(vovworld)- ບັນຍາກາດຕ້ອນຮັບລະດູບານໃຫມ່, ບຸນປີໃຫມ່ປະຈຳຊາດປີມະເມຍຂອງຊາວຫວຽດນາມພວມດຳເນີນໄປຢ່າງຟົດຟື້ນມ່ວນຊື່ນຢູ່ທຸກແຖບຖິ່ນຂອງປະເທດຊາດ. ຢູ່ເຂດໝູ່ເກາະທີ່ຫ່າງໄກ, ບັນດາພະນັກງານ, ນັກຮົບ ແລະ ປະຊາຊົນ ຢູ່ເມືອງເກາະ ເຈື່ອງຊາ ແຂວງ ແຄງຮ່ວາ ພວມຫ້າງຫາກະກຽມຕ້ອນຮັບບຸນເຕັດຢ່າງອົບອຸ່ນ.
ພະນັກງານນັກຮົບເມືອງເກາະ ເຈື່ອງຊາກະກຽມຕ້ອນຮັບບຸນເຕັດ
photo:qdnd.vn
|
ເຖິງວ່າຢູ່ຫ່າງໄກຈາກເຂດດິນຕໍ່ແຜ່ນ, ການດຳລົງຊີວິດຍັງປະສົບກັບຄວາມຫຍຸ້ງຍາກ, ຂາດເຂີນກໍຕາມ ແຕ່ໂດຍໄດ້ຮັບຄວາມເອົາໃຈໃສ່ຈາກພັກ, ລັດ ແລະ ປະຊາຊົນຢູ່ເຂດດິນຕໍ່ແຜ່ນ, ພະນັກງານນັກຮົບເມືອງເກາະ ເຈື່ອງຊາ ກໍໄດ້ຕ້ອນຮັບບຸນປີໃຫມ່ປີມະເມຍປີນີ້ ດ້ວຍວັດຖຸສິ່ງຂອງພໍສົມຄວນ. ກ່ອນຈະຮອດບຸນເຕັດ ສອງອາທິດ, ບັນດາກຳປັ່ນຂອງທະເຮືອເຂດ 4 ໄດ້ຂົນສົ່ງເຄື່ອງຂອງທີ່ຈຳເປັນ 80ໂຕນ ຄື: ເຂົ້າຫນຽວ, ໝາກຖົ່ວຂຽວ, ຊີ້ນໝູ, ຊີ້ນໄກ່, ໃບຕອງຈີງໃຫ້ພະນັກງານນັກຮົບຢູ່ໝູ່ເກາະຕ້ອນຮັບບຸນເຕັດ. ຢູ່ເກາະແຫ່ງຕ່າງໆ, ພະນັກງານ, ນັກຮົບພ້ອມກັນປະດັບປະດາຕົບແຕ່ງດ້ວຍໂຄມໄຟ, ປ້າຍໂຄສະນາ…ເພື່ອກະກຽມຕ້ອນຮັບບຸນເຕັດ. ຢູ່ເກາະ ເຊີນກາ, ພະນັກງານນັກຮົບ ພວມເຕົ້າໂຮມກັນຢູ່ຫໍວັດທະນະທຳໃນເກາະ ເພື່ອຝືກແອບບັນດາລາຍການສິລະປະ ແລະ ກະກຽມພາໝາກໄມ້ໃຫ້ແກ່ຄຳ່ຄືນສ່ົງທ້າຍປີເກົ່າຕ້ອນຮັບປີໃຫມ່. ພັນໂທ ໂດ໋ເທຕວຽນ, ຜູ້ບັນຊາການເກາະ ເຊີນກາ ໃຫ້ຮູ້ວ່າ:
“ການຕ້ອນຮັບບຸນເຕັດຢູ່ເກາະມີຫລາຍສິ່ງທີ່ແຕກຕ່າງກັບຢູ່ເຂດດິນຕໍ່ແຜ່ນ, ທັງກະກຽມວັດຖຸສິ່ງຂອງເພື່ອຕ້ອນຮັບບຸນເຕັດ, ທັງກຽມພ້ອມສູ້ຮົບເພື່ອຮັກສາຄວາມສະຫງົບປອດໄພໃຫ້ແກ່ປະຊາຊົນຢູ່ເຂດດິນຕໍ່ແຜ່ນ. ”
