(vovworld)- ໃນຊຸມປີມໍ່ໆມານີ້, ຂະແຫນງທ່ອງທ່ຽວ ນະຄອນ ດາຫນັງ ບັນລຸໄດ້ຜົນງານໃຫຍ່ຫລວງຫລາຍຢ່າງ ຢັ້ງຢືນເຄື່ອງໝາຍທ່ອງທ່ຽວຂອງຕົນ. ເຖິງຢ່າງໃດກໍຕາມ, ເພື່ອຮັກສາ ແລະ ສືບຕໍ່ເສີມຂະຫຍາຍກຳລັງແຮງທີ່ມີຢູ່ແລ້ວຂອງຕົນ, ນະຄອນ ດາຫນັງ ຍັງຄົງມີວຽກງານຫລາຍຢ່າງຈະຕ້ອງເຮັດ, ພິເສດ ກໍ່ສ້າງລະບົບພື້ນຖານໂຄງລ່າງ, ບໍລິການທ່ອງທ່ຽວໃຫ້ສຳເລັດຜົນ.
ສະຖານທີ່ທ່ອງທ່ຽວ ບ່ານ່າ
ພາບ:internet
|
ກ່ອນນີ້ 10 ປີ, ດາຫນັງ ຍັງແມ່ນສະຖານທີ່ທ່ອງທ່ຽວທຳມະດາສຳລັບນັກທ່ອງທ່ຽວພາຍໃນ ແລະ ຕ່າງປະເທດຫລາຍຄົນ. ໃນ 10 ປີຜ່ານມາ, ຂະແຫນງທ່ອງທ່ຽວ ດາຫນັງ ມີບາດກ້າວພັດທະນາຢ່າງວ່ອງໄວ ແລະ ບຸກທະລຸ. ປີ 2010 ໄດ້ຮັບຖືວ່າ ແມ່ນປີເປັນຂີດໝາຍແຫ່ງຜົນສຳເລັດຂອງຂະແຫນງທ່ອງທ່ຽວ ດາຫນັງ ກ່ຽວກັບຈຳນວນນັກທ່ອງທ່ຽວ ແລະ ລາຍຮັບ. ລະອຽດຄື: ນັກທ່ອງທ່ຽວມາຢ້ຽມຢາມ ດາຫນັງ ບັນລຸເກືອບ 2 ລ້ານເທື່ອຄົນ, ເພີ່ມຂຶ້ນ 33% ເມື່ອທຽບໃສ່ປີ 2009, ໃນນັ້ນ ມີ ນັກທ່ອງທ່ຽວຕ່າງປະເທດ 400.000 ເທື່ອຄົນ. ລາຍຮັບຈາກການທ່ອງທ່ຽວບັນລຸເກືອບ 1.300 ຕື້ດົ່ງ, ເພີ່ມຂຶ້ນເກືອບ 40% ເມື່ອທຽບໃສ່ປີ 2009. ເຄື່ອງໝາຍການທ່ອງທ່ຽວ ດາຫນັງ ເລີ່ມຕົ້ນມີຊື່ສຽງດ້ວຍບັນດາສະຖານທີ່ທ່ອງທ່ຽວ ແລະ ເຫດການຕ່າງຄື: ການແຂ່ງຂັນຍິງບັ້ງໄຟດອກສາກົນ, ງານບຸນທະເລ, ເຂດທັດສະນີຍະພາບ ບ່ານ່າ, ຫງູແຮ່ງເຊີນ. ທ່ານ ເຈີນກີມທໍ້, ຫົວຫນ້າຫ້ອງການດຳເນີນທຸລະກິດໂຮມແຮມ Tourane ນະຄອນ ດາຫນັງ ໄດ້ເວົ້າວ່າ:
“ໃນຊຸມປີມໍ່ໆມານີ້ ຂະແຫນງທ່ອງທ່ຽວ ດາຫນັງ ພັດທະນາຢ່າງວ່ອງໄວ, ພື້ນຖານໂຄງລ່າງ ແລະ ບັນດາສະຖານທີ່ທ່ອງທ່ຽວໄດ້ດຶງດູດນັກທ່ອງທ່ຽວມາຢ້ຽມຢາມນະຄອນ ດາຫນັງ ນັບມື້ນັບຫລາຍ, ບັນດາບໍລິການພັກເຊົາກໍໄດ້ຮັບການລົງທຶນ. ສຳລັບບັນດາສະຖານທີ່ພັກເຊົາ, ບັນດານັກລົງທຶນກໍເອົາໃຈໃສ່ລົງທຶນບໍລິການພັກຢູ່ແຄມທະເລນັບທັງພື້ນຖານທາງດ້ານວັດຖຸ ແລະ ຄຸນນະພາບ ເພື່ອຕອບສະຫນອງຄວາມຕ້ອງການຂອງນັກທ່ອງທ່ຽວນັບມື້ນັບສູງ.”
