(vovworld) - ເພື່ອບັນລຸຄາດໝາຍກາຍເປັນປະເທດອຸດສາຫະກຳ ແລະ ທັນສະໄໝໃນປີ 2020 ໃຫ້ໄດ້ນັ້ນ, ພ້ອມກັບຄວາມມານະພະຍາຍາມຂອງຕົນ, ຫວຽດນາມ ຍັງຕ້ອງການໄດ້ຮັບການໜູນຊ່ວຍຈາກປະຊາຄົມໂລກ, ໃນນັ້ນມີແຫຼ່ງກຳລັງສຳຄັນຂອງບັນດາອົງການບໍ່ຂຶ້ນກັບລັດຖະບານຕ່າງປະເທດ. ສືບຕໍ່ໜູນຊ່ວຍຫວຽດນາມ ພັດທະນາຢ່າງໝັ້ນຄົງກວ່າອີກ, ແມ່ນຄຳໝັ້ນສັນຍາຂອງບັນດາອົງການຈັດຕັ້ງບໍ່ຂຶ້ນກັບລັດຖະບານຕ່າງປະເທດໃນໄລຍະຈະມາເຖິງ.
Oxfam ສະເຫຼີມສະຫຼອງ 40 ປີ ແຫ່ງການເຄື່ອນໄຫວຢູ່ຫວຽດນາມ
(ພາບ: ອິນເຕີແນດ)
ໃນ 10 ປີຜ່ານມາ, ຈຳນວນອົງການຈັດຕັ້ງບໍ່ຂຶ້ນກັບລັດຖະບານທີ່ມີໜ້າຢູ່ຫວຽດນາມ ໄດ້ເພີ່ມຂຶ້ນທົບສອງເທົ່າ, ດ້ວຍມູນຄ່າຊ່ວຍເຫຼືອເພີ່ມຂຶ້ນທົບ 3 ເທົ່າ. ບັນດາອົງການຈັດຕັ້ງນີ້ໄດ້ເຄື່ອນໄຫວໃນຫຼາຍຂົງເຂດທີ່ແທດຈິງ ແລະ ມີຄວາມໝາຍໃນການລົບລ້າງຄວາມອຶດຫີວ ຫຼຸດຜ່ອນຄວາມທຸກຍາກ ແລະ ພັດທະນາເສດຖະກິດ - ສັງຄົມຂອງຫວຽດນາມ.
ບັນດາໂຄງການແທດຈິງຢູ່ຫວຽດນາມ
Oxfam ແມ່ນໜຶ່ງໃນບັນດາອົງການບໍ່ຂຶ້ນກັບລັດຖະບານສາກົນແຖວໜ້າທີ່ເຄື່ອນໄຫວໃນບັນດາຂົງເຂດພັດທະນາກະສີກຳ, ໜູນຊ່ວຍມະນຸດສະທຳ ແລະ ຫຼຸດຜ່ອນຄວາມສ່ຽງຈາກໄພທຳມະຊາດ. ດ້ວຍທິດນຳ: ສ້າງເງື່ອນໄຂໃຫ້ຊາວຫວຽດນາມ ທຸກຄົນ, ພິເສດແມ່ນແມ່ຍິງພັດທະນາ. ໃນຫຼາຍປີຜ່ານມາ, Oxfam ໄດ້ເຮັດວຽກກັບບັນດາຄູ່ຮ່ວມມືຢູ່ທ້ອງຖີ່ນຕ່າງໆຂອງຫວຽດນາມ, ພິເສດແມ່ນເອົາໃຈໃສ່ເຖິງປະຊາຄົມຜູ້ທຸກຍາກ ແລະ ຊາວຊົນເຜົ່າສ່ວນໜ້ອຍ, ໂດຍຜ່ານບັນດາຮູບແບບພັດທະນາການດຳລົງຊີວິດ, ຮັບມືກັບການປ່ຽນແປງຂອງດິນຟ້າອາກາດ ແລະ ຫຼຸດຜ່ອນໄພທຳມະຊາດ. ທ່ານ Andy Baker, ຜູ້ອຳນວຍການອົງການ Oxfam ຢູ່ຫວຽດນາມ, ຢືນຢັນວ່າ:
“ພວກຂ້າພະເຈົ້າໃຫ້ຄຳໝັ້ນສັນຍາຈະສືບຕໍ່ໜູນຊ່ວຍໂດຍກົງ ຫຼືໂດຍທາງອ້ອມຜູ້ທີ່ທຸກຍາກ, ຮັບປະກັນຊີວິດໃຫ້ຜູ້ທີ່ທຸກຍາກຢູ່ເຂດຫ່າງໄກສອກຫຼີກ ແລະ ບັນດາເຂດເຄີຍຖືກໄພທຳມະຊາດ. ຍຸດທະສາດຂອງພວກຂ້າພະເຈົ້າໃນໄລຍະຈະມາເຖິງແມ່ນສຸມໃສ່ພັດທະນາການດຳລົງຊີວິດຢູ່ເຂດຊົນນະບົດ, ຍົກສູງກຳລັງຄວາມສາມາດຂອງປະຊາຄົມ, ຍ້ອນການກະທົບຢ່າງຫຍໍ້ທໍ້ຈາກການປ່ຽນແປງຂອງດິນຟ້າອາກາດ ແລະ ໄພທຳມະຊາດ, ເພີ່ມຄວາມສາມາດໃນການຮັບມື, ກຽມພ້ອມປ້ອງກັນ, ຮັບມືຢ່າງມີປະສິດທິຜົນເມື່ອໄພທຳມະຊາດເກີດຂຶ້ນ“.
