(vovworld) - ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນຈົດໝາຍ ແລະ ຕອບຄຳຖາມທີ່ທ່ານຜູ້ຟັງຝາກມາລາຍການໃນອາທິດຜ່ານມາ.
ເພື່ອນ ວອນແສງ, ແຂວງ ບໍ່ແກ້ວ ໄດ້ຝາກ ອີແມວມາຍັງລາຍການໂດຍຖາມວ່າ: “ຄອບຄົວຂ້າພະເຈົ້າຢາກໄປທ່ຽວທະເລ ຫວຽດນາມ ແຕ່ ຫວຽດນາມ ມີຝັ່ງທະເລທີ່ຍາວຢ້ຽດ, ດັ່ງນັ້ນການເລືອກເຟັ້ນທະເລແຫ່ງທີ່ສວຍງາມ, ຈັບອົກຈັບໃຈ ແລະ ມີຄວາມມ່ວນຊື່ແມ່ນຍາກຫຼາຍ. ບັງເອີນ, ໃນອາທິດຜ່ານມາ, ຂ້າພະເຈົ້າໄດ້ຮັບຟັງຂ່າວກ່ຽວກັບ Festival ທະເລຍາຈາງ ແລະ ເຫັນວ່າໄດ້ໄປທ່ຽວທະເລ ຍາຈາງ ໃນຄາວນີ້ແມ່ນເໝາະສົມທີ່ສຸດ. ຂ້າພະເຈົ້າຂໍໃຫ້ຮູ້ຕື່ມອີກກ່ຽວກັບສະຖານທີ່ດັ່ງກ່າວແດ່.”
ພາບປະກອບ
|
ເພື່ອນ ວອນແສງ ທີ່ຮັກແພງ, ຍາຈາງ ແມ່ນນະຄອນແຄມທະເລ ແລະ ແມ່ນສູນການເມືອງ, ເສດຖະກິດ, ວັດທະນະທຳ, ວິທະຍາສາດ ເຕັກນິກ ແລະ ທ່ອງທ່ຽວຂອງແຂວງ ແຄ໋ງຮ່ວາ, ຂຶ້ນກັບເຂດແຄມທະເລຕອນໃຕ້ພາກກາງ ຫວຽດນາມ. ນີ້ແມ່ນໜຶ່ງໃນບັນດາຕົວເມືອງອັນດັບ 1 ສັງກັດແຂວງຂອງ ຫວຽດນາມ. ຍາຈາງ ໄດ້ຮັບການຂະໜານນາມວ່າແມ່ນເພັດມະນີຂອງທະເລຕາເວັນອອກ, ເພັດມະນີຂຽວຍ້ອນຄຸນຄ່າທຳມະຊາດ, ຄວາມງາມ ກໍ່ຄືອາກາດຂອງມັນ.
Festival ທະເລຍາຈາງ ແມ່ນງານບຸນຂະໜາດໃຫຍ່ທີ່ໄດ້ຮັບການຕອບສະໜອງຈາກແຂກທ່ອງທ່ຽວທົ່ວໂລກ, ດຳເນີນໄປໃນປີຄີກ ແລະ ຖືກຈັດຕັ້ງ 2 ປີ/ເທື່ອໜຶ່ງ. Festival ທະເລຍາຈາງ ປີ 2015 ດຳເນີນໃນລະຫວ່າງວັນທີ 11-14/7. ຄາດວ່າ, ຈະມີນັກທ່ອງທ່ຽວພາຍໃນ ແລະ ສາກົນມາຢ້ຽມຢາມ ແຄ໋ງຮ່ວາ ປະມານ 150.000 ເທື່ອຄົນ ແລະ ເຂົ້າຮ່ວມບັນດາການເຄື່ອນໄຫວຂອງ Festival ຄັ້ງນີ້. Festival ທະເລຍາຈາງ ປີ 2015 ລວມມີ 52 ລາຍການເຄື່ອນໄຫວດ້ານວັດທະນະທຳ, ກິລາ, ການດຳລົງຊີວິດໃນປະຊາຄົມ… ຜ່ານນັ້ນແນະນຳ, ເຊີດຊູບັນດາຄຸນຄ່າວັດທະນະທຳທີ່ເປັນມູນເຊື້ອ, ບັນດາສິ່ງຍອດຍິ່ງຂອງເຂດທະເລ ແລະ ປະຊາຊົນແຂວງ ແຄ໋ງຮ່ວາ ເວົ້າສະເພາະ ແລະ ຫວຽດນາມ ເວົ້າລວມ. ໃນນັ້ນມີການເຄື່ອນໄຫວຫຼາຍຢ່າງມຸ່ງໄປສູ່ອະທິປະໄຕເຂດທະເລ, ໝູ່ເກາະຂອງປະເທດຊາດຄື: ງານວາງສະແດງແຜນທີ່ ແລະ ວາງສະແດງເອກະສານ “ຮ່ວາງຊາ-ເຈື່ອງຊາຂອງຫວຽດນາມ-ບັນດາພະຍານຫຼັກຖານປະຫວັດສາດ ແລະ ນິຕິທຳ”; ກອງປະຊຸມສຳມະນາວິທະຍາສາດ “ວັດທະນະທຳທະເລໝູ່ເກາະ-ແຫຼ່ງກຳລັງພັດທະນາແບບຍືນຍົງ ແລະ ສຶກສາອະທິປະໄຕເຂດທະເລ, ໝູ່ເກາະໃນໂຮງຮຽນ”… ຫວັງວ່າ Festival ທະເລຍາຈາງ 2015 ຈະສ້າງຄວາມປະທັບໃຈອັນດີງາມໃຫ້ແກ່ຄອບຄົວຂອງເພື່ອນໃນການຢ້ຽມຢາມ ຫວຽດນາມ ຄັ້ງນີ້.
+++++
ໃນອາທິດ, ພວກຂ້າພະເຈົ້າກໍໄດ້ຮັບ ອີແມວຂອງ ນາງ ສຸດທະສອນ, ຢູ່ນະຄອນຫຼວງ ວຽງຈັນ, ດ້ວຍເນື້ອໃນວ່າ: “ຂ້າພະເຈົ້າມັກກິນໝາກລິ້ນຈີ່ຂອງ ຫວຽດນາມ ຫຼາຍ ຍ້ອນມັນມີລາຄາເໝາະສົມ, ມີນ້ຳຫຼາຍ, ແກ່ນນ້ອຍ, ເປືອກບາງ, ມີລົດຫວານ ແລະ ກິນຫອມພິເສດ. ເມື່ອຟັງຂ່າວຈາກ VOV, ຂ້າພະເຈົ້າກໍ່ຮູ້ວ່າປີນີ້ ຫວຽດນາມ ໄດ້ສົ່ງອອກໝາກລິ້ນຈີ່ ເຖິງຕະຫຼາດ ອາເມລິກາ, ຝຣັ່ງ ແລະ ອົດສະຕາລີ. ແນ່ນອນວ່າປະຊາຊົນຢູ່ບັນດາປະເທດນັ້ນກໍ່ນິຍົມລົດຊາດຂອງໝາກລິ້ນຈີ່ ຫວຽດນາມ ຫຼາຍ.”
ຂໍຂອບໃຈນາງ ສຸດທະສອນ ໄດ້ສະຫງວນນ້ຳໃຈພິເສດໃຫ້ໝາກລິ້ນຈີ່ຂອງ ຫວຽດນາມ. ໃນເດືອນ 6 ຜ່ານມາ, ຫວຽດນາມ ໄດ້ສົ່ງອອກໝາກລີ້ນຈີ່ ນັບຮ້ອຍໂຕນ ເຖິງບັນດາຕະຫຼາດທີ່ໄດ້ຮັບຖືວ່າຫຍຸ້ງຍາກທີ່ສຸດ ນັ້ນແມ່ນ ຝຮັ່ງ, ອາເມລິກາ ແລະ ອົດສະຕາລີ. ນີ້ແມ່ນສັນຍານທີ່ໜ້າຊື່ນຊົມສຳລັບໝາກລິ້ນຈີ່ ເວົ້າສະເພາະ ແລະ ຜະລິດຕະພັນກະເສດຂອງ ຫວຽດນາມ ເວົ້າລວມ. ໜຶ່ງໃນບັນດາເຫດການເພື່ອແນໃສ່ໂຄສະນາໝາກລິ້ນຈີ່ ຫວຽດນາມ ຢູ່ຕະຫຼາດສາກົນແມ່ນ ໃນວັນທີ 29/06, ຢູ່ນະຄອນ Melbourne, ທາງພາກໃຕ້ປະເທດອົດສະຕາລີ, ໄດ້ຈັດວັນບຸນ “ໝາກລິ້ນຈີ່ນຫວຽດນາມ”. ເຫດການໂດຍອົງການການຄ້າຫວຽດນາມ ສົມທົບກັບສະມາຄົມນັກທຸລະກິດຫວຽດນາມ ປະຈຳອົດສະຕາລີ ຈັດຕັ້ງ, ເພື່ອໂຄສະນາໝາກລິ້ຈີ່ນຫວຽດນາມ ຢູ່ອົດສະຕາລີ. ການເຄື່ອນໄຫວດັ່ງກ່າວຖືກດຳເນີນໄປໃນເວລາກວ່າໜຶ່ງສັບປະດາ ເມື່ອໝາກລິ້ຈີ່ນຫວຽດນາມ ນັບສີບໆໂຕນທຳອິດ ໄດ້ສົ່ງໄປຂາຍຢູ່ອົດສະຕາລີ. ເພື່ອຕອບສະໜອງ “ວັນໝາກລິ້ຈີ່ນຫວຽດນາມ”, ມີພໍ່ແມ່ປະຊາຊົນຊາວຫວຽດນາມ ອາໄສຢູ່ອົດສະຕາລີ, ນັກສຶກສາຫວຽດນາມ ແລະ ອົດສະຕາລີ ກໍຄືນັກທ່ອງທ່ຽວສາກົນຢູ່ນະຄອນ Melbourne ໄດ້ມາຊື້ໝາກລິ້ຈີ່ນຫວຽດນາມ. ປະຈຸບັນ, ອົງການການຄ້າຫວຽດນາມ ປະຈຳອົດສະຕາລີ ພວມຮີບເຮ່ັງສ້າງແຜນການສົ່ງເສີມບັນດາການເຄື່ອນໄຫວຄ້າຍຄືກັນຢູ່ ນະຄອນອື່ນໆ ເພື່ອໂຄສະນາໝາກລິ້ຈີ່ນຫວຽດນາມ ເຖິງປະຊາຄົມຊາວຫວຽດນາມ ອາໄສຢູ່ຕ່າງປະເທດ ແລະ ບັນດາປະເທດອາຊີອື່ນຢູ່ອົດສຕາລີ.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ຟັງໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົນບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.825.6631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.