(vovworld) - ນະຄອນຫລວງ ຮ່າໂນ້ຍ ແມ່ນຕົວເມືອງມີຄວາມງາມແບບເກົ່າແກ່ ແຕ່ທັນສະໄຫມ. ນອກຈາກບັນດາຄຸ້ມຖະໜົນກໍ່ສ້າງໃຫມ່ດ້ວຍອາຄານຫລາຍຊັ້ນທີ່ຫນ້າແຫນ້ນຄື: ຄຸ້ມຖະຫນົນ ຫງວຽນທິດີ້ງ, ຮວ່າງດ້າວທີ.... ຄຸ້ມຖະນົນເກົ່າມີຖະຫນົນຫລາຍສາຍຍັງຄົງຮັກສາອາຊີບຫັດຖະກຳທີ່ມີມາແຕ່ດົນນານຄື: ຖະຫນົນຮ່າງໝ໋າ ດ້ວຍອາຊີບຜະລິດເຄື່ອງບູຊາ, ເຈ້ຍປະດັບປະດາດ້ວຍສີສັນຫລາກຫລາຍ, ຖະຫນົນຮ່າງທຽກ, ຮ່າງດົ່ງ ແມ່ນຫລໍ່ທອງ, ຕີເຫລັກ .. ນະຄອນຫລວງຮ່າໂນ້ຍ ມີຈຸດທີ່ເປັນເອກະລັກພິເສດສະເພາະ ສະນັ້ນນັກທ່ອງທ່ຽວສາກົນມາຢ້ຽມຢາມນະຄອນຫລວງ ຮ່າໂນ້ຍລ້ວນແຕ່ຮູ້ສຶກປະທັບໃຈທີ່ສຸດ.
ໃນສາຍຕາຂອງນັກທ່ອງທ່ຽວສາກົນ, ນະຄອນຫລວງ ຮ່າໂນ້ຍງາມຫລາຍ ແລະ ແປກປະຫລາດ. ດ້ວຍຖະຫນົນຫລາຍສາຍມີຕົ້ນໄມ້ຂຽວເປັນທີ່ຮົ່ມເຢັນ ແລະ ຄົນໄປມາຢ່າງຄັບຄາຫນາແຫນ້ນ. ຄວາມງາມນັ້ນບໍ່ມີຢູ່ນະຄອນແຫ່ງໃດໃນໂລກ ສະນັ້ນ ຮ່າໂນ້ຍຍາມໃດກໍແມ່ນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວຕ່າງປະເທດ.
ພາບປະກອບ:internet
|
ຊີວິດການເປັນຢູ່ຂອງປະຊາຊົນໃນຄຸ້ມຖະໜົນເກົ່າຮ່າໂນ້ຍ ແມ່ນຟົດຟື້ນເຕັມໄປດ້ວຍພະລັງຊີວິດ ຈຶ່ງເຮັດໃຫ້ນັກທ່ອງທ່ຽວຫລາຍຄົນບໍ່ອາດຈາກລາຮ່າໂນ້ຍ. ອ້າຍ Albert Thomas, ນັກທ່ອງທ່ຽວມາຈາກ ຝລັ່ງ ເປັນຄັ້ງທຳອິດມາຢ້ຽມຢາມຮ່າໂນ້ຍມີຄວາມປະຫລາດໃຈຕໍ່ການສັນຈອນໄປມາຂອງຍານພາຫະນະຢູ່ຕາມຖະຫນົນຫົນທາງ
ສາຍຕ່າງໆ. ອ້າຍ Albert Thomas ເວົ້າວ່າ:
“ຮ່າໂນ້ຍແມ່ນນະຄອນຫລວງພິເສດ. ຊາວເອີລົບທຸກຄົນມາຢ້ຽມຢາມຮ່າໂນ້ຍ ລ້ວນແຕ່ຮູ້ສຶກວ່າ ຢູ່ນະຄອນນີ້ມີລົດຈັກ, ລົດໂອໂຕໄປມາຫນາແຫນ້ນ ຫາກຢູ່ຝລັ່ງບໍ່ມີ. ດຽວນີ້ ຂ້າພະເຈົ້າຍັງກຳລັງຮຽນເອົາວິທີຂ້າມທາງ.”
ນັກທ່ອງທ່ຽວຕ່າງປະເທດສ່ວນຫລາຍມາຢ້ຽມຢາມຮ່າໂນ້ຍໃນຄັ້ງທຳອິດກໍ່ຮູ້ສຶກຄືອ້າຍ Albert Thomas. ແຕ່ສິ່ງນັ້ນກໍແມ່ນຄວາມດຶງດູດນັກທ່ອງທ່ຽວ. ນອກນັ້ນ ຢູ່ໃນຄຸ້ມຖະໜົນເກົ່າຮ່າໂນ້ຍ ຍັງມີຮ້ານກາເຟບາງແຫ່ງໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວເປັນຈຳນວນຫຼວງຫລາຍ.
