ແຕ່ລະປີເມື່ອລະດູບານໃໝ່, ບຸນເຕັດວຽນມາ, ເຂົ້າຕົ້ມຂຽວແມ່ນອາຫານເຍື່ອງໜຶ່ງທີ່ຂາດບໍ່ໄດ້ໃນພາເຂົ້າເພື່ອຖະຫວາຍບູຊາບັນພະບຸລຸດໃນບັນດາຄອບຄົວຊາວຫວຽດນາມ. ດ້ວຍຄວາມຫວັງນຳຄວາມເບີກບານມ່ວນຊື່ນມາສູ່ຫຼາຍຄົນທີ່ມີສະພາບຄອບຄົວຫຍຸ້ງຍາກ. ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າຫວຽດນາມ, ກະຊວງວັດທະນະທຳ-ກິລາ ແລະ ທ່ອງທ່ຽວໄດ້ສົມທົບກັບຫຼາຍຫົວໜ່ວຍຈັດຕັ້ງລາຍການ“ຫໍ່ເຂົ້າຕົ້ມເພື່ອພ້ອມກັບຜູ້ທຸກຍາກຕ້ອນຮັບບຸນເຕັດ” ປີ 2016 ດ້ວຍຫົວຂໍ້ “ ເຕົ້າໂຮມກັນຕ້ອນຮັບລະດູບານໃໝ່, ແບ່ງທຸກແບ່ງສຸກໃນບຸນເຕັດ” . ລາຍການດັ່ງກ່າວຖືກຈັດຂຶ້ນໃນວັນທີ 30 ແລະ 31/1 ກົງກັບວັນທີ 21 ແລະ 22 ເດືອນ 12 ໄລ່ຕາມຈັນທະປະຕິທິນ.
ລາຍການ“ຫໍ່ເຂົ້າຕົ້ມເພື່ອພ້ອມກັບຜູ້ທຸກຍາກຕ້ອນຮັບບຸນເຕັດ” |
ແຕ່ 7 ໂມງເຊົ້າ, ມີປະມານ 500 ຄົນໄດ້ພາກັນມາເຕົ້າໂຮມຢູ່ສະໜາມຫຼວງ ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າຫວຽດນາມ ທີ່ດົງໂມ, ເຊີນໄຕເພື່ອເຂົ້າຮ່ວມການຫໍ່ເຂົ້າຕົ້ມ. ເຂົ້າຮ່ວມລາຍການຫໍ່ເຂົ້າຕົ້ມປີນີ້ ມີບັນດາພຸດທະສາສະນິກກະຊົນຢູ່ວັດ ຟາບເວີນ-ຮ່າໂນ້ຍ, ວັດຄາຍງວຽນ, ຊາວໜຸ່ມເທດສະບານເຊີນໄຕ ແລະ ບັນດາຕາແສງອ້ອມຂ້າງ. ເພື່ອຫໍ່ໄດ້ເຂົ້າຕົ້ມທີ່ແຊບ ແລະ ງາມນັ້ນ, ຄະນະຈັດຕັ້ງໄດ້ເຊື້ອເຊີນບັນດານັກສິລະປະການໃນໝູ່ບ້ານອາຊີບ ເອືອກເລ້, ຕາແສງເຕີນເອືອກ, ຮ່າໂນ້ຍ ມາແນະນຳວິທີຫໍ່ເຂົ້າຕົ້ມ. ທຸກໆຄົນຕ່າງກໍເບີກບານມ່ວນຊື່ນ, ຄົນລະວຽກ, ຜູ້ລ້າງໃບຕອງຈິງ, ຜູ້ເຊິເຂົ້າ, ຖົ່ວຂຽວ, ຜູ້ຕັດຊອຍຊີ້ນໝູ…ນ້ອງເຈີນຈຸກລິງ, ເປັນນັກຮຽນທີ່ໄດ້ເຂົ້າຮ່ວມລາຍການຫໍ່ເຂົ້າຕົ້ມ ເວົ້າວ່າ :
