(vovworld) - ກຳປູເຈຍ ແມ່ນເຂດດິນແດນທີ່ສ້າງຄວາມດູດດື່ມສຳລັບນັກທ່ອງທ່ຽວຜູ້ທີ່ມັກໄປຄົ້ນຫາສິ່ງມະຫັດສະຈັນຂອງມວນມະນຸດ ດ້ວຍທັດສະນີຍະພາບທີ່ລືຊື່ຫລາຍແຫ່ງຄື: ອັງກໍວັດ, ອັງກໍທົມ.... ກຳປູເຈຍ ບໍ່ພຽງແຕ່ມີ ອັງກໍວັດ ເທົ່ານັ້ນ ຫາກຍັງມີສະຖານທີ່ຫລາຍແຫ່ງດຶງດູດນັກທ່ອງທ່ຽວເປັນຈຳນວນຫລວງຫລາຍ, ໃນນັ້ນເຂດພູພຽງ Bokor ພວມໄດ້ຮັບຄວາມສົນໃຈຈາກນັກທ່ອງທ່ຽວ, ເປັນຕົ້ນແມ່ນນັກທ່ອງທ່ຽວຢາກຄົ້ນຫາ, ພັກຜ່ອນບຳລຸງສຸຂະພາບ.
ພູ Bokor ຕັ້ງຢູ່ແຂວງ Kampot ຖ້າເດີນທາງດ້ວຍລົດໂອໂຕ ຈາກນະຄອນຫລວງ ພະນົມເປັນໄປ ພູ Bokor ຕ້ອງເສຍເວລາປະມານ 2 ຊ່ົວໂມງ. ຈອມພູສູງສຸດແມ່ນ Phnom Bokor ມີຄວາມສູງ 1.081 ແມັດ. ສວນສາທາລະນະແຫ່ງຊາດ Bokor(Preah Monivong Nation Park) ຕັ້ງຢູ່ເທິງພູ Bokor ໄດ້ຮັບການສ້າງຕັ້ງຂຶ້ນຕາມດຳລັດຂອງມະຫາກະສັດກຳປູເຈຍ ໂນໂຣດົມ ສີຫານຸ ເມື່ອປີ 1993. ສວນສາທາລະນະແຫ່ງນີ້ມີເນື້ອທີ່ 1580 ຕາລາງກິໂລແມັດ ແມ່ນບ່ອນຢູ່ອາໄສຂອງສັດສາວາສິ່ງທີ່ຫາຍາກຫລາຍຊະນິດ. ນີ້ແມ່ນຫນຶ່ງໃນຈຳນວນ 23 ແຫ່ງທີ່ໄດ້ຮັບການອະນຸລັກຮັກສາຢູ່ ກຳປູເຈຍ. ປີ 1971 ຝລັ່ງ ໄດ້ກໍ່ສ້າງເຂດພັກຜ່ອນບຳລຸງສຸຂະພາບປະສົມແຫ່ງຫນຶ່ງຢູ່ພູ Bokor, ຊຶ່ງລວມມີ: ໂຮງຮຽນ, ໄປສະນີ, ໂບດ, ສູນການພະນັນ (Casino) ແລະ ໂຮງແຮມທັນສະໄຫມຮັບໃຊ້ເຈົ້າຂຸນມຸນນາຍຊາວຝລັ່ງທີ່ຢາກຫລີກລ້ຽງອາກາດຮ້ອນເອົ້າຢູ່ນະຄອນຫລວງ ພະນົມເປັນ. ນີ້ແມ່ນໄລຍະຈະເລີນຮຸ່ງເຮືອງຂອງ Bokor ກ່ອນທີ່ແຫ່ງນີ້ຈະກາຍເປັນເຂດເປົ່າຫວ່າງໃນເວລາຫລາຍປີ. ໃນທົດສະວັດທີ່ 90, Bokor ໄດ້ຮັບຖືວ່າແມ່ນສິ່ງແປກປະຫລາດກວ່າໝູ່ຢູ່ໃນໂລກ ຍ້ອນຄວາມຮົກເຮື້ອເປົ່າວ່າງ ແລະ ຄວາມເລິກລັບ. ສະຖານທີ່ແຫ່ງນີ້ເຄີຍໄດ້ຮັບເລືອກເຟັ້ນແມ່ນສະຖານທີ່ເພື່ອຖ່າຍທຳຟີມ City of ghost (ເມືອງຜີ) ແລະ ຟິມ(R point).