ໂດຍມີໜ້າຢູ່ຫວຽດນາມແຕ່ຊຸມປີ 90 ຂອງສະຕະວັດທີ 20, ອົງການຊ່ວຍເຫຼືອເດັກໄດ້ເຄື່ອນໄຫວໃນຫຼາຍຂົງເຂດຄື: ສຸຂະພາບ, ການສຶກສາ, ທາດບຳລຸງລ້ຽງ, ການຊ່ວຍເຫຼືອດ່ວນ ແລະ ເດັກນ້ອຍຫວຽດນາມ. ໃນ 2 ປີຜ່ານມາ, ໄພທຳມະຊາດເກີດຂຶ້ນຢ່າງຕໍ່ເນື່ອງຢູ່ພາກກາງຫວຽດນາມ, ອົງການຊ່ວຍເຫຼືອເດັກ ແມ່ນໜຶ່ງໃນບັນດາອົງການທີ່ໄດ້ມີການໜູນຊ່ວຍຢ່າງທັນການ ແລະ ມີປະສິດິຜົນ. ຕາມທ່ານ Gunnar F. Andersen, ຜູ້ອຳນວຍການອົງການຊ່ວຍເຫຼືອເດັກ ແລ້ວ, ການຊ່ວຍເຫຼືອມະນຸດສະທຳ, ຊ່ວຍເຫຼືອເດັກນ້ອຍ ແລະ ຄອບຄົວແກ້ໄຂຜົນຮ້າຍຢ້ອນຫຼັງຈາກໄພທຳມະຊາດ ເພື່ອກັບຄືນສູ່ຊີວິດເປັນປົກກະຕິນັ້ນ ແມ່ນໜຶ່ງໃນບັນດາຄາດໝາຍ ແລະ ໜ້າທີ່ບຸລິມາສິດຂອງອົງການຊ່ວຍເຫຼືອເດັກຢູ່ຫວຽດນາມ. ກ່ຽວກັບການເຄື່ອນໄຫວໃນໄລຍະຈະມາເຖິງ, ທ່ານ Gunnar F. Andersen ແບ່ງປັນວ່າ:
“ໃນໄລຍະຈະມາເຖິງ, ພວກຂ້າພະເຈົ້າຢາກສຸມໃສ່ເຖິງໝູ່ເດັກນ້ອຍຢູ່ເຂດຫ່າງໄກສອກຫຼີກ, ຄຽງຂ້າງນັ້ນ, ການເຕີບໂຕທາງດ້ານເສດຖະກິດຂອງຫວຽດນາມ ໃນໄລຍະຜ່ານມາ, ກໍ່ເຮັດໃຫ້ສະພາບຫັນເປັນຕົວເມືອງນັບມື້ນັບໄວ, ສິ່ງດັ່ງກ່າວກໍ່ເປັນການທ້າທາຍໃໝ່. ຂ້າພະເຈົ້າຖືວ່າ, ນັ້ນກໍ່ແມ່ນບັນດາຂົງເຂດ ເຊິ່ງພວກຂ້າພະເຈົ້າຈະເຮັດໃນໄລຍະຈະມາເຖິງ ແລະ ຈຳເປັນຕ້ອງໄດ້ຮັບການຮ່ວມມືຈາກລັດຖະບານຫວຽດນາມ ເພື່ອໃຫ້ການເຄື່ອນໄຫວຂອງໂຄງການນັບມື້ນັບມີປະສິດທິຜົນກວ່າອີກ“.
