(vovworld)- ໂດຍຫ່າງຈາກໃຈກາງນະຄອນຫລວງ ຮ່າໂນ້ຍໄປທາງທິດຕາເວັນຕົກສຽງເຫນືອ ປະມານ 53 ກິໂລແມັດ, ບາຫວີ່ ແມ່ນເຂດດິນແດນທີ່ມີທິວທັດທຳມະຊາດສວຍງາມ ແລະ ກໍແມ່ນສະຖານທີ່ ທີ່ມີປູຊະນີຍະສະຖານປະຫວັດສາດວັດທະນະທຳຫລາຍແຫ່ງຂອງຫວຽດນາມ. ມາຢ້ຽມຢາມ ບາຫວີ່ ນັກທ່ອງທ່ຽວຈະໄດ້ຢ້ຽມຊົມແມ່ນ້ຳລຳເຊ, ພູຜາປ່າໄມ້ ແລະ ທົ່ງຫຍ້າທີ່ຂຽວອຸ່ມທູ່ມ. ດ້ວຍທ່າໄດ້ປຽບນັ້ນ ຢູ່ ບາຫວີ່ ໄດ້ສ້າງໃຫ້ມີເຂດທ່ອງທ່ຽວຫລາຍແຫ່ງຄື: ນ້ຳອຸ່ນ ຄວາງແຊນ - ຊວຍຕຽນ, ອາວວົວ - ເດີ່ມລອງ, ທາກດາ - ໂຮ່ຕຽນຊາ, ເຂດທ່ອງທ່ຽວ ຫ້ວຍນ້ຳອຸ່ນ ຕ໋ານດ່າ .
ຈາກນະຄອນຫລວງ ຮ່າໂນ້ຍ, ນັກທ່ອງທ່ຽວຂີ່ລົດໂອໂຕປະມານກວ່າ 1 ຊົ່ວໂມງຈະໄປຮອດ ບາຫວີ່ ເພື່ອເຈືອຈານເຂົ້າກັບທິວທັດທຳມະຊາດທີ່ສວຍງາມ ຫລືໄປຢ້ຽມຢາມເຂດປູຊະນີຍະສະຖານປະຫວັດສາດທີ່ມີມາແຕ່ດົນນານ. ນອກນັ້ນ ບາຫວີ່ ຍັງດຶງດູດນັກທ່ອງທ່ຽວດ້ວຍປ່າສະຫງວນບາຫວີ່ ຊຶ່ງແມ່ນຫນຶ່ງໃນຈຳນວນປ່າສະຫງວນ 6 ແຫ່ງທີ່ມີລະບົບສັດສາວາສິ່ງອຸດົມສົມບູນອັນດັບຫນຶ່ງຢູ່ ຫວຽດນາມ. ຍາກທີ່ຈະມີດິນແດນແຫ່ງໃດມີທິວທັດທຳມະຊາດພູຜາປ່າໄມ້, ແມ່ນ້ຳລຳເຊ ແລະ ປ່າດົງດີບປະສົມປະສານກັນຄືຢູ່ ບາຫວີ່. ຈອມພູ ບາຫວີ່ ມີຄວາມສູງ 1.296 ແມັດ ແມ່ນທັດສະນີຍະພາບ ແລະ ກໍແມ່ນແຫ່ງທີ່ມີເຂດປູຊະນີຍະສະຖານປະຫວັດສາດຫລາຍແຫ່ງ. ຢູ່ ບາຫວີ່ ມີສະຖານທີ່ທ່ອງທ່ຽວຊີວະພາບ 2 ແຫ່ງຄື: ຢູ່ທາງທິດຕາເວັນອອກຂອງ ບາຫວີ່ ມີທິວທັດທຳມະຊາດສວຍງາມດ້ວຍ ນ້ຳຕົກຕາດ, ຫ້ວຍນ້ຳ, ປ່າດົງດີບມີຄວາມງາມດັ່ງໃນຝັນ. ສ່ວນຢູ່ທາງທິດຕາເວັນຕົກ ມີທີ່ຕັ້ງພູມລຳເນົາສວຍງາມ ດ້ວຍແມ່ນ້ຳດ່າໄຫຼຜ່ານຢູ່ທາງໜ້າ ອັນໄດ້ສ້າງຄວາມດູດດື່ມໃຫ້ແກ່ນັກທ່ອງທ່ຽວ.
