(vovworld) - ໄລ່ມາຮອດປີ 2012, ແຂວງ Thua Thien Hue ໄດ້ຈັດຕັ້ງ Festival ເປັນ 6 ຄັ້ງແລ້ວ ເຊິ່ງໄດ້ສ້າງຄວາມປະທັບໃຈຫລາຍຢ່າງໃຫ້ແກ່ປະຊາຊົນພາຍໃນປະເທດ ແລະ ເພື່ອນມິດສາກົນ. ໂດຍມີມູນເຊື້ອດ້ານວັດທະນະທຳ, ປະຫວັດສາດ ແລະ ທີ່ຕັ້ງພູມລຳເນົາພິເສດ, ສະນັ້ນ ນະຄອນ Hue ຈຶ່ງແມ່ນສະຖານທີ່ເຕົ້າໂຮມບັນດາປັດໄຈ ແລະ ເງື່ອນໄຂທີ່ຈຳເປັນເພື່ອສ້າງເປັນນະຄອນ Festival ທີ່ເປັນເອກະລັກສະເພາະ ພ້ອມທັງແມ່ນເຄື່ອງໝາຍທ່ອງທ່ຽວຂອງຫວຽດນາມ ແລະ ແຂວງ Thua Thien Hue.
ການສະແດງສິລະປະຢູ່ Festival Hue 2012
ພາບ: internet
|
Festival Hue ໄດ້ເລີ່ມມາຈາກງານພົບປະສ້າງສັນ Hue 1992 ລະຫວ່າງ ນະຄອນ Hue ແລະ ນະຄອນ Codev ຂອງຝລັ່ງ. ດ້ວຍແນວຄວາມຄິດຈັດຕັ້ງ Festival ທີ່ມີຂອບຂະຫນາດໃຫຍ່, ມີຄຸນນະພາບສູງ ໂດຍແຂວງ Thua Thien Hue ສົມທົບກັບສະຖານທູດ ຝລັ່ງ ປະຈຳຫວຽດນາມ ຈັດຕັ້ງຂຶ້ນໄດ້ຮັບການເຫັນດີຈາກລັດຖະບານ ຫວຽດນາມ. ນັ້ນກໍແມ່ນສະຖານທີ່ເຕົ້າໂຮມ, ພົບປະແລກປ່ຽນທີ່ເປັນເອກະລັກສະເພາະຂອງຫລາຍລາຍການສິລະປະທີ່ເຂັ້ມຂົ້ນໄປດ້ວຍສີສັນວັດທະນະທຳທີ່ແຕກຕ່າງກັນຢູ່ໃນໂລກ. ຜ່ານ Festival 6 ຄັ້ງ (ນັບແຕ່ ປີ 2000) ໄດ້ມີຄະນະສິລະປະກອນກວ່າ 120 ຄະນະ ດ້ວຍຮູບການສິລະປະຫລາຍປະເພດທີ່ມາຈາກວ່າ 30 ປະເທດ ເຂົ້າຮ່ວມ. ສີສັນ ສະເພາະ ຂອງ Hue ພ້ອມກັບບັນດາຄຸນຄ່າວັດທະນະທຳທາງດ້ານວັດຖຸ ແລະ ຈິດໃຈ ໄດ້ສ້າງຄວາມຈັບອົກຈັບໃຈ ແລະ ນັບມື້ນັບດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ເປັນ ຈຳນວນຫລວງຫລາຍ.
