(vovworld) - ປີທ່ອງທ່ຽວແຫ່ງຊາດຢູ່ຕອນເຫນືອທາງພາກກາງ ຫວຽດນາມ ປີ 2012 ພາຍໃຕ້ຫົວຂໍ້ວ່າ: “ທ່ອງທ່ຽວມໍລະດົກ”. ເຂດຕອນເຫນືອທາງພາກກາງ ຫວຽດນາມ ຊຶ່ງແມ່ນສະຖານທີ່ມີ ມໍລະດົກ, ປູຊະນີຍະສະຖານລະດັບຊາດສຳຄັນ ແລະ ມໍລະດົກໂລກຫລາຍແຫ່ງພ້ອມກັບງານບຸນທີ່ເປັນເອກະລັກສະເພາະຕ່າງໆ. ງານບຸນຕົ້ນລະດູບານໃຫມ່, Festival ເຫ້ວ ແມ່ນຖືກຈັດຂຶ້ນໃນເດືອນ 1,2 ແລະ ເດືອນ 4, ສ່ວນລະດູທ່ອງທ່ຽວຍາມຮ້ອນ ຖືກຈັດຂຶ້ນໃນເດືອນ 6, 7 ຢູ່ພາກກາງ ຊື່ງແມ່ນສະຖານທີ່ມີຫາດຊາຍທະເລສວຍງາມຫລາຍແຫ່ງ ໃນນັ້ນມີເມືອງຫລວງເກົ່າເຫ້ວ ແມ່ນແຫ່ງຈັດຕັ້ງບັນດາເຫດການຕົ້ນຕໍດ້ວຍການຮ່ວມສຳພັນກັບບັນດາແຂວງ, ນະຄອນຄື: ກວ໋າງຈີ້, ກວ໋າງບີ່ງ, ຮ່າຕີ້ງ, ເຫງ້ອານ, ແທນຮວາ ແລະ ຮ່າໂນ້ຍ.
ທ່ານນາຍົກລັດຖະມົນຕີNguyen Tan Dung ອ່ານສູນທອນພົດໄຂພິທີປີ
ທ່ອງທ່ຽວແຫ່ງຊາດ 2012
ພາບ:internet
|
ໃນປີທ່ອງທ່ຽວແຫ່ງຊາດ ຈະດຳເນີນການເຄື່ອນໄຫວທາງດ້ານວັດທະນະທຳ, ກິລາ ແລະ ການທ່ອງທ່ຽວລະດັບຊາດ ແລະ ສາກົນເກືອບ 30 ລາຍການ. ດ້ວຍທ່າແຮງທີ່ເປັນເອກະລັກສະເພາະກ່ຽວກັບມໍລະດົກ, ປູຊະນີຍະສະຖານ, ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ໂດຍແຂວງ ເທື່ອທຽນເຫ້ວ ເປັນເຈົ້າພາບຈັດຕັ້ງໄດ້ນຳມາຊຶ່ງຄວາມແປກປະຫລາດ, ຄວາມດູດດື່ມ ແລະ ສີສັນສະເພາະ. ທ່ານຟານຕຽນຢູ໋ງ ຮອງຫົວຫນ້າພະແນກວັດທະນະທຳກິລາ ແລະ ທ່ອງທ່ຽວ ແຂວງ ເທື່ອທຽນເຫ້ວ ໃຫ້ຮູ້ວ່າ:
“ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ກໍແມ່ນປີທີ່ພວກຂ້າພະເຈົ້າຈັດຕັ້ງ Festival ເຫ້ວ ຄັ້ງທີ 7. ນີ້ກໍແມ່ນສິ່ງທີ່ສະດວກ ແລະ ແມ່ນກາລະໂອກາດໃຫຍ່ໃຫ້ແກ່ທ້ອງຖິ່ນ. ເຂດປູຊະນີຍະສະຖານຕົ້ນຕໍບາງແຫ່ງໃນລາຊະວັງ ແລະ ແຫ່ງອື່ນອີກຈຳນວນຫນຶ່ງກໍພວມໄດ້ຮັບການສຸມໃສ່ລົງທຶນເພື່ອຈັດຕັ້ງບັນດາເຫດການຂອງ ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012. ນອກນັ້ນພວກຂ້າພະເຈົ້າຍັງຄົ້ນຄ້ວາສ້າງບັນດາຜະລິດຕະພັນທີ່ເປັນເອກະລັກ ແລະ ມີຄວາມສາມາດແກ້ງແຍ້ງສູງ. ປີ 2012, ແຂວງ ເທື່ອທຽນເຫ້ວ ຈະນຳເອົາສ່ວນຫນຶ່ງຂອງໂຄງການ Laguna ຂອງສິງກະໂປເຂົ້າເຄື່ອນໄຫວ ເພື່ອສ້າງສະຖານທີ່ທ່ອງທ່ຽວໃຫມ່. ຄຽງຄູ່ກັນນັ້ນ ບັນດາບໍລິການທ່ອງທ່ຽວດ້ານຈິດວິນຍານ, ສາສະຫນາ, ງານບຸນເປັນເອກະລັກສະເພາະຕ່າງໆ ຖືກນຳເຂົ້າຂຸດຄົ້ນ.”
ລາຍການ ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ພຽງແຕ່ສາມາດເສີມຂະຫຍາຍກຳລັງແຮງສັງລວມໄດ້ກໍຕໍ່ເມື່ອຕອບສະຫນອງ ແລະ ມີການຮ່ວມສຳພັນພັດທະນາການທ່ອງທ່ຽວ. ໂດຍຮັບຮູ້ໄດ້ສິ່ງດັ່ງກ່າວ ບັນດາທ້ອງຖິ່ນ ບັນດາແຂວງ, ນະຄອນຢູ່ຕອນເຫນືອພາກກາງ ຫວຽດນາມ ໄດ້ຈົດທະບຽນຈັດຕັ້ງການເຄື່ອນໄຫວທີ່ມີຄວາມໝາຍຫລາຍຢ່າງຄື: ການແຂ່ງຂັນຍິງບັ້ງໄຟດອກສາກົນຢູ່ ດາໜັງ, ງານບຸນ ກວ໋າງຈີ້ ຄວາມຊົງຈຳທີ່ຈັດຂຶ້ນໃນເດືອນ 4, ງານບຸນໝູ່ບ້ານແຊນ ຢູ່ເຫງ້ອານ ໃນເດືອນ 5, ເດືອນທ່ອງທ່ຽວຄົ້ນຫາຖ້ຳຢູ່ ຫວຽດນາມ ຢູ່ ແຂວງ ກວ໋າງບີ່ງ, ງານບຸນຄຸ້ມເມືອງເກົ່າໂຮ້ຍອານຢູ່ກວ໋າງນາມ ແລະອື່ນໆ. ເມື່ອເວົ້າເຖິງງານບຸນຢູ່ຄຸ້ມເມືອງເກົ່າໂຮ້ຍອານ, ທ່ານ ດີງຮ່າຍ ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ແຂວງ ກວ໋າງນາມ ໃຫ້ຮູ້ວ່າ:
“ລາຍການນີ້ ແມ່ນວາບພາບໃຫ້ເຫັນຄຸ້ມເມືອງເກົ່າໃນໄລຍະຕົ້ນສັດຕະວັດທີ່ 20. ນັກທ່ອງທ່ຽວສາມາດເຂົ້າຮ່ວມບັນດາການເຄື່ອນໄຫວວັດທະນະທຳຂອງຊາວທ້ອງຖິ່ນ. ລາຍການນີ້ກໍແມ່ນການຟື້ນຟູງານບຸນປະເພນີຕິດພັນກັບການເຫລື້ອມໃສທາງສາສະຫນາຂອງຊາວທ້ອງຖິ່ນ ຜ່ານນັ້ນ ນັກທ່ອງທ່ຽວສາມາດເຂົ້າໃຈກ່ຽວກັບຊີວິດການເປັນຢູ່ຂອງປະຊາຊົນຢູ່ທີ່ນີ້. ນອກນັ້ນ ພວກຂ້າພະເຈົ້າຍັງຈັດຕັ້ງບັນດາການເຄື່ອນໄຫວຄື ງານວາງສະແດງຮູບພາບ, ລາຍການເສບດົນຕີພື້ນເມືອງ, ທັນສະໄຫມ, ລາຍການຟ້ອນແລະອື່ນໆ.”
