(vovworld) - ມຸ່ງໄປເຖິງການສ້າງປະຊາຄົມລວມໃນປີ 2015, ອາຊຽນ ບໍ່ພຽງແຕ່ເພີ່ມທະວີການຮ່ວມມືພາຍໃນກຸ່ມເທົ່ານັ້ນ ຫາກຍັງຍູ້ແຮງການຮ່ວມມືຫລາຍຝ່າຍ ແລະ ສອງຝ່າຍກັບບັນດາປະເທດຄູ່ຮ່ວມມືຢ່າງບໍ່ຢຸດຢັ້ງ ອີກດ້ວຍ, ໃນນັ້ນ ມີອິນເດຍ. ໃນປີ 2012, ການພົວພັນຮ່ວມມືລະຫວ່າງ ອາຊຽນ ແລະ ອິນເດຍ ມີບາດກ້າວພັດທະນາທີ່ເປັນຫນ້າປະທັບໃຈໃນຫລາຍຂົງເຂດ, ປະກອບສ່ວນສ້າງສາຍພົວພັນສອງຝ່າຍໃຫ້ນັບມື້ນັບໝັ້ນຄົງ ແລະ ພັດທະນາກວ່າໃນຊຸມປີຕໍ່ໄປ.
ທ່ານເລຂາທິການໃຫຍ່ ຫງວຽນຟູຈ້ອງ ຕ້ອນຮັບທ່ານຮອງປະທານາທິບໍດີ ອິນເດຍ Momamad Hamed Ansari
ພາບ: TTXVN
|
ໃນປີ 2012, ການພົວພັນສອງຝ່າຍ ຫວຽດນາມ ແລະ ອິນເດຍ ໄດ້ຮັບການຍູ້ແຮງ ແລະ ເພີ່ມທະວີຢ່າງບໍ່ຢຸດຢັ້ງດ້ວຍຫລາຍເຫດການຄື: ການຢ້ຽມຢາມບັນດາປະເທດ ອາຊຽນໃນທ້າຍເດືອນ 12/2012 ຂອງກຳປັ່ນທະຫານເຮືອ, ກອງປະຊຸມສຳມະນາການຮ່ວມມືຜະລິດພະລັງງານຄືນໃຫມ່ ລະຫວ່າງ ອາຊຽນ ແລະ ອິນເດຍ ໃນເດືອນ 11/2012, ບັນດາການພົບປະສອງຝ່າຍລະຫວ່າງການນຳບັນດາປະເທດ ອາຊຽນ ກັບອິນເດຍເມື່ອເດືອນ 8/2012. ໃນນັ້ນເຫດການທີ່ເປັນຂີດໝາຍກ່ຽວກັບການພັດທະນາຂອງສາຍພົວພັນສອງຝ່າຍໃນປີຜ່ານມາ ແມ່ນກອງປະຊຸມສຸດຍອດ ສະເຫລີມສະຫລອງ 20 ປີແຫ່ງການສ້າງຕັ້ງການພົວພັນທາງການທູດ ລະຫວ່າງ ອາຊຽນ ແລະ ອິນເດຍ ໄດ້ຮັບການຈັດຕັ້ງຂຶ້ນໃນທ້າຍເດືອນ 12 ຜ່ານມາຢູ່ ອິນເດຍ.
ທີ່ກອງປະຊຸມຄັ້ງນີ້, ການນຳ ອາຊຽນ ແລະ ອິນເດຍ ໄດ້ອອກຖະແຫລງການຮ່ວມ ຍົກການພົວພັນລະຫວ່າງ ອາຊຽນ ແລະ ອິນເດຍ ຈາກ ຄູ່ເຈລະຈາຂຶ້ນສູ່ລະດັບຄູ່ຮ່ວມມື, ໝາຍຄວາມວ່າ ທັດສະນະຂອງທັງສອງຝ່າຍມີວິໄສທັດຮ່ວມ ແລະ ຕັດສິນໃຈພ້ອມກັນກ້າວເດີນໄປຕາມເສັ້ນທາງສັນຕິພາບ ແລະ ວັດທະນາຖາວອນ. ທ່ານນາຍົກລັດຖະມົນຕີ ອິນເດຍ Manmohan Sigh ໄດ້ຢືນຢັນວ່າ:
“ ຍາມໃດ ອິນເດຍ ກໍຖືການປັບປຸງ, ເພີ່ມທະວີການພົວພັນຮ່ວມມືກັບ ອາຊຽນ ໃນທຸກຂົງເຂດເປັນສຳຄັນ ແລະ ສະຫນັບສະຫນູນບົດບາດໃຈກາງຂອງ ອາຊຽນ ຢູ່ ພາກພື້ນ. ອາຊຽນ ແມ່ນເສົາຄ້ຳຕົ້ນຕໍໃນນະໂຍບາຍ “ມຸ່ງໄປສູ່ທິດຕາເວັນອອກ” ຂອງ ອິນເດຍ ເພື່ອເປີດກວ້າງການຮ່ວມມື ແລະ ຮ່ວມສຳພັນດ້ານເສດຖະກິດກັບພາກພື້ນ ອາຊີ ປາຊີຟີກ.”
