(vovworld)- ໝູ່ບ້ານ ຫວຽດຫາຍ ແມ່ນສະຖານທີ່ພິເສດໃນໝູ່ເກາະທ່ອງທ່ຽວ ກາດບ່າ, ນະຄອນ ຫາຍຟ່ອງ ຍ້ອນການດຳລົງຊີວິດຂອງປະຊາຊົນຢູ່ທີ່ນີ້ຍັງຄົງຮັກສາມູນເຊື້ອເດີມຂອງຊາວຫວຽດນາມໄວ້ຢູ່. 76 ຄອບຄົວໃນໝູ່ບ້ານຍາມໃດກໍເປີດປະຕູໂດຍບໍ່ຕ້ອງລະມັດລະວັງຜູ້ຊົ່ວຮ້າຍ ເພາະວ່າ ຊາວໝູ່ບ້ານຫວຽດຫາຍມີຈິດໃຈເປີດເຜີຍ ຍາມໃດກໍຊ່ວຍເຫລືອເຊິ່ງກັນ ແລະ ກັນ. ບຸນປີໃຫມ່ປີມະເມຍນີ້, ມີນັກທ່ອງທ່ຽວຫລາຍຄົນໄດ້ແວ່ຢາມ, ເພື່ອເຫັນປະຈັກຕາການດຳລົງຊີວິດທີ່ເຕັມໄປດ້ວຍໄມຕິຈິດຮັກແພງຂອງໝູ່ບ້ານຫວຽດຫາຍ. ບົດຂຽນຂອງນັກຂ່າວ ຮ່ວາງທາຍ.
ບຸນປີໃຫມ່ປະຈຳຊາດຢູ່ໝູ່ບ້ານ ຫວຽດຫາຍ ແມ່ນຕ່າງກັບຫຼາຍທ້ອງຖິ່ນ ຢູ່ພາກເຫນືອຫວຽດນາມ. ທັງໝູ່ບ້ານ ມີປະຊາຊົນກວ່າ 300 ຄົນທີ່ດຳລົງຊີວິດໃນບັນດາຫລັງຄາເຮືອນປະຖົມປະຖານຢູ່ເກາະກາດບ່າ. ບັນຍາກາດຢູ່ໝູ່ບ້ານ ຫວຽດຫາຍ ບໍ່ອຶກກະທຶກ, ບໍ່ມີງານບຸນ. ນັກທ່ອງທ່ຽວມາຢ້ຽມຢາມ ໝູ່ບ້ານຫວຽດຫາຍ ຕ້ອງຂີ່ກຳປັ່ນຜ່ານອ່າວ ລານຫ້າ, ແລ້ວໄປທາງບົກຕື່ມອີກ 10 ກິໂລແມັດ ຫລື ຍ່າງຂ້າມປ່າສະຫງວນແຫ່ງຊາດກາດບາ ໃນເວລາປະມານ 4-5 ຊົ່ວໂມງ. ໝູ່ບ້ານ ຫວຽດຫາຍ ຖືກຕັ້ງຢູ່ກາງເກາະກາດບາ, ການໄປມາແມ່ນຫຍຸ້ງຍາກຄືແນວນັ້ນ ແຕ່ໝູ່ບ້ານທີ່ຫ່າງໄກ ແລະ ມີຄວາມເລິກລັບນີ້ພັດ ດຶງດູດນັກທ່ອງທ່ຽວສາກົນມາຢ້ຽມຢາມເປັນຈຳນວນຫຼວງຫລາຍ. ທ່ານ John, ນັກທ່ອງທ່ຽວມາຈາກ ອັງກິດ ແບ່ງປັນວ່າ:
ໝູ່ບ້ານ ຫວຽດຫາຍ
ພາບ:thethaovietnam.vn
|
“ພວກຂ້າພະເຈົ້າດຳລົງຊີວິດຢູ່ເຂດບ້ານນາຂອງ ອັງກິດ, ທຸກສິ່ງທຸກຢ່າງ ແມ່ນຕ່າງກັບຢູ່ທີ່ນີ້ຫລາຍ. ເມື່ອພວກຂ້າພະເຈົ້າຂີ່ກຳປັ່ນຜ່ານອ່າວ ລານຫ້າ ເຫັນວ່າມີຫລາຍສິ່ງທີ່ແຕກຕ່າງກັນ. ທິວທັດທຳມະຊາດສວຍງາມຫລາຍ. ແນ່ນອນວ່າ ຂ້າພະເຈົ້າຈະກັບມາຢ້ຽມຢາມແຫ່ງນີ້ອີກຫລາຍຄັ້ງ ເພື່ອສູບເອົາອາກາດທີ່ປອດໂປ່ງ, ຢູ່ໃນບັນຍາກາດສະຫງົບສຸກ ແລະ ເຂົ້າໃຈກ່ຽວກັບຊີວິດການເປັນຢູ່ຂອງຊາວ ຫວຽດຫາຍ.”
