ໃນລາຍການ “ໂອ້ລົມກັບເພື່ອນລາວ” ມື້ນີ້, ພວກເຮົາຂໍຄັດສະເໜີເນື້ອໃນ ແລະ ຄຳຖາມຂອງທ່ານຜູ້ຟັງ, ຜູ້ອ່ານຝາກມາລາຍການໃນອາທິດຜ່ານມາ.
ທ່ານ ເພັດສະຫວັນ ສີຊານົນ, ແຂວງ ອັດຕະປື ໄດ້ແຈ້ງໃຫ້ຊາບວ່າ: ໃນຊ່ວງເວລານີ້, ຢູ່ແຂວງ ອັດຕະປື ຝົນຕົກຫຼາຍ, ຢູ່ ຮ່າໂນ້ຍ ອາກາດຄືແນວໃດ?
ທ່ານ ເພັດສະຫວັນ ທີ່ເຄົາລົບ, ປະຈຸບັນ, ຢູ່ພາກເໜືອ ຫວຽດນາມ ພວມກ້າວເຂົ້າສູ່ລະດູຝົນ ແຕ່ຝົນຕົກບໍ່ຫຼາຍ, ມີແຕ່ແດດຮ້ອນເອົ້າ. ຖ້າຫາກທ່ານ ເພັດສະຫວັນ ຫຼື ຜູ້ຟັງທ່ານໃດຢາກມາທ່ອງທ່ຽວ ຫວຽດນາມ ໃນໂອກາດນີ້ ຄວນກະກຽມວັດຖຸສິ່ງຂອງທີ່ຈຳເປັນເພື່ອກັນແດດ, ຮັບປະກັນໃຫ້ການທ່ອງທ່ຽວບັນລຸຜົນສຳເລັດ.
ເພື່ອນ ມາໄລວັນ ວິລາວົງ, ແຂວງ ຊຽງແຂວງ ໄດ້ຝາກ ອີແມວມາຍັງລາຍການຖາມວ່າ: ໃນເດືອນ 8, ຢູ່ ຫວຽດນາມ ໄດ້ຈັດຕັ້ງພິທີສະເຫຼີມສະຫຼອງເຫດການໃດແດ່?
ໃນເດືອນ 8 ນີ້, ຢູ່ຫວຽດນາມ ຈະຈັດຕັ້ງການສະເຫຼີມສະຫຼອງເຫດການດັ່ງຕໍ່ໄປນີ້:
- ວັນທີ 2 ແລະ 5/8 ສະເຫຼີມສະຫຼອງໄຊຊະນະຄັ້ງທຳອິດຂອງກອງທັບເຮືອປະຊາຊົນ ຫວຽດນາມ
- ວັນທີ 15/8, ສະເຫຼີມສະຫຼອງວັນໄຊຊະນະຟາດຊິດ ຍີ່ປຸ່ນ
- ວັນທີ 19/8, ສະເຫຼີມສະຫຼອງວັນການປະຕິວັດເດືອນ 8
- ວັນທີ 20/8, ສະເຫຼີມສະຫຼອງວັນຄ້າຍວັນເກີດຂອງປະທານ ໂຕນດຶກຖັ໋ງ
- ວັນທີ 26/8, ວັນ ຫວຽດນາມ ເຂົ້າເປັນສະມາຊິກຂອງຂະບວນການບໍ່ຮ່ວມກຸ່ມ
ເພື່ອນ ຫງວຽນຫາຍຮ່າ, ນັກສຶກສາມະຫາວິທະຍາໄລ ສຸພາ ນຸວົງ, ແຂວງ ຫຼວງພະບາງ ໄດ້ໂທລະສັບມາຫາລາຍການຖາມກ່ຽວກັບການຢ້ຽມຢາມ ແລະ ເຮັດວຽກຂອງສູນກາງສະພາກາແດງ ຫວຽດນາມ ຢູ່ລາວ, ເພື່ອນເວົ້າວ່າ: ຂ້າພະເຈົ້າໄດ້ເອົາໃຈໃສ່ທີ່ສຸດເຖິງການຮ່ວມມືລະຫວ່າງ ຫວຽດນາມ - ລາວ, 2, 3 ມື້ກ່ອນ, ຂ້າພະເຈົ້າໄດ້ຮັບຟັງກ່ຽວກັບການຢ້ຽມຢາມ ແລະ ເຮັດວຽກຂອງສູນກາງສະພາກາແດງ ຫວຽດນາມ ຢູ່ລາວ, ແຕ່ພຽງແຕ່ໄດ້ຮັບຟັງການສະຫລຸບລາຍການຂ່າວເທົ່ານັ້ນ, ຂໍໃຫ້ລາຍການແນະນຳການຢ້ຽມຢາມ ແລະ ເຮັດວຽກຂອງຄະນະຜູ້ແທນ ຫວຽດນາມ ໃນຄັ້ງນີ້ໃຫ້ຂ້າພະເຈົ້າໄດ້ຮັບຊາບແດ່.
