(vovworld)-ເພື່ອຫລຸດຜ່ອນມົນລະພິດສິ່ງແວດລ້ອມ, ລັດຖະບານ ຟິລີບປີນ ຫາກໍ່ປະກາດໂຄງການຄົມມະນາຄົມ, ຕາມນັ້ນແລ້ວ ຈະໃຊ້ລົດໂອໂຕແລ່ນດ້ວຍໄຟຟ້າແທນໃຫ້ບັນດາລົດ Jeep ໃຊ້ພະລັງກາຊວນ . ໂຄງການນີ້ພວມໄດ້ຮັບການສະໜັບສະໜູນຈາກບັນດານັກເຄື່ອນໄຫວໃນຂົງເຂດສິ່ງແວດລ້ອມ, ຜູ້ຂັບລົດ ແລະ ຊາວ ຟິລິບປີນເປັນຈຳນວນຫລວງຫລາຍ.
ລົດJeepໃຊ້ພະລັງກາຊວນເປັນພາຫະນະຂົນສົ່ງສາທາລະນະທົ່ວໄປ
photo:dulich.vn
|
ລົດ Jeep ໃຊ້ພະລັງກາຊວນ ທີ່ເປັນພາຫະນະຂົນສົ່ງສາທາລະນະທົ່ວໄປດ້ວຍລາຄາຖືກ ຢູ່ ຟິລິບປີນ ຈະຖືກແທນດ້ວຍລົດໂອໂຕໃຊ້ພະລັງໄຟຟ້າ. ນີ້ແມ່ນຫນຶ່ງໃນບັນດາຄວາມມານະພະຍາຍາມຂອງລັດຖະບານ ຟິລິບປີນ ເພື່ອຫລຸດຜ່ອນສະພາບມົນລະພິດສິ່ງແວດລ້ອມ. ທ່ານ Sigfrido Tinga, ປະທານສະພາບໍລິຫານບໍລິສັດຂົນສົ່ງດ້ວຍລົດໂອໂຕໃຊ້ພະລັງໄຟຟ້າທົ່ວໂລກ, ຊື່ງແມ່ນບໍລິສັດສະຫນອງລົດໂອໂຕໃຊ້ພະລັງໄຟຟ້າໃຫ້ຮູ້ວ່າ:
“85% ມົນລະພິດຢູ່ນະຄອນຫລວງ Metro Manila ໂດຍພາຫະນະຂົນສົ່ງຄື ລົດ Jeep ກໍ່ຂຶ້ນ. ສະນັ້ນ ເພື່ອນຳລົດໂອໂຕໃຊ້ພະລັງໄຟຟ້າແທນໃຫ້ລົດ Jeep ແມ່ນສິ່ງທີ່ມີຄວາມໝາຍທີ່ສຸດ. ພາຫະນະຂົນສົ່ງໃຊ້ພະລັງໄຟຟ້າ ມີລາຍຈ່າຍເບື້ອງຕົ້ນແພງກວ່າ ແຕ່ລາຍຈ່າຍໃນການເຄື່ອນໄຫວຖືກກວ່າ. ສະນັ້ນ ການໃຊ້ລົດປະເພດນີ້ໃນການຂົນສົ່ງສາທາລະນະແມ່ນດີກວ່າ.”
ຕາມແຜນການ, ໃນ 5 ປີຈະມາເຖິງ ຈະນຳເອົາລົດໂອໂຕໃຊ້ພະລັງໄຟຟ້າປະມານ 20.000 ຄັນ ແທນໃຫ້ລົດ Jeep 55.000 ໃຊ້ພະລັງກາຊວນ. ນອກຈາກນຳໃຊ້ພະລັງໄຟຟ້າແລ້ວ, ລົດປະເພດນີ້ ຍັງໄດ້ຮັບການອອກແບບສະເພາະໃຫ້ເໝາະສົມກັບເງື່ອນໄຂການຄົມມະນາຄົມຢູ່ ຟິລີບປີນ ອີກ. ທ່ານ Renato Constantino, ຜູ້ອຳນວຍການບໍລິຫານສະຖາບັນສິ່ງແວດລ້ອມ ແລະ ນະຄອນແບບຍືນຍົງໃຫ້ຮູ້ວ່າ: ບັນດາລົດໂອໂຕໃຊ້ພະລັງໄຟຟ້າ ຈະປະກອບສ່ວນຫລຸດຜ່ອນສະພາບມົນລະພິດອາຍແກສ Cacbon dioxide ແລະ nitrogen oxide.
