ບັນຍາກາດຂອງລະດູບານໃໝ່ພວມປົກຄຸມໄປທົ່ວທຸກແຫ່ງຂອງປະເທດ ຫວຽດນາມ. ເຈື່ອຈານເຂົ້າກັບຄວາມເບີກບານມ່ວນຊື່ນນັ້ນ, ກໍມີຊາວຕ່າງປະເທດຫຼາຍຄົນທີ່ພວມຮຳ່ຮຽນ, ດຳລົງຊີວິດ ແລະ ເຮັດວຽກຢູ່ ຫວຽດນາມ. ສຳລັບເຂົາເຈົ້າແລ້ວ, ບຸນປີໃໝ່ປະຈຳຊາດຂອງ ຫວຽດນາມ ແມ່ນມີຄວາມຈັບອົກຈັບໃຈທີ່ສຸດ, ຍ້ອນວ່າໃນຈຸດເວລານີ້, ເຂົາເຈົ້າອາດສາມາດໄດ້ເຫັນປະຈັກຕາໃນຫຼາຍແງ່ມູມທີ່ແຕກຕ່າງກັນຂອງ ຫວຽດນາມ ຄື: ດ້ານອາຫານການກິນ, ດ້ານວັດທະນະທຳການປະພຶດ ແລະ ບັນດາງານບຸນທີ່ເຂັ້ມຄົ້ນໄປດ້ວຍສີສັນຊາດ. ແຕ່ລະຄົນລ້ວນແຕ່ໄດ້ຕ້ອນຮັບບຸນເຕັດຕາມວິທີສະເພາະຂອງໃຜມັນ.
ພ້ອມກັບວິວັດການເຊື່ອມໂຍງເຂົ້າກັບສາກົນ, ການເປີດປະຕູ, ນັບມື້ນັບມີຊາວຕ່າງປະເທດຫຼາຍຄົນໄດ້ທຳມາຫາກິນ ແລະ ດຳລົງຊີວິດຢູ່ ຫວຽດນາມ. ຫຼາຍຄົນໄດ້ອາໄສຢູ່ ຫວຽດນາມ ເປັນເວລາຍາວນານດ້ວຍການຊອກຫາຄູ່ຄອງທີ່ເປັນຊາວ ຫວຽດນາມ. ແລະບັນດາຄອບຄົວທີ່ມີວັດທະນະທຳຫຼາຍຮູບຫຼາຍແບບນັ້ນ ກໍນັບມື້ນັບປະກົດອອກເປັນຈຳນວນຫຼວງຫຼາຍ. ມີຊາວຕ່າງປະເທດຫຼາຍຄົນໄດ້ລື້ງເຄີຍກັບຮີດຄອງປະເພນີຂອງບຸນປີໃໝ່ຂອງຊາດ ຫວຽດນາມ ແຕ່ສຳລັບເຂົາເຈົ້າແລ້ວ, ແຕ່ລະເທື່ອ, ເມື່ອໄດ້ເຂົ້າຮ່ວມບຸນເຕັດ ຫວຽດນາມ ຄືດັ່ງໄດ້ມີອະນຸສອນອັນດີງາມຕື່ມອີກກ່ຽວກັບປະເທດທີ່ມີມູນເຊື້ອດ້ານວັດທະນະທຳທີ່ດີງາມນີ້.
ພາບປະກອບ |
ສຳລັບທ່ານ John Marcus, ນັກທຸລະກິດຊາວ ອາເມລິກາ ຜູ້ທີ່ໄດ້ຕ້ອນຮັບບຸນປີໃໝ່ປະຈຳຊາດຂອງ ຫວຽດນາມ 12 ຄັ້ງແລ້ວ, ເມື່ອບຸນປີໃໝ່ວຽນມາແຕ່ລະຄັ້ງ ລ້ວນແຕ່ນຳເອົາຄວາມຮູ້ສຶກພິເສດສະເພາະທີ່ສຸດໃຫ້ແກ່ທ່ານ. ກໍ່ເຊັນດຽວກັບຊາວ ຫວຽດນາມ, ບຸນເຕັດແມ່ນໂອກາດເພື່ອໃຫ້ທ່ານ John Marcus ເຕົ້າໂຮມພ້ອມກັບຄອບຄົວ, ກັບເມຍທີ່ເປັນຊາວ ຫວຽດນາມ ທີ່ສວຍງາມ ແລະ ລູກທີ່ໜ້າຮັກ:
“ສຳລັບຂ້າພະເຈົ້າແລ້ວ, ປີໃໝ່ມີຄວາມສຳຄັນທີ່ສຸດ, ຍ້ອນວ່າມັນເປັນການເປີດສາກທຸກສິ່ງທຸກຢ່າງທີ່ດີງາມໃນປີ. ໃນຕະຫຼອດ 12 ປີຂ້າພະເຈົ້າລ້ວນແຕ່ໄດ້ຕ້ອນຮັບບຸນປີໃໝ່ຢູ່ ຫວຽດນາມ. ຂ້າພະເຈົ້າບໍ່ມັກໄປທ່ອງທ່ຽວໃນໂອກາດບຸນປີໃໝ່ເພາະວ່າຈຸດເວລານັ້ນທຸກຄົນໃນຄອບຄົວເຄີຍເຕົ້າໂຮມກັນ. ເມຍຂອງຂ້ອຍແຕ່ງກິນແຊບຫຼາຍ ດັ່ງນັ້ນລາວຈະແຕ່ງບັນດາເຍື່ອງອາຫານທີ່ແຕກຕ່າງກັນໃນໂອກາດບຸນເຕັດ ແລະ ຂ້າພະເຈົ້າຈະຢູ່ເຮືອນເພື່ອຮັບປະທານອາຫານເຫຼົ່ານັ້ນ.”
ຊາວຕ່າງປະເທດຫຼາຍຄົນໃຫ້ຮູ້ວ່າສິ່ງທີ່ສ້າງຄວາມຈັບອົກຈັບໃຈທີ່ສຸດໃຫ້ແກ່ເຂົາເຈົ້າກ່ຽວກັບບຸນເຕັດຢູ່ ຫວຽດນາມ, ນັ້ນແມ່ນບັນຍາກາດເຕົ້າໂຮມສະມາຊິກທຸກຄົນໃນຄອບຄົວ. ທຸກໆຄົນໄປຢື້ຢາມຖາມຂ່າວ, ອວຍພອນປີໃໝ່ ແລະ ໄດ້ຮັບປະທານອາຫານນຳກັນ. ສິ່ງດັ່ງກ່າວໄດ້ເຮັດໃຫ້ບຸນເຕັດຂອງ ຫວຽດນາມ ມີຄວາມແຕກຕ່າງກັນເມື່ອທຽບໃສ່ກັບບຸນປີໃໝ່ສາກົນຢູ່ບັນດາປະເທດຕາເວັນຕົກ. ທ່ານ Jean – Noel Poirier, ເອກອັກຄະລັດຖະທູດ ຝຣັ່ງ ປະຈຳ ຫວຽດນາມ, ໃຫ້ຂໍ້ສັງເກດວ່າ:
“ໃນ 10 ວັນຂອງບຸນເຕັດ, ພົນລະເມືອງ ຫວຽດນາມ 91 ລ້ານຄົນລ້ວນແຕ່ມີອາລົມ ຈິດດຽວກັນ. ໃຜໆກໍຢາກກັບເມືອຄອບຄົວ. ຂ້າພະເຈົ້າເຫັນວ່າ, ຕອນເຊົ້າຂອງວັນທີ 1 (ວັນຂຶ້ນປີໃໝ່) ຂອງບຸນເຕັດເກືອບຄືວ່າບໍ່ມີໃຜມັກອອກຖະໜົນ, ຫາກທຸກຄົນລ້ວນແຕ່ເຕົ້າໂຮມກັນພ້ອມກັບຄອບຄົວ ເພື່ອຮັດແໜ້ນຄວາມສະໜິດຕິດພັນລະຫວ່າງບັນດາສະມາຊິກໃນຄອບຄົວນຳກັນ. ຂ້າພະເຈົ້າຖືວ່ານີ້ແມ່ນມູນເຊື້ອທີ່ດີ, ເປັນສັນຍາລັກແຫ່ງຄວາມສາມັກຄີຂອງຊາວ ຫວຽດນາມ.”
