(vovworld)- ຮ່າໂນ້ຍແມ່ນສະຖານທີ່ດູດດື່ມແຫ່ງທີ 6 ຢູ່ ອາຊີ. ນັ້ນແມ່ນຜົນແຫ່ງການຄັດເລືອກຂອງວາລະສານ Smart Travel Asia online ຮົ່ງກົງ ປະເທດຈີນ. ແຕ່ລະປີ, ຜູ້ອ່ານຂອງວາລະສານດັ່ງກ່າວລ້ວນແຕ່ຄັດເລືອກບັນດາສະຖານທີ່ທ່ອງທ່ຽວທີ່ດູດດື່ມກວ່າໝູ່ຢູ່ອາຊີ ຕາມບັນດາມາດຕະຖານຖື: ນະຄອນພັກຜ່ອນບຳລຸງສຸຂະພາບດີທີ່ສຸດ; ນະຄອນຊື້ເຄື່ອງຂອງດີທີ່ສຸດ; ນະຄອນດຳເນີນທຸລະກິດດີທີ່ສຸດ; ບັນດາໂຮງແຮມ, ຮ້ານອາຫານ, ບໍລິສັດການບິນດີທີ່ສຸດ... ນະຄອນຮ່າໂນ້ຍແມ່ນນະຄອນທີ່ເກົ່າແກ່ດ້ວຍປະຫວັດເປັນມານັບພັນປີ ແລະ ແມ່ນແຫ່ງທີ່ສະຫງົບງຽບ, ມີທິວທັດທຳມະຊາດສວຍງາມ, ຊາວຮ່າໂນ້ຍແມ່ນຜູ້ຮັກແພງແຂກຄົນ, ເຍື່ອງອາຫານຢູູ່ຮ່າໂນ້ຍກໍແຊບນົວ, ຮ້ານຂາຍເຄື່ອງອຸດົມສົມບູນ... ຮ່າໂນ້ຍແມ່ນສະຖານທີ່ທ່ອງທ່ຽວທີ່ບັນລຸໄດ້ບັນດາມາດຕະຖານຊື່ງວາລະສານທ່ອງທ່ຽວດັ່ງກ່າວໄດ້ວາງອອກ.
ຖະຫນົນ Hang Gai ຢູ່ ຮ່າໂນ້ຍ
ພາບ: internet
|
ນັກທ່ອງທ່ຽວມາຢ້ຽມຢາມນະຄອນຫລວງ ຮ່າໂນ້ຍ ສ່ວນຫລາຍມັກພັກເຊົາຢູ່ອ້ອມແອ້ມຄຸ້ມຖະຫນົນເກົ່າ ເພື່ອເລາະຫຼິ້ນ, ຄົ້ນຫາຄຸ້ມຖະຫນົນເກົ່າ 36 ສາຍ. ພິເສດໃນລະດູໃບໄມ້ຫລົ່ນແມ່ນລະດູສວຍງາມກວ່າໝູ່ໃນປີ, ຈຳນວນນັກທ່ອງທ່ຽວມາຢ້ຽມຢາມຮ່າໂນ້ຍແມ່ນຫລາຍກວ່າໝູ່. ນັກທ່ອງທ່ຽວເຄີຍເລາະທ່ຽວລຽບຕາມຄຸ້ມຖະຫນົນເກົ່າ, ເຂົ້າຮ້ານຂາຍເຄື່ອງຂອງແຫ່ງຕ່າງໆ ຫລື ຮ້ານຂາຍພາບແຕ້ມທີ່ອຸດົມສົມບູນ, ມີສີສັນຫລາກຫລາຍ. ເປັນຕົ້ນແມ່ນຢູ່ຖະຫນົນ Hang Gai ແລ້ວຜ່ານຖະໜົນ Hang Hom, Hang Ma, Hang Bac, Hang Buom.... ຖະຫນົນສາຍໃດກໍມີແຂກຄົນມາຊື້ເຄື່ອງຂອງເປັນຈຳນວນຫລວງຫລາຍ. ຮ້ານຂາຍໂສ້ງເສື້ອຢູ່ຖະໜົນເຫຼົ່ານັ້ນມີຮູບແບບສວຍງາມ ແລະ ລາຄາຖືກ. ຖ້າຫາກນັກທ່ອງທ່ຽວຢາກຊື້ເຄ່ືອງຂອງຜະລິດດ້ວຍແພ ຫລື ໄຫມ ຕ້ອງແວ່ຖະຫນົນ Hang Gai ແລະ ຖະຫນົນສາຍອ້ອມແອ້ມ. ຢູ່ຖະຫນົນສາຍນີ້ ນອກຈາກໂສ້ງເສື້ອເຮັດດ້ວຍແພໄຫມແລ້ວ, ຍັງມີກະເປົາ, ເຄື່ອງທີ່ລະນຶກທີ່ງາມຕາ ແລະ ເປັນເອກະລັກສະເພາະດ້ວຍສີສັນຫລາກຫລາຍອີກດ້ວຍ. ສ່ວນຢູ່ ຖະໜົນ Hang Bac, Hang Hom ນັກທ່ອງທ່ຽວສາມາດຊື້ເຄື່ອງຂອງເຮັດດ້ວຍເງິນ ເຊິ່ງໄດ້ຮັບການອອກແບບພິເສດສະເພາະ ດ້ວຍຫລາຍຮູບຫລາຍແບບ. ອ້າຍ Tho Mas ມາຈາກ ອາເມລິກາ ໃຫ້ຮູ້ວ່າ:
“ຂ້າພະເຈົ້າຢາກຊື້ເຄື່ອງຂອງ ຢູ່ ຫວຽດນາມ. ເພາະເຫັນວ່າ, ຜະລິດຕະພັນເຮັດດ້ວຍເງິນຢູ່ທີ່ນີ້ມີຄຸນນະພາບດີ ແລະ ລາຄາຖືກ. ຢູ່ຖະຫນົນ Hang Bac ນີ້ ເຂົາເຈົ້າຂາຍເຄື່ອງຂອງທີ່ມີຄຸນຄ່າຫລາຍຢ່າງ. ຂ້າພະເຈົ້າໄດ້ຊື້ດອກໄມ້, ພາບແຕ້ມ, ໂສ້ງເສື້ອ, .... ເຍື່ອງອາຫານຢູ່ຄຸ້ມຖະຫນົນເກົ່າຂອງຮ່າໂນ້ຍກໍແຊບນົວ ແລະ ລາຄາຖືກ.”
ໃນຄຸ້ມຖະຫນົນເກົ່າຮ່າໂນ້ຍ ຂາຍສິນຄ້າ, ເຄື່ອງຂອງທຸກປະເພດຄື: ໂສ້ງເສື້ອ, ເກີບ, ກະເປົາ, ໝວກ, ຜ້າຄ້ອງຄໍ. ສິນຄ້າຂອງຕ່າງປະເທດກໍມີ, ສິນຄ້າຂອງຫວຽດນາມ ກໍມີ. ແຕ່ນັກທ່ອງທ່ຽວສ່ວນຫລາຍຢາກຊື້ເຄື່ອງຂອງທີ່ເປັນເອກະລັກສະເພາະຂອງຫວຽດນາມ, ສະນັ້ນເຂົາເຈົ້ານິຍົມຊື້ກະເປົາກວ່າໝູ່. ພິເສດ, ຢູ່ລຽບຕາມຖະຫນົນເກົ່າ, ນັກທ່ອງທ່ຽວເຄີຍພົບເຫັນຮ້ານຂາຍເຄື່ອງທີ່ລະນຶກຫັດຖະກຳ ຫຼື handmade ທີ່ສວຍງາມເປັນຈຳນວນຫລວງຫລາຍ. ນີ້ກໍແມ່ນຫນຶ່ງໃນບັນດາຜະລິດຕະພັນທີ່ໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ນາງ Thu Huong ຢູ່ ແຂວງ Lao Cai ໃຫ້ຮູ້ວ່າ: ນາງມັກເລາະທ່ຽວ ແລະ ຊື້ເຄື່ອງຂອງຢູ່ຄຸ້ມຖະຫນົນເກົ່າຫລາຍ.
