(vovworld)- ປະຈຸບັນ, ໄປ “ເຟືອດ“ (ທ່ອງທ່ຽວແບບເສລີໂດຍກຸ້ມຕົນເອງທັງພາຫະນະໄປມາ, ບ່ອນກິນ, ບ່ອນຢູ່ ທັງສະຖານທີ່ທ່ອງທ່ຽວ) ຢູ່ພາຍໃນປະເທດ ບໍ່ແມ່ນສິ່ງໃຫມ່ອ່ຽມສຳລັບຜູ້ມັກໄປທ່ອງທ່ຽວອີກ, ຫາກໄປທ່ອງທ່ຽວແບບກຸ້ມຕົນເອງເຖິງບັນດາປະເທດອາຊຽນກໍແມ່ນທ່າອ່ຽງພວມດຶງດູດຜູ້ທີ່ມັກຄົ້ນຫາ, ພິເສດ ປະຈຸບັນ ບັນດາປະເທດ ອາຊຽນ ໄດ້ຍົກເວັ້ນວີຊາ ມີນະໂຍບາຍສະດວກຫຼາຍຢ່າງເພື່ອໃຫ້ປະຊາຊົນບັນດາປະເທດ ອາຊຽນ ໄປມາ, ພົວພັນແລກປ່ຽນນຳກັນ. ໃນລາຍການຊາຍຄາອາຊຽນ ພາກນີ້ ເຊີນທ່ານ ພ້ອມກັບພວກເຮົາຊອກຮູ້ຮູບການທ່ອງທ່ຽວນນີ້.
ຕາມເອື້ອຍ ເຮືອງລີ, ຜູ້ທີ່ເຄີຍໄປ ”ເຟືອດ” ເຖິງບັນດາປະເທດອາຊຽນ ແລ້ວ, ເພື່ອໄປທ່ອງທ່ຽວບັນດາປະເທດອາຊຽນດ້ວຍທາງບົກ ຕ້ອງກະກຽມຢ່າງລອບຄອບຖິ່ຖ້ວນ. ເອື້ອຍ ເຮືອງລີ ເວົ້າວ່າ: ຂ້າພະເຈົ້າເລືອກເຟັ້ນການໄປທ່ອງທ່ຽວດ້ວຍທາງບົກ ເພື່ອສາມາດເຫັນປະຈັກຕາ ແລະ ເຂົ້າໃຈໄດ້ຊີວິດການເປັນຢູ່ຂອງປະຊາຊົນຢູ່ສະຖານທີ່ເຊິ່ງຕົນເອງໄປຜ່ານ. ເອື້ອຍ ເຮືອງລີ ແບ່ງປັນວ່າ:
“ ຖ້າຫາກ ສັ່ງລາຍການທ່ອງທ່ຽວຜ່ານບໍລິສັດທ່ອງທ່ຽວ, ທຸກສິ່ງທຸກຢ່າງເຂົາເຈົ້າກະກຽມໃຫ້ໝົດ, ພວກເຮົາຈະສະດວກກວ່າ ບໍ່ຕ້ອງວາງແຜນການຫຍັງເລີຍ. ແຕ່ຕົນເອງບໍ່ເປັນເຈົ້າການກ່ຽວກັບເວລາ, ສະຖານທີ່ຢ້ຽມຊົມ ແລະ ບໍ່ມີກາລະໂອກາດເພື່ອຄົ້ນຫາຈຸດທີ່ເປັນເອກະລັກສະເພາະຂອງສະຖານທີ່ເຊິ່ງຕົນເອງໄປຜ່ານ. ໄປ “ເຟືອດ“ ຈະສ້າງຄວາມປະທັບໃຈກວ່າ. ເພາະວ່າ ຕົນເອງສາມາດສັງເກດຊີວິດປະຈຳວັນຂອງປະຊາຊົນ ແລະ ທິວທັດທຳມະຊາດຢູ່ບ່ອນທີ່ພວກເຮົາຜ່ານໄປໄດ້.”
