(vovworld) - ງານບຸນພາວະນາຂໍຄວາມສະຫງົບສຸກ ແມ່ນງານບຸນພາວະນາເທວະດາຟ້າແຖນຂອງຊາວເຜົ່າຢ້າວແທງອີ ຢູ່ຕາແສງບັ່ງກາ, ເມືອງແຮ່ວງໂບ່, ແຂວງກວາງນິງ. ງານບຸນຖືກຈັດຕັ້ງ 4 ຄັ້ງໃນປີ, ເຊິ່ງລວມມີ 13 ພິທີ. ພິທີຕົ້ນຕໍແມ່ນຟ້ອນຕີມວຍທີ່ເປັນມູນເຊື້ອ, ແຕ່ລະພິທີກໍ່ມີວາດຟ້ອນສະເພາະທີ່ມີຄວາມໝາຍແຕກຕ່າງກັນ.
ງານບຸນພາວະນາຂໍຄວາມສະຫງົບສຸກຂອງຊາວເຜົ່າຢ້າວແທງອີ
(ພາບ: ອິນເຕີແນດ)
ເປີດສາກງານບຸນແມ່ນຟ້ອນຕີກອງຂອງຊາວໜຸ່ມຊົນເຜົ່າຢ້າວແທງອີທີ່ແຂງແຮງ. ຕາມເຈົ້າກົກເຈົາເຫຼົ່າ ຫຼີວັນອຸດ ຢູ່ບ້ານ 2, ຕາແສງບັ່ງກາດ ເມືອງແຮ່ວງໂບ່ ແລ້ວ, ຊາວເຜົ່າຢ້າວແທງອີ ຍາມໃດກໍ່ມີສະຕິຫຼໍ່ຫຼອມສຸຂະພາບ ເພື່ອກໍ່ສ້າງກຳແພງ, ຮັກສາຜົນລະປູກໃຫ້ຮັບຜົນດີ, ເພື່ອຄວາມຢູ່ເຢັນເປັນສຸກໃນໝູ່ບ້ານ, ພາຍຫຼັງຟ້ອນຕີກອງ, ສຽງຄ້ອງໃນວາດຟ້ອນເຕົ່າກໍ່ດັງຂຶ້ນ. ພິທີນີ້ຖືກຈັດຂຶ້ນດ້ວຍຄວາມຫວັງຢາກຫຼີກເວັ້ນໄພທຳມະຊາດ, ຄວາມສ່ຽງ, ນຳມາເຊິ່ງຄວາມໂຊກໝານໃຫ້ແກ່ຊາວເຜົ່າຢ້າວແທງອີ. ທ່ານ ດັ້ງແທງເລືອງ, ຢູ່ບ້ານ 2 ໃຫ້ຮູ້ວ່າ, ໂຕເຕົ່າມີຄວາມໝາຍສຳຄັນ ແລະ ໄດ້ຮັບຄວາມນັບຖືບູຊາໃນປະຊາຄົມຊາວເຜົ່າຢ້າວແທງອີ.
“ໂຕເຕົາມີລວດລາຍຫຼາຍຢ່າງໃນໂຕ. ຊາວເຜົ່າຢ້າວແທງອີ ເຄີຍປະດັບ ເຄື່ອງນຸ່ງ ແລະ ເຄື່ອງໃຊ້ໄມ້ສອຍຂອງຕົນດ້ວຍລວດລາຍທີ່ມີໃນຕົວໂຕເຕົ່າ. ທີສອງແມ່ນລວດລາຍນັ້ນໄດ້ຍືນຍົງຄົງຕົວພ້ອມກັບໂຕເຕົ່າເປັນເວລາເກືອບ 200 ປີ, ດັ່ງນັ້ນ, ເລື່ອງນັບຖືໂຕເຕົ່າກໍ່ສະແດງໃຫ້ເຫັນຄວາມມຸ້ງຫວັງຂອງຊາວເຜົ່າຢ້າວແທງອີ ແມ່ນຢາກມີສຸຂະພາບເຂັ້ມແຂງ ແລະ ມີອາຍຸຍືນອີກດ້ວຍ“.
ຟ້ອນໂຕເຕົ່າຂອງຊາວເຜົ່າຢ້າວແທງອີ
(ພາບ: ອິນເຕີແນດ)
ພາຍຫຼັງຟ້ອນເຕົ່າແມ່ນຟ້ອນມັງກອນ. ຊາວເຜົ່າຢ້າວແທງອີ 8 ຄົນ, ໃນນັ້ນຜູ້ຊາຍ 4 ຄົນນຸ່ງຊຸດເສື້ອຍາວສີແດງທີ່ປັກແສ່ວຮູບໂຕມັງກອນ ແລະ ຜູ້ຍິງ 4 ຄົນນຸ່ງເສື້ອສີຄາມ, ສີດຳ, ມືຈັບຜ້າບີງສີດຳ, ສີແດງສອງແຜ່ນຢືນຄຽງຄູ່ກັນ. ເມື່ອສຽງກອງ, ສຽງຄ້ອງດັງຂຶ້ນ, ເຂົາເຈົ້າຈະຟ້ອນຕາມກິລິຍາທ່າທາງຂອງມັງກອນ, ພິເສດແມ່ນເວລາທີ່ພວມພົ່ນນຳ້. ສຳລັບຊາວເຜົ່າຢ້າວແທງອີ ແລ້ວ, ມັງກອນແມ່ນສັດປະເພດໜຶ່ງທີ່ນຳມາເຊິ່ງຄວາມໂຊກໝານ, ຈະເລີນສີວິໄລ, ເພາະວ່າແຕ່ລະເທື່ອເມື່ອດິນຟ້າອາກາດແຫ້ງແລ້ງ, ມັງກອນຈະປະກົດຕົວ ແລະ ພົ່ນນ້ຳ, ຫົດນຳ້ໃຫ້ທົ່ງນາ. ນັກສິລະປະການ ຫຼີວັນອຸດ, ໃຫ້ຮູ້ວ່າ:
“ຟ້ອນມັງກອນເພື່ອພາວະນາຂໍໃຫ້ຝົນຕົກຮັບໃຊ້ໃຫ້ແກ່ການປູກຝັງ. ມັງກອນພົ່ນນຳ້ອຳນວຍຄວາມສະດວກໃຫ້ປະຊາຊົນທຳມາຫາກິນ. ຟ້ອນມັງກອນບາງເທື່ອມີ 8 ຄົນ, 6 ຄົນ ຫຼື 10 ຄົນ. ແຕ່ຢ່າງໜ້ອຍທີ່ສຸດກໍ່ມີ 4 ຄົນພົ່ນນຳ້“.
