(vovworld)- ໃນສະພາບການດິນຟ້າອາກາດພວມຜັນແປໄປຢ່າງສັບສົນ, ອຳນາດການປົກຄອງ ແລະ ປະຊາຊົນຂອງແຕ່ລະປະເທດສະມາຊິກ ອາຊຽນ ພວມມານະພະຍາຍາມຊອກຫາ ແລະ ປະຕິບັດບັນດາມາດຕະການປົກປັກຮັກສາສິ່ງແວດລ້ອມ. ຄະນະນັກຂ່າວວິທະຍຸກະຈາຍສຽງຫວຽດນາມ ໄດ້ມີໂອກາດໄປທັດສະນະສຶກສາຢູ່ແຂວງ ຈັນທະບູຣີ ພາກຕາເວັນອອກຂອງໄທ ເພື່ອຊອກຫາມາດຕະການຮັກສານ້ຳໃຫ້ຕົ້ນໄມ້ຂອງຊາວທ້ອງຖິ່ນດ້ວຍວິທີເກັບຮັກສາໃບໄມ້ແຫ້ງ, ຂຸດເໝືອງຫລືກໍ່ສ້າງລະບົບຫົດນ້ຳ. ນີ້ແມ່ນສ່ວນຫນຶ່ງໃນໂຄງການອະນຸລັກຮັກສາແຫລ່ງນ້ຳ ຊື່ງອຳນາດການປົກຄອງ ແລະ ປະຊາຊົນຢູ່ທີ່ນີ້ພວມປະຕິບັດ ດ້ວຍຊື່ເອີ້ນວ່າ “ຮັກສານ້ຳໃຫ້ທີ່ດິນ”.
ລຸງ ພິສິດພະສົມ ເຈົ້າຂອງສວນປູກຕົ້ນໄມ້ກິນໝາກໃນເນື້ອທີ່ກວ່າ 50 ເຮັກຕາ ທັງເກັບໃບໄມ້ແຫ້ງ ທັງອະທິບາຍໃຫ້ພວກຂ້າພະເຈົ້າຮູ້ກ່ຽວກັບວຽກງານນີ້ວ່າ: ໃບໄມ້ແຫ້ງມີຄຸນປະໂຫຍດປົກຄຸມ ແລະ ຮັກສາຄວາມຊຸ່ມໃຫ້ທີ່ດິນ ແລະ ພວກຂ້າພະເຈົ້າພຽງແຕ່ເກັບໃບໄມ້ແຫ້ງເມື່ອຕົ້ນໄມ້ໃນສວນເຕີບໂຕແລ້ວ. ນີ້ແມ່ນມາດຕະການຊຶ່ງຜູ້ເຮັດສວນຢູ່ ຈັນທະບູຣີ ພວມປະຕິບັດແທນທີ່ມາດຕະການທຳມະດາແມ່ນຫົດນ້ຳປະຈຳເພື່ອຮັກສານ້ຳໃຫ້ຕົ້ນໄມ້. ແລະ ສິ່ງດັ່ງກ່າວໄດ້ອະທິບາຍ ໃຫ້ຂໍ້ຂ້ອງໃຈຂອງພວກຂ້າພະເຈົ້າເມື່ອເຫັນວ່າບັນດາເຂດສວນຢູ່ ຈັນທະບູຣີ ລ້ວນແຕ່ມີໃບໄມ້ແຫ້ງປົກຫນ້າດິນຢ່າງຫຼວງຫຼາຍ.
ນ້ຳຕົກຕາດພະຣີວ
ພາບ:tourdulichthailan.net.vn
|
“ຮັກສານ້ຳໃຫ້ທີ່ດິນ” ແມ່ນໂຄງການນອນໃນລາຍການຫນູນຊ່ວຍຂອງລັດຖະບານ ແລະ ລາຊະວົງໄທ ທີ່ໄດ້ສ້າງຂຶ້ນເມື່ອປີ 1996 ໃນສະພາບການ ຢູ່ແຂວງ ຈັນທະບູຣີ ເວົ້າສະເພາະ ແລະ ຫລາຍແຂວງ, ນະຄອນອື່ນໆຢູ່ໄທເວົ້າລວມ ເຄີຍຕົກຢູ່ໃນສະພາບຂາດນ້ຳຢ່າງຫນັກຫນ່ວງໃນລະດູແລ້ງ. ທ່ານ ພັດສະພົງ ຈີນນຸດົມພົງສາ ຜູ້ອຳນວຍການໂຄງການ “ຮັກສານ້ຳໃຫ້ທີ່ດິນ” ໃຫ້ຮູ້ວ່າ: ໃນວິວັດການປະຕິບັດໂຄງການ, ພວກຂ້າພະເຈົ້າມີຄວາມເອົາໃຈໃສ່ເຖິງການໂຄສະນາຜ່ານການພົບປະສົນທະນາ, ກອງປະຊຸມສຳມະນາ ເພື່ອຍົກສູງຄວາມຮັບຮູ້ກໍຄືສະຕິວົງຄະນາຍາດໃຫ້ແກ່ປະຊາຊົນ, ເປັນຕົ້ນແມ່ນລຸ້ນຫນຸ່ມໃນການປົກປັກຮັກສາສິ່ງແວດລ້ອມ ແລະ ປູກຕົ້ນໄມ້.
