ປີ 2011 ຂະແຫນງທ່ອງທ່ຽວຫວຽດນາມ ບັນລຸໄດ້ຕົວເລກສະຖິຕິທີ່ສ້າງຄວາມປະທັບໃຈ ແລະ ດຶງດູດນັກທ່ອງທ່ຽວສາກົນມາຢ້ຽມຢາມຫວຽດນາມເຖິງ 6 ລ້ານຄົນ. ໝາກຜົນນີ້ເປັນຂີດໝາຍໃຫ້ແກ່ໄລຍະທາງ 10 ປີ ແຫ່ງການພັດທະນາຂອງຂະແຫນງທ່ອງທ່ຽວ ຄືແຕ່ປີ 2001 - 2012, ກ່ອນກ້າວເຂົ້າສູ່ຍຸດທະຍາດໃຫມ່ເຊິ່ງຈະເລີ່ມເຄື່ອນໄຫວຢ່າງເປັນທາງການໃນປີ 2012. ຂີດໝາຍແຫ່ງໄລຍະທາງໃຫມ່ຂອງຂະແຫນງການທ່ອງທ່ຽວຫວຽດນາມນັ້ນແມ່ນເຫດການປະກາດ ສັນຍາລັກ ແລະ ຄຳຂວັນ “ຄວາມງາມຕະຫຼອດການ”
ຄຳຂັວນ “ຫວຽດນາມ ຄວາມງາມຕະຫຼອດການ, ດ້ວຍສັນຍາລັກແມ່ນ ດອກບົວພວມບານ ໄດ້ກາຍເປັນສັນຍາລັກຂອງໂຄງການສົ່ງເສີມການທ່ອງທ່ຽວແຫ່ງຊາດໄລຍະ 2012-2015. ສັນຍາລັກດອກບົວປະກອບດ້ວຍ 5 ກີບ ແລະ 5 ສີທີ່ສະແດງໃຫ້ເຫັນບັນດາບໍລິການທ່ອງທ່ຽວຕົ້ນຕໍຂອງຫວຽດນາມຄື: ການທ່ອງທ່ຽວທະເລ ແລະ ໝູ່ເກາະ, ການທ່ອງທ່ຽວຊີວະພາບ, ທຳມະຊາດ; ການທ່ອງທ່ຽວວັດທະນະທຳ, ປະຫວັດສາດ; ການທ່ອງທ່ຽວຄົ້ນຫາ, ພະຈົນໄພ. ຕາມທ່ານຫງວຽນວັນຕວັນ ຫົວຫນ້າກົມໃຫຍ່ທ່ອງທ່ຽວຫວຽດນາມແລວ້, ພາຍຫລັງປະກາດ ສັນຍາລັກໃຫມ່, ຂະແຫນງການທ່ອງທ່ຽວຈະມີໂຄງການໂຄສະນາຮູບພາບ ສັນຍາລັກ ເຖິງນັກທ່ອງທ່ຽວພາຍໃນ ແລະ ຕ່າງປະເທດ ແລະ ຖືວ່າ ນີ້ແມ່ນຈຸດໃຈກາງ ແລະ ບາດກ້າວ ບຸກທະລຸຂອງປີ 2012 ແລະ ຊຸມປີຕໍ່ໆໄປ.