ອາຊຽນ ແລະ ອິນເດຍ ໃຫ້ຄຳໝັ້ນສັນຍາສືບຕໍ່ເພີ່ມທະວີການເຈລະຈາດ້ານປ້ອງກັນຊາດ ປ້ອງກັນຄວາມສະຫງົບ, ສ້າງຄວາມໄວ້ເນື້ອເຊື່ອໃຈ ແລະ ປະສານສົມທົບກັນໃນການແກ້ໄຂບັນດາບັນຫາທີ່ທັງພາກພື້ນພວມສົນໃຈ, ສູ້ຊົນເພື່ອ ອາຊີ ແຫ່ງສັນຕິພາບ ແລະ ວັດທະນາຖາວອນ. ເຂົ້າຮ່ວມກອງປະຊຸມຄັ້ງນີ້, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູງ ສະແດງທັດສະນະທີ່ກອງປະຊຸມວ່າ:
“ຂ້າພະເຈົ້າຫວັງວ່າ ອິນເດຍ ສືບຕໍ່ຮ່ວມມືຢ່າງແຫນ້ນແຟ້ນກັບ ອາຊຽນ ແລະ ສະຫນັບສະຫນູນບົດບາດໃຈກາງຂອງ ອາຊຽນ, ເຂົ້າຮ່ວມຢ່າງຕັ້ງຫນ້າ ແລະ ປະກອບສ່ວນສ້າງກົນໄກຮ່ວມມືພາກພື້ນປະຈຸບັນຄື: ກອງປະຊຸມສຸດຍອດ ອາຊີຕາເວັນອອກ (EAS), ເວທີປາໄສພາກພື້ນ ອາຊຽນ (ARF), ກອງປະຊຸມລັດຖະມົນຕີປ້ອງກັນປະເທດ ອາຊຽນ ເປີດກວ້າງ (ADMM+), ເວທີປາໄສທະເລ ອາຊຽນ ເປີດກວ້າງ…. ສ້າງບັນດາມາດຕະຖານ ແລະ ແກ້ໄຂສິ່ງທ້າທານຄວາມໝັ້ນຄົງຢູ່ພາກພື້ນ ຊື່ງລວມມີ: ຄວາມໝັ້ນຄົງ, ຄວາມປອດໄພ, ການເດີນທະເລຢ່າງເສລີ, ກໍ່ການຮ້າຍ, ອາດຊະຍາກຳຂ້າມຊາດ, ຈົນສະຫລັດ, ການປ່ຽນແປງຂອງດິນຟ້າອາກາດ, ຄວາມໝັ້ນຄົງດ້ານພະລັງງານ, ເພື່ອສັນຕິພາບ, ຄວາມກ້າວຫນ້າ ແລະ ວັດທະນາຖາວອນຢູ່ພາກພື້ນ.”
ອາດຈະເວົ້າໄດ້ວ່າ ເລື່ອງ ອາຊຽນ ແລະ ອິນເດຍ ເພີ່ມທະວີການພົວພັນໃນສະພາບການສາກົນ ແລະ ພາກພື້ນ ສືບຕໍ່ຜັນແປໄປຢ່າງສັບສົນ, ແນ່ນອນວ່າ ການຮັບປະກັນຄວາມໝັ້ນຄົງທີ່ມີຕໍ່ສັນຕິພາບ, ສະຖຽນລະພາບ ແລະ ພັດທະນາຢູ່ພາກພື້ນ ນັບທັງບັນຫາຄວາມໝັ້ນຄົງ, ຄວາມປອດໄພການເດີນເຮືອຢູ່ ທະເລຕາເວັນອອກ.
