(ພາບອີນເຕີແນດ)
(vovworld) - ທັດສະນິຍະພາບກໍ່ຄືສະຖານທີ່ທ່ອງທ່ຽວແຕ່ລະແຫ່ງຢູ່ ດາລາດ ເກືອບຄືວ່າລ້ວນແຕ່ຕິດພັນກັບເລື່ອງນິທານ, ເທບນິຍາຍ. ແຕ່ດົນນານມາແລ້ວ, ພູ Langbiang ໄດ້ກາຍເປັນສະຖານທີ່ທ່ອງທ່ຽວທີ່ຂາດບໍ່ໄດ້ສຳລັບນັກທ່ອງທ່ຽວຫລາຍຄົນເມື່ອມາຢ້ຽມຢາມເຂດພູພຽງແຫ່ງນີ້. ຄວາມງາມກໍຄືສິ່ງທີ່ເລິກລັບຂອງ Langbiang ຍາມໃດກໍ່ສ້າງຄວາມແປກປະຫຼາດໃຈແລະເປັນທີ່ຄົ້ນຫາໃຫ້ແກ່ນັກທ່ອງທ່ຽວເມື່ອມາຢາມແຫ່ງນີ້.
ໂດຍຫ່າງຈາກໃຈກາງນະຄອນ ດາລາດ ໄປທາງທິດເຫນືອ ປະມານ 12 ກິໂລແມັດ ຂຶ້ນກັບບໍລິເວນເມືອງ ລາກເຢືອງ ຕັ້ງຢູ່ລະດັບສູງ 2.169 ແມັດເມື່ອທຽບໃສ່ຫນ້ານ້ຳທະເລ, Langbiang ໄດ້ຮັບການຂະຫນານນາມວ່າ ແມ່ນ “ຫລັງຄາເຮືອນ” ຂອງພູພຽງ ເລີມວຽນ, ຊິ່ງແມ່ນຈຸດສູງສຸດຂອງນະຄອນ ດາລາດ, ແມ່ນສະຖານທີ່ຈັບອົກຈັບໃຈແລະສ້າງຄວາມດຶງດູດນັກທ່ອງທ່ຽວມາຄົ້ນຫາ. ໂດຍຕັ້ງຢູ່ລະດັບສູງຄືແນວນັ້ນ, ພູ Langbiang ໄດ້ຮັບຖືວ່າແມ່ນເຂດທ່ອງທ່ຽວທີ່ເປັນເອກະລັກສະເພາະດ້ວຍຮູບການ ທ່ອງທ່ຽວຄົ້ນຫາທຳມະຊາດ, ຊອກຫາວັດທະນະຂອງປະຊາຊົນຢູ່ທີ່ນີ້. Langbiang ຍັງແມ່ນສະຖານທີ່ດຶງດູດຜູ້ທີ່ມັກທ່ອງທ່ອງພະຈົນໄພ, ດ້ວຍລາຍການທ່ອງທ່ຽວປີນພູ, ພິຊິດຄວາມສູງ. ສ່ວນຢູ່ຕີນພູ Langbiang ກໍ່ມີການບໍລິການຢ່າງຄົບຊຸດຄື: ຮ້ານກິນດື່ມ, ຮ້ານຂາຍຂອງທີ່ລະນຶກ. ພິເສດ ຢູ່ ທີ່ນີ້ຍັງມີການບໍລິການລົດ Jeep ພານັກທ່ອງທ່ຽວຂຶ້ນພູອີກ. ອ້າຍ ຫງວຽນຫຶວມີນຟອງ, ບໍລິສັດທ່ອງທ່ຽວ Viettrip ໃຫ້ຮູ້ວ່າ:
“ນັກທ່ອງທ່ຽວມາຢ້ຽມຢາມ ດາລາດ ລ້ວນແຕ່ໄປຢ້ຽມຢາມ Langbiang. ເພາະວ່າ ເຂົາເຈົ້າຢາກສູບອາກາດຫນາວຢູ່ຈອມພູ. ຢູ່ Langbiang ພວກເຮົາສາມາດຂຶ້ນພູດ້ວຍລົດ Jeep. ຢູ່ເທິງຈອມພູພວກເຮົາສາມາດສັງເກດຮ່ອມພູ ຄຳ ແລະ ຮ່ອມພູ ເງິນ. ເສັ້ນທາງຂຶ້ນຈອມພູຕ້ອງເສຍເວລາປະມານ 3 ຊົ່ວໂມງ. ຖ້າຫາກຂີ່ລົດ Jeep ນັກທ່ອງທ່ຽວພຽງແຕ່ໄປຮອດຈອມພູຕຳ່, ບ່ອນທີ່ຕັ້ງສະຖານີຣາດາເທົ່ານັ້ນ.”
