ວັນບຸນຄຼິດສະມາດ, ບຸນປີໃຫມ່ສາກົນໄດ້ວຽນມາອີກວາລະຫນຶ່ງ. ໃນຂະນະທີ່ບັນດາບຸກຄົນ, ຄອບຄົວ, ອົງການຈັດຕັ້ງ ພວມຊອກຮູ້ ແລະ ສັ່ງຈ່ອງລາຍການທ່ອງທ່ຽວນັ້ນ, ບັນດາບໍລິສັດທ່ອງທ່ຽວກໍໄດ້ວາງອອກຫລາຍລາຍການທີ່ດູດດຶ່ມໃຫ້ແກ່ນັກທ່ອງທ່ຽວ. ມີສະຖານທີ່ທ່ອງທ່ຽວຫລາຍແຫ່ງເພື່ອໃຫ້ນັກທ່ອງທ່ຽວເລືອກເຟັ້ນເພື່ອພັກຜ່ອນບຳລຸງສຸຂະພາບພາຍຫລັງເຮັດວຽກຢ່າງອິດເມື່ອຍມາເປັນເວລາຫນຶ່ງປີ ຄື: ປີນພູ, ຄົ້ນຫາຊີວິດການເປັນຢູ່ຂອງປະຊາຊົນຊົນເຜົ່າຢູ່ເຂດພູດອຍ. ຕາມບັນດາບໍລິສັດທ່ອງທ່ຽວແລ້ວ, ລາຍການທ່ອງທ່ຽວໝູ່ເກາະ ແລະ ທະເລ ຍັງຄົງແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວ ໃນໂອກາດວັນບຸນຄຼິດສະມາດ ແລະ ບຸນປີໃຫມ່ສາກົນ 2012.
ຕາມບັນດາບໍລິສັດທ່ອງທ່ຽວແລ້ວ, ລາຍການທ່ອງທ່ຽວວັນບຸນຄຼິດສະມາດ ແລະ ບຸນປີໃຫມ່ສາກົນປີນີ້ ບໍ່ມີການຫັນປ່ຽນຫລາຍປານໃດເມ່ືອທຽບໃສ່ມື້ທຳມະດາ. ສາຍເຫດນັ້ນແມ່ນ ຍ້ອນບຸນປີໃຫມ່ສາກົນ ແລະ ບຸນປີໃຫມ່ປະຈຳຊາດປີນີ້ ແມ່ນຫ່າງກັນພຽງ 20 ມື້ເທົ່ານັ້ນ. ສະນັ້ນ ນັກທ່ອງທ່ຽວສ່ວນຫລາຍ ຢາກຍາດເວລາໄປພັກຜ່ອນໃນໂອກາດບຸນປີໃຫມ່ປະຈຳຊາດເລີຍ. ເຖິງຢ່າງໃດກໍຕາມ, ມາຮອດຈຸດເວລານີ້, ບາງລາຍການທ່ອງທ່ຽວ ວັນບຸນຄຼິດສະມາດ, ບຸນປີໃຫມ່ສາກົນ 2012, ນັກທ່ອງທ່ຽວໄດ້ຈ່ອງໝົດແລ້ວ ຄື: ລາຍການທ່ອງທ່ຽວໄປຢ້ຽມຢາມນະຄອນທະເລ ຍາຈາງ, ເກາະ ຟູກວັກ,ໂກນດ໋າວ. ບໍລິສັດທ່ອງທ່ຽວ Viettravel ກໍໄດ້ຢຸດຕິການສັ່ງຈ່ອງລາຍການທ່ອງທ່ຽວແລ້ວ. ສ່ວນຫລາຍນັກທ່ອງທ່ຽວ ນິຍົມ ບັນດາລາຍການທ່ອງທ່ຽວດັ່ງກ່າວຂອງບໍລິສັດ Viettravel ຍ້ອນທາງບໍລິສັດທ່ອງທ່ຽວນີ້ໄດ້ມີລາຍການຫລຸດລາຄາໃນໂອກາດທ້າຍປີ. ສ່ວນຕາມທ່ານນາງ ບູ່ຍທິລືວມາຍ, ຫົວຫນ້າຫ້ອງການຕະຫລາດ ສັງກັດບໍລິສັດຫຸ້ນສ່ວນທ່ອງທ່ຽວຫວຽດນາມແລ້ວ, ບັນດາລາຍການທ່ອງທ່ຽວ ທະເລ ແລະ ໝູ່ເກາະແມ່ນລາຍການທີ່ນັກທ່ອງທ່ຽວສົ່ງຈ່ອງໄປທ່ຽວຫລາຍສຸດ.
