(vovworld)- ຈຸດເວລາສົ່ງທ້າຍປີເກົ່າແລະ ຕ້ອນຮັບປີໃຫມ່ພວມວຽນມາແລ້ວ. ພ້ອມກັບປະຊາຊົນບັນດາທ້ອງຖິ່ນໃນທົ່ວປະເທດຫວຽດນາມ, ຊາວນະຄອນຫລວງ ຮ່າໂນ້ຍ ກໍພວມຮີບເຮັ່ງສຳເລັດບັນດາວຽກງານທີ່ບໍ່ທັນແລ້ວເພື່ອຕ້ອນຮັບປີໃຫມ່.
ຕະຫລາດດອກໄມ້ ຢູ່ຮ່າງເລືອກ
ພາບ:internet
|
ຕອນບ່າຍວັນທີ 30 ເດືອນ 12 ໄລ່ຕາມຈັນທະປະຕິທິນ, ແມ່ນຈຸດເວລາສຸດທ້າຍຂອງປີມະເສັງ, ຖະຫນົນສາຍຕ່າງໆຢູ່ນະຄອນຫລວງ ຮ່າໂນ້ຍ ຜູ້ຄົນໄປມາກໍ່ຫລຸດຫນ້ອຍລົງ, ຮ້ານຂາຍເຄື່ອງ, ຮ້ານຊັບພະສິນຄ້າໃຫຍ່ຫລາຍແຫ່ງໄດ້ປິດປະຕູ. ສ່ວນຖະຫນົນ ຮ່າງໝາ ທີ່ຂາຍເຄື່ອງປະດັບໃນໂອກາດບຸນເຕັດ, ຖະຫນົນ ຮ່າງເດືອງ, ຮ່າງບ່ວມ ຂາຍເຂົ້າໜົມ ຫລືສະຖານທີ່ມີຕະຫລາດດອກໄມ້ຄື ຖະຫນົນ ຮ່າງເລືອກ, ເຖິງວ່າ ຜູ້ຊື້ຜູ້ຂາຍບໍ່ຄັບຄາຫນາແຫນ້ນຄືຊຸມມື້ກ່ອນນີ້ ກໍຕາມ, ແຕ່ບັນຍາກາດຊື້ຂາຍຢູ່ທີ່ນີ້ຍັງຟົດຟື້ນຢູ່. ອ້າຍ ໂດ໋ຕຽນລອງ ຢູ່ ຖະຫນົນ ຮ່າມລອງ ຮ່າໂນ້ຍ ໃຫ້ຮູ້ວ່າ:
“ຂ້າພະເຈົ້າໄປເຮັດວຽກຢູ່ແດນໄກ, ສະນັ້ນ ມື້ນີ້ ຈື່ງມີເວລາໄປຊື້ດອກໄມ້ໃຫ້ແກ່ຄອບຄົວ. ປີໃດ ຂ້າພະເຈົ້າກໍຊື້ຕົ້ນດອກຄາຍ, ຕົ້ນໝາກແປ້ນປະດັບ ເພື່ອໃຫ້ຄອບຄົວຕ້ອນຮັບບຸນເຕັດຢ່າງເບີກບານມ່ວນຊື່ນ ແລະ ຖືກຕາມຮີດຄອງປະເພນີຂອງຊາວຫວຽດນາມ.”
ສຳລັບຊາວຫວຽດນາມແລ້ວ, ຄາບອາຫານສົ່ງທ້າຍປີເກົ່າຕ້ອນຮັບປີໃຫມ່ໃນມື້ທ້າຍປີແມ່ນມີຄວາມໝາຍທີ່ສຸດ. ນີ້ແມ່ນຈຸດເວລາທີ່ທຸກຄົນໃນຄອບຄົວ ເຖິງວ່າມີຜູ້ເຮັດວຽກຢູ່ໄກຫລືຢູ່ໃກ້ກໍລ້ວນແຕ່ກັບຄືນມາເຕົ້າໂຮມກັນເພື່ອຕ້ອນຮັບຈຸດເວລາພິເສດນີ້. ປ້າ ໂດແທນຮ່ວາ, ຢູ່ເມືອງ ດົງດາຮ່າໂນ້ຍ ໃຫ້ຮູ້ວ່າ:
“ຕອນແລງວັນທີ 30 ຂອງປີໃດກໍເຊັ່ນດຽວກັນ, ຄອບຄົວຂ້າພະເຈົ້າກໍກຽມຄາບອາຫານເພື່ອສົ່ງທ້າຍປີເກົ່າຕ້ອນຮັບປີໃຫມ່. ທັງປີກໍມີພຽງມື້ດຽວເພື່ອໃຫ້ທຸກຄົນໃນຄອບຄົວເຕົ້າໂຮມກັນ. ”
ຮ່າງໝາ ຂາຍເຄື່ອງປະດັບໃນໂອກາດບຸນເຕັດ
ພາບ:giaoduc.net
|
