(vovworld)- ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບຄຳຖາມຂອງທ່ານຜູ້ຟັງຝາກເຖິງລາຍການລາວໃນອາທິດຜ່ານມາ.
ເພື່ອນ ກາບແກ້ວ, ແຂວງ ຊຽງຂວາງ ໄດ້ຝາກຈົດໝາຍມາຍັງລາຍການພາກພາສາລາວ ໂດຍຖາມວ່າ: “ດັ່ງທີ່ພວກເຮົາໄດ້ຮູ້ນຳກັນແລ້ວວ່າ, ແຂວງ ຊຽງຂວາງນອນໃນເຂດພື້ນທີ່ສູງ ດັ່ງນັ້ນມີອາກາດໜາວເຢັນຕະຫຼອດປີ ແລະ ອີກດ້ານໜຶ່ງແມ່ນຍ້ອນຄຸນນະພາບຂອງດິນບໍ່ດີປານໃດ ດັ່ງນັ້ນການປູກຝັງຢູ່ທີ່ນີ້ກໍບໍ່ອຸດົມສົມບູນ. ແຕ່ວ່າ ຫວ່າງມໍ່ໆມານີ້ໝູ່ຂອງຂ້າພະເຈົ້າໄດ້ເລົ່າສູ່ຟັງວ່າ, ຢູ່ ຫວຽດນາມກໍ່ມີທ້ອງຖີ່ນຕັ້ງໃນເຂດພື້ນທີ່ສູງພໍສົມຄວນ ແລະ ອາກາດກໍ່ໜາວເຢັນຕະຫຼອດປີແຕ່ການປູກພືດກະສິກຳຢູ່ທີ່ນີ້ພັດອຸດົມສົມບູນຫຼາຍ, ນັ້ນແມ່ນ ດ່າລາດ. ຂ້າພະເຈົ້າຢາກຮູ້ຂໍ້ມູນກ່ຽວກັບເຂດດິນແຫ່ງນີ້ໄດ້ບໍ່?”
ເພື່ອນ ກາບແກ້ວ ທີ່ຮັກແພງ, ນະຄອນ ດ່າລາດ ແມ່ນເມືອງເອກຂອງແຂວງ ເລີມດົ່ງ, ນອນໃນເຂດພູພຽງ ເລີມວຽນ, ຂຶ້ນກັບເຂດໄຕງວຽນຂອງ ຫວຽດນາມ. ດ້ວຍລະດັບຄວາມສູງ 1.500 ມ ເມື່ອທຽບໃສ່ໜ້ານ້ຳທະເລ ແລະ ອ້ອມຮອບດ້ວຍບັນດາສາຍພູ ແລະ ພ້ອມດ້ວຍລະບົບພືດພັນທັນຍາຫານຕ່າງ ດັ່ງນັ້ນ ດ່າລາດ ຈຶ່ງມີອາກາດໜາວເຢັນຕະຫຼອດປີ. ດ່າລາດມີ 2 ລະດູນັ້ນແມ່ນລະດູແລ້ງ ແລະ ລະດູຝົນ. ລະດູຝົນເລີ່ມແຕ່ເດືອນ 5 ຫາເດືອນ 10. ສ່ວນລະດູແລ້ງແມ່ນແກ່ຍາວແຕ່ເດືອນ 11 ຫາເດືອນ 4 ຂອງປີຕໍ່ໄປ. ດ້ວຍເງື່ອນໄຂທຳມະຊາດ ແລະ ດິນຟ້າອາກາດຄືແນວນັ້ນ ດ່າລາດ ຈຶ່ງພັດທະນາການປູກແນວພັນພືດສຳລັບເຂດໜາວ. ແນວພັນຜັກເກືອບທຸກຊະນິດຂອງນະຄອນ ດ່າລາດແມ່ນຖືກນຳເຂົ້າຈາກ ຝຣັ່ງ, ເຢຍລະມັນ, ໂຮນລັງ, ຍີ່ປຸ່ນ, ອາເມລິກາ… ຜັກທີ່ເຄີຍປູກຫລາຍທີ່ສຸດນັບແຕ່ກ່ອນມາຮອດປະຈຸບັນແມ່ນຜັກກະລ່ຳປີ, ໃນນັ້ນປູກຫຼາຍກ່ວາໝູ່ແມ່ນແນວພັນຜັກກະລ່ຳຂອງ ຍີ່ປຸ່ນ, ທີ່ສາມາດປູກຕະຫຼອດປີໄດ້. ໃນເນື້ອທີ່ດິນປູກພືດຂອງ ດ່າລາດກໍ່ມີພືດຫຼາຍຊະນິດອື່ນໆອີກຄື: ມັນຝຣັ່ງ, ກາຣົດ, ຫົວບົ່ວໃຫຍ່, ໝາກຖົ່ວຍັດ… ດ່າລາດ ຍັງໄດ້ຮັບການຮັບຮູ້ວ່າ ແມ່ນເຂດດິນແດນຂອງດອກໄມ້ຊະນິດຕ່າງໆເຊັ່ນ: ດອກເໝີ້ຍຸ, ດອກກຸຫລາບ, ດອກກ້ວຍໄມ້, ດອກລີໆ… ນອກຈາກນັ້ນ, ດ່າລາດ ຍັງແມ່ນສະຖານທີ່ທ່ອງທ່ຽວທີ່ມີຊື່ສຽງ, ຖ້າຫາກມີໂອກາດເພື່ອນ ກາບແກ້ວ ຢ່າລືມໄປທ່ອງທ່ຽວຢູ່ເຂດດິນແດນທີ່ສວຍສົດງົດງາມນີ້ແດເດີ.
ພິທີມອບຂອງຂວັນໃຫ້ໂຮງຮຽນພອນສະຫວັນ ແລະ ຊົນເຜົ່າ |
ສ່ວນຈົດໝາຍຂອງເພື່ອນ ອຳພາວັນ, ນະຄອນຫຼວງວຽງຈັນ ທີ່ສົ່ງມາຍັງລາຍການໂດຍຖາມວ່າ: “ອາທິດຜ່ານມາ, ຢູ່ມະຫາວິທະຍາໄລແຫ່ງຊາດລາວ, ໄດ້ດຳເນີນການເຄື່ອນໄຫວມອບຂອງຂວັນຂອງ ຫວຽດນາມ ໃຫ້ໂຮງຮຽນ ພອນສະຫວັນ ແລະ ກຽມມະຫາວິທະຍາໄລ ຊົນເຜົ່າ ລາວ ແຕ່ຂ້າພະເຈົ້າບໍ່ຮູ້ເນື້ອໃນລະອຽດເທື່ອ. ຫວັງວ່າ: ລາຍການພາກພາສາ ລາວ ສະໜອງຂໍ້ມູນກ່ຽວກັບການເຄື່ອນໄຫວນີ້ ໃຫ້ຂ້າພະເຈົ້າຮັບຊາບໄດ້ບໍ່?”
ເພື່ອນ ອຳພາວັນ ທີ່ຮັກແພງ, ໃນວັນທີ 23/11 ຜ່ານມາ, ໂຮງຮຽນພອນສະຫວັນ ແລະ ກຽມມະຫາວິທະຍາໄລ ຊົນເຜົ່າ ລາວ ຂຶ້ນກັບມະຫາວິທະຍາໄລແຫ່ງຊາດ ລາວ ໄດ້ຈັດຕັ້ງພິທີຮັບຂອງຂວັນຂອງທ່ານນາງຮອງປະທານປະເທດ ຫວຽດນາມ ຫງວຽນທິຢວານ ຢ່າງສົມກຽດ. ທີ່ພິທີ, ໂດຍໄດ້ຮັບການມອບສິດຂອງທ່ານນາງຮອງປະທານປະເທດ ຫວຽດນາມ ຫງວຽນທິຢວານ, ທ່ານເອກອັກຄະລັດຖະທູດ ສສ ຫວຽດນາມ ປະຈຳ ລາວ ຫງວຽນແມ້ງຮູ່ງ ໄດ້ມອບຂອງຂວັນນີ້ໃຫ້ທ່ານນາງລັດຖະມົນຕີຊ່ວຍຕາງໜ້າໃຫ້ກະຊວງສຶກສາທິການ ແລະ ກິລາ ລາວ ແສງເດືອນ ຫຼ້າຈັນທະບູນ ແລະ ທ່ານ ຄຳພຸດ ພິມາສອນ, ຜູ້ຕາງໜ້າໃຫ້ໂຮງຮຽນພອນສະຫວັນ ແລະ ກຽມມະຫາວິທະຍາໄລ ຊົນເຜົ່າ ລາວ. ຂອງຂວັນລວມມີ ຄອມພິວເຕີ 25 ຊຸດ ດ້ວຍຍອດມູນຄ່າ 317 ລ້ານດົ່ງ ເພື່ອປະກອບໃຫ້ຫ້ອງສອນເຕັກໂນໂລຢີຂໍ້ມູນຂ່າວສານຂອງໂຮງຮຽນ. ທ່ານເອກອັກຄະລັດຖະທູດ ຫງວຽນແມ້ງຮູ່ງ ໄດ້ເນັ້ນໜັກວ່າ: ນີ້ແມ່ນຂອງຂວັນທີ່ສະແດງໃຫ້ເຫັນນ້ຳໃຈຂອງທ່ານນາງຮອງປະທານປະເທດ ຫງວຽນທິຢວານ ແລະ ປະຊາຊົນ ຫວຽດນາມ ທີ່ມີຕໍ່ປະຊາຊົນ ແລະ ພາລະກິດການສຶກສາຂອງລາວ. ທ່ານເອກອັກຄະລັດຖະທູດຫວັງວ່າ, ຂອງຂວັນນີ້ຈະໄດ້ຮັບການນຳໃຊ້ຢ່າງມີປະສິດທິຜົນ, ປະກອບສ່ວນຍົກສູງຄຸນນະພາບການຮຽນການສອນ, ຊ່ວຍໃຫ້ນັກຮຽນໄດ້ສຳພັດກັບບັນດາຄວາມຮູ້ກ່ຽວກັບເຕັກໂນໂລຢຂໍ້ມູນຂ່າວສານຢ່າງວ່ອງໄວ, ເລິກເຊິ່ງ ແລະ ໝັ້ນຄົງກ່ວາ, ນີ້ແມ່ນສິ່ງທີ່ສຳຄັນໃນໄລຍະປະຈຸບັນ. ຜູ້ອຳນວຍການໂຮງຮຽນ ຄຳພຸດ ພິມາສອນ, ຕາງໜ້າໃຫ້ຄະນະອຳນວຍການໂຮງຮຽນ ພ້ອມກັບຄູອາຈານ ແລະ ນັກຮຽນທຸກຄົນພາຍໃນໂຮງຮຽນ ໄດ້ຂອບອົກຂອບໃຈນ້ຳໃຈຂອງທ່ານນາງຮອງປະທານປະເທດ ຫງວຽນທິຢວານ ແລະ ປະຊາຊົນ ຫວຽດນາມ ທີ່ສະຫງວນໃຫ້ຄູອາຈານ ແລະ ນັກຮຽນຂອງໂຮງຮຽນ ແລະ ຢັ້ງຢືນວ່ານີ້ແມ່ນຂອງຂວັນທີ່ມີຄວາມໝາຍ ແລະ ແທດຈິງທີ່ສຸດ, ພ້ອມທັງໃຫ້ຄຳໝັ້ນສັນຍາຈະນຳໃຊ້ຂອງຂວັນເຫຼົ່ານີ້ຢ່າງມີປະສິດທິຜົນ, ປະກອບສ່ວນຍົກສູງຄຸນນະພາບການບຳລຸງສ້າງຂອງໂຮງຮຽນ.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນ ແລະ ຄຳຖາມຂອງຜູ້ຟັງບາງທ່ານທີ່ຝາກມາລາຍການໃນອາທິດຜ່ານມາ. ຖ້າຫາກ ຜູ້ຟັງ, ຜູ້ອ່ານທ່ານໃດມີຄວາມສົນໃຈຕໍ່ບັນຫາໃດໜຶ່ງ, ກໍ່ສາມາດຝາກຈົດໝາຍມາຍັງລາຍການພວກເຮົາໄດ້ເລີຍໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ. ຫຼືໂທລະສັບໂດຍກົງກໍ່ໄດ້ຕາມເບີໂທ 0084.43.8256631 ຫຼື ອີແມວ laovov@yahoo.com, laovov5@gmail.com.