ອາຄານເກົ່າຢູ່ Bokor
ພາບ:internet
|
ຢູ່ສວນສາທາລະນະແຫ່ງຊາດ ພູ Bokor ມີເຂດທີ່ດຶງດູດນັກທ່ອງທ່ຽວມາຢ້ຽມຢາມຫລາຍສຸດ ແມ່ນ Bokor Hill Station, ຊຶ່ງແມ່ນສະຖານທີ່ຫນຶ່ງດຽວຍັງຮັກສາຮ່ອງຮອຍແຫ່ງໄລຍະຈະເລີນຮຸ່ງເຮືອງຂອງ Bokor ໄວ້. ອ້າຍ ເລຟານຢີ ນັກທ່ອງທ່ຽວມາຈາກ ຫວຽດນາມ ມີຄວາມຮູ້ສຶກແປກປະຫລາດໃຈເມື່ອມາຢ້ຽມຢາມ ແຫ່ງນີ້:
“ພວກຂ້າພະເຈົ້າໄດ້ເຂົ້າຮ່ວມລາຍການທ່ອງທ່ຽວຢ້ຽມຢາມເຂດພູພຽງ Bokor. ນີ້ແມ່ນລາຍການທ່ອງທ່ຽວທີ່ສ້າງຄວາມປະທັບໃຈທີ່ສຸດ. ເຂດພູພຽງ Bokor ມີສັດສາວາສິ່ງທີ່ອຸດົມສົມບູນ ແລະ ອາກາດຢູ່ທີ່ນີ້ກໍເຢັນສະບາຍຫລາຍ. ຢູ່ທີ່ນີ້ຍັງມີບັນດາປູຊະນີຍະສະຖານໄດ້ຮັບການກໍ່ສ້າງໃນສະໄຫມຝລ່ັງຄື: ໂບດ, ໂຮງຮຽນ, ໄປສະນີ. ສ່ວນເຂດພັກຜ່ອນບຳລຸງສຸຂະພາບລວມສູນ ແມ່ນຫາກໍ່ໄດ້ຮັບການກໍ່ສ້າງໃຫມ່ ແລະ ທັນສະໄຫມທີ່ສຸດ.”
ໄລຍະຜ່ານມາ, ໃນຂອບເຂດລາຍງານພົບປະແລກປ່ຽນດ້ານວັດທະນະທຳລະຫວ່າງສອງປະເທດ ຫວຽດນາມ ແລະ ກຳປູເຈຍ, ກະຊວງທ່ອງທ່ຽວ ກຳປູເຈຍ ໄດ້ແນະນຳສະຖານທີ່ທ່ອງທ່ຽວທີ່ລືຊື່ຢູ່ ກຳປູເຈຍ ໃນປີ 2012 ນັ້ນແມ່ນ: Thansur Bokor, ເຊິ່ງເຂດພັກຜ່ອນບຳລຸງສຸຂະພາບລວມສູນ ແລະ ເຂດພັກຜ່ອນຢ່ອນອາລົມຢູ່ພູພຽງແຫ່ງຫນຶ່ງດຽວໃນອະນຸພາກພື້ນແມ່ນ້ຳຂອງ ທ່ີຂຶ້ນກັບສວນສາທາລະນະແຫ່ງຊາດພູ Bokor. Thansur Bokor ແມ່ນເຂດພັກຜ່ອນບຳລຸງສຸຂະພາບລວມສູນ ທີ່ໄດ້ຮັບການກໍ່ສ້າງຕາມແບບ ຂະແມທັນສະໄຫມ, ຕັ້ງຢູ່ເຂດພູພຽງ Bokor ແຫ່ງປະຫວັດສາດ. ເຂດພັກຜ່ອນແຫ່ງນີ້ ມີເນື້ອທີ່ກວ່າ 60.000 ຕາລາງແມັດ, ຕັ້ງຢູ່ໃນລະດັບຄວາມສູງ 1080 ແມັດເມື່ອທຽບກັບລະດັບໜ້ານ້ຳທະເລ, ດ້ວຍຫ້ອງພັກກວ່າ 