ເຂດທ່ອງທ່ຽວ ທຽນເຊີນ - ຊວຍງ່າ ຢູ່ ບາຫວີ່
ພາບ:dulich.com
|
ສະຖານທີ່ທ່ອງທ່ຽວທຳອິດທີ່ນັກທ່ອງທ່ຽວເຄີຍເລືອກເຟັ້ນເມື່ອມາຢ້ຽມຢາມ ບາຫວີ່, ນັ້ນແມ່ນເຂດທ່ອງທ່ຽວ ຄວາງແຊນ - ຊວຍຕຽນ. ບໍ່ພຽງແຕ່ມີນ້ຳຕົກຕາດຫລາຍແຫ່ງທີ່ສວຍງາມຄື: ທາກຈານ, ທາກເມີ, ທາກເມີມໂຊຍ, ທາກຮ່ວາລານ... ຄວາງແຊນ ຊວນຕຽນ ຍັງສ້າງຄວາມດຶງດູດນັກທ່ອງທ່ຽວ ດ້ວຍສະພາບແວດລ້ອມຊີວະພາບທຳມະຊາດຢູ່ທີ່ນີ້ອີກດ້ວຍ. ພາຍຫລັງອາບນ້ຳຢູ່ນ້ຳຕົກຕາດແລ້ວ, ນັກທ່ອງທ່ຽວສາມາດຂຶ້ນຈອມພູ ວົວ ເພື່ອຄົ້ນຫາປາດົງດີບດ້ວຍລະບົບສັດສາວາສິ່ງອຸດົມສົມບູນ ແລະ ຕົ້ນໄມ້ທີ່ຫາຍາກຫລາຍຊະນີດ. ໃນເຂດທ່ອງທ່ຽວນີ້ຍັງມີຫ້ວຍນ້ຳອຸ່ນ, ບໍລິການອາບບວກຂີ້ຕົມອີກດ້ວຍ. ໂດຍແມ່ນຫນຶ່ງໃນບັນດາສະຖານທີ່ທ່ອງທ່ຽວຢູ່ມໍ່ກັບນະຄອນຫລວງ ສະນັ້ນ ຄວາງແຊນ - ຊວຍຕຽນໄດ້ດຶງດູດນັກທ່ອງທ່ຽວ, ເປັນຕົ້ນແມ່ນລຸ້ນຫນຸ່ມມາຢ້ຽມຢາມແຫ່ງນີ້ເປັນຈຳນວນຫລວງຫລາຍ. ທ່ານ ກ່ຽວວັນຕວຽນ ຜູ້ອຳນວຍການດຳເນີນທຸລະກິດເຂດທ່ອງທ່ຽວ ຄວາງແຊນ - ຊວຍຕຽນ ໃຫ້ຮູ້ວ່າ:
“ຢູ່ ຄວາງແຊນ, ຈຳນວນນັກທ່ອງທ່ຽວມາຢ້ຽມຢາມໄດ້ເພີ່ມຂຶ້ນໃນແຕ່ລະປີ , ເພາະວ່າ ບໍລິການທ່ອງທ່ຽວຢູ່ທີ່ນີ້ແມ່ນອຸດົມສົມບູນ ແລະ ຫລາຍຮບູຫລາຍແບບ. ສະນັ້ນ ເຂດທ່ອງທ່ຽວ ຄວາງແຊນ ຊວຍຕຽນ ຈຶ່ງສາມາດດຶງດູດນັກທ່ອງທ່ຽວນັບແຕ່ຜູ້ເຖົ້າແກ່ຕະຫລອດຮອດໄວຫນູ່ມມາຢ້ຽມຢາມເປັນຈຳນວນຫລວງຫລາຍ.”
