(vovworld)-ຊຸມມື້ໃກ້ຈະຮອດບຸນປີໃຫມ່ປະຈຳຊາດຫວຽດນາມ(ໝາຍເຖິງບຸນເຕັດ), ຕະຫລາດດອກໄມ້ ກວ໋າງອານ ຢູ່ ເມືອງ ໄຕໂຮ່ ນະຄອນຮ່າໂນ້ຍ ມີຜູ້ມາຊື້, ຂາຍດອກໄມ້ເປັນຈຳນວນຫລວງຫລາຍ. ບັນຍາກາດອຶກກະທຶກຄຶກໂຄມຢູ່ທີ່ນີ້ເຮັດໃຫ້ຫລາຍຄົນຮູ້ສຶກວ່າບຸນເຕັດໄດ້ວຽນມາແລ້ວ.
ຕະຫລາດດອກໄມ້ ກວ໋າງອານ
photo:internet
|
ພວກຂ້າພະເຈົ້າພວມມີຫນ້າຢູ່ຕະຫລາດດອກໄມ້ ກວ໋າງອານ ຢູ່ ຖະຫນົນ ເອົາເກີ ຂຶ້ນກັບເມືອງ ໄຕໂຮ່ ນະຄອນ ຮ່າໂນ້ຍ. ນີ້ແມ່ນຕະຫລາດດອກໄມ້ທີ່ມີຂອບຂະຫນາດໃຫຍ່ ແລະ ລືຊື່ຢູ່ ຮ່າໂນ້ຍ. ໃນເວລາ 8 ໂມງ 30 ນາທີ່ຕອນເຊົ້າ, ບັນຍາກາດຢູ່ຕະຫລາດແມ່ນຄຶກຄື້ນມ່ວນຊື່ນທີ່ສຸດ. ດອກໄມ້ທຸກຊະນິດດ້ວຍສີສັນຫລາກຫລາຍໄດ້ນຳເອົາມາຂາຍຢູ່ທີ່ນີ້. ຜູ້ຂາຍ, ຜູ້ຊື້ ພ້ອມດ້ວຍຜູ້ມາຊົມຢ່າງໜາແໜ້ນໄດ້ສ້າງບັນຍາກາດທີ່ເປັນຫນ້າປະທັບໃຈ. ນາງ ເຈີນກີມທວາ, ຜູ້ຂາຍດອກໄມ້ຢູ່ ຕະຫລາດດອກໄມ້ ກວ໋າງອານ ໃຫ້ຮູ້ວ່າ: ປີນີ້ ຜູ້ມາຊື້ດອກໄມ້ຫລາຍກວ່າເມື່ອທຽບໃສ່ຊຸມປີກ່ອນ ແລະ ດອກໄມ້ທີ່ນຳເອົາມາຂາຍຢູ່ທີ່ນີ້ກໍອຸດົມສົມບູນກວ່າທຸກໆປີ.
“ດອກໄມ້ທຸກຊະນິດທີ່ປູກຢູ່ທຸກແຖບຖິ່ນຂອງປະເທດລ້ວນແຕ່ໄດ້ສົ່ງມາຂາຍຢູ່ຕະຫລາດ, ຕົວຢ່າງຄື: ດອກຄາຍ, ດອກດາວເຮືອງຂອງເຍີດເຕີນ, ຕົ້ນໝາກແປ້ນປະດັບຂອງ ຕືລຽນ, ດອກເໝີຍຂອງນະຄອນ ໂຮ່ຈິມີນ, ດອກກຸຫລາບ ຂອງ ຊອກເຊີນ. ໃນໂອກາດບຸນເຕັດ ຍັງມີ ດອກກ້ວຍດິນ, ດອກລີລີ ຂອງດາລາດ ກໍຖືກຂົນສົ່ງມາຂາຍຢູ່ ຕະຫລາດດອກໄມ້ ກວ໋າງອານ ເຮັດໃຫ້ບັນຍາກາດຢູ່ຕະຫລາດນີ້ຍີ່ງຟົດຟື້ນ ຂຶ້ນຕື່ມ ແລະ ສີສັນຫລາກຫລາຍຂອງດອກໄມ້ທຸກຊະນິດ ກໍເປັນສິ່ງທີ່ດຶງດູດຜູ້ມາຊື້ມາຜູ້ຊົມເປັນຈຳນວນຫລວງຫລາຍ, ໃນນັ້ນ ນັກທ່ອງທ່ຽວຕ່າງປະເທດກໍມາຢ້ຽມຊົມ ແລະ ຊື້ດອກໄມ້.”