ຜູ້ໄປຊື້ເຄື່ອງກໍຄືຜູ້ຂາຍເຄື່ອງ, ໃຜໆກໍຢາກຊື້ໄວຂາຍໄວເພື່ອກັບເມືອບ້ານໃຫ້ທັນເວລາກະກຽມຈຸດເວລາສົ່ງທ້າຍປີເກົ່າຕ້ອນຮັບປີໃຫມ່. ເອື້ອຍ ຫງວຽນທີບັກ, ຜູ້ຂາຍຕົ້ນໝາກແປ້ນປະດັບຢູ່ຕະຫລາດດອກໄມ້ ຮ່າງເລືອກ ໃຫ້ຮູ້ວ່າ:
“ຂ້າພະເຈົ້າຫາກໍ່ຂາຍຕົ້ນສຸດທ້າຍ. ແລະກໍຕ້ອງຂາຍໃຫ້ລູກຄ້າດ້ວຍລາຄາຖືກ ເພື່ອກັບເມືອບ້ານໃຫ້ທັນເວລາເພື່ອກະກຽມໃຫ້ຄອບຄົວຕ້ອນຮັບບຸນເຕັດ. ”
ເຖິງວ່າແມ່ນມື້ທ້າຍປີ, ແຕ່ບັນດາສະຖານີລົດໄຟ, ລົດໂດຍສານ ຍັງມີຫລາຍຄົນຢູ່. ຜູ້ໄປເຮັດວຽກຢູ່ແດນໄກພວມລໍຖ້າລົດ ຢາກກັບເມືອຫາຄອບຄົວໃຫ້ທັນເວລາກ່ອນຈຸດເວລາສົ່ງທ້າຍປີເກົ່າຕ້ອນຮັບປີໃຫມ່. ນາງ ຫງວຽນບີກຖູຍ, ນັກສຶກສາມະຫາວິທະຍາໄລ ທັງລອງ ໃຫ້ຮູ້ວ່າ:
“ນ້ອງເຫັນວ່າ ທຸກຄົນພວມຮີບເຮ່ັງກະກຽມຕ້ອນຮັບບຸນເຕັດ ນ້ອງກໍ ຢາກກັບເມືອບ້ານໂດຍໄວ ເພື່ອຕ້ອນຮັບບຸນເຕັດກັບຄອບຄົວ.”
ໃນຂະນະທີ່ທຸກຄົນ, ທຸກຄອບຄົວ ພວມຂຸ້ນຂ້ຽວກະກຽມບຸນເຕັດ, ບັນດາກຳມະກອນຂອງບໍລິສັດເຮັດອະນາໄມສິ່ງແວດລ້ອມ ຢູ່ ນະຄອນ ຮ່າໂນ້ຍ ພວມສຳເລັດຫນ້າທີ່ຂອງຕົນເພື່ອເຮັດໃຫ້ຖະຫນົນສາຍຕ່າງໆຢູ່ນະຄອນຫລວງສະອາດກວ່າກ່ອນທີ່ກ້າວເຂົ້າສູ່ປີໃຫມ່.
ບັນຍາກາດໃກ້ຈະຮອດຈຸດເວລາສົ່ງທ້າຍປີເກົ່າຕ້ອນຮັບປີໃຫມ່ຍິ່ງອຶກກະທຶກຄືກໂຄມ ເມື່ອປະຊາຊົນພາກັນລົງຖະຫນົນ. ເຂົາເຈົ້າເຕົ້າໂຮມກັນຢູ່ບັນດາສະຖານທີ່ຈັດຕັ້ງລາຍການສະແດງສິລະປະຢູ່ກາງແຈ້ງ, ລໍຖ້າຈຸດເວລາຍິ່ງບັ້ງໄຟດອກສົ່ງທ້າຍປີເກົ່າຕ້ອນຮັບປີໃຫມ່.
ລະດູບານໃຫ່ມພວມວຽນມາຢູ່ທຸກແຖບຖິ່ນຂອງປະເທດຊາດ. ນີ້ແມ່ນຈຸດເວລາຊື່ງຜູ້ໄປເຮັດວຽກຢູ່ຫ່າງໄກພວມອວ່າຍເມືອຫາຄອບຄົວ, ອວ່າຍເມືອຫານະຄອນຫລວງ.
ຈຸດເວລາສົ່ງທ້າຍປີເກ່ົາຕ້ອນຮັບປີໃຫມ່ໄດ້ມາຮອດແລ້ວ, ເຖິງວ່າຄ້າງຄາກັບວຽກງານແນວໃດກໍຕາມ, ແຕ່ທຸກຄົນຕ່າງໆກໍຢຸດຕິວຽກງານຂອງຕົນໄວ້ຊ່ົວຄາວເພື່ອ ຕ້ອນຮັບຈຸດເວລາທີ່ສັກກະລະບູຊານີ້. ກ້າວເຂົ້າສູ່ປີໃຫມ່ປີມະເມຍ, ທຸກຄົນກໍລ້ວນແຕ່ມີຄວາມເຊື່ອໝັ້ນ ແລະ ຄວາມຫວັງຕໍ່ສ່ິງທີ່ດີງາມກວ່າ.