“ປີ 2012 ແມ່ນແນ່ນອນວ່າຈະປະສົບກັບຄວາມຫຍຸ້ງຍາກ, ສິ່ງທ້າທາຍຫລາຍປະການ, ຢູ່ພາຍໃນປະເທດ ແລະ ໃນໂລກ ອາດຈະເກີດປັດໃຈບໍ່ປົກກະຕິ ແຕ່ສິ່ງສະດວກກໍໄດ້ຮັບການສ້າງຂຶ້ນໃນໄລຍະຜ່ານມາ. ພິເສດແມ່ນ ເລື່ອງອ່າວຮ້າລອງໄດ້ຮັບການຮັບຮອງແມ່ນຫນຶ່ງໃນສິ່ງມະຫັດສະຈັນທຳມະຊາດ 7 ແຫ່ງຂອງໂລກ ຈະສ້າງກຳລັງຫນູນເພື່ອດຶງດູດນັກທ່ອງທ່ຽວມາຢ້ຽມຢາມ ຮ້າລອງ. ນີ້ແມ່ນປັດໃຈສ້າງບາດກ້າວບຸກທະລຸໃຫ້ແກ່ປີ 2012. ປີ 2012 ນີ້ ພວກຂ້າພະເຈົ້າຈະສູ້ຊົນ ຕ້ອນຮັບນັກທ່ອງທ່ຽວສາກົນປະມານ 6.5 - 6.6 ລ້ານເທື່ອຄົນ ແລະ ຮັບໃຊ້ນັກທ່ອງທ່ຽວພາຍໃນປະເທດປະມານ 32 ລ້ານເທື່ອຄົນ, ສ້າງລາຍຮັບຈາກການທ່ອງທ່ຽວປະມານ 150.000 ຕຶ້ດົ່ງ.”
ປີ 2012 ຂະແຫນງທ່ອງທ່ຽວຫວຽດນາມ ຜັນຂະຫຍາຍ ແລະ ປະຕິບັດຍຸດທະສາດໄລຍະແຕ່ນີ້ຮອດປີ 2020 ວິໄສທັດຮອດປີ 2030 ຢ່າງເປັນທາງການ ແລະ ຜັນຂະຫຍາຍການວາງແຜນກຳນົດສັງລວມພັດທະນາການທ່ອງທ່ຽວຫວຽດນາມຮອດປີ 2020 ແລະ ວິໄສທັດຮອດ ປີ 2030 ພ້ອມກັນນັ້ນ ກໍສ້າງບັນດາການວາງແຜນກຳນົດພັດທະນາສະຖານທີ່ທ່ອງທ່ຽວ, ພິເສດແມ່ນ ເຂດທ່ອງທ່ຽວຈຸດສຸມ 7 ແຫ່ງ. ຍຸດທະສາດນີ້ແມ່ນກຳລັງຫນູນເພື່ອຊຸກຍູ້ຂະແຫນງທ່ອງທ່ຽວພັດທະນາກວ່າອີກ, ນຳຫວຽດນາມກາຍເປັນຈຸດນັດພົບອັນດູດດື່ມ, ບັນລຸລະດັບພາກພື້ນ ແລະ ໃນໂລກ. ທ່ານ ຫງວຽນວັນຕວັນໃຫ້ຮູ້ວ່າ:
“ຂະແຫນງທ່ອງທ່ຽວຈະເພີ່ມທະວີການຄຸ້ມຄອງຈຸດນັດພົບ ຜ່ານການກວດກາຄຸນນະພາບບໍລິການ ແລະ ຄຸ້ມຄອງສະພາບແວດລ້ອມແຫ່ງການທ່ອງທ່ຽວ. ສືບຕໍ່ຍູ້ແຮງການເຄື່ອນໄຫວໂຄສະນາການທ່ອງທ່ຽວພາຍໃນ ແລະ ຕ່າງປະເທດ ແລະ ຍັງຄົງຮັກສາບັນດາການເຄື່ອນໄຫວດ້ານວິຊາສະເພາະຕາມແຜນການທີ່ໄດ້ວາງອອກ. ຈຸດໝາຍສຸດທ້າຍແມ່ນປະສິດທິຜົນທາງດ້ານເສດຖະກິດສັງຄົມ.”