ກຳປັ່ນທະຫານເຮືອ ອິນເດຍ ຢ້ຽມຢາມ ຫວຽດນາມ
ພາບ:internet
|
ຄວາມຕັດສິນໃຈຂຸດຄົ້ນ ແລະ ເສີມຂະຫຍາຍຄວາມສາມາດບົ່ມຊ້ອນອັນໃຫຍ່ຫລວງກ່ຽວກັບການຮ່ວມມືດ້ານເສດຖະກິດ ການຄ້າ ຂອງພາກພື້ນ, ອາຊຽນ ແລະ ອິນເດຍ ສູ້ຊົນຍົກວົງເງິນການຄ້າສອງສົ້ນໃຫ້ຂຶ້ນເຖິງ 100 ຕື້ USD ໃນປີ 2015 ແລະ ກ້າວໄປເຖິງການສ້າງເຂດການຄ້າເສລີ ຮອບດ້ານລະຫວ່າງ ອາຊຽນ ແລະ ອິນເດຍ. ທ່ານ ຟ້າມກວາງວີນ ຮອງລັດຖະມົນຕີການຕ່າງປະເທດ ຫວຽດນາມ ໃຫ້ຮູ້ວ່າ:
“ອາຊຽນ ແລະ ອິນເດຍ ໄດ້ສິ້ນສຸດການເຈລະຈາ ສັນຍາການຄ້າ ບໍລິການ ແລະ ສັນຍາກ່ຽວກັບການລົງທຶນ ຈະສ້າງພື້ນຖານເພື່ອບັນລຸເຂດການຄ້າເສລີຮອບດ້ານລະຫວ່າງ ອາຊຽນ ແລະ ອິນເດຍ ໂດຍໄວ ຊື່ງບໍສະເພາະແຕ່ສິນຄ້າເທົ່ານັ້ນ ຫາກຍັງລວມທັງການບໍລິການ ແລະ ການລົງທຶນອີກດ້ວຍ. ສິ່ງດັ່ງກ່າວຈະເສີມຂະຫຍາຍກຳລັງແຮງຂອງພົນລະເມືອງ 1,8 ຕື້ຄົນ ແລະ GDP 3.800 ຕື້ USD ໄດ້. ສອງຝ່າຍຈະເພີ່ມທະວີບັນດາເງື່ອນໄຂເພື່ອຊູກຍູ້ການພົບປະແລກປ່ຽນດ້ານເສດຖະກິດ ການຄ້າ ແລະ ການທ່ອງທ່ຽວ, ກ່ອນອື່ນໝົດສຸມແຫລ່ງກຳລັງເພື່ອເພີ່ມທະວີການເຊື່ອມຈອດ ອາຊຽນ - ອິນເດຍ ຜ່ານການຍູ້ແຮງບັນດາໂຄງການເຊື່ອມຕໍ່ ອິນເດຍ - ແມ່ຂອງ, ສືບຕໍ່ກໍ່ສ້າງເສັນທາງຄວາມໄວສູງ ອິນເດຍ - ມ້ຽນມາ -ໄທ ໂດຍໄວ ຫລັງຈາກນັ້ນເປີດກວ້າງການເຊື່ອມຕໍ່ ກັບລາວ, ກຳປູເຈຍ ແລະ ຫວຽດນາມ.”
ດ້ວຍບັນດາໂຄງການທີ່ເຕັມໄປດ້ວຍຄວາມສາມາດບົ່ມຊອ້ນ ໄດ້ ແລະ ພວມຜັນຂະຫຍາຍ, ສາຍພົວພັນສອງຝ່າຍ ລະຫວ່າງ ອິນເດຍ ກັບ ອາຊຽນ ເວົ້າລວມ ແລະ ແຕ່ລະປະເທດສະມາຊິກ ອາຊຽນ ເວົ້າສະເພາະ ໝັ້ນໝາຍອະນາຄົດພັດທະນາຢ່າງແຂງແຮງກວ່າ. ແລະ ໃນຊຸມມື້ຕົ້ນປີ 2013, ການນຳບັນດາປະເທດ ອາຊຽນ ແລະ ອິນເດຍ ໄດ້ມີການພົບປະສອງຝ່າຍ ແລະ ຢູ່ນອກກອງປະຊຸມໃຫຍ່ຄື: ເວທີປາໄສການທ່ອງທ່ຽວ ອາຊຽນ ຄັ້ງທີ 32 ຈັດຂຶ້ນຢູ່ ສປປ ລາວ ໃນວັນທີ 20/1 ຫລື ການຢ້ຽມຢາມ ຫວຽດນາມ ຢ່າງເປັນທາງການຂອງທ່ານຮອງປະທານາທິບໍດີ ອິນເດຍ Momamad Hamed Ansari . ບັນດາການເຄື່ອນໄຫວສອງຝ່າຍ ແລະ ຫລາຍຝ່າຍ ຢ່າງລະອຽດດັ່ງກ່າວ ແມ່ນເປີດສາກໃຫ້ແກ່ປີເພີ່ມທະວີການຮ່ວມມືຍົກການພົວພັນລະຫວ່າງ ອາຊຽນ ແລະ ອິນເດຍ ຈາກຄູ່ເຈລະຈາຂຶ້ນສູ່ລະດັບຄູ່ຮ່ວມມື.