ນັກທ່ອງທ່ຽວຕ່າງປະເທດຢ້ຽມຢາມໝູ່ບ້ານຫວຽດຫາຍ
ພາບ:thethaovietnam.vn
|
ຮ່ວມເດີນທາງກັບທ່ານ John ຍັງມີເມຍ ແລະ ລູກ. ທ່ານນາງ Anna ເມຍຂອງທ່ານ John ໃຫ້ຮູ້ວ່າ: ຄອບຄົວຂອງທ່ານນາງຮູ້ຈັກເຖິງໝູ່ບ້ານ ຫວຽດຫາຍ ຜ່ານຫນ້າເວັບໂຄສະນາການທ່ອງທ່ຽວຢູ່ ອັງກິດ. ທ່ານນາງ Anna ມີຄວາມປິຕິຊົມຊື່ນ ແລະ ມັກທິວທັດທຳມະຊາດຢູ່ທີ່ນີ້ຫລາຍ, ພິເສດ ແມ່ນບັນຍາກາດຕ້ອນຮັບບຸນປີໃຫມ່ປະຈຳຊາດຂອງຊາວ ຫວຽດຫາຍ.
“ພວກຂ້າພະເຈົ້າຫາກໍ່ຂີ່ຍົນຈາກນະຄອນ ໂຮ່ຈິມີນ ມານະຄອນຫາຍຟ່ອງມື້ວານນີ້. ພວກຂ້າພະເຈົ້າຢາກມານີ້ເພື່ອຄົ້ນຫາຕື່ມກ່ຽວກັບປະເທດຫວຽດນາມ ທີ່ສວຍງາມ. ປະຊາຊົນຢູ່ທີ່ນີ້ມີຄວາມສະຫນິດສະຫນົມແລະຮັກແພງແຂກຄົນຫລາຍ, ອາຫານກໍແຊບນົວ. ພວກຂ້າພະເຈົ້າມາຢ້ຽມຢາມໝູ່ບ້ານ ຫວຽດຫາຍ ແມ່ນກົງກັບໂອກາດປະຊາຊົນຫວຽດນາມ ຕ້ອນຮັບບຸນປີໃຫມ່ປະຈຳຊາດ, ສະນັ້ນ ພວກຂ້າພະເຈົ້າໄດ້ເຫັນປະຈັກຕາກ່ຽວກັບຮີດຄອງປະເພນີຂອງຊາວຫວຽດນາມ ຜ່ານການກະກຽມຕ້ອນຮັບບຸນປີໃຫມ່ປະຈຳຊາດຂອງຊາວ ຫວຽດຫາຍ. ຂ້າພະເຈົ້າຢາກກັບຄືນຢ້ຽມຢາມອີກຄັ້ງຫນຶ່ງ.”
ຍ້ອນຕັ້ງຢູ່ໃຈກາງເຂດທ່ອງທ່ຽວກາດບ່າ ທີ່ລືຊື່ ດ້ວຍນັກທ່ອງທ່ຽວແວ່ຢາມເປັນຈຳນວນຫລວງຫລາຍ, ເມື່ອບຸນປີໃຫມ່(ບຸນເຕັດ)ວຽນມາ, ຊາວຫວຽດຫາຍ ກະກຽມທຸກສິ່ງທຸກຢ່າງເພື່ອຕ້ອນຮັບແຂກ. ເອື້ອຍ ຫງວຽນທິຮ່າ, ຜູ້ທີ່ດຳລົງຊີວິດຢູ່ບ້ານຫວຽດຫາຍ ມາແຕ່ຄາວຍັງນ້ອຍໃຫ້ຮູ້ວ່າ: ຄຽງຄູ່ກັບການເຮັດໄຮ່ເຮັດນາ, ຄອບຄົວຂອງເອື້ອຍ ຍັງເຮັດບໍລິການທ່ອງທ່ຽວອີກ.