ນັບມື້ນັບມີນັກທ່ອງທ່ຽວຕ່າງປະເທດຫລາຍຄົນໄປຢ້ຽມຢາມ
ນະຄອນຫລວງວຽງຈັນ
|
ເພື່ອກະກຽມໃຫ້ແກ່ລາຍການທ່ອງທ່ຽວໃນເວລາເກືອບອາທິດຫນຶ່ງ, ຄອບຄົວເອື້ອຍ ເຮືອງລີ ໄດ້ຊອກຮູ້ບັນດາຂໍ້ມູນທາງເຄືອຂ່າຍອິນເຕີແນັດຢ່າງລະອຽດຄື: ເສັ້ນທາງ ຕະຫລອດ, ໂຮງແຮມ ຫລື ສະຖານທີ່ຈະມາຢ້ຽມຊົມ. ຖ້າຫາກຂີ່ຍົນຈາກຮ່າໂນ້ຍໄປຮອດນະຄອນຫລວງວຽງຈັນ ແມ່ນເສຍເວລາ 45 ນາທີ, ແຕ່ຄອບຄົວຂອງເອື້ອຍໄປດ້ວຍລົດໂອໂຕຕ້ອງເສຍເວລາ 16 ຊົ່ວໂມງ. ພາຍຫລັງໄປຜ່ານເສັ້ນທາງ ໂຮ່ຈິມີນ, ດ່ານຊາຍແດນລາວບາວ, ດ່ານຊາຍແດນນຳ້ພາວຂອງລາວ ແລ້ວ, ຮອດ10 ໂມງຄຳ່ຈະໄປຮອດນະຄອນຫລວງວຽງຈັນ. ຄອບຄົວຂອງເອື້ອຍ ຍາດເວລາ 2 ມື້ເພື່ອໄປຢ້ຽມຊົມບັນດາສະຖານທີ່ທ່ອງທ່ຽວທີ່ລືຊື່ຂອງ ລາວ. ແລະໃນໄລຍະຢູ່ລາວ ສິ່ງທີ່ສ້າງຄວາມປະທັບໃຈພິເສດສຳລັບເອື້ອຍ ນັ້ນແມ່ນເວລາໄປຢ້ຽມຢາມ ກຸງເກົ່າຫລວງພະບາງ, ເອື້ອຍ ເຮືອງລີ ໃຫ້ຮູ້ວ່າ:
“ກຸງເກົ່າຫລວງພະບາງ ມີອາກາດເຢັນສະບາຍ ແລະ ປອດໂປ່ງ. ປະຊາຊົນຢູ່ທີ່ນີ້ແມ່ນຜູ້ຮັກແພງແຂກຄົນທີ່ສຸດ. ຊີວິດການເປັນຢູ່ຂອງເຂົາເຈົ້າຍັງຮັກສາປະເພນີເດີມໄວ້ໄດ້, ບໍ່ຖືກຜົນສະທ້ອນປານໃດຈາກຊີວິດທັນສະໄຫມ. ເມື່ອມາຢ້ຽມຢາມຫລວງພະບາງ ຂ້າພະເຈົ້າຮູ້ສຶກສະຫວາດສະເຫວີຍກວ່າ. ເຖິງວ່າ ມາຢ້ຽມຢາມເທື່ອຫນຶ່ງແລ້ວ ແຕ່ຂ້າພະເຈົ້າຢາກກັບຄືນອີກຄັ້ງຫນຶ່ງ.”
ວັດວາອາຮາມຢູ່ ໄທ ກໍ່ແມ່ນສິ່ງທີ່ດຶງດູດນັກທ່ອງທ່ຽວເປັນ
ຈຳນວນຫລວງຫລາຍ
ພາບ:dulich.com
|
ສຳລັບຜູ້ມັກຄົ້ນຫາສິ່ງທີ່ໃຫມ່ອ່ຽມ, ພຽງແຕ່ໄປ ”ເຟືອດ” ຄືແນວນີ້ ຈຶ່ງເຫັນປະຈັກຕາຊີວິດການເປັນຢູ່ກໍຄືອາລົມຈິດຂອງປະຊາຊົນທ້ອງຖິ່ນແຫ່ງທີ່ຕົນເອງໄປຜ່ານໄດ້.
ພາຍຫລັງສິ້ນສຸດລາຍການຢ້ຽມຢາມປະເທດລ້ານຊ້າງແລ້ວ, ຄອບຄົວເອື້ອຍ ເຮືອງລີ ສືບຕໍ່ເດີນທາງໄປຢ້ຽມຢາມ ໄທເພື່ອຄົ້ນຫາສິ່ງທີ່ໃຫມ່ອ່ຽມຂອງສະຖານທີຕ່າງໆຢູ່ປະເທດນີ້.
ຮູບການໄປ ”ເຟືອດ” ຄືຄອບຄົວເອື້ອຍ ເຮືອງລີ ພວມແມ່ນທ່າອ່ຽງສຳລັບຜູ້ນິຍົມທ່ອງທ່ຽວຫຼາຍຄົນ. ປະຈຸບັນ, ນອກຈາກໄປທ່ອງທ່ຽວຕາມສາຍ ຫວຽດນາມ -ລາວ - ໄທແລ້ວ, ນະຄອນໂຮ່ຈິມີນ - ກຳປູເຈຍແລ້ວ, ສາຍທ່ອງທ່ຽວຫວຽດນາມ - ມາເລເຊຍ - ສິງກະໂປ ກໍດຶງດູດຜູ້ນິຍົມໄປ ”ເຟືອດ” ເປັນຈຳນວນຫລວງຫລາຍ. ເອື້ອຍເຮືອງລີ ແບ່ງປັນປະສົບການກ່ຽວກັບການທ່ອງທ່ຽວ ຈາກນະຄອນ ໂຮ່ຈິມີນ ໄປຍັງ ກຳປູເຈຍວ່າ:
“ກຳປູເຈຍ ຫ່າງຈາກນະຄອນ ໂຮ່ຈີມີນປະມານ 300 ກິໂລແມັດ. ຖ້າຂີ່ລົດເມ ຈາກນະຄອນ ໂຮ່ຈິມີນ ໄປຍັງກຳປູເຈຍ ຕ້ອງເສຍເວລາ 6 ຊົ່ວໂມງ. ມາຮອດກຳປູເຈຍ, ຄອບຄົວຂ້າພະເຈົ້າໄປຢ້ຽມຢາມບັນດາສະຖານທີ່ທ່ອງທ່ຽວລືຊ່ືຢູ່ນະຄອນຫລວງ ພະນົມເປັນ. ຈາກພະນົມເປັນ ພວກຂ້າພະເຈົ້າ ຂີ່ລົດໂດຍສານເຖິງ ຊຽມຣຽບ ເສຍເວລາປະມານ 6 ຊົ່ວໂມງ. ”
ໄປ ”ເຟືອດ” ທັງປະຢັດ ແລະ ທັງຢ້ຽມຊົມສະຖານທີ່ທ່ອງທ່ຽວໄດ້ຫລາຍແຫ່ງ, ເພື່ອດຶງດູດນັກທ່ອງທ່ຽວ, ບັນດາບໍລິສັດການບິນ ຍັງມີນະໂຍບາຍຫລຸດລາຄາປີ້ຍົນ, ສ່ວນບັນດາໂຮງແຮມກໍມີລາຍການຫລຸດລາຄາເຊົ່າຫ້ອງພັກ. ຄຽງຄູ່ກັນນັ້ນ ບັນດາບໍລິສັດທ່ອງທ່ຽວກໍເອົາໃຈໃສ່ເຖິງການສ້າງລາຍການເຊື່ອມຕໍ່ບັນດາປະເທດ ອາຊຽນ ດ້ວຍວິທີຮ່ວມສຳພັນກັບບັນດາບໍລິສັດການບິນເພື່ອສະຫນອງປີ້ຍົນດ້ວຍລາຄາຕຳ່. ສິ່ງດັ່ງກ່າວໄດ້ສ້າງເງື່ອນໄຂສະດວກເພື່ອດຶງດູດນັກທ່ອງທ່ຽວເວົ້າລວມ ກໍ່ຄືຜູ້ນິຍົມໄປ ”ເຟືອດ” ເວົ້າສະເພາະ ໄປຢ້ຽມຢາມບັນດາປະເທດອາຊຽນນັບມື້ນັບຫລາຍ.