ກົມໃຫຍ່ທ່ອງທ່ຽວຫວຽດນາມ ຫາກໍຕ້ອນຮັບນັກທ່ອງທ່ຽວສາກົນຜູ້ທີ່ 6 ລ້ານ. ນີ້ເປັນຂີດໝາຍສຳຄັນຂອງຂະແຫນງທ່ອງທ່ຽວຫວຽດນາມ ເມື່ອຈຳນວນນັກທ່ອງທ່ຽວສາກົນໄດ້ລື່ນກາຍຄາດໝາຍຕ້ອນຮັບນັກທ່ອງທ່ຽວ ແຕ່ 5,3 -5,5 ລ້ານເທ່ືອຄົນໃນປີ 2011 ຊຶ່ງຂະແຫນງທ່ອງທ່ຽວໄດ້ວາງອອກກ່ອນນັ້ນ. ເລື່ອງຕ້ອນຮັບນັກທ່ອງທ່ຽວຜູ້ທີ 6 ລ້ານ ມາຫວຽດນາມໃນປີ 2011 ສືບຕໍ່ຢືນຢັນການພັດທະນາຂອງຂະແຫນງທ່ອງທ່ຽວ, ຊຶ່ງແມ່ນຫນຶ່ງໃນບັນດາຂະແຫນງເສດຖະກິດສຳຄັນຂອງຫວຽດນາມ.
ນັກທ່ອງທ່ຽວສາກົນຜູ້ທີ 6 ລ້ານ ແມ່ນທ່ານ Curvalle Bernard Francois ສັນຊາດຝລັ່ງ, ມາຈາກຈີນ ໃນກຳປັ່ນ MV SuperStar Aquarious ເຂົ້າທຽບທ່າແຄມທະເລ ບ໋າຍໄຈ, ນະຄອນ ຮ້າລອງ ແຂວງ ກວ໋າງນີງ. ນອກຈາກໃບຢັ້ງຢືນເປັນນັກທ່ອງທ່ຽວຜູ້ທີ 6 ລ້ານ, ຫລຽນກາລະນຶກ, ຂອງຂັວນ ແລ້ວ, ນັກທ່ອງທ່ຽວທ່ານນີ້ຍັງໄດ້ຮັບຂອງຂວັນຫນຶ່ງອີກ ນັ້ນແມ່ນລາຍການທ່ອງທ່ຽວຢ້ຽມຊົມ ດາໜັງ ໂຮ້ຍອານ ສະຫງວນໃຫ້ແກ່ 2 ຄົນ ໂດຍບໍລິສັດທ່ອງທ່ຽວ Saigontourist ມອບໃຫ້. ທ່ານ Curvalle Bernard Francois ໄດ້ແບ່ງປັນດ້ວຍຄວາມເບີກບານມ່ວນຊື່ນວ່າ:
“ລູກສິດຂອງຂ້າພະເຈົ້າຢູ່ ຈີນ ໄດ້ແນະນຳໃຫ້ຜົວເມຍຂ້າພະເຈົ້າວ່າ ຄວນໄປຢ້ຽມຊົມ ອ່າວຮ້າລອງ. ສະນັ້ນ ພວກຂ້າພະເຈົ້າໄດ້ມີຫນ້າຢູ່ທີ່ນີ້ ແລະກໍແມ່ນຄວາມບັງເອີນທີ່ໄດ້ຮັບນາມມະຍົດແມ່ນນັກທ່ອງທ່ຽວສາກົນຜູ້ທີ 6 ລ້ານ. ນີ້ແມ່ນການທ່ອງທ່ຽວທີ່ມີຄວາມໝາຍຢ່າງແທ້ຈິງ.“