ຍ້ອນມີການປ່ຽນແປງ ແລະ ຫົວຄິດປະດິດສ້າງຢ່າງບໍ່ຢຸດຢັ້ງ, Festival ຄັ້ງຕ່າງໆຜ່ານມາໄດ້ປະສົບຜົນສຳເລັດດ້ວຍບັນດາງານບຸນວັດທະນະທຳທີ່ສະແດງໃຫ້ເຫັນບັນດາມໍລະດົກຂອງເມືອງຫລວງເກົ່າ, ຄວາມເອກອ້າງທະນົງໃຈຂອງຊາວ Hue. Festival Hue 2004 ພາຍໃຕ້ຫົວຂໍ້ວ່າ: ມໍລະດົກວັດທະນະທຳກັບການເຊ່ືອມໂຍງ ແລະ ພັດທະນາ” ບໍ່ພຽງແຕ່ແມ່ນງານບຸນດ້ານວັດທະນະທຳ ການທ່ອງທ່ຽວເທົ່ານັ້ນ ຫາກຍັງແມ່ນໂອກາດເຊີດຊູດົນຕີພະລາຊະວັງ Hue ຊຶ່ງແມ່ນສິລະປະທີ່ເປັນເອກະລັກສະເພາະຂອງວັດທະນະທຳທີ່ບໍ່ມີຮູບຮ່າງ ແລະ ເລົ່າສືບປາກຕໍ່ປາກກັນມາຂອງມວນມະນຸດ ຊຶ່ງໄດ້ຮັບການຮັບຮອງຈາກ UNESCO. ປີ 2006, Festival Hue ມູ້ງໄປເຖິງ “700 ປີ ແຫ່ງວັນສ້າງຕັ້ງ Thuan Hoa - Phu Xuan - Thua Thien Hue, ມໍລະດົກວັດທະນະທຳ ກັບການເຊື່ອມໂຍງ ແລະ ພັດທະນາ”, ໄດ້ຮັບການຕີລາຄາວ່າແມ່ນງານບຸນທີ່ເຂັ້ມຂົ້ນໄປດ້ວຍສີສັນຊາດ ແຕ່ຍັງສະແດງໃຫ້ເຫັນພະລັງຊີວິດຂອງຍຸກປະຈຸບັນ. ສຳລັບ Festival Hue 2010 ນອກຈາກເນື້ອໃນຕົ້ນຕໍແມ່ນເຊີດຊູບັນດາຄຸນຄ່າທີ່ເປັນມູນເຊື້ອ ແລ້ວ, Festival ຄັ້ງນີ້ຍັງໂອກາດໂຄສະນາບັນດາມໍລະດົກວັດທະນະທຳທີ່ເປັນຕົວແທນໃຫ້ແກ່ 5 ທະວີບ. ສ່ວນ Festival Hue 2012 ນີ້ແມ່ນມຸ້ງໄປເຖິງຫົວຂໍ້ວ່າ: “ມໍລະດົກວັດທະນະທຳກັບການເຊື່ອມໂຍງ ແລະ ພັດທະນາ - ສະຖານທີ່ນັດພົບຂອງບັນດານະຄອນປະຫວັດສາດ” ຕິດພັນກັບຫົວຂໍ້“ການທ່ອງທ່ຽວມໍລະດົກ” ຂອງປີທ່ອງທ່ຽວແຫ່ງຊາດ 2012. ທ່ານ Ngo Hoa ຮອງປະທານປະຈຳຄະນະກຳມະການປະຊາຊົນ ແຂວງ Thua Thien Hue ໃຫ້ຮູ້ວ່າ:
“ສິ່ງທ້າທາຍຕໍ່ກັບຄະນະຈັດຕັ້ງ Festival ແມ່ນຊອກຫາ, ຄັດເລືອກໃນສາງວັດທະນະທຳຂອງ Hue ເພື່ອສ້າງບັນດາງານບຸນໃຫມ່, ດູດດື່ມ ແລະ ສາມາດໂຄສະນາ. ເຮັດໄດ້ຄືນແນວນັ້ນຈຶ່ງດຶງດູດນັກທ່ອງທ່ຽວມາຢ້ຽມຊົມ Festival Hue ນັບມື້ນັບຫລາຍໄດ້. ຄວາມສາມາດບົ່ມຊ້ອນດ້ານການທ່ອງທ່ຽວຂອງ ນະຄອນ Hue