ຊາວຕ່າງປະເທດຮຽນວິທີຫໍ່ເຂົ້າຕົ້ມ
(ພາບປະກອບ)
|
ທ່ານ Jean – Noel Poirier ໃຫ້ຮູ້ວ່າ: ທ່ານມັກບັນຍາກາດສະຫງົບງຽບຂອງຖະໜົນຫົນທາງຢູ່ ຮ່າໂນ້ຍ ໃນວັນທຳອິດຂອງບຸນເຕັດ. ການດຳລົງຊີວິດທີ່ຟ້າວຝັ່ງໃນວັນທຳມະດາໄດ້ຫາຍໄປ, ແທນທີນັ້ນແມ່ນບັນຍາກາດທີ່ປອດໂປ່ງ, ງຽບສະຫງັດ, ດັ່ງນັ້ນປີໃດທ່ານກໍຍ່າງໄປທ່ຽວຊົມທັດສະນີຍະພາບທີ່ສວຍງາມຂອງ ຮ່າໂນ້ຍ. ເມື່ອແບ່ງປັນອະນຸສອນກ່ຽວກັບບຸນເຕັດ, ທ່ານ Jean – Noel Poirier, ໄດ້ເວົ້າດ້ວຍຄວາມກະຕືລືລົ້ນວ່າ:
“ຂ້າພະເຈົ້າຍັງຄົງຈື່ຈຳອະນຸສອນແຫ່ງປີທຳອິດທີ່ຂ້າພະເຈົ້າເປັນເອກອັກຄະລັດຖະທູດປະຈຳ ຫວຽດນາມ. ເວລານັ້ນ, ທັງຄອບຄົວຂ້າພະເຈົ້າຍັງຢູ່ ຝຣັ່ງ, ມີຂ້າພະເຈົ້າແຕ່ຜູ້ດຽວຢູ່ ຫວຽດນາມ ເທົ່ານັ້ນ. ຂ້າພະເຈົ້າໄດ້ຕັດສິນໃຈໄປຢ້ຽມຢາມຄອບຄົວຊາວກະສິກອນຄອບຄົວໜຶ່ງຢູ່ເຂດຊົນນະບົດ. ແລະດຳລົງຊີວິດພ້ອມກັບນັ້ນເປັນເວລາ 2, 3 ວັນ. ເມື່ອເຂົ້າຮ່ວມການດຳເນີນຊີວິດຂອງເຂົາເຈົ້າ ແລະ ຂ້າພະເຈົ້າຮູ້ສຶກຈັບອົກຈັບໃຈທີ່ສຸດ. ຂ້າພະເຈົ້າກໍໄດ້ເຂົ້າຮ່ວມຊີວິດຕົວຈິງທີ່ອຸດົມສົມບູນຂອງເຂົາເຈົ້າ. ສິ່ງດັ່ງກ່າວໄດ້ສ້າງຄວາມຮູ້ສຶກໃໝ່ຫຼາຍຢ່າງໃຫ້ແກ່ຂ້າພະເຈົ້າ.”