“ບັນດາສະຖານທີ່ຊຶ່ງນັກທ່ອງທ່ຽວຫວຽດນາມຢາກໄປຢ້ຽມຢາມແມ່ນເຂດຮ້ອນຄື: ຍາຈາງ, ຟູກວັກ, ປີນີ້ ນັກທ່ອງທ່ຽວກໍສົນໃຈເຖິງເກາະໂກນດ໋າວ. ຟູກວັກ ກໍແມ່ນສະຖານທີ່ທ່ອງທ່ຽວແຫ່ງໃຫມ່ໃນປີ 2011. ນັກທ່ອງທ່ຽວຢາກມາຢ້ຽມຢາມຟູກວັກ ຍ້ອນວ່າຢູ່ທີ່ນີ້ ການບໍລິການແມ່ນອຸດົມສົມບູນ, ບັນລຸມາດຕະຖານ, ທິວທັດທຳມະຊາດກໍສວຍງາມ, ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ສ່ວນ ໂກນດ໋າວ ກໍແມ່ນສະຖານທີ່ທ່ອງທ່ຽວໃຫມ່.“
ຕາມການຕີລາຄາຂອງທ່ານນາງ ມາຍ ແລ້ວ, ໄຊງ່ອນ ຟູກວັກ ແມ່ນລາຍການທ່ອງທ່ຽວໄດ້ຮັບຄວາມນິຍົມກວ່າໝູ່ຈາກນັກທ່ອງທ່ຽວ. ຟູກວັກ ບໍ່ພຽງແຕ່ມີຄວາມງາມແບບຮົກເຮື້ອເປົ່າຫວ່າງທຳມະຊາດເທົ່ານັ້ນ ຫາກ ປະຈຸບັນ ເສັ້ນທາງໄປຍັງ ຟູກວັກ ກໍສະດວກຫລາຍແລ້ວ.
“ຫນຶ່ງໃນບັນດາສິ່ງທີ່ນັກທ່ອງທ່ຽວຢາກມາຢ້ຽມຢາມ ຟູກວັກ ແມ່ນບໍລິສັດການບິນ Air Mekong ໄດ້ເປີດສາຍການບິນໂດຍກົງ ຈາກຮ່າໂນ້ຍ ໄປຍັງ ຟູກວັກ, ສ້າງຄວາມສະດວກໃນການໄປມາໃຫ້ແກ່ນັກທ່ອງທ່ຽວ ແລະ ປະຢັດເວລາ. ນັກທ່ອງທ່ຽວມັກໄປຢ້ຽມຢາມ ຟູກວັກໃນໂອກາດທ້າຍສັບປະດາ, ວັນເສົາໄປ, ວັນອາທິດກັບຄືນ. ນັກທ່ອງທ່ຽວຈຳນວນຫນຶ່ງ ກໍຖືໂອກາດນີ້ເພື່ອໄປຢ້ຽມຢາມນະຄອນ ໂຮ່ຈິມີນ ເລີຍ.“
ຟູກວັກ ແມ່ນເກາະແຫ່ງໃຫຍ່ກວ່າໝູ່ຢູ່ຫວຽດນາມ, ຕັ້ງຢູ່ແຂວງ ກຽນຢາງ ແລະ ຮັບການຂະຫນານນາມວ່າ ແມ່ນເກາະແຫ່ງໄຂ່ມຸກ ຍ້ອນຊັບພະຍາກອນທະເລແມ່ນອຸດົມສົມບູນ, ທິວທັດທຳມະຊາດສວຍງາມ, ສະຫງົບງຽບ. ເກາະ ຟູກວັກ ແມ່ນແຫ່ງທີ່ເໝາະສົມເພື່ອໃຫ້ນັກທ່ອງທ່ຽວໄປຄົ້ນຫາທຳມະຊາດ, ຕືກປາ ຫລືດຳນ້ຳ. ຫາດຊາຍທະເລຢູ່ ຟູກວັກ ແມ່ນນຽນ ແລະ ລະອຽດ, ນ້ຳທະເລໃສສະອາດ ແລະ ເລິກ, ບາງບ່ອນມີຄວາມເລິກເຖິງ 30ແມດ. ເກາະແຫ່ງນີ້ ແມ່ນສະຖານທີ່ພັກຜ່ອນທີ່ຈັບອົກຈັບໃຈສຳລັບນັກທ່ອງທ່ຽວ. ທ່ານ ຟູ່ງຊວັນມາຍ, ຜູ້ອຳນວຍການໃຫຍ່ເຂດພັກຜ່ອນບຳລຸງຂຸຂະພາບ ໄຊງ່ອນ ຟູກວັກ ໃຫ້ຮູ້ວ່າ:
“ ໄຊງ່ອນ ຟູກວັກ ໄດ້ຮັບການສ້າງຕັ້ງຂຶ້ນເມ່ືອປີ 1999, ໃນຄາວນັ້ນຢູ່ເທິງເກາະມີໂຮມແຮງພຽງແຫ່ງດຽວ ສະນັ້ນ ເຂດພັກຜ່ອນບຳລຸງສຸຂະພາບ ໄຊງ່ອນ ຟູກວັດ ໄດ້ດຶງດູດນັກລົງທຶນເປັນຈຳນວນຫລວງຫລາຍ. ກ່ອນອື່ນໝົດ ນັກລົງທຶນ ເຂົ້າມາລົງທຶນໃນຂົງເຂດຂົນສົ່ງນັກທ່ອງທ່ຽວ. ປີ 2000 ມີ 3 ຖ້ຽວບິນ/ອາທິດ, ຫລັງຈາກນັ້ນ ແມ່ນ 7 ຖ້ຽວ/ອາທິດ ແລະ ມາຮອດປະຈຸບັນ ແມ່ນ 24 ຖ້ຽວ/ມື້.“
ຕາມທ່ານ ຟູ່ງຊວັນມາຍ ແລ້ວ, ນັກທ່ອງທ່ຽວມາຢ້ຽມຢາມ ຟູກວັກ ບໍ່ພຽງແຕ່ໄດ້ສຳພັດກັບບັນຍາກາດປອດໂປ່ງເທົ່ານັ້ນ ຫາກຍັງໄດ້ຊົມໃຊ້ບັນດາບໍລິການທ່ອງທ່ຽວຊີວະພາບທີ່ເປັນເອກະລັກສະເພາະອີກດ້ວຍ.
“ພິເສດ ພວກຂ້າພະເຈົ້າຂຸດຄົ້ນການບໍລິການທ່ອງທ່ຽວຊີວະພາບເປັນຕົ້ນ ຊຶ່ງລວມມີ: ຊັບພະຍາກອນທຳມະຊາດຢູ່ທ້ອງທະເລຄື: ຕືກປາ, ດຳນ້ຳ, … ສ່ວນຢູ່ໃນປ່າ ພວກຂ້າພະເຈົ້າສ້າງບັນດາລາຍການພິຊິດຈອມພູ, ປີນພູ ນີ້ແມ່ນບັນດາຊັບພະຍາກອນທຳມະຊາດທີ່ມີຢູ່ແລ້ວ ແລະ ແມ່ນທ່າແຮງຂອງ ຟູກວັກ.“
ນອກຈາກ ຟູກວັກ ແລ້ວ, ໂກນດ໋າວ ກໍແມ່ນສະຖານທີ່ດຶງດູດນັກທ່ອງທ່ຽວໃນໂອກາດນີ້. ຕາມທ່ານ ຮີ່ນວັນຮູ່ງ ຫົວຫນ້າຫ້ອງການທ່ອງທ່ຽວຊີວະພາບ ຂອງຄະນະຄຸ້ມຄອງປ່າສະຫງວນແຫ່ງຊາດ ໂກນດ໋າວ ແລ້ວ, ປີນີ້ ຈຳນວນນັກທ່ອງທ່ຽວມາຢ້ຽມຢາມໂກນດ໋າວ ເພີ່ມຂຶ້ນຢ່າງກ້າວກະໂດດ.
“ປະຈຸບັນ ໂກນດ໋າວ ມີ 2 ລາຍການທ່ອງທ່ຽວທີ່ເປັນເອກະລັກສະເພາະ ນັ້ນແມ່ນທ່ອງທ່ຽວປະຫວັດສາດ ແລະ ທ່ອງທ່ຽວຊີວະພາບ. ທ່ອງທ່ຽວຊີວະພາບນັ້ນແມ່ນ: ຢ້ຽມຊົມທິວທັດທຳມະຊາດ, ປີນພູ, ລອຍນ້ຳ, ຊົມປະກາລັງ..... ພິເສດ ແມ່ນຊົມຝຸງເຕົ່າແຜ່ພັນ. ນອກນັ້ນ ຍັງຊົມເບິ່ງນົກບາງຊະນິດບີນມາສ້າງຮັງຢູ່ແຫ່ງນີ້ ຫລືໄປຕຶກປາ, ລອຍນ້ຳ.. ໂກນດ໋າວ ພວມຢູ່ໃນທ່າພັດທະນາ, ນັກທ່ອງທ່ຽວມາຢ້ຽມຢາມໂກນດ໋າວປີນີ້ແມ່ນຫລາຍກວ່າປີກ່ອນ.“
ລາຍຮັບ ແລະ ເງື່ອນໄຂສັງຄົມມີການປ່ຽນແປງ ຄວາມຕ້ອງການໃນຊີວິດສັງຄົມກໍ່ໄດ້ເພີ່ມຂຶ້ນ ນັ້ນແມ່ນສາຍເຫດຊຶ່ງເຮັດໃຫ້ນັບມື້ນັບມີຫລາຍຄົນຍາດເວລາໄປທ່ອງທ່ຽວ ເພື່ອພັກຜ່ອນບຳລຸງສຸຂະພາບ ຫລື ເຕົ້າໂຮມກັບຄອບຄົວ, ເພື່ອນມິດ ຊ້ຳບໍ່ຫນຳບາງຄົນກໍໄປທ່ອງທ່ຽວຜູ້ດຽວ. ເຊີນທ່ານໄປທ່ອງທ່ຽວຟູກວັກ, ໂກນດ໋າວ ເພື່ອສຳພັດກັບລາຍການທ່ອງທ່ຽວທີ່ຈັບອົກຈັບໃຈພິເສດເຫລົ່ານັ້ນ./.
ລານແອງ