“ໃນຊຸມມື້ບຸນເຕັດ, ມີນັກທ່ອງທ່ຽວມາຢາມ ພວກຂ້າພະເຈົ້າຕ້ອງເຊີນເຂົາເຈົ້າກິນອາຫານພື້ນເມືອງ. ຂ້າພະເຈົ້າຈະແນະນຳໃຫ້ນັກທ່ອງທ່ຽວກ່ຽວກັບຮີດຄອງປະເພນີໃນຊຸມມື້ບຸນເຕັດຂອງຊາວຫວຽດນາມ. ເຂົາເຈົ້າກໍມັກຊອກຮູ້ກ່ຽວກັບການດຳລົງຊີວິດ ແລະ ປະເພນີຕ້ອນຮັບບຸນເຕັດຂອງປະຊາຊົນຢູ່ທີ່ນີ້ຫລາຍ.”
ເພື່ອຊ່ວຍປະຊາຊົນຫວຽດຫາຍ ເວົ້າສະເພາະ, ປະຊາຊົນ ເມືອງເກາະ ກາດຫາຍ ເວົ້າລວມ, ທັງຮັກສາວັດທະນະທຳທີ່ເປັນມູນເຊື້ອຂອງຊາວຫວຽດນາມໄວ້ ທັງມີເງື່ອນໄຂພັດທະນາເສດຖະກິດ, ອຳນາດການປົກຄອງເມືອງ ກາດຫາຍ ໄດ້ເອົາໃຈໃສ່ເປັນພິເສດເຖິງການໂຄສະນາເຖິງບັນດາເຈົ້າຂອງຮ້ານອາຫານ, ໂຮງແຮມ ແລະ ປະຊາຊົນ ກ່ຽວກັບການຮັກສາບັນດາຄຸນຄ່າວັດທະນະທຳທີ່ເປັນມູນເຊື້ອ. ເມືອງກາດຫາຍ ກໍຜັນຂະຫຍາຍຫລາຍມາດຕະການ ເພື່ອສ້າງເງື່ອນໄຂດີທີ່ສຸດໃຫ້ແກ່ນັກທ່ອງທ່ຽວມາຢາມ, ຊອກຮູ້ກ່ຽວກັບປະເພນີຕ້ອນຮັບບຸນປີໃຫມ່ປະຈຳຊາດ. ທ່ານ ບູ່ຍຈູງເຫງ້ຍ, ປະທານຄະນະກຳມະການປະຊາຊົນ ເມືອງກາດຫາຍ, ນະຄອນ ຫາຍຟ່ອງ ໃຫ້ຮູ້ວ່າ:
“ ປີນີ້, ບັນດາເຈົ້າຂອງຮ້ານອາຫານ, ໂຮງແຮມຈັດຕັ້ງໃຫ້ນັກທ່ອງທ່ຽວຊອກຮູ້ກ່ຽວກັບຈຸດວັດທະນະທຳທີ່ເປັນມູນເຊື້ອຂອງບຸນປີໃຫມ່ປະຈຳຊາດຫວຽດນາມ ແລະ ບັນດາຈຸດວັດທະນະທຳທີ່ເປັນເອກະລັກສະເພາະຂອງເກາະກາດບາ. ພວກຂ້າພະເຈົ້າຈັດຕັ້ງຄາບອາຫານໃນຄ່ຳຄືນທ້າຍປີ ແລະ ພິທີຕ້ອນຮັບຈຸດເວລາສົ່ງທ້າຍປີເກົ່າຕ້ອນຮັບປີໃຫມ່. ບັນດາບໍລິສັດທ່ອງທ່ຽວ ແລະ ປະຊາຊົນຢູ່ທີ່ນີ້ ໄດ້ມີການກະກຽມຢ່າງລະອຽດເພື່ອໃຫ້ນັກທ່ອງທ່ຽວໄດ້ຕ້ອນຮັບບຸນເຕັດຢູ່ທີ່ນີ້.”
ຊອກຮູ້ກ່ຽວກັບຊີວິດການເປັນຢູ່ຂອງປະຊາຊົນ ຫວຽດຫາຍ ກໍຄືຢ້ຽມຊົມທິວທັດທຳມະຊາດຢູ່ທີ່ນີ້ ແມ່ນລາຍການທ່ອງທ່ຽວທີ່ສ້າງຄວາມປະທັບໃຈໃຫ້ແກ່ນັກທ່ອງທ່ຽວຕ່າງປະເທດເມື່ອມາຢາມເກາະກາດຫາຍ. ດ້ວຍຄວາມງາມແບບເປົ່າຫວ່າງດັ້ງເດີມ, ທິວທັດທຳມະຊາດທີ່ສວຍງາມ, ປະຊາຊົນມີຄວາມສະຫນິດສະຫນົມຮັກແພງແຂກຄົນ ໄດ້ສ້າງຄວາມດຶງດູດນັກທ່ອງທ່ຽວມາຢ້ຽມຢາມໝູ່ບ້ານຫວຽດຫາຍນັບມື້ນັບຫລາຍ