ນັ່ງເທິງລົດ Jeep ຂອງທະຫານເພື່ອເມື່ອຂຶ້ນພູ, ນັກທ່ອງທ່ຽວມີຄວາມຮູ້ສຶກສະບາຍໃຈ. ທັງບໍລິເວນເຕັມໄປດ້ວຍສີຂຽວອຸ່ມທູ່ມຂອງຕົ້ນໄມ້ໃບຫຍ້າ, ອາກາດປອດໂປ່ງ, ເຢັນສະບາຍທີ່ເປັນເອກະລັກສະເພາະຂອງນະຄອນ ດາລາດ. ອ້າຍ Ignazio ນັກທ່ອງທ່ຽວຊາວ ອີຕາລີ ໃຫ້ຮູ້ວ່າ:
“ພວກຂ້າພະເຈົ້າຂຶ້ນພູ ຮູ້ສຶກວ່າ ອາກາດຫນາວຫລາຍ. ທິວທັດທຳມະຊາດຢູ່ ທີ່ນີ້ງາມຫຼາຍ. ນີ້ແມ່ນຫນຶ່ງໃນບັນດາສະຖານທີ່ທີ່ສ້າງຄວາມດູດດື່ມ ໃຫ້ແກ່ພວກຂ້າພະເຈົ້າ ເມື່ອມາຢ້ຽມຢາມ ຫວຽດນາມ. ຂ້າພະເຈົ້າ ມັກແຫ່ງນີ້ຫລາຍ.”
ລະບົບຊີວະນາໆພັນຢູ່ພູພຽງ Langbiang ແມ່ນອຸດົມສົບບູນ ແລະ ຍັງຄົງຮັກສາ ພືດທຸກປະເພດທີ່ລ້ຳຄ່າເຊິ່ງຖືກຈັດເຂົ້າບັນຊີລາຍຊື່ໃນປື້ມແດງຂອງ ຫວຽດນາມ. ຢູ່ ທີ່ນີ້ຍັງມີຕົ້ນໄມ້ຫາຍາກ ແລະ ມີຄ່າຫລາຍປະເພດ, ນອກນັ້ນ Langbiang ຍັງມີຕົ້ນຢາສະໝູນໄພທີ່ລ້ຳຄ່າຫຼາຍຊະນິດອີກ. ສະເພາະດອກດອກກ້ວຍ Langbiang ກໍ່ມີເຖິງ 300 ຊະນິດ. ນອກນັ້ນ, ຢູ່ທີ່ນີ້ຍັງມີດອກໄມ້ປ່າ, ດອກໄມ້ ຫວຽດນາມ ກໍຄືດອກໄມ້ທີ່ນຳເຂົ້າຈາກຕ່າງປະເທດຫຼາຍຊະນິດອີກດ້ວຍຄື: violet, mimosa, … ພາຍຫຼັງຄົ້ນຫາ ພູພຽງ Langbiang ໃນມື້ຫນຶ່ງ, ຮອດຍາມຄ່ຳຄືນ ເມື່ອລົງຕີນພູນັກທ່ອງທ່ຽວຈະໄດ້ຮັບປະທານອາຫານພິເສດສະເພາະຂອງທ້ອງຖິ່ນຄື: ຊີ້ນປີ້ງ, ເຫລົ້າໄຫ ແລະ ໄດ້ຮັບຟັງສຽງຄ້ອງທີ່ມ່ວນຊຶ່ນໂດຍຊາວຊົນເຜົ່າສະແດງ.