ນັກທ່ອງທ່ຽວສາກົນມາຢ້ຽມຢາມອ່າວຮ້າລອງ
ຍຸດທະສາດ “ພັດທະນາການທ່ອງທ່ຽວຫວຽດນາມ ຮອດປີ 2020 ແລະ ວິໄສທັດປີຮອດ 2030” ມີຈຸດໃຫມ່ຫລາຍຢ່າງ ແລະ ມີລັກສະນະບຸກທະລຸ. ລັກສະນະບຸກທະລຸສະແດງອອກໃນທັດສະນະພັດທະນາການທ່ອງທ່ຽວແບບຍືນຍົງ ຕາມທິດມີຄຸນນະພາບ, ມີເຄື່ອງໝາຍການຄ້າ, ທັນສະໄຫມ, ຂຸດຄົ້ນຢ່າງມີປະສິດທິຜົນ, ມີຈຸດສຸມ, ເສີມຂະຫຍາຍລັກສະນະລະຫວ່າງຂະແຫນງ, ລະຫວ່າງເຂດ ແລະ ຫັນເປັນບັນຫາຂອງສັງຄົມດ້ວຍບົດບາດກຳລັງຫນູນຂອງບັນດາວິສາຫະກິດ. ສ່ວນຈຸດໃຫມ່ໃນຍຸດທະສາດນີ້ ແມ່ນວາງຫນ້າທີ່ພັດທະນາເຄື່ອງໝາຍການຄ້າກາຍເປັນປັດໃຈຫລັກແຫລ່ງໃນການແກ້ງແຍ້ງສາກົນ ແລະ ຍົກສູງປະສິດທິຜົນ, ສູ້ຊົນສ້າງ ແລະ ພັດທະນາເຄື່ອງໝາຍການຄ້າທີ່ພົ້ນເດັ່ນຂອງການທ່ອງທ່ຽວຫວຽດນາມຢູ່ພາຍໃນພາກພື້ນ ແລະ ຢູ່ໃນໂລກ. ສິ່ງດັ່ງກ່າວແມ່ນສະແດງໃຫ້ເຫັນຢ່າງຈະແຈ້ງໃນການສຸມໃສ່ສ້າງບັນດາຜະລິດຕະພັນ, ຮູບການທ່ອງທ່ຽວທີ່ເປັນລະບົບ, ມີການກວດກາຄຸນນະພາບ ແລະ ມີລັກສະນະເປັນເອກະລັກ, ພັດທະນາການທ່ອງທ່ຽວທະເລຢ່າງແຂງແຮງດ້ວຍຂອບຂະຫນາດ, ລະດັບສາກົນ; ພັດທະນາການທ່ອງທ່ຽວຊອກຮູ້ວັດທະນະທຳເປັນພື້ນຖານ, ພັດທະນາການທ່ອງທ່ຽວຊີວະພາບ, ການທ່ອງທ່ຽວຂຽວ ແລະ ອື່ນໆ. ໂດຍແມ່ນເຂດໃຈກາງຂອງການທ່ອງທ່ຽວຫວຽດນາມ, ຂະແຫນງການທ່ອງທ່ຽວນະຄອນໂຮ່ຈິມີນ ຍາມໃດກໍມີຄວາມຂະຫຍັນຂັນເຄື່ອນສ້າງບັນດາບໍລິການທ່ອງທ່ຽວໃຫມ່ເພື່ອດຶງດູດ ແລະ ຮັບໃຊ້ນັກທ່ອງທ່ຽວ. ຕາມທ່ານ ຫລາກວັກແຄງ, ຮອງຫົວຫນ້າພະແນກວັດທະນະທຳ ກິລາ ແລະ ການທ່ອງທ່ຽວນະຄອນ ໂຮ່ຈິມີນແລ້ວ, ຈຸດສຸມໃນຊຸມປີຕໍ່ໄປຂອງຂະແຫນງທ່ອງທ່ຽວນະຄອນໂຮ່ຈິມີນ ແມ່ນສືບຕໍ່ພັດທະນາບັນດາຜະລິດຕະພັນທ່ອງທ່ຽວຂຽວ.
