(vovworld) - ໃນຊີວິດຍຸກປະຈຸບັນ, ວັດທະນະທຳທີ່ເປັນເອກະລັກສະເພາະຫຼາຍຢ່າງຂອງຊາວເຜົ່າເວິນກ່ຽວ, ໃນນັ້ນມີເຮືອນຮ້ານທີ່ເປັນມູນເຊື້ອພວມຄ່ອຍໆສູນຫາຍໄປ. ຫວ່າງແລ້ວນີ້, ພະແນກວັດທະນະທຳ ກິລາ ແລະ ທ່ອງທ່ຽວແຂວງກວາງຈີ້ ຫາກໍ່ສຸມໃສ່ການຟື້ນຟູເຮືອນຮ້ານທີ່ເປັນມູນເຊື້ອ 16 ຫຼັງຂອງຊາວເຜົ່າເວິນກ່ຽວ ຢູ່ບ້ານ ກາລູ, ຕາແສງ ດັກຣົງ, ເມືອງດັກຣົງ ໄວ້. ປະຈຸບັນ, ບ້ານ ກາລູ ໄດ້ກາຍເປັນບ້ານວັດທະນະທຳ, ທ່ອງທ່ຽວຊີວະພາບວົງຄະນາຍາດ ທີ່ເປັນເອກະລັກສະເພາະຂອງຊາວເຜົ່າເວິນກ່ຽວ. ນີ້ແມ່ນຈຸດນັດພົບຂອງນັກທ່ອງທ່ຽວໃນແລວເສດຖະກິດຕາເວັນອອກ-ຕາເວັນຕົກ.
ເຮືອນຮ້ານຂອງຊາວເຜົ່າເວິນກ່ຽວ
ມາຢ້ຽມຢາມໝູ່ບ້ານ ກາລູ ໃນຍາມບຸນກໍ່ເຫັນວ່າຍິງ-ຊາຍຊາວເວິນກຽ່ວເມົາມົວດື່ມເຫຼົ້າໄຫ. ໃນເຮືອນຫຼັງໃໝ່ທີ່ຫາກໍ່ໄດ້ຮັບການຟື້ນຟູດ້ວຍໄມ້ປ່າ, ທ່ານ ໂຮ່ແທງມ່ານ ຢູ່ບ້ານ ກາລູ ໄດ້ເລົ່າສູ້ຟັງວ່າ: ກ່ອນນີ້ເຮືອນຮ້ານຂອງຊາວເຜົ່າເວິນກ່ຽວ ມີຫຼັງຄາມຸງດ້ວຍຫຍ້າ ຫຼືໃບຫວາຍ, ສ່ວນເສົາ, ແຂນນາງ, ໂຄງຫຼັງຄາເຮັດດ້ວຍໄມ້ ຫຼືໄມ້ໄຜ່. ຕາມການເວລາ, ຊາວເວິນກ່ຽວບໍ່ເຮັດຫຼັງຄາຕາມແບບມູນເຊື້ອອີກ, ຫາກເຂົາເຈົ້າມຸງດ້ວຍສັງກະສີ ຫຼື ພີໂບຼຊີມັງ. ດັ່ງນັ້ນ, ປະຈຸບັນໄດ້ຢູ່ໃນເຮືອນຮ້ານທີ່ເປັນມູນເຊື້ອຂອງຕົນ, ປະຊາຊົນໃນບ້ານຜູ້ໃດກໍ່ພາກພູມໃຈ. ທ່ານ ໂຮ່ແທງມ່ານ, ໃຫ້ຮູ້ວ່າ:
“ໂຄງການລົງທຶນໄດ້ເຮັດໃຫ້ປະຊາຊົນພາກພູມໃຈຫຼາຍ, ຍ້ອນກ່ອນນີ້ເງື່ອນໄຂເສດຖະກິດຍັງຂາດເຂີນ, ການປຸກສ້າງເຮືອນຈຶ່ງບໍ່ບັນລຸໄດ້ມາດຕະຖານຂອງເຮືອນເດີມ. ປະຈຸບັນ, ເຮືອນໄດ້ຮັບການປຸກສ້າງໃໝ່ຢ່າງສວຍງາມ, ປະກອບສ່ວນຮັກສາສີສັນທີ່ເປັນເອກະລັກສະເພາະຂອງຊາວເຜົ່າເວິນກ່ຽວ ໄວ້“