ການຢ້ຽມຢາມຂອງຄະນະຜູ້ແທນສູນກາງສະພາກາແດງ ຫວຽດນາມ ໂດຍທ່ານ ເຈີ່ນທິຮົ່ງແອງ, ຮອງປະທານສະພານຳໜ້າ ຢ້ຽມຢາມ ແລະ ເຮັດວຽກຢູ່ ລາວ ໃນລະຫວ່າງວັນທີ 4 – 8/8, ວັນທີ 5/8, ຄະນະໄດ້ຮັບການຕ້ອນຮັບຈາກທ່ານ ອາຊາງ ລາວລີ, ກຳມະການກົມການເມືອງ, ຮອງນາຍົກລັດຖະມົນຕີ ລາວ. ທ່ານຮອງນາຍົກລັດຖະມົນຕີ ລາວ ໄດ້ຊົມເຊີຍການຢ້ຽມຢາມຂອງຄະນະ, ຕີລາຄາສູງໝາກຜົນແຫ່ງການຮ່ວມມືລະຫວ່າງສະພາກາແດງ 2 ປະເທດ ແລະ ການຊ່ວຍເຫຼືອເຊິ່ງສະພາກາແດງ ຫວຽດນາມ ສະຫງວນໃຫ້ແກ່ອົງການກາແດງ ລາວ ໃນໄລຍະຜ່ານມາ. ໃນຂົງເຂດຮ່ວມມື 2 ຝ່າຍ, ສະພາກາແດງ 2 ປະເທດໄດ້ແບ່ງປັນການເຄື່ອນໄຫວຕ່າງໆໃນຂົງເຂດມະນຸດສະທຳຄື: ກວດ, ປິ່ນປົວພະຍາດ, ມອບຂອງຂວັນປີໃໝ່ໃຫ້ແກ່ຄົນທຸກຍາກ, ໜູນຊ່ວຍ, ຢື້ຢາມຖາມຂ່າວບ່ອນທີ່ປະສົບກັບໄພພິບັດທຳມະຊາດ, ຍົກສູງຄວາມສາມາດຂອງພະນັກງານ, ຊຸກຍູ້ການເຄື່ອນໄຫວແຮກສ່ຽວລະຫວ່າງສະພາກາແດງ 2 ປະເທດ, ແລກປ່ຽນ, ຮຳ່ຮຽນເອົາບົດຮຽນຜັນຂະຫຍາຍຮູບແບບທະນາຄານງົວ... ໃນໄລຍະຈະມາເຖິງ, 2 ຝ່າຍສືບຕໍ່ແລກປ່ຽນຄະນະ, ສ້າງຂະບວນການອາສາສະໝັກ, ເບິ່ງແຍງດູແລໃຫ້ແກ່ປະຊາຊົນ, ພິເສດແມ່ນເຂດຊາຍແດນລະຫວ່າງ 2 ປະເທດ, ແລກປ່ຽນບົດຮຽນຂົນຂວາຍ, ສ້າງກອງທຶນ, ໜູນຊ່ວຍກັນໃນການໜູນຊ່ວຍຮັບມືກັບໄພພິບັດທຳມະຊາດ ກໍ່ຄືສະໜັບສະໜູນເຊິ່ງກັນ ແລະ ກັນໃນບັນດາເວທີປາໄສສາກົນ.