ເຫດການຕ້ອນຮັບນັກທ່ອງທ່ຽວສາກົນ ຜູ້ທີ 6 ລ້ານ ມາຫວຽດນາມ ໃນປີ 2011 ອີກຄັ້ງຫນຶ່ງໄດ້ເປັນການຢືນຢັນວ່າ ຫວຽດນາມ ຍາມໃດກໍແມ່ນສະຖານທີ່ທ່ອງທ່ຽວປອດໄພ, ສະຫນິດສະໜົມທີ່ມີຕໍ່ແຂກທ່ອງທ່ຽວ. ຍິ່ງກວ່ານັ້ນ, ການທ່ອງທ່ຽວ ຫວຽດນາມ ໄດ້ສ້າງພື້ນຖານ ແລະ ອິດທິພົນຊື່ສຽງເພື່ອດຶງດູດນັກທ່ອງທ່ຽວສາກົນ ແລະ ກະຕຸກຊຸກຍູ້ຕະຫລາດພາຍໃນປະເທດ, ເຖິງວ່າ ໃນປີຜ່ານມາ, ມີຫລາຍປັດໃຈຂາດຄວາມສະຖຽນລະພາບຢູ່ບັນດາຕະຫລາດທີ່ມີຄວາມສາມາດບົ່ມຊ້ອນຂອງການທ່ອງທ່ຽວຫວຽດນາມ, ພ້ອມກັນນັ້ນ ແມ່ນວິກິດການການເງິນໂລກ, ໄພທຳມະຊາດ ໄດ້ສົ່ງຜົນສະທ້ອນບໍ່ຫນ້ອຍເຖິງຂະແຫນງທ່ອງທ່ຽວຫວຽດນາມ. ທ່ານ ຫງວຽນວັນຕວັນ, ຫົວຫນ້າກົມໃຫຍ່ທ່ອງທ່ຽວຫວຽດນາມໃຫ້ຮູ້ວ່າ:
“ສິ່ງດັ່ງກ່າວໝາຍຄວາມວ່າ ພວກເຮົາສືບຕໍ່ສ້າງຂີດໝາຍທີ່ມີລັກສະນະກະໂດດຂັ້ນໃຫມ່. ປີນີ້ ພວກເຮົາບັນລຸໄດ້ສະຖິຕິນັກທ່ອງທ່ຽວພາຍໃນປະເທດ 3 ລ້ານເທື່ອຄົນ, ລາຍຮັບຈາການທ່ອງທ່ຽວບັນລຸ 130.000 ຕຶ້ດົ່ງ. ຂີດໝາຍນີ້ໄດ້ສ້າງບາດກ້າວພັດທະນາໃຫມ່ໃຫ້ແກ່ຂະແຫນງທ່ອງທ່ຽວຫວຽດນາມ ແລະ ກໍໝາຍຄວາມວ່າ ຫວຽດນາມ ກ້າວເຂົ້າສູ່ທົດສະວັດແຫ່ງການພັດທະນາ 2111- 2020 ເພື່ອປະຕິບັດຍຸດທະສາດການພັດທະນາການທ່ອງທ່ຽວຫວຽດນາມ ຮອດປີ 2020 ແລະ ວິໄສທັດຮອດປີ 2030.“
(ພາບ: ຫວຽດນາມຕ້ອນຮັບນັກທ່ອງທ່ຽວສາກົນຜູ້ທີ່ 6 ລ້ານ)
ຂະແຫນງທ່ອງທ່ຽວໄດ້ຮັບໄຊຊະນະຄືແນວນັ້ນ ຍ້ອນໃນປີຜ່ານມາ, ບັນດາທ້ອງຖິ່ນໃນທົ່ວປະເທດໄດ້ຈັດຕັ້ງບັນດາເຫດການເພື່ອຍູ້ແຮງການສົ່ງເສີມໂຄສະນາຜະລິດຕະພັນການທ່ອງທ່ຽວ, ດຶງດູດນັກທ່ອງທ່ຽວ. ພົ້ນເດັ່ນແມ່: ສັບປະດາ Caraval ຢູ່ ແຂວງ ກວ໋າງນີງ, ການແຂ່ງຂັນຍິງບັ້ງໄຟດອກຢູ່ ດາຫນັງ, ສັບປະດາທະເລ ແຄງຮ່ວາ. ພິເສດ ແມ່ນບັນດາການເຄື່ອນໄຫວໃນຂອບເຂດປີທ່ອງທ່ຽວແຫ່ງຊາດ ຊຶ່ງຈັດຂຶ້ນຢູ່ແຂວງ ຟູອຽນ ແລະ ບັນດາແຂວງອ້ອມຂ້າງ. ໃນປີຜ່ານມາ, ບໍລິສັດການບິນຫລາຍແຫ່ງໄດ້ເປີດສາຍການບິນໃຫມ່ຈາກຮ່າໂນ້ຍໄປຍັງບັນດາປະເທດ ແລະກົງກັນຂ້າມ, ພ້ອມທັງມີລາຍການ Promotion ຊຶ່ງເຮັດໃຫ້ນັກທ່ອງທ່ຽວມາຮ່າໂນ້ຍເພີ່ມຂຶ້ສູງ, ບັນລຸເກືອບ 1.9 ລ້ານເທື່ອຄົນ. ໃນມື້ທ້າຍປີ 2011, ຂະແຫນງທ່ອງທ່ຽວແຂວງ ກ໋ວາງນາມໄດ້ຕ້ອນຮັບນັກທ່ອງທ່ຽວຜູ້ທີ 1,2 ລ້ານ, ເພີ່ມຂຶ້ນປະມານ 5% ເມື່ອທຽບໃສ່ປີ 2010, ລາຍຮັບເກັບມາໄດ້ຈາກຂົງເຂດທ່ອງທ່ຽວແມ່ນ 1600 ຕຶ້ດົ່ງ. ທ່ານ ດີງຫາຍ, ຜູ້ອຳນວຍການພະແນກວັດທະນະທຳກິລາ ແລະ ການທ່ອງທ່ຽວ ແຂວງ ກວ໋າງນາມໃຫ້ຮູ້ວ່າ:
“ເພື່ອບັນລຸໄດ້ໝາກຜົນດັ່ງກ່າວ, ກອ່ນອື່ນໝົດໃນຊຸມປີຜ່ານມາ ພວກເຮົາໄດ້ເຮັດວຽກງານໂຄສະນາຢູ່ພາຍໃນປະເທດເປັນປະຈຳ ແລະ ເຂົ້າຮ່ວມບັນດາງານຕະຫລາດນັດສາກົນ. ຫນຶ່ງໃນບັນຫາສຳຄັນສ້າງເປັນຜົນງານນີ້ ແມ່ນວົງຄະນາຍາດຢູ່ແຂວງ ກວ໋າງນາມ, ໃນນັ້ນ ມີໂຮ້ຍອານ ໄດ້ຮ່ວມແຮງຮ່ວມໃຈສ້າງພາບພົດຄຸ້ມເມືອງເກົ່າ, ມໍລະດົກໝີ້ເຊີນ, ແຕ່ຕົ້ນຕໍແມ່ນ ປະຊາຊົນ, ເຂົາເຈົ້າໄດ້ມີສະຕິໃນການອະນຸລັກຮັກສາ, ແລະ ດຶງດຸູດນັກທ່ອງທ່ຽວ.“
ນອກນັ້ນ, ບັນດາຕະຫລາດນັດກໍໄດ້ຮັບການຈັດຂຶ້ນໃນໂອກາດທ້າຍປີຄື: ງານຕະຫລາດນັດການທ່ອງທ່ຽວສາກົນ ITEຢູ່ ນະຄອນ ໂຮ່ຈິມີນ, ການເຂົ້າຮ່ວມງານຕະຫລາດນັດການທ່ອງທ່ຽວຢູ່ຕ່າງປະເທດ ກໍຄືຈັດຕັ້ງການປຸກລະດົມຕະຫລາດທ່ອງທ່ຽວຢູ່ປະເທດຈຳນວນຫນຶ່ງຄື: ຈີນ, ຢູແກຼນ, ແດນມາກ, ນອກແວ ກໍໄດ້ປະກອບສ່ວນດຶງດູດຈຳນວນນັກທ່ອງທ່ຽວສາກົນມາຫວຽດນາມເປັນຈຳນວນຫລາຍ. ບັນດາລາຍການໂຄສະນາການທ່ອງທ່ຽວ ຢູ່ຕ່າງປະເທດ ກໍປະກອບສ່ວນຍູ້ແຮງພາບພົດການທ່ອງທ່ຽວຫວຽດນາມ. ທ່ານ ຫງວຽນວັນຕີງ, ຫົວຫນ້າກົມຮ່ວມມືສາກົນ, ສັງກັດກະຊວງວັດທະນະທຳກິລາ ແລະ ການທ່ອງທ່ຽວ ຫວຽດນາມ ໃຫ້ຮູ້ວ່າ:
