ປີໃໝ່ ປີວອກນີ້, ປະເທດຊາດປ່ຽນແປງໃໝ່ຄົບຮອບ 30 ປີ. ກິດຈະການປ່ຽນແປງຂອງຊາຮດທີ່ຍິ່ງໃຫຍ່ນີ້ໄດ້ບັນລຸຜົນງານນາໆປະການ. ແຕ່ປະຈຸບັນ, ປະຫວັດສາດພວມຊຸກຍູ້ປະເທດຊາດຫວຽດນາມຕ້ອງສືບຕໍ່ປ່ຽນແປງໃໝ່ຢ່າງແຂງແຮງເພື່ອເຊື່ອມໂຍງເຂົ້າກັບສາກົນ. ນັ້ນແມ່ນເສັ້ນທາງກ້າວເດີນທີ່ຊາດຫວຽດນາມຈະຕ້ອງປະຕິບັດໃນປີ 2016 ເພື່ອກ້າວໄປເຖິງຄວາມຈະເລີນຮຸ່ງເຮືອງ ແລະ ສົມບູນພຸນສຸກ.
 |
ປີມະແມ 2015 ໄດ້ຜ່ານພົ້ນໄປ ດ້ວຍເລື່ອງຫວຽດນາມບັນລຸໄດ້ບັນດາໝາກຜົນທີ່ດີໃນການປະຕິບັດເປົ້າໝາຍພັດທະນາເສດຖະກິດສັງຄົມຢູ່ຫວຽດນາມ. ນັ້ນແມ່ນລະດັບການເຕີບໂຕ GDP ບັນລຸ 6,68%, ສູງກວ່າຫຼາຍເມື່ອທຽບໃສ່ແຜນການທີ່ໄດ້ວາງອອກແມ່ນ 6,2% ແລະ ແມ່ນລະດັບສູງສຸດໃນ 15 ປີທີ່ຜ່ານມາ. ພ້ອມກັນນັ້ນ, ໄພເງິນເຟີ້ໄດ້ຮັບການຄວບຄຸມ, ເສດຖະກິດມະຫາພາກເປັນປົກກະຕິ, ລະດັບເພີ່ມລາຄ່າສິນຄ້າໃຊ້ສອຍໄດ້ຫຼຸດລົງຫຼາຍ ຄືເຫຼືອພຽງ 0,6% ຊຶ່ງ ແມ່ນລະດັບຕ່ຳສຸດໃນ 15 ປີທີ່ຜ່ານມາ. ມີຫຼາຍຕົວເລກຄາດໝາຍອື່ນ ກໍບັນລຸລະດັບສູງຄື ການຜະລິດອຸດສາຫະກຳໄດ້ເຕີບໂຕແຮງ, ຄຸນນະພາບສີນເຊື່ອເພີ່ມຂຶ້ນອັດຕາແລກປ່ຽນເງິນຕາໄດ້ຮັບການດັດປັບໃຫ້ເໝາະສົມ, ຕະຫຼາດເງິນຕາຕ່າງປະເທດເປັນປົກກະຕິໂດຍພື້ນຖານ, ການສົ່ງອອກສາມາດຮັກສາທ່າເຕີບໂຕສູງ, ການສະສົມເງິນຕາຕ່າງປະເທດບັນລຸລພດັບສູງສຸດນັບແຕ່ກ່ອນເປັນຕົນມາ. ບັນດາຂົງເຂດວັດທະນະທຳ, ສັງຄົມມີບາດກ້າວຂະຫຍາຍຕົວ, ຊີວິດການເປັນຢູ່ຂອງປະຊາຊົນສືບຕໍ່ໄດ້ຮັບການປົວແປງ.
ປີ ມະແມ 2015 ກໍເປັນຂີດໝາຍກ່ຽວກັບປີໜຶ່ງທີ່ຫວຽດນາມສາມາດບັນລຸຜົນສຳເລັດທີ່ດີງາມໃນຂົງເຂດການຕ່າງປະເທດ, ທັງໃນຂອບເຂດ 2 ຝ່າຍ ແລະ ຫຼາຍຝ່າຍ. ຈຸດທີ່ພົ້ນເດັ່ນຂຶ້ນ ແມ່ນຫວຽດນາມໄດ້ຕັ້ງໜ້າຍູ້ແຮງການເຊື່ອມໂຍງເຂົ້າກັບສາກົນໃຫ້ຂຶ້ນສູ່ລະດັບສູງໃໝ່, ຖືຜົນປະໂຫຍດຂອງປະເທດຊາດເປັນ ເປົ້າໝາຍສູງສຸດ ແລະ ສ້າງສະພາບແວດລ້ອມທີ່ເອື້ອອຳນວຍຄວາມສະດວກໃຫ້ແກ່ການກໍ່ສ້າງ ແລະ ປົກປັກຮັກສາປະເທດຊາດ. ສິ່ງທີ່ພິເສດແມ່ນຫວຽດນາມໄດ້ພ້ອມກັບບັນດາປະເທດອາຊຽນສ້າງຕັ້ງປະຊາຄົມອາຊຽນ, ເປີດແງ່ຫວັງທີ່ສະຫວ່າງສະໄຫວ ແລະ ວັດທະນາຖາວອນລວມໃຫ້ທັງພາກພື້ນ. ຫວຽດນາມກໍໄດ້ສຳເລັດການເຈລະຈາສັນຍາການຄ້າເສລີກັບສະຫະພັນເສດຖະກິດອາຊີ-ເອີລົບ, ລົງນາມໃນສັນຍາການຄ້າເສລີກັບ ສ.ເກົາຫຼີ, ສຳເລັດການເຈລະຈາສັນຍາຄູ່ຮ່ວມມືຂ້າມປາຊີຟິກ TPP ກັບ 11 ຄູ່ຮ່ວມມືໃນພາກພື້ນອາຊີ-ປາຊີຟິກ, ອັນໄດ້ເປີດແງ່ຫວັງດ້ານເສດຖະກິດ, ການຄ້າທີ່ສະຫວ່າງສະໄຫວໃຫ້ແກ່ພື້ນຖານເສດຖະກິດຫວຽດນາມ.
