(vovworld)- ໃນຊຸມປີຜ່ານມາ, ການພົວພັນສາມັກຄີມິດຕະພາບ, ການຮ່ວມມືຮອບດ້ານລະຫວ່າງ ຫວຽດນາມ ແລະ ກຳປູເຈຍ ໄດ້ມີບັນດາບາດກ້າວພັດທະນາອັນດີງາມທັງລວງກວ້າງ ແລະ ລວງເລິກ. ສາຍພົວພັນນັ້ນໄດ້ຮັບການເພີ່ມພູນຄູນສ້າງຜ່ານຫລາຍລຸ້ນຄົນ ແລະ ພວມນັບມື້ນັບພັດທະນາຢ່າງວ່ອງໄວໃນທຸກຂົງເຂດຄື: ການເມືອງ, ເສດຖະກິດ, ວັດທະນະທຳ, ການສຶກສາ.. ໃນນັ້ນ ການພົວພັນທາງດ້ານເສດຖະກິດ, ການຄ້າ ບັນລຸໄດ້ບັນດາບາດກ້າວບຸກທະລຸ ແລະ ກໍແມ່ນຫນຶ່ງໃນບັນດາປັດໄຈສຳຄັນ ປະກອບສ່ວນສ້າງການພົວພັນ “ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ” ລະຫວ່າງສອງປະເທດສຳເລັດຜົນ.
ທ່ານນາຍົກລັດຖະມົນຕີຫວຽດນາມ ຫງວຽນເຕີນຢູງ
ແລະ ທ່ານນາຍົກລັດຖະມົນຕີ ກຳປູເຈຍ Hunsen
photo:TTXVN
|
ຫວຽດນາມ ແລະ ກຳປູເຈຍ ແມ່ນສອງປະເທດມີບັນດາເງື່ອນໄຂພູມສາດສະດວກ, ເພີ່ມເຕີມໃຫ້ກັນເພືອ່ພັດທະນາ. ແລະ ໄລຍະປະຈຸບັນແມ່ນໄລຍະສະດວກທີ່ສຸດເພື່ອຊຸກຍູ້ການຮ່ວມມືເສດຖະກິດ ແລະ ການຄ້າສອງຝ່າຍ. ນັ້ນແມ່ນຂໍ້ສັງເກດຂອງທ່ານ ຫວູທີ້ງເກືອງ, ທູດການຄ້າຫວຽດນາມ ປະຈຳ ກຳປູເຈຍ ເມື່ອເວົ້າເຖິງຄວາມສາມາດບົ່ມຊ້ອນໃນການຮ່ວມມືລະຫວ່າງສອງປະເທດ.
“ຫວຽດນາມ ແລະ ກຳປູເຈຍມີເຊັ້ນຊາຍແດນທາງບົກລວມກວ່າ 1.100 ກິໂລແມັດ, ຕິດກັບ 10 ແຂວງຊາຍແດນ ຂອງຫວຽດນາມ ແລະ 9 ແຂວງ ຊາຍແດນຂອງ ກຳປູເຈຍ. ຄຽງຄູ່ກັນນັ້ນ ຮີດຄອງປະເພດນີ ຂອງສອງປະເທດແມ່ນຄ້າຍຄືກັນ, ຄວາມຕ້ອງການໃຊ້ສອຍສິນຄ້າຂອງ ກຳປູເຈຍ ແມ່ນໃຫຍ່ຫລວງ, ແຕ່ຄວາມຕ້ອງການ ຄຸນນະພາບ ແລະ ເຕັກນິກບໍ່ສູງປານໃດ, ສອດຄອ່ງກັບກຳລັງຄວາມສາມາດຜະລິດຂອງຫວຽດນາມ.”