ສ່ວນອົງການມະນຸດສະທຳ Planສາກົນ International, ໄດ້ເຄື່ອນໄຫວຢູ່ຫວຽດນາມ ນັບແຕ່ປີ 1993, ດ້ວຍມາດຖານເຄື່ອນໄຫວໃນໄລຍະຈະມາເຖິງ ແມ່ນຊ່ວຍເຫຼືອເດັກອາພັບໃນທົ່ວປະເທດຫວຽດນາມ, ພິເສດແມ່ນເດັກຊົນເຜົ່າສ່ວນໜ້ອຍຢູ່ເຂດພູດອຍ, ກໍ່ຄືສ້າງຄວາມສະເໝີພາບໃຫ້ແກ່ເດັກຍິງກວ່າອີກ. ທ່ານ Glenn Gibney, ຜູ້ອຳນວຍການອົງການ Planສາກົນ International ປະຈຳຫວຽດນາມ, ໃຫ້ຮູ້ວ່າ:
“ປະຈຸບັນ, ພວກຂ້າພະເຈົ້າພວມປະຕິບັດໂຄງການຢູ່ 10 ແຂວງ, ນະຄອນຂອງຫວຽດນາມ, ໂດຍສຸມໃສ່ຍົກສູງສິດຂອງເດັກໃຫ້ຊາວໜຸ່ມເຍົາວະຊົນ. ໃນ 10 ແຂວງ ແລະ ນະຄອນດັ່ງກ່າວ, ຮ່າໂນ້ຍ ແມ່ນທ້ອງຖີ່ນທີ່ພວກຂ້າພະເຈົ້າສຸມໃສ່ຊຸກຍູ້ສິດຂອງເດັກຍິງ. ພິເສດ, ພວກຂ້າພະເຈົ້າພວມມີບັນດາລາຍການຢູ່ເຂດຫ່າງໄກສອກຫຼີກ. ງົບປະມານຂອງພວກຂ້າພະເຈົ້າຖືກສົ່ງໂດຍກົງເຖິງບັນດາເປົ້າໝາຍຂອງໂຄງການ 80%“.
ເພື່ອຈຸດໝານພັດທະນາຢ່າງໝັ້ນຄົງ
ຈາກໜຶ່ງໃນບັນດາປະເທດທຸກຍາກກວ່າໝູ່ຢູ່ໂລກ, ປະຈຸບັນ, ຫວຽດນາມ ໄດ້ກາຍເປັນປະເທດທີ່ມີລາຍຮັບປານກາງ. ຫວຽດນາມ ກໍ່ບັນລຸໄດ້ 5/8 ຄາດໝາຍພັດທະນາສະຫັດສະວັດໃນປີ 2015. ບັນດາຜົນງານດັ່ງກ່າວ, ສ່ວນໜຶ່ງແມ່ນຍ້ອນມີການຊ່ວຍເຫຼືອຢ່າງມີຄວາມໝາຍຈາກບັນດາອົງການບໍ່ຂຶ້ນກັບລັດຖະບານຕ່າງປະເທດ ແລະ ເພື່ອນມິດສາກົນ, ອັນໄດ້ປະກອບສ່ວນເຮັດໃຫ້ຊີວິດທາງດ້ານເສດຖະກິດ - ສັງຄົມມີການປ່ຽນແປງ.
ແຕ່ໃນວິວັດການພັດທະນາ, ເພື່ອກາຍເປັນປະເທດອຸດສາຫະກຳ ແລະ ທັນສະໄໝໃນປີ 2020, ຫວຽດນາມ ຕ້ອງປະສົບກັບການທ້າທາຍຫຼາຍຢ່າງ, ໃນສະພາບນັ້ນ, ການໃຫ້ຄຳໝັ້ນສັນຍາຊ່ວຍເຫຼືອຂອງບັນດານັກອຸປະຖຳ, ບັນດາອົງການບໍ່ຂຶ້ນກັບລັດຖະບານຕ່າງປະເທດປະຈຳຫວຽດນາມ ຈະແມ່ນແຫຼ່ງກຳລັງທີ່ສຳຄັນ, ຊ່ວຍຫວຽດນາມ ບັນລຸຄາດໝາຍພັດທະນາແບບຍືນຍົງຢ່າງໄວກວ່າ.