ແມ່ນອຸດົມສົມບູນ ແລະ ຫລາຍຮູບຫລາຍແບບ ເພາະວ່າ Hue ມີ ມໍລະດົກວັດທະນະທຳໂລກ 2 ແຫ່ງ, ມີອ່າວ Lang Co ຊຶ່ງແມ່ນຫນຶ່ງໃນບັນດາອ່າວທີ່ສວຍງາມກວ່າໝູ່ໃນໂລກ, Hue ຍັງມີທິວທັດທຳມະຊາດສວຍງາມ ມີແມ່ນ້ຳ Huong, ພູ Ngu , ພູ Bach Ma. ການທ່ອງທ່ຽວ ຢູ່ Hue ມີຫລາຍຮູບການ, ນອກຈາກທ່ອງທ່ຽວທັດສະນີຍະພາບແລ້ວ ຍັງມີການບໍລິການທ່ອງທ່ຽວຄົ້ນຫາອີກດ້ວຍ. ສະນັ້ນ Hue ມີຄວາມສາມາດບົ່ມຊ້ອນດ້ານການທ່ອງທ່ຽວຢ່າງພຽງພໍເພື່ອກາຍເປັນພື້ນຖານເສດຖະກິດປາຍແຫລມໄດ້.”
Festival Hue 2012
ພາບປະກອບ: internet
|
ພາຍຫລັງ Festival Hue ຄັ້ງຕ່າງໆ ພະແນກການທ່ອງທ່ຽວກໍຄືວັດທະນະທຳຂອງ Hue ໄດ້ຮັບຜົນປະໂຫຍດທີ່ສຸດ ນັ້ນແມ່ນຂຸດຄົ້ນໄດ້ຈຸດວັດທະນະທຳຂອງພະລາຊະວັງ, ວັດທະນະທຳພື້ນເມືອງທີ່ເປັນມູນເຊື້ອ. ທ່ານ Phan Thanh Hai ຜູ້ອຳນວຍການສູນອະນຸລັກຮັກສາປູຊະນີຍະສະຖານກຸງເກົ່າ Hue ໃຫ້ຮູ້ວ່າ: ແຂວງ Thua Thien Hue ພວມຄ່ອຍໆສຳພັດກັບເທັກໂນໂລຊີຈັດຕັ້ງ Festival ຕາມມາດຕະຖານສາກົນ. ແຕ່ສິ່ງຫຍຸ້ງຍາກທີ່ສຸດນັ້ນແມ່ນ ເຮັດແນວໃດເພື່ອເກັບກຳຮ່ຳຮຽນເອົາບັນດາເທັກໂນໂລຊີໃຫມ່, ຄວາມກ້າວຫນ້າຂອງບັນດາປະເທດໃນການເຄື່ອນໄຫວຈັດຕັ້ງ Festival ຢ່າງທັນການໄດ້. ດ້ານອື່ນ, ຕ້ອງສ້າງ ຄວາມດູດດື່ມ ບໍ່ພຽງແຕ່ສຳລັບນັກທ່ອງທ່ຽວເທົ່ານັ້ນ ຫາກຍັງສຳລັບບັນດາຄູ່ຮ່ວມມືທີ່ເຂົ້າຮ່ວມອີກດ້ວຍ. ທ່ານ Phan Thanh Hai ຖືວ່າ: ການອະນຸລັກຮັກສາມໍລະດົກວັດທະນະທຳແມ່ນຄວາມຈຳເປັນຂອງນະຄອນ Hue. ສິ່ງສຳຄັນທີ່ສຸດໃນປະຈຸບັນ ແລະ ໄລຍະຕໍ່ໄປນັ້ນແມ່ນ ຍົກສູງກຳລັງຄວາມສາມາດໃນການຄຸ້ມຄອງເຄື່ອງຫມາຍທ່ອງທ່ຽວ Festival Hue ແລະ ບັນດາການກຳນົດທິດສັງໃນວິວັດທະນາການຄົ້ນຄ້ວາ, ສ້າງຜະລິດຕະພັນການທ່ອງທ່ຽວ, ບໍລິການດ້ານວັດທະນະທຳທີ່ມີຄຸນນະພາບສູງເພື່ອສຳພັດກັບພື້ນຖານວັດທະນະທຳຢູ່ບໍລິເວນແຂວງ Thua Thien Hue, ບັນດາທ້ອງຖິ່ນຢູ່ພາຍໃນ ແລະ ຕ່າງປະເທດ.