ນອກຈາກຄວາມສະດວກກ່ຽວກັບເງື່ອນໄຂທຳມະຊາດ, ການພົວພັນຮ່ວມມືດ້ານເສດຖະກິດການຄ້າລະຫວ່າງສອງປະເທດ ຍັງໄດ້ຮັບຄວາມເອົາໃຈໃສ່ເປັນພິເສດຈາກການນຳຂັ້ນສູງ ຫວຽດນາມ ແລະ ກຳປູເຈຍ. ທີ່ການພົບປະຄັ້ງຕ່າງໆລະຫວ່າງການນຳຂັ້ນສູງສອງປະເທດ, ສອງຝ່າຍ ລ້ວນແຕ່ຢືນຢັນຄວາມສຳຄັນຂອງການຮ່ວມມືເສດຖະກິດ, ການຄ້າ ແລະ ໝັ້ນໝາຍສືບຕໍ່ເປີດກ້ວາງ, ຍົກສູງປະສິດທິຜົນການຮ່ວມມືໃຫ້ສົມກັບຄວາມມຸ່ງມາດປາດຖະຫນາ ແລະ ຄວາມສາມາດບົ່ມຊ້ອນອັນໃຫຍ່ຫລວງຂອງສອງປະເທດ. ການນຳຂັ້ນສູງສອງປະເທດ ໄດ້ເຫັນດີຕັດສິນໃຈນຳວົງເງິນການຄ້າສອງສົ້ນບັນລຸ 5 ຕື້ USD ໃນປີ 2015. ທ່ານ NguonMengTich, ປະທານຫ້ອງການການຄ້າ ກຳປູເຈຍ ໃຫ້ຮູ້ວ່າ: ໃນໄລຍະ 2001-2011, ວົງເງິນການຄ້າສອງສົ້ນໄດ້ເພີ່ມຂຶ້ນເກືອບ 17 ເທົ່າ, ແຕ່ 169 ລ້ານ USD ຂຶ້ນເຖິງ 2,83 ຕື້ USD, ລະດັບເຕີບໂຕສະເລ່ຍແມ່ນ 32,5%/ປີ. ນັກທ່ອງທ່ຽວ ຫວຽດນາມ ໄປຢ້ຽມຢາມ ກຳປູເຈຍ ນັບມື້ນັບເພີ່ມຂຶ້ນ ແລະ ຫວຽດນາມ ແມ່ນນຳຫນ້າໃນບັນດາປະເທດມີຈຳນວນນັກທ່ອງທ່ຽວມາຢ້ຽມຢາມ ກຳປູເຈຍ ຫລາຍສຸດ. ປະຈຸບັນ ມີບໍລິສັດ, ສາຂາ, ຫ້ອງການຜູ້ຕາງຫນ້າຂອງຫວຽດນາມເກືອບ 600 ແຫ່ງໄດ້ຈົດທະບຽນສ້າງຕັ້ງຢູ່ ກຳປູເຈຍ ແລະ ເຄື່ອນໄຫວໃນຫລາຍຂົງເຂດຄື: ການຄ້າ, ຂຸດຄົ້ນບໍ່ແຮ່, ໄຟຟ້າ, ໂທລະຄົມມະນາຄົມ, ເຕັກໂນໂລຊີຂໍ້ມູນຂ່າວສານ, ປູກຕົ້ນໄມ້ອຸດສາຫະກຳ, ທ່ອງທ່ຽວ, ສາທາລະນະສຸກ, ບໍລິການ, ຂົນສົ່ງ, ທະນາຄານ, ກໍ່ສ້າງ.. ທ່ານ NguonMengTich ໃຫ້ຮູ້ວ່າ:
“ການພົວພັນດ້ານການຄ້າລະຫວ່າງ ຫວຽດນາມ ແລະ ກຳປູເຈຍ ພັດທະນາຢ່າງແຮງ. ປະຈຸບັນ ມີວິສາຫະກິດຂອງກຳປູເຈຍ ຫລາຍແຫ່ງ ໄດ້ຮ່ວມມືດຳເນີນທຸລະກິດກັບບັນດາວິສາຫະກິດ ຫວຽດນາມ ແລະ ມີຫລາຍຫົວຫນ່ວຍພວມເປັນຕົວແທນຜູກຂາດໃຫ້ແກ່ບັນດາບໍລິສັດຂອງຫວຽດນາມ. ນັ້ນແມ່ນການຮ່ວມມືນຳມາເຊິ່ງຜົນປະໂຫຍດດ້ານເສດຖະກິດໃຫ້ແກ່ແຕ່ລະຝ່າຍ.”
ໂຄງການປູກຕົ້ນຢາງພາລາຂອງຫວຽດນາມ ຢູ່ ກຳປູເຈຍ
photo:internet
|
ຄຽງຄູ່ກັບບັນດາຜົນງານດ້ານເສດຖະກິດແລ້ວ, ຂົງເຂດລົງທຶນກໍມີບັນດາບາດກ້າວກະໂດດຂັ້ນ. ປະຈຸບັນ ຫວຽດນາມ ມີປະມານ 130 ໂຄງການລົງທຶນຢູ່ ກຳປູເຈຍ ດ້ວຍແຫລ່ງທຶນກວ່າ 3 ຕື້ USD, ສຸມໃສ່ໃນບັນດາຂົງເຂດຄື: ຢາງພາລາ, ຝຸ່ນເຄມີ, ທະນາຄານ, ການບິນ ແລະ ໂທລະຄົມມະນາຄົມ.. ກຳປູເຈຍ ກາຍເປັນປະເທດຢືນອັນດັບທີ 2 ໃນຈຳນວນ 50 ປະເທດ ແລະ ເຂດແຄ້ວນໄດ້ຮັບເງິນລົງທຶນໂດຍກົງຂອງຫວຽດນາມ.