ດ້ວຍບັນດາໝາກຜົນດັ່ງກ່າວ, ຊາວຫວຽດນາມຕ້ອນຮັບລະດູບານໃໝ່ປີວອກດ້ວຍບັນດາກາລະໂອກາດ ແລະ ບັນດາສິ່ງທ້າທາຍບົນເສັ້ນທາງເຊື່ອມໂຍງເຂົ້າກັບສາກົນ ແລະ ພັດທະນາ. ນັບແຕ່ນີ້ເປັນຕົ້ນໄປ, ຫວຽດນາມຈະເຊື່ອມຕໍ່ກັບພື້ນຖານເສດຖະກິດທົ່ວໂລກຢ່າງໜັກແໜ້ນກວ່າ ດ້ວຍການພັດທະນາການຜະລິດ, ເປີດກ້ວາງຕະຫຼາດສົ່ງອອກ, ດຶງດູດການລົງທຶນໂດຍກົງຈາກຕ່າງປະເທດ ຫຼາຍຂຶ້ນ, ສ້າງວຽກເຮັດງານທຳຫຼາຍຂຶ້ນອີກ… ມື້ຕໍ່ມື້, ຊາວຫວຽດນາມສືບຕໍ່ສູ້ຊົນຢ່າງບໍ່ຢຸດຢັ້ງເພື່ອສ້າງບັນດາປະຖົມປັດໄຈດ້ານວັດຖຸໃຫ້ແກ່ການແຜ່ຂະຫຍາຍບັນດາຄຸນຄ່າຫວຽດນາມ. ນັ້ນແມ່ນ : ເຊື່ອມໂຍງເຂົ້າກັບສາກົນເພື່ອພັດທະນາໄວກ່ວາ, ຍືນຍົງກວ່າ, ເຊື່ອມໂຍງເຂົ້າກັບສາກົນເພື່ອກໍ່ສ້າງປະເທດຫວຽດນາມແຫ່ງສັນຕິພາບ ແລະ ຮັ່ງມີເຂັ້ມແຂງ.
ກາລະໂອກາດອັນໃຫຍ່ຫຼວງກ່ຽວກັບເຊື່ອມໂຍງເຂົ້າກັບສາກົນ ແລະ ພັດທະນາປະເທດຊາດ ໃນລະດູບານໃໝ່ປີນີ້ ແມ່ນເລີ່ມມາຈາກຈຸດເວລາກ່ອນນີ້ 30 ປີ, ຂະນະທີ່ພັກກອມມູນິດຫວຽດນາມປະຕິບັດການປ່ຽນແປງໃໝ່ເມື່ອປີ 1986. ປີວອກ 2016 ນີ້, ກິດຈະການປ່ຽນແປງໃໝ່ ຈະມີພະລັງຊີວິດໃໝ່ ຂະນະທີ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມໄດ້ມີບັນດາລັດຖະນະໂຍບາຍໃໝ່ເພື່ອເຍືອງທາງ ກະຕຸກຊຸກຍູ້ທົ່ວທັງຊາດຫວຽດນາມສືບຕໍ່ກ້າວຂຶ້ນບົນເສັ້ນທາງຂອງຕົນ. ພ້ອມກັນນັ້ນ, ບັນດາສັນຍາການຄ້າເສລີ ຍັງຈະເປີດຊ່ອງທາງອອກສູ່ທະເລເພື່ອໃຫ້ພື້ນຖານເສດຖະກິດຫວຽດນາມເຊື່ອມໂຍງເຂົ້າກັບສາກົນ.
ລະດູບານໃໝ່ປີນີ້ ຍິ່ງມີຄວາມໝາຍ, ເພາະວ່າ ນີ້ແມ່ນລະດູບານໃໝ່ທຳອິດທີ່ປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ, ແລະ ກໍແມ່ນລະດູບານໃໝ່ທຳອິດທີ່ຫວຽດນາມປະຕິບັດແຜນການພັດທະນາເສດຖະກິດສັງຄົມໄລຍະ 5 ປີ 2016-2021 ດ້ວຍເປົ້າໝາຍປ່ຽນແປງໃໝ່ຮູບແບບການເຕີບໂຕ, ເຂົ້າຮ່ວມລະບົບການຜະລິດທົ່ວໂລກຢ່າງເລິກເຊິ່ງກ້ວາງຂວາງ.
ໂດຍມີພະລັງຊີິວິດລະດູບານໃໝ່ຂອງ 30 ປີແຫ່ງການປ່ຽນແປງໃໝ່, ຫວຽດນາມພວມຫັນປ່ຽນຢ່າງແຂງແຮງໃນກິດຈະການເຊື່ອມໂຍງເຂົ້າກັບສາກົນ.
ປ່ຽນແປງໃໝ່, ການ ເຊື່ອມໂຍງເຂົ້າກັບສາກົນຈະແຂງແຮງກວ່ານັບແຕ່ລະດູບານໃໝ່ປີນີ້ເປັນຕົ້ນໄປ.