາດແຫ່ງປະຊາຄົມ ອາຊຽນ.