412 ຫ້ອງ ທີ່ບັນລຸມາດຕະຖານ. ຄຽງຂ້າງບັນດາອາຄານທີ່ຫາກໍ່ໄດ້ຮັບການກໍ່ສ້າງໃຫມ່, ເລ່ືອງປູກປ່າໄມ້ຄືນໃຫມ່, ປູກຕົ້ນໄມ້ຂຽວ 2 ລ້ານກວ່າຕົ້ນ, ກໍ່ສ້າງບັນດາອ່າງເກັບນ້ຳຄືນໃຫມ່ ແລະ ການອະນຸລັກຮັກສາປະຕິສັງຂອນບັນດາປູຊະນີຍະສະຖານຢູ່ເທິງພູຄື: ສູນການພະນັນເກົ່າຂອງຝລ່ັງ, ໂບດ ແລະ ວັດວາອາຮາມໃນສະໄຫມກະສັດ Monivong, ການອະນຸລັກສັດສາວາສິ່ງທຸກຊະນິດຢູ່ເທິງພູພວມໄດ້ຮັບການຜັນຂະຫຍາຍເທື່ອລະກ້າວ. ເມື່ອແນະນຳກ່ຽວກັບເຂດທ່ອງທ່ຽວ Thansur Bokor, ທ່ານ So Ma Ra, ລັດຖະມົນຕີການຕ່າງປະເທດ ລາຊະອານາຈັກ ກຳປູເຈຍ ໃຫ້ຮູ້ວ່າ:
“ເມື່ອເວົ້າເຖິງເຂດທ່ອງທ່ຽວພັກຜ່ອນບຳລຸງສຸຂະພາບThansur Bokor, ພວກເຮົາ ອາດຈະເຫັນໄດ້ວ່າ ປະຈຸບັນ ໂລກພວມຖືກຜົນສະທ້ອນຈາກສະພາບໂລກຮ້ອນຈາກການປ່ຽນແປງຂອງດິນຟ້າອາກາດ. ເພາະສະນັ້ນ ບັນດາເຂດພັກຜ່ອນບຳລຸງສຸຂະພາບຕ້ອງຮັບປະກັນທີ່ມີອຸນຫະພູມຈາກ12-20 ອົງສາແມ່ນໄດ້ຮັບການເລືອກເຟັ້ນຈາກນັກທ່ອງທ່ຽວເປັນຈຳນວນຫລວງຫລາຍ. ນີ້ແມ່ນທ່າແຮງຂອງເຂດພັກຜ່ອນບຳລຸງສຸຂະພາບດັ່ງກ່າວ. ຢູ່ອ້ອມແອ້ມເຂດພັກຜ່ອນບຳລຸງສຸຂະພາບແມ່ນສີຂຽວຂອງປ່າໄມ້ ແລະ ດອກໄມ້ດ້ວຍສີສັນຫລາກຫລາຍນາໆຊະນິດ.”
ຮູບພາບກ່ຽວກັບ Bokor
ພາບ: internet
|
ສຳລັບການລະຫລິ້ນພັກຜ່ອນຢ່ອນອາລົມຢູ່ກາງແຈ້ງ, ສົມທົບກັບການທ່ຽວຊົມທິວທັດທຳມະຊາດ ແລະ ບັນດາອາຄານ ເກົ່າແກ່ແຫ່ງປະຫວັດສາດ, ແດນສະຫວັນ Bokor ແມ່ນສະຖານທີ່ພັກຜ່ອນບຳລຸງສຸຂະພາບທີ່ສ້າງຄວາມປະທັບໃຈຢູ່ເຂດພູພຽງ ແລະ ສົມເປັນແດນສະຫວັນແຫ່ງການທ່ອງທ່ຽວ, ພັກຜ່ອນແລະບັນເທິງຂອງພາກພື້ນ.