ງານບຸນພາວະນາຂໍຄວາມສະຫງົບສຸກຂອງຊາວເຜົ່າຢ້າວແທງອີ
(ພາບ: ອິນເຕີແນດ) ໃນງານບຸນພາວະນາຂໍຄວາມສະຫງົບສຸກ, ຍັງມີຟ້ອນຍື່ນບູຊາໄກ່, ເພື່ອເຊື້ອເຊີນເທພະຍະເຈົ້າລົງໂລກສົງສານ. ຜູ້ຊາຍ 3 ຄົນຈັບໄກ່ຜູ້ 3 ໂຕ, ຕີນພັນດ້ວຍເຈ້ຍສີເຫຼືອງ. ພາຍຫຼັງກິນເຫຼົ້າໂດຍເຈົ້າກົກເຈົ້າເຫຼົ້າເຫຍ້ນໃຫ້, 3 ຄົນນີ້ຈະຈັບຕີນໄກ່ແລ້ວເຕັ້ມຕາມສຽງກອງ, ສຽງຄ້ອງ. ຟ້ອນໄກ່ວາດພາບກິລິຍາທ່າທາງເທພະຍະເຈົ້າລົງສູ່ໂລກສົງສານຊ່ວຍປະຊາຊົນຈັບແມງໄມ້, ເພື່ອເຮັດໃຫ້ລະດູການເກັບກ່ຽວໄດ້ຮັບຜົນສູງ.
“ໃນວາດຟ້ອນນີ້, ຊາວໜຸ່ມ 3 ຄົນ, ຈັບໄກ່ຜູ້ລະໂຕເພື່ອເປັນສັນຍາລັກຮູບພາບເທພະຍະເຈົ້າລົງຊ່ວຍເຫຼືອຊາວເຜົ່າຢ້າວຈັບແມງໄມ້ເຮັດໃຫ້ລະດູການຜະລິດໄດ້ຮັບຜົນດີ. ເມື່ອວາດຟ້ອນສິ້ນສຸດ, ເຂົາເຈົ້າກໍ່ຈັບໄກ່ໄຫວ້ບູຊາເທພະຍະເຈົ້າ. ຫຼັງຈາກນັ້ນເທພະຍະເຈົ້າກໍ່ກັບຄືນສູ່ແດນສະຫວັນ“.
ຟ້ອນມັງກອນຂອງຊາວເຜົ່າຢ້າວແທງອີ
(ພາບ: ອິນເຕີແນດ) ແຕ່ລະວາດຟ້ອນໃນງານບຸນລ້ວນແຕ່ມີບົດເພງປະກອບທີ່ເໝາະສົມກັບເນື້ອໃນຄວາມໝາຍຂອງແຕ່ລະພິທີ. 2 ຄົນຂັບຮ້ອງໃນງານບຸນໂດຍໝໍຜີເປັນຜູ້ຄັດເລືອກຢ່າງລະອຽດ.
ໃນຕະຫຼອດເວລານັບແຕ່ພິທີເປີດສາກເຖິງພິທີອັດງານບຸນ, ໝໍຜີກໍ່ນັ່ງຢູ່ບ່ອນດຽວ ແລະ ສູດມົນເຊື້ອເຊີນເທພະຍະເຈົ້າ, ເທວະດາເຂົ້າຮ່ວມງານບຸນ, ແຕ່ບໍ່ມີໃຜສາມາດຟັງສຽງສູດມົນໄດ້, ເພາະວ່າໝໍຜີມີແຕ່ສູດມົນຢູ່ໃນໃຈເທົ່ານັ້ນ.
ງານບຸນພາວະນາຂໍຄວາມສະຫງົບສຸກຂອງຊາວເຜົ່າຢ້າວແທງອີຢູ່ບັ່ງກາ ຖືກຈັດຂຶ້ນໃນວັນທີ 1ເດືອນຈຽງ (ໄລ່ຕາມຈັນທະປະຕິທິນ) ແມ່ນງານບຸນສຳຄັນກວ່າໝູ່ ເພື່ອແນໃສ່ຂໍໃຫ້ດິນຟ້າອາກາດ, ເທວະດາຟ້າແຖນບັນດານໃຫ້ດິນຟ້າອາກາດເອື້ອອຳນວຍຄວາມສະດວກຕະຫຼອດປີ ເພື່ອໃຫ້ລະດູການເກັບກຽວໄດ້ຮັບຜົນດີ.