(vovworld)- ສາຍທ່ອງທ່ຽວໃຫມ່ແມ່ນ ເລີ່ມຕົ້ນຈາກແຂວງ ພະເຍົາຂອງ ໄທ ເຖິງ ເມືອງຂວາ ຂອງລາວ ເຂົ້າດ້ຽນບຽນຝູ ຂອງຫວຽດນາມ ແລະ ໄປຍັງ ແຂວງ ຫນານຫນີງຂອງຈີນ ຈະໄດ້ສ້າງຂຶ້ນໃນ 2 ປີຈະມາເຖິງ ເພື່ອດຶງດູດນັກທ່ອງທ່ຽວມາຢ້ຽມຢາມບັນດາແຂວງເຫຼົ້ານີ້ໃຫ້ຫລາຍກວ່າອີກ. ນັ້ນແມ່ນຄຳຢືນຢັນຂອງທ່ານ ມານົບ ຫາຣື ປະທານ ສະຫະສະມາຄົມການຄ້າ, ດຳເນີນທຸລະກິດ ແລະ ການທ່ອງທ່ຽວ ແຂວງ ພະເຍົາ ໃນການມາຢ້ຽມຢາມຫວຽດນາມ ລະຫວ່າງເດືອນ 10 ຜ່ານມາ ເພື່ອສຳຫລວດສາຍທາງນີ້.
ຄະນະສຳຫລວດຂອງໄທ
|
ພະເຍົາ ແມ່ນແຂວງຫນຶ່ງໃນພາກອີສານຂອງໄທ ທີ່ຕິດກັບບັນດາແຂວງ ໄຊຍະບູລີ ຂອງລາວ. ຕາມທ່ານ ມານົບ ຫາຣື, ປະທານ ສະຫະສະມາຄົມການຄ້າ, ດຳເນີນທຸລະກິດ ແລະ ການທ່ອງທ່ຽວ ພະເຍົາ ແລ້ວ, ພະເຢົາແມ່ນແຂວງຫນຶ່ງທີ່ເຕັມໄປດ້ວຍຄວາມສາມາດບົ່ມຊ້ອນດ້ານການທ່ອງທ່ຽວແຕ່ບໍ່ທັນໄດ້ຮັບການຂຸດຄົ້ນເທື່ອ.
ສຽງທ່ານ ມານົບ
ເພື່ອພັດທະນາຄວາມສາມາດບົ່ມຊ້ອນດ້ານການທ່ອງທ່ຽວນີ້, ເດືອນ 10 ຜ່ານມາ, ຄະນະສຳຫລວດ ຂອງສະຫະສະມາຄົມ ການຄ້າ, ດຳເນີນທຸລະກິດ ແລະ ການທ່ອງທ່ຽວ ແຂວງ ພະເຍົາ ໄດ້ເດີນທາງມາ ຫວຽດນາມ ເພື່ອສຳຫລວດໂຄງການເປີດສາຍທ່ອງທ່ຽວໃຫມ່ນີ້ ແນໃສ່ຍາດແຍ່ງຄວາມສາມາດບົ່ມຊ້ອນດ້ານທ່ອງທ່ຽວທີ່ມີຢູ່ແລ້ວຂອງແຕ່ລະປະເທດ. ທ່ານ ທຳມະພູນ ສີສະກຸນ, ເລຂາສະຫະສະມາຄົມ ການຄ້າ, ດຳເນີນທຸລະກິດ ແລະ ການທ່ອງທ່ຽວແຂວງ ພະເຍົາ ໃຫ້ຮູ້ວ່າ:
ສຽງທ່ານ ທຳມະພູນ
ຕາມແຜນການແລ້ວ, ນັກທ່ອງທ່ຽວ ຈາກ ພະເຍົາ -ໄທ ຈະໄປຍັງລາວ ຜ່ານດ່ານຊາຍແດນ ບ້ານຮວກ ເຂົ້າເມືອງຂວາ ຂອງລາວ. ນີ້ແມ່ນແຂວງຫນຶ່ງຕັ້ງຢູ່ທາງທິດໃຕ້ແຂວງ ຜົ້ງສາລີ ແລະ ຕິດກັບແຂວງ ດຽ້ນບຽນ ຂອງຫວຽດນາມ. ຢູ່ ເມືອງຂວາ ນັກທ່ອງທ່ຽວສາມາດໄປຢ້ຽມຢາມ ບ້ານປາກນ້ຳນ້ອຍ ແລະ ປ່າສະຫງວນແຫ່ງຊາດ ພູສະຫງ່າ ເປັນເຂດທີ່ອຸດົມສົມບູນໄປດ້ວຍທຳມະຊາດ, ສັດນ້ຳ, ສັດບົກ ແລະ ພືດພັນນາໆຊະນິດ. ເໝາະສົມໃຫ້ຜູ້ນິຍົມການຄົ້ນຫາ ທາງດ້ານຊີວະນາໆພັນ ແລະ ການທ່ອງທ່ຽວແບບອະນຸລັກ.