“ພວກເຮົາບໍ່ເຫັນໄດ້ອາຍແກສເປັນພິດນີ້ ແຕ່ພວກເຮົາພວມສູບມັນເຂົ້າ. ສະພາບມົນລະພິດຢູ່ແຕ່ລະຖະຫນົນ, ແຕ່ລະທ້ອງຖິ່ນ ພວມກໍ່ໃຫ້ເກີດສະພາບປ່ຽນແປງດິນຟ້າອາກາດໃນທົ່ວໂລກ. ອາຍແກສ Carbon dioxide ແມ່ນຫນຶ່ງໃນບັນດາສາຍເຫດພາໃຫ້ຫນ່ວຍໂລກອຸ່ນຂຶ້ນ.”
ໂຄງການນີ້ຂອງລັດຖະບານ ຟິລີບປີນ ໄດ້ຮັບການຊົມເຊີຍຈາກບັນດາບໍລິສັດຂົນສົ່ງ ແລະ ຜູ້ຂັບລົດ. ເພາະວ່າ ບັນດາລົດໂອໂຕໃຊ້ພະລັງໄຟຟ້າ ໄດ້ຊ່ວຍຫລຸດຜ່ອນລາຍຈ່າຍໃນສະພາບລາຄານ້ຳມັນກາຊວນນັບມື້ນັບເພີ່ມຂຶ້ນໃນປະຈຸບັນ. ທ່ານ Roberto Martin, ປະທານສະພາບໍລິຫານກຸ່ມບໍລິສັດຂົນສົ່ງ Pasang Masda ໃຫ້ຮູ້ວ່າ:
“ລາຍຮັບຂອງຜູ້ຂັບລົດແມ່ນອີງໃສ່ລາຄານຳ້ມັນກາຊວນ. ສະນັ້ນການໃຊ້ລົດໂອໂຕແລ່ນດ້ວຍພະລັງໄຟຟ້າແມ່ນມາດຕະການທີ່ດີໃນປະຈຸບັນ. ເມື່ອນຳລົດແບບນີ້ເຂົ້າໃຊ້ການ ຈະປະຢັດລາຍຈ່າຍໄດ້ 50% ເມື່ອທຽບໃສ່ການນຳໃຊ້ ກາຊວນ ແລະ ບໍ່ກໍ່ມົນລະພິດເຖິງສິ່ງແວດລ້ອມອີກ.”
ການນຳເອົາລົດໂອໂຕໃຊ້ພະລັງໄຟຟ້າເປັນພາຫະນະຂົນສົ່ງ ແທນໃຫ້ລົດ Jeep ໃຊ້ພະລັງກາຊວນ ແມ່ນຂໍ້ຕົກລົງທີ່ໄດ້ຮັບການຊົມເຊີຍບໍ່ພຽງແຕ່ສຳລັບຊາວ ຟີລີບປີນ ເທົ່ານັ້ນ ຫາກນັບທັງນັກເຄື່ອນໄຫວໃນຂົງເຂດສິ່ງແວດລ້ອມທົ່ວໂລກອີກດ້ຍ. ເພື່ອຫລຸດຜ່ອນການຂຶ້ນກັບພະລັງໄຟຟ້າ, ຄາດວ່າຮອດປີ 2017 ຈະມີບັນດາລົດໂອໂຕໃຊ້ພະລັງແສງຕະເວັນແລ່ນຕາມຖະຫນົນສາຍຕ່າງໆຢູ່ ຟິລີບປີນ.