ດອກໄມ້ທຸກຊະນິດທີ່ປູກຢູ່ທຸກແຖບຖິ່ນຂອງປະເທດລ້ວນແຕ່ໄດ້ສົ່ງມາຂາຍຢູ່ຕະຫລາດ
photo:internet
|
ເມື່ອກ່ອນນີ້,ຕະຫລາດດອກໄມ້ ກວ໋າງອານ ແມ່ນຕະຫລາດດອກໄມ້ນ້ອຍຢູ່ ຕາແສງ ເຍີດເຕີນ. ຕະຫລາດໄດ້ຮັບການສ້າງຕັ້ງຂຶ້ນຍ້ອນຄວາມຕ້ອງການຂາຍດອກໄມ້ຂອງປະຊາຊົນຢູ່ບັນດາໝູ່ບ້ານປູກດອກໄມ້ທີ່ມີຊື່ສຽງຢູ່ແຄມຫນອງໂຮ່ໄຕຄື: ເຍີດເຕີນ, ກວ໋າງບາ ແລະ ບາງຕາແສງຢູ່ເມືອງ ຕືລຽມ. ປີ 1996, ເມື່ອ ເມືອງ ໄຕໂຮ່ໄດ້ຮັບການສ້າງຕັ້ງຂຶ້ນ, ຕະຫລາດຖືກຍ້າຍໄປຕັ້ງຢູ່ເຂດດິນທີ່ຂຶ້ນກັບ ຕາແສງ ກວ໋າງອານຄືໃນປະຈຸບັນ. ໃນຊຸມມື້ໃກ້ຈະຮອດບຸນເຕັດ, ມີດອກໄມ້ຫລາຍຊະນິດຖືກຂົນສົ່ງຈາກຊານນະຄອນຮ່າໂນ້ຍຄື: ຊອກເຊີນ, ເມລີງ, ດົງແອງ ຊ້ຳບໍ່ຫນຳຈາກບັນດາແຂວງ ທີ່ຫ່າງໄກຄື: ຊາປາ, ດາລາດຫລືນຳເຂົ້າຈາກຕ່າງປະເທດ ກໍລ້ວນແຕ່ໄດ້ເອົາມາຂາຍຢູ່ທີ່ນີ້. ຢູ່ ພາກເຫນືອຫວຽດນາມ, ລະດູບານໃຫມ່ກໍແມ່ນລະດູຂອງດອກໄມ້ທຸກຊະນິດດ້ວຍສີສັນຫລາກຫລາຍ. ຈຸດພິເສດຂອງຕະຫລາດແຫ່ງນີ້ແມ່ນຕະຫຼາດຂາຍສົ່ງ ຊຶ່ງໄດ້ແຈກຢາຍດອກໄມ້ໄປເຖິງທຸກບ່ອນໃນນະຄອນຫລວງ. ມື້ທຳມະດາ ຕະຫລາດແຫ່ງນີ້ເຄີຍເຄື່ອນໄຫວນັບແຕ່ຄ່ຳຄືນຮອດຮຸ່ງເຊົ້າ. ສະເພາະຊຸມມື້ບຸນເຕັດ ຕະຫລາດຈຶ່ງເຄື່ອນໄຫວຕະຫລອດວັນແລະຄືນ. ເອື້ອຍ ຫງວຽນທິເວີນ, ລູກຄ້າປະຈຳຂອງຕະຫຼາດແຫ່ງນີ້ໃຫ້ຮູ້ວ່າ:
“ນ້ອງດຳລົງຊີວິດຢູ່ ອານເຢືອງ, ເວລາ 5 ໂມງເຊົ້າຂອງແຕ່ລະມື້ ນ້ອງມາຕະຫລາດເພື່ອເລືອກຊື້ດອກໄມ້. ຫລັງຈາກນັ້ນ ສົ່ງໄປຂາຍຢູ່ຕະຫລາດອື່ນ ຫລືຢູ່ຖະຫນົນສາຍຕ່າງໆຢູ່ນະຄອນຫລວງຮ່າໂນ້ຍ.”