“ ນ້ອງດີໃຈຫຼາຍ ແລະ ມ່ວນຊື່ນທີ່ສຸດເພາະໄດ້ເຂົ້າຮ່ວມການລາຍການຫໍ່ເຂົ້າຕົ້ມ. ຜ່ານນີ້ ນ້ອງກໍສາມາດເຂົ້າໃຈກ່ຽວກັບປະເພນີຂອງປະເທດຫວຽດນາມ ແມ່ນຮອດຍາມບຸນເຕັດ ກໍຕ້ອງຫໍ່ເຂົ້າຕົ້ມເພື່ອຕ້ອນຮັບບຸນເຕັດ. ນີ້ແມ່ນການເຄື່ອນໄຫວທີ່ມີຄວາມໝາຍເພື່ອຊວ່ຍເຫຼືອພວກນ້ອງນັກຮຽນທຸກຍາກ ”
ເຂົ້າຕົ້ມຫຼາຍຫໍ່ດ້ວຍຮູບ 4 ລຽມທີ່ງາມຕາ ພາຍຫຼັງຖືກຫໍ່ສຳເລັດແລ້ວ, ກໍຖືກນຳເອົາໃສ່ໝໍ້ໃຫຍ່ ເພື່ອນຳໄປຄ້າງເຕົາໄຟຖືກຕັ້ງຢູ່ບ່ອນໃກ້ກັບສະໜາມຫຼວງ. ຕາມເພື່ອນ ເຈີນວັນຕ້ວນ ຊາວໜຸ່ມຢູ່ເທດສະບານເຊີນໄຕແລ້ວ, ນີ້ແມ່ນການເຄື່ອນໄຫວເພື່ອໃຫ້ຊາວຫວຽດນາມລຸ່ນຕ່າງໆສະແດງນ້ຳໃຈສາມັກຄີ, ອຸ້ມຊູຊ່ວຍເຫຼືອຊຶ່ງກັນ ແລະ ກັນ, ປະກອບສ່ວນສືບທອດ ແລະ ເສີມຂະຫຍາຍມູນເຊື້ອອັນດີງາມຂອງຊາດຫວຽດນາມ. ເພື່ອນ ເຈີນວັນຕ້ວນ ໃຫ້ຮູ້ວ່າ :
“ ເນື່ອງໂອກາດປີໃໝ່ ໃກ້ວຽນມາຮອດ, ພວກຂ້າພະເຈົ້າໄດ້ເຂົ້າຮ່ວມລາຍການດ້ວຍຄວາມຫວັງຢາກແບ່ງປັນ ແລະ ປະກອບສ່ວນໃດໜຶ່ງເພື່ອຊ່ວຍເຫຼືອຄົນເຈັບຜູ້ທຸກຍາກ. ຜ່ານນັ້ນ, ພວກຂ້າພະເຈົ້າ ກໍມີຄວາມຫວັງຢາກໃຫ້ບັນດາຊາວໜຸ່ມມີການປະກອບສ່ວນ ແລະ ແບ່ງປັນກັບຜູ້ທຸກຍາກ”
ໃນຕອນເຊົ້າວັນທີ 31/1 ເຂົ້າຕົ້ມຫຼາຍຫໍ່ ແລະ ຂອງຂວັນບຸນເຕັດຫຼາຍພູດໄດ້ຖືກສົ່ງຮອດມືບັນດາທະຫານເສຍອົງຄະ, ທະຫານເຈັບເປັນ, ເດັກກຳພ້າກຳພອຍ, ເດັກທີ່ມີສະພາບຄອບຄົວຫຍຸ້ງຍາກຢູ່ບັນດາແຂວງ: ເຊີນລາ, ຮ່າຢາງ, ກາວບັງ ແລະ ບັນດາຜູ້ຮັບເຄາະຮ້າຍຈາກສານພິສີສົ້ມ/ດິໂອຊິນ. ທ່ານສາດສະດາຈານ, ດຣ ຫງວຽນຫງອກຊິງ ປະທານສະມາຄົມຮັກສາທຳມະຊາດ ແລະ ສິ່ງແວດລ້ອມຫວຽດນາມ ຊຶ່ງແມ່ນຫົວໜ່ວຍຮ່ວມຈັດຕັ້ງລາຍການໃຫ້ຮູ້ວ່າ :