“ພວກຂ້າພະເຈົ້າກຳນົດວ່າ: Festival ແມ່ນກາລະໂອກາດໃຫຍ່ເພື່ອໃຫ້ພວກເຮົາສະແດງ, ໂຄສະນາເຄື່ອງໝາຍການຄ້າຂອງມໍລະດົກວັດທະນະທຳ Hue ເຖິງວົງຄະນາຍາດ ແລະ ເພື່ອນມິດສາກົນ. ນີ້ກໍ່ແມ່ນໂອກາດເພື່ອໃຫ້ພວກເຮົາທົດລອງ, ຈັດຕັ້ງບັນດາການເຄື່ອນໄຫວງານບຸນ ຊຶ່ງໃນອະນາຄົດມັນບໍ່ພຽງແຕ່ຮັບໃຊ້ໃຫ້ແກ່ Festival ເທົ່ານັ້ນ ຫາກຍັງສາມາດຄົ້ນຄ້ວາ ແລະ ຟື້ນຟູ ກໍຄືຈັດຕັ້ງການເຄື່ອນໄຫວເປັນປະຈຳເພື່ອຮັບໃຊ້ໃຫ້ແກ່ນັກທ່ອງທ່ຽວ ແລະ ວົງຄະນາຍາດອີກດ້ວຍ. ຈຸດປະສົງຂອງພວກຂ້າພະເຈົ້າແມ່ນຍາດແຍ່ງກາລະໂອກາດຢ່າງສຸດຂີດ ຂອງ Festival ເພື່ອເຮັດແນວໃດຈັດຕັ້ງ ນຳບັນດາການເຄື່ອນໄຫວໃນ Festival ກ້າວໄປໄກກວ່າ, ມູ້ງໄປເຖິງການພັດທະນາການທ່ອງທ່ຽວ ແລະ ອະນຸລັກຮັກສາບັນດາມໍລະດົກເປັນຢ່າງດີກວ່າ.”
ບໍ່ພຽງແຕ່ຟື້ນຟູບັນດາຄຸນຄ່າວັດທະນະທຳ ຫວຽດນາມ ເທ່ົານັ້ນ ຫາກຜ່ານການຈັດຕັ້ງ Festival Hue 6 ຄັ້ງນັ້ນ ໄດ້ສ້າງເປັນເຄື່ອງໝາຍ Festival ທີ່ເປັນເອກະລັກສະເພາະຕິດພັນກັບມູນເຊື້ອກໍຄືປະຫວັດສາດວັດທະນະທຳ ຂອງ ນະຄອນ Hue ອີກດ້ວຍ. ຜ່ານການຈັດຕັ້ງ Festival ແຕ່ລະຄັ້ງນັ້ນ, ພາບພົດກ່ຽວກັບປະເທດຊາດ ແລະ ຊາວ Hue ໄດ້ຮັບການສະແດງອອກນັບທັງຄວາມງາມທີ່ເປັນມູນເຊື້ອມາແຕ່ບູຮານ ຂອງ Hue ຕະຫລອດຮອດງານບຸນສະແດງຊຸດເສື້ອຍາວ, ງານລາຕີ ພະລາຊະວັງ, ງານບຸນ Truyen Lo ແລະອື່ນໆ ໃນນັ້ນການເຄື່ອນໄຫວຕົ້ນຕໍແມ່ນເຊີດຊູບັນດາມໍລະດົກ.
ນັກຂ່າວຫວີງຟອງ