ໃນຊຸມມື້ບຸນເຕັດ, ບໍ່ພຽງແຕ່ມີຜູ້ຄ້າຂາຍດອກໄມ້ເທົ່ານັ້ນ ຫາກຍັງມີປະຊາຊົນຫລາຍຄົນ, ເປັນຕົ້ນແມ່ນໄວຫນຸ່ມເຄີຍໄປຕະຫລາດຊື້ດອກໄມ້ອີກດ້ວຍ. ເຂົາເຈົ້າຍ່າງເລາະຊົມດອກໄມ້, ເລືອກຊື້ໃຫ້ຕົນເອງຊໍ່ດອກໄມ້ທີ່ງາມຕາ. ນາງ ຫງວຽນທິຖ່ຍເຢືອງ ຢູ່ ເມືອງ ຮ່ວານກຽມ ຮ່າໂນ້ຍ ໃຫ້ຮູ້ວ່າ:
“ປີໃດກໍເຊັ່ນດຽວກັນ ຂ້າພະເຈົ້າກໍລ້ວນແຕ່ໄປຕະຫລາດດອກໄມ້. ມື້ນີ້ ອາກາດຫນາວຈັດ, ແຕ່ບັນຍາກາດກະກຽມບຸນເຕັດຢູ່ທີ່ນີ້ໄດ້ສ້າງຄວາມປະທັບໃຈຫລາຍ, ເຖິງວ່າມີຜູ້ຄົນໄປມາຢ່າງຄາຫນາແຫນ້ນກໍຕາມ ແຕ່ທຸກຄົນລ້ວນແຕ່ຮູ້ສຶກວ່າ ບຸນເຕັດໄດ້ວຽນມາແລ້ວ.”
ຄວາມປະທັບໃຈຂອງບັນດາຜູ້ໄປຕະຫລາດດອກໄມ້ແມ່ນໄດ້ສູບເອົາກິນຫອມຫວນຂອງດອກໄມ້, ໄດ້ຮັບຊົມສີສັນຫລາກຫລາຍຂອງດອກໄມ້ນາໆຊະນິດ. ແລະ ຕະຫລາດດອກໄມ້ ກວ໋າງອານ ໄດ້ກາຍເປັນສະຖານທີ່ອັນດູດດື່ມຂອງຊາວຮ່າໂນ້ຍ ກໍຄື ນັກທ່ອງທ່ຽວໃນຊຸມມື້ບຸນເຕັດ. ເມື່ອເລາະຊົມດອກໄມ້ ທຸກຄົນຕ່າງກໍຮູ້ສຶກວ່າ ຈິດໃຈສະຫວາດສະເຫວີຍກວ່າ. ສຳລັບຜູ້ມາຕະຫລາດເປັນຄັ້ງທຳອິດ ຈະຊ່ວຍໃຫ້ເຂົາເຈົ້າຮູ້ສຶກໄດ້ຈຸດວັດທະນະທຳທີ່ເປັນເອກະລັກສະເພາະຂອງຊາວ ຮ່າໂນ້ຍຢ່າງແນ່ນອນ. /.