ມາຢ້ຽມຢາມຮ່າໂນ້ຍນັກທ່ອງທ່ຽວຈະໄດ້ໄປຢ້ຽມຢາມບັນດາສະຖານທີ່ຄື: ສຸສານປະທານໂຮ່ຈິມີນ, ວັນມຽວ ກວັກຕືຢາມ, ໝູ່ບ້ານເຄື່ອງປັ້ນດິນເຜົາບາດຈ່າງ .... ແຕ່ລະແຫ່ງນັ້ນລ້ວນແຕ່ເຮັດໃຫ້ນັກທ່ອງມີທ່ຽວຄວາມຮູ້ສຶກແຕກຕ່າງກັນ. ເອື້ອຍ Marill Besneedide ຊາວຝລັ່ງ ມາເຮັດວຽກຢູ່ ຮ່າໂນ້ຍມາເປັນເວລາ 3 ອາທິດແລ້ວ ໄດ້ຍາດເວລາເພື່ອຄົ້ນຫາຮ່າໂນ້ຍຢ່າງລະອຽດ. ເອື້ອຍໃຫ້ຮູ້ວ່າ:
“ໄປທ່ຽວຊົມເພື່ອຊອກຮູ້ປະຫວັດສາດ, ຊອກຮູ້ກ່ຽວກັບປະທານໂຮ່ຈິມີນ, ແບບແຜນດຳລົງຊີວິດຂອງຊາວ ຮ່າໂນ້ຍ ຫລືສະຖາປັດຕະຍະກຳບັນດາວັດວາອາຮາມ. ຂ້າພະເຈົ້ານິຍົມວັດ ເຈີນກວກຢູ່ ຫນອງໂຮ່ໄຕ, ວັນມຽວກວກຕືຢາມ ແລະ ມື້ນີ້ໄດ້ຊອກຮູ້ກ່ຽວກັບຫໍພິພິດທະພັນຊົນເຜົ່າວິທະຍາ.”
ຕາມອ້າຍ David ນັກທ່ອງທ່ຽວມາຈາກ ອົດສະຕາລີ, ສິ່ງສ້າງຄວາມປະທັບໃຈທີ່ສຸດຢູ່ຮ່າໂນ້ຍສຳລັບນັກທ່ອງທ່ຽວຕ່າງປະເທດນັ້ນແມ່ນຊາວນະຄອນຫລວງ. ຖ້າຫາກບໍ່ມີເຂົາເຈົ້າ ບໍ່ວ່ານະຄອນໃດຢູ່ໃນໂລກ ມີພຽງຖະຫນົນສາຍຕ່າງໆເທົ່ານັ້ນ. ອ້າຍ David ມັກຮ່າໂນ້ຍຫລາຍ ເພາະວ່າ ອ້າຍຮູ້ສຶກຄືຕົນເອງໄດ້ຮັບການຕ້ອນຮັບຢ່າງສະຫນິດສະຫນົມແທ້ໆ.
“ຂ້າພະເຈົ້າໄດ້ໄປຢ້ຽມຢາມພາກໃຕ້ ແລະ ຫລາຍແຂວງຢູ່ ຫວຽດນາມ ແຕ່ມາຮ່າໂນ້ຍແມ່ນຄັ້ງທຳອິດ. ຂ້າພະເຈົ້າເຫັນວ່າ ຊາວຮ່າໂນ້ຍແມ່ນຜູ້ຮັກແພງແຂກ ແລະ ສະຫນິດສະຫນົມ. ເຂົາເຈົ້າພ້ອມແລ້ວຈະຊ່ວຍເຫລືອໃຫ້ທຸກຄົນ. ຂ້າພະເຈົ້າໄດ້ໄປຢ້ຽມຢາມຫລາຍປະເທດຢູ່ອາຊີຕາເວັນອອກ ແຕ່ເຫັນວ່າ ຮ່າໂນ້ຍແມ່ນແຫ່ງທີ່ຂ້າພະເຈົ້າມັກທີ່ສຸດ. ຖ້າມີໂອກາດຈະກັບຄືນອີກຄັ້ງຫນຶ່ງ.”