ນອກຈາກວຽກໄຮ່ການນາ, ເມື່ອມີແຂກທ່ອງທ່ຽວມາຢ້ຽມຢາມ, ປະຊາຊົນຢູ່ ລາກເຢືອງ ກໍ່ໄດ້ແນະນຳໃຫ້ນັກທ່ອງທ່ຽວສີສັນວັດທະນະທຳຂອງຊົນເຜົ່າຕົນຜ່ານສຽງຄ້ອງ, ສຽງເປົ່າແຄນ. ນີ້ກໍເປັນສິ່ງພິເສດເພື່ອດຶງດູດນັກທ່ອງທ່ຽວ. ທ່ານ Krajan Plin ຫົວຫນ້າຫນ່ວຍເພື່ອນມິດ Langbiang ໃຫ້ຮູ້ວ່າ:
“ຂ້າພະເຈົ້າໄດ້ກຳນົດວ່າ: ໃນລາຍການສ່ວນຫລາຍແມ່ນແນະນຳຈຸດພິເສດສະເພາະ ແລະ ວັດທະນະທຳພື້ນເມືອງຂອງຕົນ. ຄຽງຄູ່ກັນນັ້ນ ພວກຂ້າພະເຈົ້າຍັງແນະນຳເຄື່ອງດົນຕີພື້ນເມືອງອີກ. ໃນລາຍການຂອງຂ້າພະເຈົ້າລວມມີ 3 ພາກ, ພາກທີ 1 ແນະນຳວັດທະນະທຳພື້ນເມືອງ. ພາກທີ 2 ແນະນຳບັນດາບົດເພງຊຶ່ງຂ້າພະເຈົ້າປະດິດແຕ່ງ ກໍຄືບັນດາບົດເພງຂອງນັກດົນຕີໄຕງວຽນ ປະດິດແຕ່ງກ່ຽວກັບໄຕງວຽນ ເພື່ອແນະນຳໃຫ້ທຸກຄົນຢູ່ທຸກແຖບຖິ່ນຂອງປະເທດ ກໍຄືແຂກສາກົນຮູ້ຈັກເຖິງ. ພາກທີ 3 ແມ່ນການພົວພັນແລກປ່ຽນ ບາງເທື່ອເຊີນນັກທ່ອງທ່ຽວຟ້ອນນຳ ຫລື ນັກທ່ອງທ່ຽວຂັບຮ້ອງໃຫ້ປະຊາຊົນໃນບ້ານຮັບຟັງ.”
ໃນເວລາ 1 ຊົ່ວໂມງ, ນັກທ່ອງທ່ຽວໄດ້ຮັບຟັງສຽງຄ້ອງໄຕງວຽນ, ໄດ້ດື່ມເຫລົ້າໄຫ ແລະ ເຂົ້າຮ່ວມວາດຟ້ອນຂອງຊາວເຜົ່າ K”ho, ໄດ້ຮັບຟັງເລື່ອງລາວກ່ຽວກັບ ພູພຽງ Langbiang, ເລື່ອງລາວກ່ຽວກັບຄວາມຮັກຂອງຊາຍຫນຸ່ມ K”lang ແລະ ນາງສາວ Hobiang ແຫ່ງເທບນິຍາຍ, ທຸກສິ່ງທຸກຢ່າງເຫຼົ່ານັ້ນໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວເມື່ອມາຢ້ຽມຢາມ Langbiang, ຢ້ຽມຢາມ ນະຄອນ ດາລາດ.