ເພື່ອອະນຸລັກຮັກສາ ແລະ ເສີມຂະຫຍາຍສີສັນວັດທະນະທຳທີ່ເປັນມູນເຊື້ອຂອງບັນດາເຜົ່າສ່ວນໜ້ອຍໃຫ້ເໝະສົມກັບສະພາບຕົວຈິງ, ພະແນກວັດທະນະທຳ, ກິລາ ແລະ ທ່ອງທ່ຽວແຂວງກວາງຈີ້ ໄດ້ລົງທຶນຟື້ນຟູເຮືອນຮ້ານທີ່ເປັນມູນເຊື້ອ 16 ຫຼັງຢູ່ບ້ານ ກາລູ, ຕາແສງ ດັກຣົງ, ເມືອງດັກຣົງ ແລະ ກໍ່ສ້າງບ້ານ ກາລູ ໃຫ້ກາຍເປັນໝູ່ບ້ານວັດທະນະທຳ, ທ່ອງທ່ຽວຊີວະພາບທີ່ເປັນແບບຢ່າງຢູ່ແຂວງກວາງຈີ້, ແນໃສ່ຂຸດຄົ້ນທ່າແຮງດ້ານການທ່ອງທ່ຽວໃນແລວເສດຖະກິດຕາເວັນອອກ - ຕາເວັນຕົກ.
ການຟື້ນຟູເຮືອນຮ້ານທີ່ເປັນມູນເຊື້ອ 16 ຫຼັງຢູ່ບ້ານ ກາລູ, ຕາແສງ ດັກຣົງ, ເມືອງດັກຣົງ ເຮືອນຮ້ານ 16 ຫຼັງຢູ່ບ້ານ ກາລູ ໄດ້ຮັບການຟື້ນຟູຕາມສະຖາປັດຕະຍາກຳເດີມຂອງຊາວເວິນກ່ຽວ, ເຮືອນແຕ່ລະຫຼັງມີມູນຄ່າແຕ່ 300-400 ລ້ານດົ່ງ, ໂດຍຊາວບ້ານປຸກສ້າງເອງ. ການປຸກສ້າງເຮືອນກໍ່ຕ້ອງປະຕິບັດຕາມຫຼັກການສະເພາະ ເພື່ອຮັບປະກັນມີຄວາມເຢັນ, ປອດໂປ່ງໃນຍາມຮ້ອນ ແລະ ອົບອຸ່ນໃນຍາມໜາວ. ເຮືອນຮ້ານຂອງຊາວເວິນກ່ຽວບໍ່ໃຫຍ່, ຖືກແບ່ງເປັນຫ້ອງນອນໃຫ້ຜົວເມຍ, ພໍ່ແມ່ ແລະ ລູກຫຼານໃນຄອບຄົວ. ຫ້ອງຢູ່ໃຈກາງເປັນຫ້ອງຮັບແຂກ. ຫຼັງຄາເຮືອນມຸງດ້ວຍຫຍ້າ, ໂຄງເຮັດດ້ວຍໄມ້ໄຜ່, ໄມ້ເຮ້ຍ. ເຈົ້າກົກເຈົ້າເຫຼົ່າ ໂຮ່ວັນຮືມ, ຖືວ່າ. ໃນການປຸກສ້າງເຮືອນ, ວຽກງານຍາກທີ່ສຸດນັ້ນແມ່ນການມຸງຫຼັງຄາ, ມັນຮຽກຮ້ອງຕ້ອງມີສີມືດີ. ປະຈຸບັນ, ໃນບ້ານມີພຽງສອງ, ສາມຄົນຮູ້ມຸງຫຼັງຄາເຮືອນເທົ່ານັ້ນ, ສ່ວນຫຼາຍແມ່ນຄົນມີອາຍຸສູງ. ຕາມ ເຈົ້າກົກເຈົ້າເຫຼົ່າ ໂຮ່ວັນຮືມ ແລ້ວ, ການຟື້ນຟູເຮືອນຮ້ານ, ທັງຮັກສາເຮືອນເດີມໄວ້, ທັງແມ່ນໂອກາດເພື່ອໃຫ້ລູກຫຼານສືບທອດອາຊີບທີ່ເປັນມູນເຊື້ອ.