ເພື່ອສ້າງເງື່ອນໄຂສະດວກທີ່ສຸດໃຫ້ແກ່ບັນດາວິສາຫະກິດຫວຽດນາມ ເຄື່ອນໄຫວຢູ່ ກຳປູເຈຍ, ທ່ານ ຫງວຽນວັນບີງ, ຜູ້ວ່າການທະນາຄານແຫ່ງລັດ ຫວຽດນາມ ຢືນຢັນວ່າ: ຄຽງຄູ່ກັບການແກ້ໄຂກ່ຽວກັບລະບຽບການ, ນະໂຍບາຍ, ທະນາຄານແຫ່ງລັດຫວຽດນາມ ຈະສືບຕໍ່ອອກຫນັງສືອະນຸຍາດໃຫ້ບັນດາທະນາຄານການຄ້າໃຫຍ່ຂອງຫວຽດນາມ ເປີດສາຂາເຄື່ອນໄຫວຢູ່ ກຳປູເຈຍ ເພື່ອຫນູນຊ່ວຍການຊຳລະ ແລະ ສະຫນອງແຫລ່ງທຶນໃຫ້ແກ່ບັນດາວິສາຫະກິດລົງທຶນຢູ່ທີ່ນີ້.
“ສິ່ງທີ່ສະແດງໃຫ້ເຫັນຢ່າງລະອຽດທີ່ສຸດ, ມີຊີວິດຊີວາທີ່ສຸດຂອງທະນາຄານແຫ່ງລັດ ໃນຍຸດທະສາດລົງທຶນຢູ່ ຕະຫລາດກຳປູເຈຍ ນັ້ນແມ່ນຍູ້ແຮງບັນດາອົງການສິນເຊື່ອຫວຽດນາມ ເປີດສາຂາຢູ່ກຳປູເຈຍ. ຕາມແຜນການຂອງພວກຂ້າພະເຈົ້າ, ເຮັດແນວໃດ ເພື່ອໃຫ້ທະນາຄານໃຫຍ່ຂອງຫວຽດນາມ ປະມານ 10 ແຫ່ງ ມີສາຂາຢູ່ ກຳປູເຈຍ.”
ນອກຈາກບັນດາການເຄື່ອນໄຫວຮ່ວມມືສອງຝ່າຍ, ຫວຽດນາມ ແລະ ກຳປູເຈຍ ຍັງພ້ອມກັນເຂົ້າຮ່ວມບັນດາຂອບເຂດຮ່ວມມືພາກພື້ນຄື: ການຮ່ວມມືເຂດສາມຫລ່ຽມພັດທະນາ ຫວຽດນາມ -ລາວ- ກຳປູເຈຍ, ການຮ່ວມມືສົ່ງເສີມດ້ານເສດຖະກິດລະຫວ່າງ 4 ປະເທດ ຊື່ງລວມມີ: ຫວຽດນາມ, ລາວ, ກຳປູເຈຍ ແລະ ມຽນມາ (CLMV), ການຮ່ວມມື ACMECS ຊື່ງລວມມີ 5 ປະເທດ ຄື: ຫວຽດນາມ, ລາວ, ກຳປູເຈຍ, ມຽນມາ ແລະ ໄທ, ການຮ່ວມມືແມ່ຂອງ - ຍີ່ປຸ່ນ, ການຮ່ວມມືອະນຸພາກພື້ນແມ່ນ້ຳຂອງເປີດກວ້າງ, ການຮ່ວມມື ອາຊຽນ. ຜ່ານບັນດາການເຄື່ອນໄຫວຮ່ວມມືນີ້, ການພົວພັນດ້ານເສດຖະກິດ, ການຄ້າສອງຝ່າຍລະຫວ່າງສອງປະເທດ ນັບມື້ນັບໄດ້ຮັບການປັບປຸງ ແລະ ເພີ່ມທະວີ ເພື່ອຜົນປະໂຫຍດຂອງປະຊາຊົນແຕ່ລະປະເທດ, ເພື່ອຄວາມວັດທະນາຖາວອນຂອງແຕ່ລະປະເທດກໍຄືເພື່ອສັນຕິພາບ ແລະ ສະຖຽນລະພາບໃນພາກພື້ນ.
ບັນດາຜົນງານກ່ຽວກັບການຮ່ວມມືດ້ານເສດຖະກິດ ແລະ ການຄ້າ ຈະປະກອບສ່ວນເພີ່ມພູນຄູນສ້າງໃຫ້ແກ່ສາຍພົວພັນອັນດີງາມລະຫວ່າງ ຫວຽດນາມ ແລະ ກຳປູເຈຍ ສືບຕໍ່ພັດທະນາຕາມທິດນຳທີ່ວ່າ:ບ້ານໃກ້ເຮືອນຄຽງອັນດີງາມ, ມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງຍາວນານ”, ປະກອບສ່ວນເຂົ້າໃນການພັດທະນາ ແລະ ຈະເລີນຮຸ່ງເຮືອງຂອງແຕ່ລະປະເທດ, ນຳສອງປະເທດ ພ້ອມກັບບັນດາປະເທດ ອາຊຽນ ສ້າງປະຊາຄົມເສດຖະກິດ ອາຊຽນ ໃນປີ 2015 ຄືດັ່ງຄາດໝາຍທີ່ໄດ້ວາງອອກ.