“ວຽກງານໂຄສະນາໃນປີ 2011 ໄດ້ຮັບການປະຕິບັດຢ່າງແຂງແຮງ. ກ່ອນອື່ນໝົດແມ່ນໂຄສະນາຢູ່ພາຍໃນປະເທດ ໂດຍກົມໃຫຍ່ທ່ອງທ່ຽວຈັດຕັ້ງ. ສ່ວນການເຄື່ອນໄຫວຢູ່ຕ່າງປະເທດໂດຍກົມຮ່ວມມືສາກົນຈັດຕັ້ງ 10 ສັບປະດາວັດທະນະທຳການທ່ອງທ່ຽວຢູ່ຕ່າງປະເທດ, ບັນດາການເຄື່ອນໄຫວແຂ່ງຂັນກິລາຄັ້ງໃຫຍ່. ການເຄື່ອນໄຫວຕ່າງໆນັ້ນ ລ້ວນແຕ່ຕິດພັນກັບການໂຄສະນາການທ່ອງທ່ຽວ. ນອກນັ້ນ ກົມໃຫຍ່ທ່ອງທ່ຽວກໍເຂົ້າຮ່ວມງານຕະຫລາດນັດສົ່ງເສີມການທ່ອງທ່ຽວຢູ່ຕ່າງປະເທດເປັນຫລາຍຄັ້ງ ນັບທັງບັນດາເຂດຈຸດສຸມຄື: ຈີນ, ສເກົາຫລີ, ຍີ່ປຸ່ນ ແລະ ເອີລົບ. ພວກຂ້າພະເຈົ້າຍັງໂຄສະນາຜ່ານສື່ມວນຊົນສາກົນຄື: BBC
ປີ 2011, ຕະຫລາດແຂກທ່ອງທ່ຽວສາກົນຂອງຫວຽດນາມທັງໝົດ ລ້ວນແຕ່ເພີ່ມຂຶ້ນຄື: ຕະຫລາດອາຊີຕາເວັນອອກສຽງເຫນືອ, ເອີລົບ ແລະ ອາເມລິກາລາຕີນ. ໃນສະພາບການທ່ອງທ່ຽວມີສັນຍານດີຂຶ້ນ, ທ່ານ ຮ່ວາງຕວັນແອງ, ລັດຖະມົນຕີກະຊວງວັດທະນະທຳ ກິລາ ແລະ ການທ່ອງທ່ຽວ ໄດ້ວາງຈຸດໝາຍໃຫ້ແກ່ຂະແຫນງວ່າ: “ຈຸດໝາຍຍຸດທະສາດຂອງຫວຽດນາມໃນປີ 2015 ແມ່ນດຶງດູດນັກທ່ອງທ່ຽວສາກົນ 7,5 ລ້ານເທື່ອຄົນ,ນັກທ່ອງທ່ຽວພາຍໃນປະເທດ 35 ລ້ານເທື່ອຄົນ, ລາຍຮັບຄາດວ່າບັນລຸ 8 - 9 ຕຶ້ USD. ເພື່ອບັນລຸໄດ້ຈຸດໝາຍດັ່ງກ່າວ, ບັນດາສະຖານທີ່ທ່ອງທ່ຽວຈຸດສຸມມີບົດບາດຕັດສິນຊີ້ຂາດ, ສ້າງກຳລັງຫນູນໃຫ້ແກ່ການພັດທະນາຂອງຂະແຫນງທ່ອງທ່ຽວຂອງທັງປະເທດ.