ໂດຍແມ່ນຜູ້ທີ່ດຳລົງຊີວິດຢູ່ ຫວຽດນາມ ມາເປັນເວລາຫຼາຍປີ ແລະ ໄດ້ຕ້ອນຮັບບຸນເຕັດ ຫວຽດນາມ ເປັນຫຼາຍຄັ້ງແລ້ວ, ທ່ານ Valeriu Arteni, ອຸປະທູດຊົ່ວຄາວ Rumani ປະຈຳ ຫວຽດນາມ ພັດມັກໄປທ່ຽວຊົມງານບຸນດອກໄມ້, ການລະຫຼິ້ນພື້ນເມືອງຂອງ ຫວຽດນາມ ທີ່ສຸດ ແລະ ພິເສດແມ່ນໄດ້ຮັບຄຳເຊີນເອົາບຸນເຕັດຈາກປະຊາຊົນ. ດ້ວຍອາຫານທີ່ແຊບນົວ, ຫຼາຍເຍື່ອງ:
“ຂ້າພະເຈົ້າເຄີຍໄດ້ຮັບຄຳເຊື້ອເຊີນຈາກໝູ່ເພື່ອນ ຫວຽດນາມ ມາຢ້ຽມຢາມ ແລະ ຮັບປະທານອາຫານພ້ອມກັບຄອບຄົວຂອງເຂົາເຈົ້າໃນໂອກາດບຸນເຕັດ, ຂ້າພະເຈົ້າເຫັນວ່າອາຫານ ຫວຽດນາມ ແຊບຫຼາຍ, ພິເສດແມ່ນແນມຈືນ. ຄອບຄົວຂ້າພະເຈົ້າກໍຮູ້ວິທີປຸງແຕ່ງເຍື່ອງອາຫານນີ້.”
ເມື່ອບຸນເຕັດວຽນມາ, ຖ້າບໍ່ມີແຜນການໄປທ່ຽວ, ທ່ານ Valeriu Arteni ເຄີຍບອກເມຍຊື້ເຂົ້າຕົ້ມ, ເຂົ້າໜົມຂີງ ແລະ ອາຫານຫຼາຍເຍື່ອງເພື່ອຕ້ອນຮັບໝູ່ເພື່ອນ. ໂດຍຍອມຮັບວ່າຕົນເອງແມ່ນຜູ້ມັກດື່ມມັກກິນ, ທ່ານ Valeriu Arteni ໃຫ້ຮູ້ວ່າ: ເຖິງວ່າໄດ້ຮັບປະທານອາຫານ ຫວຽດນາມ ຫຼາຍເຍື່ອງໃນຫຼາຍປີແລ້ວກໍຕາມແຕ່ອາຫານ ຫວຽດນາມ ໄດ້ສ້າງຄວາມປະທັບໃຈໃຫ້ແກ່ທ່ານຢ່າງແທ້ຈິງ, ພິເສດແມ່ນບັນດາເຍື່ອງອາຫານໃນບຸນເຕັດ.
ເຖິງວ່າຊີວິດທີ່ທັນສະໄໝໄດ້ເຮັດໃຫ້ບຸນເຕັດ ມີການປ່ຽນແປງສ່ວນໃດສ່ວນໜຶ່ງ ແຕ່ຊາວຕ່າງປະເທດຫຼາຍຄົນຍັງໃຫ້ຂໍ້ສັງເກດວ່າ, ບຸນປີໃໝ່ປະຈຳຊາດ ຫວຽດນາມ ຍັງຄົງຮັກສາຈຸດທີ່ເປັນເອກະລັກສະເພາະເຊິ່ງພຽງແຕ່ມີໃນບຸນເຕັກຂອງຫວຽດນາມ ເທົ່ານັ້ນ. ບຸນເຕັດສະທ້ອນໃຫ້ເຫັນບັນດາຄຸນຄ່າວັດທະນະທຳມະນຸດ, ທີ່ເປັນມູນເຊື້ອ, ສັກກະລະບູຊາ ແລະ ເຂັ້ມຂົ້ນໄປດ້ວຍສີສັນວັດທະນະທຳຂອງຊາດທີ່ມີອະລິຍາທຳມາເປັນເວລານັບພັນປີ.