ບໍ່ພຽງແຕ່ ຄວາມແຊນ ຊວຍຕຽນ, ບັນດາເຂດທ່ອງທ່ຽວແຫ່ງອື່ນຢູ່ ບາຫວີ່ ຄື:ທຽນເຊີນ ຊວຍງ່າ, ເຂດທ່ອງທ່ຽວທາກດາ ...ລ້ວນແຕ່ຖືການພັດທະນາທ່ອງທ່ຽວຊີວະພາບເປັນພື້ນຖານ, ສະນັ້ນ ການລົງທຶນພື້ນຖານໂຄງລ່າງຢູ່ທີ່ນີ້ລ້ວນແຕ່ຕິດພັນກັບທຳມະຊາດ ຈຳກັດການກໍ່ສ້າງກິດຈະກຳຕ່າງໆດ້ວຍເບຕົງ, ພ້ອມທັງຫັນແຫ່ງນີ້ເປັນສະຖານທີ່ສຶກສາກ່ຽວກັບສິ່ງແວດລ້ອມທຳມະຊາດ. ທ່ານ ຫງວຽນວັນຫາຍ, ຮອງປະທານຄະນະກຳມະການປະຊາຊົນ ເມືອງ ບາຫວີ່ ໃຫ້ຮູ້ວ່າ:
“ປະຈຸບັນ ຢູ່ ບາຫວີ່ ມີສະຖານທີ່ທ່ອງທ່ຽວຫລາຍແຫ່ງພວມໄດ້ຮັບການພັດທະນາຢ່າງແຮງ, ກ່ອນອື່ນໝົດ ແມ່ນພັດທະນາຮູບການທ່ອງທ່ຽວຄື: ທ່ອງທ່ຽວງານບຸນຕົ້ນປີ, ທ່ອງທ່ຽວຊີວະພາບ, ທ່ອງທ່ຽວປະຊາຄົມ ແລະ ໃນຊຸມປີມໍ່ໆມານີ້ ເມືອງ ບາຫວີ່ ກໍໄດ້ສຸມໃສ່ພັດທະນາບັນດາເຂດທ່ອງທ່ຽວຈຸດສຸມຄື: ຄວາງແຊນ ຊວຍຕຽນ, ອາວວົວ ຫລື ທຽນເຊີນ ຊວຍງ່າ ແລະ ເຂດເຊື່ອມຕໍ່ຂອງປ່າສະຫງວນແຫ່ງຊາດ ບາຫວີ່.”
ທິວທັດທຳມະຊາດ ຢູ່ ບາຫວີ່
ພາບ: internet
|
ໃນສອງສາມປີມານີ້ ຈຳນວນນັກທ່ອງທ່ຽວມາຢ້ຽມຢາມ ບາຫວີ່ ໄດ້ເພີ່ມຂຶ້ນຫລາຍເມື່ອທຽບໃສ່ຊຸມປີກ່ອນ. ປີ 2011 ຈຳນວນນັກທ່ອງທ່ຽວມາຢ້ຽມຢາມ ບາຫວີ່ ບັນລຸກວ່າ 2 ລ້ານເທ່ືອຄົນ, ເພີ່ມຂຶ້ນ 40% ເມື່ອທຽບໃສ່ປີ 2010 ສ້າງລາຍຮັບໄດ້ 140 ຕື້ດົ່ງ. ເຖິງຢ່າງໃດກໍຕາມ, ຈຳນວນນັກທ່ອງທ່ຽວມາຢ້ຽມຢາມ ບາຫວີ່ ສ່ວນຫລາຍແມ່ນນັກທ່ອງທ່ຽວພາຍໃນປະເທດ, ສະນັ້ນ ຂະແຫນງທ່ອງທ່ຽວ ຮ່າໂນ້ຍ ໄດ້ ແລະ ພວມວາງແຜນກຳນົດຮອດປີ 2020 