ສ່ວນຢູ່ເກາະ ນາມອຽດ ຕາແສງ ຊີງຕົນ ແລະ ເກາະຊອງຕືໄຕ, ພະນັກງານ, ນັກຮົບ ແລະ ປະຊາຊົນໃນເກາະ ພວມຫ້າງຫາກະກຽມທຸກສິ່ງທຸກຢ່າງເພື່ອຕ້ອນຮັບບຸນເຕັດ. ປີ 2013, ຍ້ອນປະຕິບັດການເພີ່ມພູນຜະລິດຜົນເປັນຢ່າງດີ ສະນັ້ນ ໃນໂອກາດປີໃຫມ່ນີ້, ພະນັກງານ, ນັກຮົບ ແລະ ປະຊາຊົນໃນເກາະໄດ້ຕ້ອນຮັບບຸນເຕັດດ້ວຍວັດຖຸສິ່ງຂອງອາຫານຢ່າງພຽງພໍ ແລະ ຄົບຖ້ວນ. ພັນໂຕ ຫງວຽນຈ້ອງບີງ, ພະນັກງານການເມືອງເກາະຊອງຕືໄຕ ເມືອງເກາະເຈື່ອງຊາ ແຂວງ ແຄງຮວ່າ ໃຫ້ຮູ້ວ່າ: ວຽກງານກະກຽມໄດ້ສຳເລັດແລ້ວ, ພະນັກງານ, ນັກຮົບ ແລະ ປະຊາຊົນຢູ່ເກາະ ຊອງຕືໄຕ ຈະຕ້ອນຮັບບຸນເຕັດ 2014 ຢ່າງອົບອຸ່ນ ແລະ ເຕັມໄປດ້ວຍນຳ້ໃຈຄວາມຮັກແພງລະຫວ່າງທະຫານ ແລະ ປະຊາຊົນ, ເຂັ້ມຂົ້ນໄປດ້ວຍສີສັນວັດທະນະທຳທີ່ເປັນມູນເຊື້ອຂອງຊາດຫວຽດນາມ ແລະ ບ້ານເກີດເມືອງນອນ ພ້ອມທັງເຊີດຊູສະຕິລະວັງຕົວ, ກຽມພ້ອມສູ້ຮົບ, ປົກປັກຮັກສາອະທິປະໄຕເຂດໝູ່ເກາະຂອງປະເທດຊາດຢ່າງໝັ້ນຄົງ.
“ປີນີ້ ພວກຂ້າພະເຈົ້າຈະສ້າງບັນຍາກາດເພື່ອໃຫ້ທະຫານຢູ່ເຂດໝູ່ເກາະ ຕ້ອນຮັບບຸນເຕັດຢ່າງເບີກບານມ່ວນຊື່ນຄືດັ່ງຢູ່ບ້ານເກີດເມືອງນອນຂອງຕົນ. ພວກຂ້າພະເຈົ້າຈະໂທລະສັບເຖິງແຕ່ລະຄອບຄົວຂອງນັກຮົບເພື່ອຢື້ຢາມຖາມຂ່າວ ແລະ ອວຍພອນປີໃຫມ່ ພ້ອມທັງແຈ້ງບັນຍາກາດຕ້ອນຮັບບຸນເຕັດຢູ່ເກາະເພື່ອໃຫ້ຄອບຄົວຂອງບັນດານັກຮົບອຸ່ນອ່ຽນໃຈ ແລະ ຜ່ານນັ້ນແມ່ນສ້າງອາລົມຈິດຄວາມຮັກແພງລະຫວ່າງຄອບຄົວ ແລະ ກົມກອງຢູ່ເຂດໝູ່ເກາະ.”