“ກ່ອນນີ້ພວກຂ້າພະເຈົ້າປຸກສ້າງເຮືອນທີ່ເປັນມູນເຊື້ອ. ແຕ່ຍ້ອນເງື່ອນໄຂເສດຖະກິດບໍ່ຮັບປະກັນການປຸກສ້າງເຮືອນຈຶ່ງມີການປ່ຽນແປງບາງຢ່າງ. ປະຈຸບັນຊີວິດນັບມື້ນັບດີຂຶ້ນ, ພວກຂ້າພະເຈົ້າຕ້ອງຟື້ນຟູເຮືອນເດີມໄວ້ ເພື່ອດຶງດູດນັກທ່ອງທ່ຽວ“.
ທ່ານ ໂຮ່ແທງມ່ານພ້ອມກັບເຮືອນຮ້ານທີ່ຫາກໍ່ໄດ້ຮັບການຟື້ນຟູ ບ້ານ ກາລູ ໄດ້ຮັບການວາງແຜນໃຫ້ກາຍເປັນສະຖານທີ່ທ່ອງທ່ຽວໃນແລວເສດຖະກິດຕາເວັນອອກ - ຕາເວັນຕົກ. ໃນເຮືອນຮ້ານຫຼັງໃໝ່, ບັນດາສິລະປະການ ແລະ ບ່າວສາວຊາວເຜົ່າເວິນກ່ຽວ ເມົາມົວເຝິກແອບ, ຟື້ນຟູພິທີງານບຸນຕ່າງໆຂອງຊົນເຜົ່າຕົົນ ເພື່ອແນະນຳເຖິງແຂກທ່ອງທ່ຽວ. ທ່ານ ຟ້າມວັນທັ໋ງ, ຫົວໜ້າຄະນະຄຸ້ມຄອງໂຄງການ, ພະແນກວັດທະນະທຳ ກິລາ ແລະ ທ່ອງທ່ຽວແຂວງກວາງຈີ້, ໃຫ້ຮູ້ວ່າ, ພ້ອມກັບການຟື້ນຟູເຮືອນຮ້ານ, ໂຄງການພັດທະນາການທ່ອງທ່ຽວເຂດອະນຸພາກພື້ນແມ່ນຳ້ຂອງແບບຍືນຍົງພວມປັບປຸງກຸ່ມກິດຈະກຳເຮືອນພັກວົງຄະນາຍາດ, ແລະ ທັດສະນີຍະພາບຢູ່ບ້ານ ກາລູ ເພື່ອຮັບໃຊ້ນັກທ່ອງທ່ຽວ. ທ່ານ ຟ້າມວັນທັ໋ງ, ໃຫ້ຮູ້ວ່າ:
“ໄປຄຽງຄູ່ກັບການຟື້ນຟູວັດຖຸທີ່ມີຮູບຮ່າງ ແລະ ບໍ່ມີຮູບຮ່າງ, ອະນຸລັກຮັກສາບັນດາງານບຸນ, ອາຫານການກິນທີ່ເປັນມູນເຊື້ອແລ້ວ, ຖ້າຫາກສົມທົບກັບການທ່ອງທ່ຽວວົງຄະນາຍາດເປັນຢ່າງດີ, ມັນຈະສ້າງວຽກເຮັດງານທຳໃຫ້ປະຊາຊົນ, ເມື່ອລາຍຮັບຂອງປະຊາຊົນເພີ່ມຂຶ້ນ, ເຂົາເຈົ້າຈະປະກອບສ່ວນເຂົ້າໃນການອະນຸລັກຮັກສາຄືນໄໝ່“.
ບ້ານ ກາລູ ຕັ້ງຢູ່ແຄມເສັ້ນທາງ ໂຮ່ຈີມິນ ປະຫວັດສາດ, ຕໍ່ໜ້າບ້ານແມ່ນຂົວແຂວນຂ້າມແມ່ນຳ້ ດັກຣົງ. ໃນອະນາຄົດໃກ້ໆນີ້, ບ້ານ ກາລູ ຈະກາຍເປັນສະຖານທີ່ທ່ອງທ່ຽວທີ່ດຶງດູດນັກທ່ອງທ່ຽວມາຄົ້ນຫາວັດທະນະທຳເຂດຊົນເຜົ່າຢູ່ທາງທິດຕາເວັນອອກສາຍພູຫຼວງທີ່ໃຫຍ່ໂຕມະໂຫຖານ.