“ບັນດາຮ້ານຂາຍເຄື່ອງຢູ່ຖະຫນົນເກົ່າປຽບເຫມືອນຄືຮູບພາບທີ່ມີສີສັນຫລາກຫລາຍ. ມີສິນຄ້າ, ເຄື່ອງຂອງທຸກປະເພດ, ຢາກຊື້ອັນໃດກໍມີ. ບັນດາຜະລິດຕະພັນຢູ່ທີ່ນີ້ກໍຖືກໃຈກັບຜູ້ອຸປະໂພກ, ບໍລິໂພກ. ເຄື່ອງຂອງທີ່ຂາຍໃຫ້ນັກທ່ອງທ່ຽວກໍອຸດົມສົມບູນ. ຂ້າພະເຈົ້າຢາກເລາະທ່ຽວຕາມບັນດາຮ້ານຂາຍພາບສີຂັດມັນ ຫລື ເຄື່ອງສຳອາງ. ຂ້າພະເຈົ້າມັກທຸກສິ່ງທຸກຢ່າງຢູ່ທີ່ນີ້. ຂ້າພະເຈົ້າຊື້ ປອກຄໍສີຂຽວສາຍຫນຶ່ງມີ່ມີລາຄາບໍ່ຮອດ 100.000 ດົ່ງເທົ່ານັ້ນ ”
ຖະຫນົນ Hang Manh ຢູ່ ຮ່າໂນ້ຍ
ພາບ:internet
|
ຍັງມີຄວາມປະທັບໃຈອື່ນອີກເມື່ອເລາະຫລິ້ນຕາມຄຸ້ມຖະຫນົນເກົ່າ, ນັ້ນແມ່ນຮູບພາບຂອງຜູ້ຂາຍດອກໄມ້ຕາມຖະໜົນ, ເຂົາເຈົ້າວາງດອກໄມ້ເທິງລົດຖີບແລ້ວຖີບລົດໄປລຽບຕາມຖະຫນົນ. ມີນັກທ່ອງທ່ຽວຜູ້ຫນຶ່ງເມື່ອຂຽນບົດກ່ຽວກັບຮ່າໂນ້ຍ ໄດ້ນຳເອົາຮູບພາບຜູ້ຂາຍດອກໄມ້ຕາມຖະຫນົນລົງໃນຫນ້າປົກ. ນອກຈາກຮູບພາບຜູ້ຂາຍດອກໄມ້ລຽບຕາມຄຸ້ມຖະຫນົນແລ້ວ, ບັນດາຮ້ານຂາຍໝາກໄມ້ກໍແມ່ນສິ່ງທີ່ດຶງດູດນັກທ່ອງທ່ຽວ. ຮ່າໂນ້ຍມີ 4 ລະດູຄື: ລະດູບານໃຫມ່, ລະດູຮ້ອນ, ລະດູໃບໄມ້ຫລົ່ນ ແລະ ລະດູຫນາວ, ສະນັ້ນ ໝາກໄມ້ກໍອຸດົມສົມບູນ ມີທຸກປະເພດ. ເອື້ອຍ Natalia ນັກທ່ອງທ່ຽວມາຈາກ ໂປໂລຍ ໃຫ້ຮູ້ວ່າ:
“ຢູ່ຮ່າໂນ້ຍ ມີເຄື່ອງຂອງງາມຕາຫລາຍຢ່າງ. ຂ້າພະເຈົ້າມັກຫລາຍ. ໝາກໄມ້ຢູ່ທີ່ນີ້ກໍແຊບ, ໝາກໄມ້ທຸກປະເພດຢູ່ຫວຽດນາມ ແຕກຕ່າງກັບຢູ່ໂປໂລຍ. ອັນໃດຢູ່ຮ່າໂນ້ຍ ກໍ່ມີລາຄາຖືກ. ຂ້າພະເຈົ້າຢາກຊື້ເຄື່ອງຂອງຢູ່ ຫວຽດນາມ. ພວກຂ້າພະເຈົ້າຮັກຮ່າໂນ້ຍ, ຮັກ ຫວຽດນາມຫຼາຍ.”
ເລາະທ່ຽວລຽບຕາມຖະຫນົນສາຍຕ່າງໆນັກທ່ອງທ່ຽວຈຶ່ງສາມາດຄົ້ນຫາໄດ້ລັກສະນະຫລາຍຮູບຫລາຍແບບຂອງສິນຄ້າ, ເຄື່ອງຂອງຢູ່ທີ່ນີ້. ຖະຫນົນແຕ່ລະສາຍກໍ່ດຳເນີນທຸລະກິດປະເພດສະເພາະໃດຫນຶ່ງຄື: ຖະໜົນ Hang Bo ຂາຍອຸປະກອນສຳລັບການຕັດຫຍິບ, ຖະໜົນ Hang Duong ຂາຍເຂົ້າຫນົມ, ຖະໜົນ Hang Bac ຂາຍເຄື່ອງສຳອາງທີ່ຜະລິດດ້ວຍເງິນ. ເລາະທ່ຽວລຽບຕາມຖະຫນົນສາຍຕ່າງໆຢູ່ ຮ່າໂນ້ຍນັກທ່ອງທ່ຽວຈະເຂົ້າໃຈໄດ້ວ່າເປັນຫຍັງຮ່າໂນ້ຍນັບມື້ນັບດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍຄືແນວນັ້ນ. ນອກນັ້ນ, ຍັງ ມີສິ່ງຫນຶ່ງທີ່ເຮັດໃຫ້ນັກທ່ອງທ່ຽວນິຍົມເລາະທ່ຽວ ແລະ ຊື້ເຄື່ອງຂອງຢູ່ຄຸ້ມຖະຫນົນເກົ່າຮ່າໂນ້ຍ ນັ້ນແມ່ນການຕ້ອນຮັບຢ່າງສະຫນິດສະຫນົມຂອງຊາວຮ່າໂນ້ຍ.