ຮ່າໂນ້ຍ ບໍ່ພຽງແຕ່ສ້າງຄວາມດຶງດູດນັກທ່ອງທ່ຽວຕ່າງປະເທດດ້ວຍຄວາມງາມແບບເກົ່າແກ່, ຄວາມສຸພາບຂອງຊາວນະຄອນຫລວງ ຫາກບັນດາເຍື່ອງອາຫານພື້ນເມືອງທີ່ເປັນພິເສດສະເພາະກໍເປັນສິ່ງດຶງດູດນັກທ່ອງທ່ຽວ. ເອື້ອຍ Marill Besneedide ເວົ້າວ່າ:
“ຂ້າພະເຈົ້າມັກກິນເຍື່ອງອາຫານ ຫວຽດນາມ ຫລາຍ, ຕົວຢ່າງຄື: ເຂົ້າປຸນ້ງົວ, ແນມ, ແບນກວນ... ຢູ່ ຝລັ່ງພວກຂ້າພະເຈົ້າກໍເຂົ້າຮ້ານອາຫານ ອາຊີຫລາຍແຫ່ງ. ແຕ່ມາຮ່າໂນ້ຍຂ້າພະເຈົ້າໄດ້ກິນອາຫານຫລາຍເຍື່ອງທີ່ແຊບນົວກວ່າ.”
ຄຸ້ມຖະຫນົນເກົ່າຢູ່ຮ່າໂນ້ຍ
ພາບ:internet
|
ເມື່ອມາຮ່າໂນ້ຍ, ເຍື່ອງອາຫານທີ່ນັກທ່ອງທ່ຽວບໍ່ອາດປະຕິເສດໄດ້ ນັ້ນແມ່ນ ເຝີ. ຮ້ານຂາຍເຝີ ຢູ່ ຮ່າໂນ້ຍມີຫຼາຍຈົນນັບບໍ່ຫລ້ອນ. ແຂກທ່ອງທ່ຽວອາດຈະເຂົ້າຮ້ານຂາຍເຝີໃດໆກໍ່ໄດ້, ບໍ່ວ່າຢູ່ຮ້ານໃດກໍລ້ວນແຕ່ໄດ້ຮັບປະທານເຝີຖ້ວຍໃຫຍ່ທີ່ສົດໆຮ້ອນໆ ດ້ວຍເສັ້ນເຝີທີ່ຫນຽວ, ຂາວ ໃສ່ເຂົ້າໃນຖ້ວຍທີ່ສະອາດ ພ້ອມກັບນ້ຳເຝີທີ່ຕົ້ມດວ້ຍກະດູກ ແລະ ເຄື່ອງເທດສະເພາະມັນຍິ່ງເຮັດໃຫ້ເຝີ ຮ່າໂນ້ຍແຊບນົວ ແລະ ມີລົດຊາດພິເສດ, ລາຄາກໍຖືກ ປະມານ 2 USD/ຖ້ວຍ. ມາຮ່າໂນ້ຍຄັ້ງໃດກໍ່ເຊັ່ນກັນ, ທ່ານ James Rhode ຊິ່ງແມ່ນແຂກທ່ອງທ່ຽວມາຈາກອາເມລິກາ, ກໍໄດ້ຍາດເວລາຫາໂອການຊອກຮັບປະທານເຝີຕາມຮ້ານທົວ່ໆໄປ. ທ່ານ James Rhode ເວົ້າວ່າ:
“ເຖິງວ່າ ເພື່ອນກິນເຝີຢູ່ໃນພັດຕະຄານ ຫລື ກິນເຝີນຳຜູ້ຫາບຂາຍເລາະໄປຕາມຖະໜົນ ກໍລ້ວນແຕ່ແຊບເໝືອນກັນ. ຂ້າພະເຈົ້າພະຍາຍາມກິນເຝີ ຢ່າງໜ້ອຍສຸດແມ່ນມື້ລະເທື່ອ, ຍ້ອນວ່າເຝີແຊບຫຼາຍ ແລະເປັນອາຫານບຳລຸງ. ວິທີປຸງແຕ່ງທີ່ຊາວຫວຽດນາມເຮັດເຝີແມ່ນດີຕໍສຸຂະພາບທີ່ສຸດ. ຂ້າພະເຈົ້າກິນເຝີຫລາຍທີ່ສຸດ ແຕ່ກໍຍັງຫລຸດນ້ຳຫນັກໄດ້. ສິ່ງດັ່ງກ່າວຂ້າພະເຈົ້າພຽງແຕ່ເຮັດໄດ້ຢູ່ຮ່າໂນ້ຍເທົ່ານັ້ນ .”
ພາຍຫລັງຄົ້ນຫາຮ່າໂນ້ຍໃນເວລາມື້ຫນຶ່ງ, ຕອນຄຳ່ນັກທ່ອງທ່ຽວຕ່າງປະເທດມັກໄປເລາະຫລິ້ນຢູ່ຄຸ້ມຖະໜົນເກົ່າ. ຕາມອ້າຍ James Rhode ຢູ່ຮ່າໂນ້ຍມີຫລາຍສິ່ງຫລາຍຢ່າງ ພຽງໃນເວລາ 5 ນາທີ ນັກທ່ອງທ່ຽວສາມາດເຫັນປະຈັກຕາຈຸດທີ່ເປັນລັກສະນະພິເສດ ແລະ ມີຊີວິດຊີວາຂອງນະຄອນຫລວງຮ່າໂນ້ຍ.