ສຽງທ່ານພັດສະພົງ
ຈຸດເດັ່ນຂອງໂຄງການແມ່ນປູກໄມ້ປ່າສະຫລັບສັບຊ້ອນກັບຕົ້ນໄມ້ກິນໝາກ. ວຽກງານນີ້ຈະມີຜົນປະໂຫຍດຢ່າງຫນ້ອຍສຸດ 2 ຢ່າງ. ທີຫນຶ່ງ ເມື່ອໄມ້ປ່າໄດ້ເຕີບໃຫຍ່ແລ້ວ,ຮາກຂອງມັນຈະຮັກສານ້ຳເຮັດໃຫ້ທີ່ດິນຍາມໃດກໍມີຄວາມຊຸ່ມ, ຊ່ວຍໃຫ້ຕົ້ນໄມ້ກິນໝາກພັດທະນາ. ທີສອງ ປູກປ່າເອົາໄມ້ ນຳມາເຊິ່ງຄຸນຄ່າດ້ານເສດຖະກິດ. ໃນເບື້ອງຕົ້ນ ປະຊາຊົນຍັງສົງໃສກ່ຽວກັບຜົນສະທ້ອນຂອງໄມ້ປ່າເຖິງການພັດທະນາ ແລະ ປະສິດທິພາບຂອງຕົ້ນໄມ້ກິນໝາກ. ແຕ່ພາຍຫລັງປູກທົດລອງໃນໄລຍະຫນຶ່ງ, ເຂົາເຈົ້ດກໍ່ຊອກໄດ້ຄຳຕອບ. ທ່ານ ພິສິດ ພະສົມ, ເຈົ້າຂອງສວນຕົ້ນໄມ້ ໃຫ້ຮູ້ວ່າ:
ສຽງທ່ານພິສິດ
ໃນຫລາຍປີຜ່ານມາ, ໂຄງການດັ່ງກ່າວໄດ້ພິສູດໃຫ້ເຫັນປະສິດທິຜົນຢ່າງຈະແຈ້ງ, ຈຳນວນຜູ້ເຂົ້າຮ່ວມນັບມື້ນັບຫລາຍ, ປະລິມານນ້ຳທີ່ນຳໃຊ້ໃຫ້ແກ່ການຫົດນ້ຳໄດ້ຫລຸດລົງ 50%. ທາດເຄມີໃຊ້ໃນການປ້ອງກັນ ແລະ ປາບສັດຕູພືດໃຫ້ແກ່ຕົ້ນໄມ້ກໍ່ຫຼຸດລົງ, ປະກອບສ່ວນຫລຸດຜ່ອນລາຄາຜະລິດ, ເພີ່ມຄຸນນະພາບຜະລິດຕະພັນ ແລະ ມີຜົນປະໂຫຍດໃຫ້ແກ່ສຸຂະພາບຂອງຜູ້ອຸປະໂພກບໍລິໂພກ. ທ່ານພັດສະພົງ ຈີນນຸດົມພົງສາ ຖືວ່າ: ໂຄງການ “ຮັກສານ້ຳໃຫ້ທີ່ດິນ” ຄວນທະວີຄູນອອກສູ່ແຂວງອື່ນ:
ສຽງທ່ານພັດສະພົງ
ມາຢ້ຽມຢາມແຂວງ ຈັນທະບູຣີ ພວກຂ້າພະເຈົ້າຈື່ງມີຄວາມເຂົ້າໃຈຕື່ມອີກກ່ຽວກັບວິທີບົວລະບັດຕົ້ນໄມ້ຂອງຊາວທ້ອງຖິ່ນຢູ່ທີ່ນີ້ ນັ້ນແມ່ນນຳໃຊ້ເຫລົ້າປົນກັບຢາສູບແລ້ວສີດໃສ່ຕົ້ນໄມ້ເພື່ອຫລິກລ້ຽງສັດຕູພືດ. ບໍ່ຮູ້ວ່າ ວິທີພື້ນເມືອງນີ້ມີພື້ນຖານດ້ານວິທະຍາສາດຄືແນວໃດ ແຕ່ເຂົາເຈົ້າໄດ້ໝູນໃຊ້ມາແຕ່ດົນນານແລ້ວ ທັງຮັບປະກັນຄຸນນະພາບ, ປະລິມານການຜະລິດ ທັງປົກປັກຮັກສາສິ່ງແວດລ້ອມ. ການຮັກສາແຫລ່ງນ້ຳ, ສິ່ງແວດລ້ອມຂອງແຫລ່ງນ້ຳແມ່ນເພື່ອປົກປັກຮັກສາສີຂຽວໃຫ້ແກ່ຕົ້ນໄມ້ກິນໝາກ. ມາຢ້ຽມຢາມແຫ່ງນີ້ພວກຂ້າພະເຈົ້າຈຶ່ງເຂົ້າໃຈໄດ້ວ່າ ເປັນຫຍັງ ແຂວງ ຈັນທະບູຣີ ໄດ້ຮັບການຂະຫນານນາມວ່າແມ່ນນະຄອນຂອງໝາກໄມ້.