ການແຂ່ງຂັນຍິງບັ້ງໄຟດອກສາກົນ ຢູ່ນະຄອນ ດາໜັງ
ພາບປະກອບ:internet
|
ຕາມທ່ານ ຫງວຽນວັນຕວັນ, ຫົວຫນ້າກົມໃຫຍ່ທ່ອງທ່ຽວ ຫວຽດນາມ ແລ້ວ, ບັນດາແຂວງເຂົ້າຮ່ວມປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ຄວນຮ່ວມສຳພັນນຳກັນຢ່າງແຫນ້ນແຟ້ນເພື່ອໂຄສະນາການທ່ອງທ່ຽວ ແລະ ຜ່ານ ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ເພື່ອໂຄສະນາການທ່ອງທ່ຽວຢູ່ທ້ອງຖິ່ນຂອງຕົນ, ດຶງດູດນັກທ່ອງທ່ຽວຈາກພາຍໃນ ແລະ ສາກົນ. ທ່ານ ຫງວຽນວັນຕວັນ ກ່າວວ່າ:
“ບັນດາການເຄື່ອນໄຫວຂອງປີທ່ອງທ່ຽວແຫ່ງຊາດໄດ້ສ້າງເປັນຫລາຍເຫດການເພື່ອໂຄສະນາບັນດາຜະລິດຕະພັນ, ຈຸດນັດພົບຂອງບັນດາແຂວງຈັດຕັ້ງເຫດການ ແລະ ບັນດາແຂວງຮ່ວມສຳພັນ. ພ້ອມກັນນັ້ນ ບັນດາການເຄື່ອນໄຫວນີ້ ແມ່ນການສົມທົບກັບບັນດາແຫລ່ງກຳລັງເພື່ອລົງທຶນກໍ່ສ້າງພື້ນຖານໂຄງລ່າງ, ຮາກຖານທາງດ້ານວັດຖຸ, ບໍລິການ, ສະຖານທີ່ທ່ອງທ່ຽວຂອງບັນດາແຂວງເປັນເຈົ້າພາບຈັດຕັ້ງເຫດການທ່ອງທ່ຽວດັ່ງກ່າວ.”
ປີທ່ອງທ່ຽວແຫ່ງຊາດຕອນເຫນືອພາກກາງ ຫວຽດນາມ 2012 ພາຍໃຕ້ຫົວຂໍ້ວ່າ: ທ່ອງທ່ຽວມໍລະດົກ, ສະນັ້ນ ເລື່ອງໂຄສະນາບັນດາມໍລະດົກ, ເປັນຕົ້ນແມ່ນບັນດາສະຖານທີ່ດຶງດູດນັກທ່ອງທ່ຽວແມ່ນໄດ້ຮັບການເອົາໃຈໃສ່ເປັນພິເສດ. ການຕອບສະຫນອງ, ຮ່ວມສຳພັນຢ່າງແຮງ ບໍ່ພຽງແຕ່ຫລຸດຜ່ອນຄວາມກົດດັນໃຫ້ແກ່ ທ້ອງຖິ່ນເປັນເຈົ້າພາບຈັດຕັ້ງປີທ່ອງທ່ຽວແຫ່ງຊາດເທົ່ານັ້ນ ຫາກຍັງແມ່ນໂອກາດສ້າງເຄື່ອງໝາຍການທ່ອງທ່ຽວຢ່າງແຮງ ແລະ ມີລັກສະນະແກ້ງແຍ້ງສູງໃຫ້ທົ່ວເຂດອີກດ້ວຍ.
ລານແອງ