“ ພວກຂ້າພະເຈົ້າພາກພູມໃຈເປັນຢ່າງຍິ່ງເມື່ອເຫັນວ່າ ໃນພາເຂົ້າຂອງຫຼາຍໆຄອບຄົວ ມີເຂົ້າຕົ້ມຕື່ມອີກເພື່ອພ້ອມກັບບັນດາຜູ້ທກຍາກຕ້ອນຮັບບຸນປີໃໝ່ປະຈຳຊາດ. ພວກຂ້າພະເຈົ້າເຫັນວ່າ ຈະມີຫຼາຍຄອບຄົວອື່ນມີຄວາມອົບອຸ່ນ ແລະ ເບີກບານມ່ວນຊື່ນຍ້ອນຈິດໃຈຂອງເຫດການນີ້ນຳມາໃຫ້. ຂ້າພະເຈົ້າຫວັງວ່າ ບັນດາເຫດການເຊັ່ນດຽວກັນຈະຖືກກະຊວງວັດທະນະທຳ-ກິລາ ແລະ ທ່ອງທ່ຽວສົມທົບກັບໝູ່ບ້ານວັດທະນະທຳບັນດາເຜົ່າຫວຽດນາມຈັດຕັ້ງຂຶ້ນ ແລະ ໄດ້ຮັບການຕອບສະໜອງຈາກປະຊາຊົນໃນຊຸມປີທີ່ຈະມາເຖິງ”
ເພື່ອສ້າງບັນຍາກາດບຸນເຕັດໃຫ້ມີຄວາມມ່ວນຊື່ນ, ມີຄົບທຸກຢ່າງ, ຄະນະຈັດຕັ້ງລາຍການພ້ອມກັບພໍ່ແມ່ປະຊາຊົນບັນດາເຜົ່າ ກໍໄດ້ຕັ້ງຕົ້ນໄມ້ໄຜ່ໃຫຍ່ ເພື່ອໄຫວ້ບູຊາເທວະດາຟ້າແຖນ, ພ້ອມທັງສະແດງໃຫ້ເຫັນຫຼັກສິນທຳ “ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ ” ແລະຫວັງວ່າສິ່ງທີ່ບໍ່ຈົບບໍ່ງາມໃນປີເກົ່າ ຈະສູນຫາຍໄປ,ທຸກໆຄົນໄດ້ຕ້ອນຮັບບຸນເຕັດໃນທ່າມກາງຄວາມສະຫງົບສຸກ.
ໃນຊຸມມື້ໃກ້ຈະຮອດບຸນເຕັດ, ປະຊາຊົນພາກເໜືອຫວຽດນາມພວມຜ່າຍຜ່າອາກາດໜາວຈັດໃນລະດູໜາວ, ແຕ່ຢູ່ໝູ່ບ້ານວັດທະນະທຳ-ທ່ອງທ່ຽວບັນດາເຜົ່າຫວຽດນາມ, ໃຜໆກໍຮູ້ສຶກມີຄວາມອົບອຸ່ນແທ້. ແຕ່ລະຄົນ ຕ່າງກໍເບີກບານໃຈ ເພາະໄດ້ມີການປະກອບສ່ວນເພື່ອນຳບຸນເຕັດແຫ່ງຄວາມອົບອຸ່ນມາສູ່ບັນດາຜູ້ປະສົບກັບຄວາມຫຍຸ້ງຍາກ.