ພະນັກງານນັກຮົບຫໍ່ເຂົ້າຕົ້ມ
photo:qdnd.vn
|
ທີ່ເຂດຊຸມຊົນຢູ່ໝູ່ເກາະ, ບັນດາຄອບຄົວພວມເຮັດອະນາໄມ, ປະດັບປະດາເຮືອນຊານ, ກະກຽມຕ້ອນຮັບບຸນເຕັດ. ໂດຍມີການຊ່ວຍເຫລືອຂອງພະນັກງານນັກຮົບ, ບັນດາຄອບຄົວເລີ່ມຕົ້ນຫໍ່ເຂົ້າຕົ້ມ. ຢູ່ເຮືອນຂອງນາງ ເຢືອງທິທູຖູຍ, ພະນັກງານນັກຮົບ ແລະ ຄອບຄົວ ພວມພ້ອມກັນເຮັດຕົ້ນດອກເໝີຍ, ດອກຄາຍດ້ວຍຫອຍທະຫານ ເພື່ອຕ້ອນຮັບບຸນເຕັດ. ນາງ ທູຖູຍ ໃຫ້ຮູ້ວ່າ:
“ຄອບຄົວຂ້າພະເຈົ້າໄດ້ກະກຽມເຄ່ືອງຂອງທີ່ຈຳເປັນເພື່ອຕ້ອນຮັບບຸນເຕັດຄື: , ເຂົ້າຕົ້ມ,ເຂົ້າໜົມ, ຊີ້ນໄກ, ນຳ້ຫວານ... ບັນຍາກາດຕ້ອນຮັບບຸນເຕັດຢູ່ທີ່ນີ້ ບໍ່ແຕກຕ່າງຫຍັງກັບຢູ່ເຂດດິນຕໍ່ແຜ່ນ. ພິເສດແມ່ນໄດ້ຮັບການຊ່ວຍເຫລືອຢ່າງສຸດຈິດສຸດໃຈຂອງພະນັກງານ, ນັກຮົບໃນໝູ່ເກາະ, ສະນັ້ນ ຂ້າພະເຈົ້າຮູ້ສຶກວ່າ ບຸນເຕັດຢູ່ໝູ່ເກາະແມ່ນອົບອຸ່ນທີ່ສຸດ.”
ເຂົ້າຮ່ວມການກະກຽມຕ້ອນຮັບບຸນເຕັດຂອງບັນດາຄອບຄົວ ແລະ ພະນັກງານນັກຮົບຢູ່ເຂດໝູ່ເກາະ, ທ່ານ ເຈີນວ້ານເຟືອກ, ຮອງປະທານຄະນະກຳມະການປະຊາຊົນ ຕາແສງ ຊອງຕືໄຕ ແບ່ງປັນວ່າ:
“ໃນປີຜ່ານມາ, ຍ້ອນປະຕິບັດວຽກງານເພີ່ມພູນຜະລິດຜົນເປັນຢ່າງດີ, ສະນັ້ນ ໃນໂອກາດບຸນເຕັດ ພໍ່ແມ່ປະຊາຊົນ ມີຊີ້ນໝູ, ຊີ້ນໄກ່, ມີຜັກຂຽວຫລາຍຊະນິດຢ່າງພຽງພໍເພື່ອຕ້ອນຮັບບຸນເຕັດ. ນອກນັ້ນ ພວກຂ້າພະເຈົ້າພ້ອມກັບບັນດາຄອບຄົວດຳເນີນການຫໍ່ເຂົ້າຕົ້ມ. ພໍ່ແມ່ປະຊາຊົນກໍ່ໄດ້ຮັບຂອງຂວັນຈາກເຂດດິນຕໍ່ແຜ່ນ, ຊ່ວຍໃຫ້ພໍ່ແມ່ປະຊາຊົນຕ້ອນຮັບບຸນເຕັດຢ່າງອົບອຸ່ນຄືຢູ່ເຂດດິນຕໍ່ແຜ່ນ.”
ປະຈຸບັນ, ຊີວິດທາງດ້ານວັດຖຸ ແລະ ຈິດໃຈຂອງພະນັກງານນັກຮົບ ແລະ ປະຊາຊົນຢູ່ເມືອງເກາະ ເຈື່ອງຊາ ນັບມື້ນັບກ້າວຂຶ້ນ, ຊີວິດນັບມື້ນັບພັດທະນາ. ພ້ອມກັບຄວາມເອົາໃຈໃສ່, ເບີ່ງແຍງດູແລຂອງເຂດດິນຕໍ່ແຜ່ນ ພ້ອມກັບຄວາມມານະພະຍາຍາມບືນຕົວຂຶ້ນຂອງປະຊາຊົນໃນເກາະ, ບຸນປີໃຫມ່ປີມະເມຍ 2014, ພະນັກງານ, ນັກຮົບ ແລະ ປະຊາຊົນຢູ່ເມືອງເກາະ ເຈ່ືອງຊາ ຄືດັ່ງໄດ້ຮັບກຳລັງແຮງ, ມີຄວາມເຊື່ອໝັ້ນຕື່ມອີກເພື່ອປົກປັກຮັກສາອະທິປະໄຕເຂດທະເລໝູ່ເກາະບ້ານເກີດເມືອງນອນ ແລະ ຕ້ອນຮັບບຸນເຕັດຢ່າງອົບອຸ່ນ, ເບິກບານມ່ວນຊື່ນປຽບເຫມືອນຄືຢູ່ເຂດດິນຕໍ່ແຜ່ນ.