ດ້ຽນບຽນຝູ ແລະ ຊາປາ ຊື່ງທ່ານ ທຳມະພູນ ສີສະກຸນ ເວົ້າເຖິງ ແມ່ນບັນດາສະຖານທີ່ທ່ອງທ່ຽວດູດດື່ມ ຢູ່ ເຂດພູດອຍທາງພາກເຫນືອຂອງຫວຽດນາມ. ນະຄອນ ດ້ຽນບຽນຝູ ຂຶ້ນກັບແຂວງ ດ້ຽນບຽນ ລວມມີສະຖານທີ່ທ່ອງທ່ຽວຫລາຍແຫ່ງຄື: ທົ່ງນາ ເມື່ອງແທງ, ກີ່ວ ພາດີນ, ຖ້ຳ ປາເທີມ ແລະ ຕະຫລາດນັດເຂດພູສູງ ຕ໋າຝີນທ່າງ. ຖ້າຫາກນັກທ່ອງທ່ຽວຜູ້ໃດນິຍົມການໄປຄົ້ນຫາ ແນ່ນອນວ່າ ຈອມພູ ຟານຊີຟັງ ຢູ່ເທດສະບານ ຊາປາ ຂຶ້ນກັບແຂວງ ລາວກາຍ ແມ່ນສະຖານທີ່ຂາດບໍ່ໄດ້ໃນລາຍການທ່ອງທ່ຽວຂອງເຂົາເຈົ້າ. ນອກນັ້ນ ຄວາມງາມຂອງນາຂັ້ນໄດ, ນ້ຳຕົກຕາດ ທາກບາດ ແລະ ຖ້ຳທີ່ສວຍງາມຫລາຍແຫ່ງ ກໍແມ່ນສິ່ງທີ່ດຶງດູດນັກທ່ອງທ່ຽວມາຢ້ຽມຢາມຊາປາຫລາຍສົມຄວນ.
ຊາປາຢູ່ ຫວຽດນາມ
|
ສະຖານທີ່ທ່ອງທ່ຽວສຸດທ້າຍໃນສາຍທ່ອງທ່ຽວໃຫມ່ດັ່ງກ່າວ ນັ້ນແມ່ນ ນະຄອນ ຫນານຫນິງ ຂອງຈີນ ຊື່ງແມ່ນສະຖານທີ່ດຶງດູດນັກທ່ອງທ່ຽວ ດ້ວຍລະບົບສູນການຄ້າທີ່ໃຫຍ່ໂຕ ດ້ວຍສິນຄ້າຫລາຍປະເພດ ແລະ ອຸດົມສົມບູນ.
ເມື່ອເວົ້າເຖິງຕະຫລາດທ່ອງທ່ຽວ ຫວຽດນາມ, ດຣ ປະກອບສີຣີ ປັກດີພິນີດ ສະມາຊິກໃນຄະນະສຳຫລວດຂອງໄທໃຫ້ຮູ້ວ່າ: ທ່ານນາງ ຫາກໍປຶກສາຫາລືແຜນການເປີດສາຍທ່ອງທ່ຽວນີ້ ກັບບໍລິສັດທ່ອງທ່ຽວ Travel Agency ຂອງຫວຽດນາມ.
ສຽງທ່ານນາງ ປັກດີພີນີດ
ເສັ້ນທາງໄປມາສະດວກສະບາຍ, ພ້ອມກັບການສ້າງປະຊາຄົມເສດຖະກິດອາຊຽນ (AEC) ສຳເລັດໃນໄລຍະຈະມາເຖິງ ຈະເປັນການອຳນວຍຄວາມສະດວກໃນການໄປມາລະຫວ່າງບັນດາປະເທດໃນພາກພື້ນ. ນັກທ່ອງທ່ຽວຂອງບັນດາປະເທດພາຍໃນພາກພື້ນ ສາມາດພ້ອມກັນໄປທ່ອງທ່ຽວໃນລາຍການທ່ອງທ່ຽວດຽວ ຫລື ສາມາດໄປທ່ອງທ່ຽວເຊື່ອມຕໍ່ບັນດາປະເທດ ອາຊຽນ. ອະທິບາຍກ່ຽວກັບສິ່ງນີ້, ດຣ ປະກອບສີຣີ ປັກດີພິນີດ ໃຫ້ຮູ້ວ່າ:
ສຽງທ່ານນາງ ປະກອບສີຣີ
ດ້ວຍບັນດາສະຖານທີ່ທ່ອງທ່ຽວທີ່ເຕັມໄປດ້ວຍຄວາມສາມາດບົ່ມຊ້ອນນີ້, ພວກເຮົາ ເຊື່ອໝັ້ນວ່າ ໃນໄລຍະ 2 ປີຈະມາເຖິງ, ເມື່ອດ່ານຊາຍແດນ ບ້ານຮວກ ໄດ້ຮັບການຍົກລະດັບເປັນດ່ານຊາຍແດນສາກົນ, ຈຳນວນແຂກທ່ອງທ່ຽວຜ່ານເສັ້ນທາງນີ້ ແນ່ນອນວ່າ ຈະເພີ່ມຂຶ້ນສູງ, ປະກອບສ່ວນພັດທະນາຂະແຫນງທ່ອງທ່ຽວຂອງ 4 ປະເທດ ໄທ, ລາວ, ຫວຽດນາມ ແລະ ຈີນ.