ດ້ວຍບັນດາມາດຕະການລະອຽດ, ຄົບຊຸດ ເພື່ອພັດທະນາການທ່ອງທ່ຽວ. ປະຈຸບັນ ນະຄອນ ຮ່າໂນ້ຍ ພວມສົ່ງເສີມບັນດາວິສາຫະກິດລົງທຶນກໍ່ສ້າງພື້ນຖານໂຄງລ່າງ, ສ້າງການບໍລິການທ່ອງທ່ຽວທີ່ເປັນເອກະລັກສະເພາະເພື່ອດຶງດູດນັກທ່ອງທ່ຽວ. ນອກນັ້ນ ຮຽກຮ້ອງນັກລົງທຶນຕ່າງປະເທດເຂົ້າມາລົງທຶນຢູ່ເຂດທ່ອງທ່ຽວຊວຍຮາຍ, ທາງທິດຕາເວັນອອກ ແລະ ທາງທິດຕາເວັນຕົກຂອງ ບາຫວີ່ ເພື່ອສ້າງບັນດາໂຄງການທ່ອງທ່ຽວທີ່ດູດດື່ມ. ທ່ານ ຫງວຽນວັນຫາຍ ຮອງປະທານຄະນະກຳມະການປະຊາຊົນເມືອງ ບາຫວີ່ ຍັງໃຫ້ຮູ້ຕື່ມອີກວ່າ:
“ພວກຂ້າພະເຈົ້າສຸມໃສ່ເຂົ້າໃນການຂຸດຄົ້ນທຸກຄວາມສາມາດບົ່ມຊ້ອນ, ທ່າແຮງຂອງເມືອງ ບາຫວີ່ ແລະ ຍູ້ແຮງການພັດທະນາການທ່ອງທ່ຽວໃຫ້ກາຍເປັນຂະແຫນງເສດຖະກິດຈຸດສຸມ, ກວມ 50 % ມູນຄ່າທັງໝົດຂອງອົງປະກອບເສດຖະກິດໃນທ້ອງຖິ່ນ. ສະນັ້ນ ຕ້ອງປະຕິບັດການຫັນຮູບການທ່ອງທ່ຽວເປັນຫລາຍຮູບຫລາຍແບບ, ຕົວຢ່າງຄື: ທ່ອງທ່ຽວຈິດວິນຍານ, ທ່ອງທ່ຽງງານບຸນ, ທ່ອງທ່ຽວປະຊາຄົມ.”
ຢູ່ ບາຫວີ່ ຍັງມີທົ່ງຫຍ້າຂຽວອອ່ນທີ່ກວ້າງໃຫຍ່, ມີຟາມລ້ຽງງົວພັນນົມຫລາຍແຫ່ງ ຊື່ງແມ່ນແຫ່ງສະຫນອງບັນດາຜະລິດຕະພັນນ້ຳນົມທີ່ລືຊື່ໃນທົ່ວປະເທດ. ດ້ວຍການປະສົມປະສານຢ່າງກົມກຽວລະຫວ່າງບັນດາຮູບການທ່ອງທ່ຽວຊີບະພາບ, ທ່ອງທ່ຽວພັກຜ່ອນບຳລຸງສຸຂະພາບຕິດພັນກັບທ່ອງທ່ຽວປະຊາຄົມ, ທ່ອງທ່ຽວຈິດວິນຍານ ... ນັ້ນໄດ້ ແລະ ພວມເຮັດໃຫ້ບາຫວີ່ ກາຍເປັນສະຖານທີ່ທ່ອງທ່ຽວທີ່ນັບມື້ນັບດຶງດູດນັກທ່ອງທ່ຽວທັງຢູ່ໃກ້ ແລະ ໄກມາທ່ຽວເປັນຈຳນວນຫຼວງຫຼາຍ.