ແລະໃນທ້າຍເດືອນ 8, ຕົ້ນເດືອນ 9 ນີ້, ສູນກາງສະພາກາແດງ ຫວຽດນາມ ໄດ້ຈັດຊຸດຮຽນບຳລຸງສ້າງໃຫ້ພະນັກງານຂອງອົງການກາແດງລາວ ແຕ່ວັນທີ 19/8 - 11/9 ຢູ່ຮ່າໂນ້ຍ.
ໝາກລຳໄຍຢູ່ ຮືງອຽນ
ທ່ານສົມຫວັງ, ແຂວງ ອັດຕະປື ໄດ້ຝາກ ອີແມວ ມາຍັງລາຍການດ້ວຍເນື້ອໃນວ່າ: ຂ້າພະເຈົ້າໄດ້ຮັບຟັງບົດກ່ຽວກັບຜູ້ປູກ ລຳໄຍ ຢູ່ແຂວງ ຮືງອຽນ ໃນ ລາຍການ “ຊົນນະບົດໃໝ່”, ຂ້າພະເຈົ້າມັກບົດນີ້ຫຼາຍ. ຜ່ານບົດດັ່ງກ່າວຂ້າພະເຈົ້າໄດ້ຮູ້ຈັກເຖິງແບບຢ່າງຊາວກະສິກອນໄດ້ສ້າງຄວາມຮັ່ງມີດ້ວຍຕົ້ນໄມ້ຂອງບ້ານນາ. ຂ້າພະເຈົ້າຢາກໄດ້ຮັບຄວາມຮູ້ຕື່ມອີກກ່ຽວກັບຕົ້ນລຳໄຍຢູ່ແຂວງ ຮືງອຽນ ໄດ້ບໍ?
ໝາກລຳໄຍທີ່ໄດ້ປູກຢູ່ແຂວງ ຮືງອຽນ ແຕ່ດົນນານມາແລ້ວ ມີຊື່ສຽງວ່າມີລົດຫວານ, ແຊບ ເຄີຍຖືກນຳຖະຫວາຍໃຫ້ເຈົ້າຊີວິດ, ດັ່ງນັ້ນເຂົາເຈົ້າເຄີຍເອີ້ນວ່າ “ລຳໄຍຖະຫວາຍເຈົ້າຊີວິດ”. ເລກູຍດົນ, ນັກກະວີ, ນັກວິທະຍາສາດດີເດັ່ນໃນສະໄໝສັກດີນາຂອງ ຫວຽດນາມ ໄດ້ຮັບຮູ້ລົດຊາດດີເດັ່ນຂອງລຳໄຍ ຮືງອຽນ. ໝາກລຳໄຍ ຮືງອຽນ ມີໝາກໃຫຍ່, ເປືອກບໍ່ກ້ຽງ ແລະ ໜາ, ສີຕັບໄກ່. ເນື້ອໜາ, ນ້ຳຫຼາຍ, ແກ່ນນ້ອຍ. ກີນຫອມ ແລະ ຫວານຄືນ້ຳຕານ. ຕົ້ນລຳໄຍທີ່ມີອາຍຸສູງສຸດແມ່ນນັບຮ້ອຍປີ, ປະຈຸບັນຍັງຢູ່ວັດ ທຽນອື໋ງ, ເມືອງ ຮົ່ງເຈົາ, ເທດສະບານ ຮືງອຽນ.
ລາຍການໂອ້ລົມກັບເພື່ອນລາວຂອງພວກເຮົາຂໍ້ສິ້ນສຸດລົງພຽງເທົ່ານີ້. ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການກະລຸນາສົ່ງຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 0084.43.8256631, ອີແມວ: Laovov@yahoo.com ຫຼື laovov5@gmail.com. ພວກເຮົາຍິນດີຕ້ອນຮັບ ແລະ ພ້ອມແລ້ວຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ.