(vovworld)- ບຣູໄນ ແມ່ນລາຊະອານາຈັກກ່ຽວກັບນ້ຳມັນດ້ວຍໂບດສາສະຫນາອິດສະລາມທີ່ຟອກຄຳ ແລະ ບັນດາວັງທີ່ໃຫຍ່ໂຕ. ເຖິງຢ່າງໃດກໍຕາມ, ປະເທດນີ້ ພັດໄດ້ຮັບການສ້າງຂຶ້ນຈາກໝູ່ບ້ານນ້ອຍຢູ່ແຄມແມ່ນ້ຳ ບຣູໄນ, ຊຶ່ງແມ່ນສະຖານທີ່ປະຊາຊົນດຳລົງຊີວິດດ້ວຍອາຊີບຫາປາ ແລະ ຜະລິດບັນດາຜະລິດຕະພັນດ້ວຍໄມ້, ເງິນ, ທອງ ແລະອື່ນໆ. ປະຈຸບັນ ບຣູໄນ ແມ່ນປະເທດມີພື້ນຖານເສດຖະກິດພັດທະນາຖາວອນ ແຕ່ບໍ່ດັ່ງນັ້ນຊາວບຣູໄນພັດຫລົງລືມຕົ້ນກຳເນີດຂອງຕົນ ແລະ ນັ້ນແມ່ນສາຍເຫດເປັນຫຍັງໝູ່ບ້ານກາງນ້ຳ Kampong Ayer ຍັງຄົງຕົວ ແລະ ພັດທະນາ.
ພາບປະກອບ:vietgiaitri.com
|
ໝູ່ບ້ານກາງນ້ຳ Kampong Ayer ຂຶ້ນກັບເມືອງ Brunei ແລະ Muar ນະຄອນຫລວງ Bandar Seri. Kampong Ayer ຕາມພາສາມາເລຍເຊຍແມ່ນໝູ່ບ້ານກາງນ້ຳ, ໝາຍຄວາມວ່າໝູ່ບ້ານເທິງແມ່ນ້ຳ. ດ້ວຍປະຫວັດສາດເກືອບ 1.500 ປີ, ໝູ່ບ້ານກາງນ້ຳ Kampong Ayer ແມ່ນຄວາມເອກອ້າງທະນົງໃຈຂອງຊາວ ບຣູໄນ. ໃນໄລຍະຈະເລີນຮຸ່ງເຮືອງທີ່ສຸດ (1485 - 1524), Kampong Ayer ແມ່ນສູນປົກຄອງ, ແມ່ນເມືອງຫລວງຂອງລະບອບບຣູໄນ ແລະ ກໍແມ່ນທ່າກຳປັ່ນສຳຄັນໃນພາກພື້ນ, ແມ່ນສະຖານທີ່ເຕົ້າໂຮມຂອງບັນດາພໍ່ຄ້າຊາວຂາຍຈາກຝ່າຍຕາເວັນຕົກກໍຄືຈາກຈີນ, ກຳປູເຈຍ ແລະ ບັນດາປະເທດບ້ານໃກ້ຄຽງອື່ນ. ປະຈຸບັນ ໝູ່ບ້ານກາງນ້ຳ Kampong Ayer ມີປະຊາຊົນດຳລົງຊີວິດກວ່າ 30.000 ຄົນ, ກວມ 10% ພົນລະເມືອງຂອງລາຊະອານາຈັກ ບຣູໄນ ແລະແມ່ນບ່ອນສະແດງໃຫ້ເຫັນພື້ນຖານວັດທະນະທຳແມ່ນ້ຳລຳເຊຂອງປະເທດຢູ່ອາຊີຕາເວັນອອກຢ່າງຈະແຈ້ງທີ່ສຸດ. ເພາະສະນັ້ນ ໝູ່ບ້ານກາງນ້ຳ Kampong Ayer ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວຫລາຍຄົນທີ່ມາຈາກບັນດາປະເທດໃນພາກພື້ນ ແລະ ໂລກ. ອ້າຍ Vu Tuan Phong ນັກທ່ອງທ່ຽວມາຈາກແຂວງ ກວ໋າງນີງ ຫວຽດນາມ ມີຄວາມແປກປະຫລາດໃຈຕໍ່ຄວາມງາມຂອງ ໝູ່ບ້ານກາງນ້ຳ Kampong Ayer, ອ້າຍ Vu Tuan Phong ໃຫ້ຮູ້ວ່າ:
“ຂ້າພະເຈົ້າຮູ້ສຶກປະທັບໃຈ ຍ້ອນສະຖາປັດຕະຍະກຳຂອງໝູ່ບ້ານກາງນ້ຳນີ້. ມອງແຕ່ໄກ, ໝູ່ບ້ານຄືດັ່ງເທດສະບານແຫ່ງນ້ອຍ ແຕ່ເມື່ອມາຮອດແລ້ວ ປະກົດເຫັນບັນດາເຮືອນຮ້ານໄດ້ຮັບການກໍ່ສ້າງຕາມແບບປະເພນີທີ່ເປັນເອກະລັກສະເພາະ. ເຮືອນຮ້ານ ແລະ ກິດຈະກຳທັງໝົດລ້ວນແຕ່ໄດ້ຮັບການກໍ່ສ້າງດ້ວຍໄມ້. ຂ້າພະເຈົ້າເຫັນວ່າ, ບັນດາເຮືອນຮ້ານຢູ່ທີ່ນີ້ຖືກຈັດສັນຢ່າງເໝາະສົມ ດ້ວຍເດີ່ນກວ້າງຢູ່ເບື້ອງຫນ້າເຮືອນເພື່ອປູກຕົ້ນໄມ້ປະດັບເອ້, ດອກໄມ້ ແລະ ສ່ວນຫນຶ່ງເພື່ອຜະລິດເຄື່ອງຫັດຖະກຳ. ເຖິງວ່າ ເຄື່ອງໃຊ້ໃນເຮືອນແມ່ນລຽບງ່າຍກໍຕາມ ແຕ່ການຊັບຊ້ອນຫ້ອງໃນເຮືອນຮ້ານແມ່ນຄົບຖ້ວນ ແລະ ເໝາະສົມ. ເຮືອນຮ້ານທັງໝົດແມ່ນເຊື່ອມຕໍນຳກັນ, ສ້າງສະພາບແວດລ້ອມດຳລົງຊີວິດທີ່ໃກ້ຊິດສະຫນິດສະຫນົມ.”
ໝູ່ບ້ານກາງນ້ຳ Kampong Ayer
ພາບ:dulich.vn
|
ດ້ວຍເຂດຊຸມຊົນ 42 ແຫ່ງ ລວມມີກວ່າ 4000 ກິດຈະກຳໃນນັ້ນມີ: ໂຮງຮຽນ, ໂຮງໝໍ, ປ້ອມຕຳຫລວດ, ອົງການປົກຄອງ.... ລ້ວນແຕ່ໄດ້ຮັບການກໍ່ສ້າງດ້ວຍໄມ້ Mangrove ຊຶ່ງແມ່ນໄມ້ປະເພດພິເສດຢູ່ເທິງເກາະ Boneo. ຕາມປະຊາຊົນຢູ່ທີ່ນີ້ ໄມ້ປະເພດນີ້ ແມ່ນແຂງ ແລະ ແຫນ້ນຫນາ ສາມາດຮັບນ້ຳຫນັກຂອງເຮືອນຮ້ານ, ພ້ອມທັງທົນທານຕໍ່ຜົນສະທ້ອນຈາກນ້ຳນັບຮ້ອຍປີ. ບັນດາເຮືອນຮ້ານຄ້ຳດ້ວຍເສົາໄມ້ຫ່າງຈາກຫນ້ານ້ຳປະມານ 2 ແມັດ ແລະ ເຊື່ອມຕໍ່ກັນດ້ວຍເສັ້ນທາງໄມ້ ມີຄວາມຍາວເກືອບ 50 ກິໂລແມັດ. ສິ່ງພິເສດ, ປະຊາຊົນຢູ່ທີ່ນີ້ສ່ວນຫລາຍມີວຽກເຮັດງານທຳເປັນປົກກະຕິ. ແຕ່ລະມື້ ລັດຖະກອນຂີ່ເຮືອຮັບຈ້າງເຂົ້າດິນຕໍ່ແຜ່ນເພື່ອເຮັດວຽກ, ຜູ້ອື່ນແມ່ນເຮັດບໍລິການດຳເນີນທຸລະກິດເຮືອຮັບຈ້າງ ສ່ວນຜູ້ເຖົ້າຜູ້ແກ່ ມັກຫາປາ ຫລືຜະລິດເຄື່ອງຫັດຖະກຳຢູ່ໃນເຮືອນຂອງຕົນ. ອ້າຍບຸນທັນ ນັກທ່ອງທ່ຽວມາຈາກນະຄອນຫລວງ ວຽງຈັນ ມາຢ້ຽມຢາມໝູ່ບ້ານກາງນ້ຳ Kampong Ayer ໃຫ້ຮູ້ວ່າ:
ສຽງອ້າຍບຸນທັນ
ໃນຄວາມມານະພະຍາຍາມປົວແປງ ແລະ ຍົກສູງຊີວິດການເປັນຢູ່ໃຫ້ແກ່ປະຊາຊົນ, ນັບແຕ່ທົດສະວັດ 1990, ລັດຖະບານ ບຣູໄນ ໄດ້ມີແຜນການສະຫນອງເຮືອນຖາວອນຢູ່ເທິງດິນຕໍ່ແຜ່ນໃຫ້ແກ່ປະຊາຊົນຢູ່ກາງນ້ຳດຳລົງຊີວິດ, ແຕ່ເກືອບຄືວ່າປະຊາຊົນຢູ່ໝູ່ບ້ານແຫ່ງນີ້ ເປັນຕົ້ນແມ່ນລຸ້ນຫນຸ່ມບໍ່ສົນໃຈຕໍ່ເລື່ອງອອກຈາກບ່ອນທີ່ປູ່ຍ່າຕາຍາຍເຄີຍດຳລົງຊີວິດແຕ່ດຶກດຳບັນ. ເຂົາເຈົ້າຢາກດຳລົງຊີວິດຢູ່ກາງນ້ຳ ບໍ່ພຽງແຕ່ມີອາກາດປອດໂປ່ງເຢັນສະບາຍເທົ່ານັ້ນ ຫາກເຂົາເຈົ້າຢາກຮັກສາບັນດາຄຸນຄ່າປະເພນີອັນລ້ຳຄ່າຂອງປະເທດຊາດ.
ປະຈຸບັນ Kampong Ayer ແມ່ນຄວາມເອກອ້າງທະນົງໃຈຂອງຊາວ ບຣູໄນ. ໝູ່ບ້ານກາງນ້ຳແມ່ນມໍລະດົກທີ່ມີຊີວິດຊີວາ, ແມ່ນສິ່ງປະທັບໃຈບໍ່ສາມາດຫລົງລືມໄດ້ຂອງລາຊະອານາຈັກ ບຣູໄນທີ່ລືຊື່ດ້ວຍຄວາມຮຸ່ງເຮືອງເຫລືອງເຫລື້ອມ./.