“ໃນປີ 2012, ຈະມີຫລາຍລາຍການທ່ອງທ່ຽວໃຫ້ແກ່ວົງຈອນທ່ອງທ່ຽວທີ່ມີໄລຍະທາງບໍ່ໄກປານໃດ. ພິເສດ ແມ່ນ ທາງນະຄອນ ພວມສ້າງລາຍການທ່ອງທ່ຽວ ລ່ອງເຮືອ, ໃນນັ້ນມີ ເຮືອສະເພາະການສຳຫລວດ, ຄົ້ນຫາ ແລະ ລາຍການທ່ຽວຊົມຊີວະພາບ. ນີ້ແມ່ນລາຍການທ່ອງທ່ຽວລະດັບສູງ ທັງເຂົ້າຮ່ວມຊອກຮູ້ ຄົ້ນຫາຊີວະພາບ ແຕ່ຮັບປະກັນການປົກປັກຮັກສາສິ່ງແວດລ້ອມ ແລະ ພັດທະນາແບບຍືນຍົງ;”
ຂະແຫນງທ່ອງທ່ຽວໄດ້ກຳນົດຕະຫລາດຕາມຈຸດປະສົງທ່ອງທ່ຽວ ແລະ ຄວາມສາມາດຊຳລະ, ບຸລິມະສິດດຶງດູດນັກທ່ອງທ່ຽວມີຄວາມສາມາດໃຊ້ຈ່າຍເງິນຫຼາຍ, ມີແຕ່ຈຸດປະສົງໄປທ່ອງທ່ຽວ, ພັກອາໄສໃນໄລຍະຍາວ. ພັດທະນາຕະຫລາດທ່ອງທ່ຽວພາຍໃນປະເທດຢ່າງແຮງ, ເອົາໃຈໃສ່ເຖິງເລື່ອງພັກຜ່ອນບຳລຸງສຸຂະພາບຂອງນັກທ່ອງທ່ຽວ, ການລະຫລິ້ນພັກຜ່ອນຢ່ອນອາລົມ, ພັກຜ່ອນທ້າຍອາທິດ ແລະອື່ນໆ. ສຳລັບຕະຫລາດສາກົນ ແມ່ນສຸມໃສ່ດຶງດູດຕະຫລາດທ່ອງທ່ຽວທີມີຄຸນນະພາບສູງຄື: ບັນດາປະເທດຢູ່ອາຊີຕາເວັນອອກສຽງເຫນືອ, ອາຊີຕາເວັນອອກສຽງໃຕ້ ແລະ ປາຊີຟີກ .... , ເອີລົບເຫນືອ, ອາເມລິກາເຫນືອ ແລະ ເອີລົບຕາເວັນອອກ, ເປີດກວ້າງຕະຫລາດໃຫມ່ຢູ່ຕາເວັນອອກກາງ. ຈຸດໝາຍຮອດປີ 2020, ຫວຽດນາມຕ້ອນຮັບນັກທ່ອງທ່ຽວສາກົນໃຫ້ໄດ້ 10.5 ລ້ານເທື່ອຄົນ ແລະ ນັກທ່ອງທ່ຽວພາຍໃນປະເທດ 48 ລ້ານເທື່ອຄົນ. ບັນລຸຍອດລາຍຮັບຈາກນັກທ່ອງທ່ຽວປະມານ 19 ຕື້ USD ປະກອບ 7% GDP ຂອງທົ່ວປະເທດ ແລະ ສ້າງວຽກເຮັດງານທຳໃຫ້ແກ່ 3 ລ້ານຄົນ.ຮອດປີ 2030 ຍອດລາຍຮັບຈາກນັກທ່ອງທ່ຽວເພີ່ມຂຶ້ນທົບສອງເທົ່າເມື່ອທຽບໃສ່ປີ 2020.ຢາກບັນລຸໄດ້ບັນດາຈຸດໝາຍນີ້ ວຽກງານດັ່ງກ່າວຕ້ອງໄດ້ຮັບການຜັນຂະຫຍາຍປະຕິບັດນັບແຕ່ດຽວນີ້ເປັນຕົ້ນໄປ./.
ລານແອງ