ເລື່ອງສ້າງເຄື່ອງໝາຍການທ່ອງທ່ຽວ, ເຖິງວ່າໃນບໍ່ວ່າຂົງເຂດໃດກໍລ້ວນແຕ່ອີງໃສ່ສອງປັດໄຈຕົ້ນຕໍ ນັ້ນແມ່ນ: ຄຸນນະພາບ ແລະ ການໂຄສະນາ. ສຳລັບການເຄື່ອນໄຫວສົ່ງເສີມ, ໂຄສະນາຜະລິດຕະພັນ ແລະ ສະພາບແວດລ້ອມການທ່ອງທ່ຽວ, ຄຽງຄູ່ກັບການຈັດຕັ້ງບັນດາລາຍການສະແດງເຄື່ອນທີ່ roadshow, ງານຕະຫລາດນັດການທ່ອງທ່ຽວຢູ່ຫລາຍປະເທດໃນໂລກ, ຂະແຫນງທ່ອງທ່ຽວນະຄອນ ດາຫນັງ ໄດ້ເຊີນບັນດາຄະນະ fram trip ມາຢ້ຽມຢາມ ແລະ ຂຽນບົດໂຄສະນາກ່ຽວກັບການທ່ອງທ່ຽວ ດາຫນັງ. ອຳນາດການປົກຄອງນະຄອນ ກໍໄດ້ສຸມໃສ່ລົງທຶນກໍ່ສ້າງພື້ນຖານໂຄງລ່າງ, ສ້າງເງື່ອນໄຂໃຫ້ແກ່ບັນດາວິສາຫະກິດ, ກຸ່ມບໍລິສັດທີ່ມີຊື່ສຽງໃນໂລກມາຊອກຮູ້, ຮ່ວມມືດຳເນີນທຸລະກິດ. ນອກນັ້ນ, ການທ່ອງທ່ຽວ ດາຫນັງ ໄດ້ສ້າງບັນດາບໍລິການທ່ອງທ່ຽວໃຫມ່ ເຂົ້າໃນການຮັບໃຊ້ນັກທ່ອງທ່ຽວຄື: ລາຍການທ່ອງທ່ຽວຢ້ຽມຊົມແຫລມ ເຊີນຈາ, ດຳນ້ຳທະເລເພື່ອຊົມຫີນປະກາລັງ, ຂຶ້ນພູລົງທະເລ, ຕືກປາພ້ອມກັບຊາວປະມົງ, ຄົ້ນຫາເຊີນຈາ, ງານບຸນຍິງບັ້ງໄຟດອກສາກົນ ແລະ ອື່ນໆ, ພິເສດ ແມ່ນກະເຊົ້າລອຍຟ້າ ບ່ານ່າ ຄອງ 2 ສະຖິຕິຂອງໂລກ ກ່ຽວກັບຄວາມສູງ ແລະ ຄວາມຍາວ. ທ່ານ ຫງວຽນດຶກຫວູ, ຫົວຫນ້າຫ້ອງການໂຄສະນາ ແລະ ຈັດຕັ້ງເຫດການ, ຄະນະຄຸ້ມຄອງແຫລມເຊີນຈາ ແລະ ບັນດາຫາດຊາຍທະເລທ່ອງທ່ຽວ ດາຫນັງ ໃຫ້ຮູ້້ວ່າ:
“ຈຸດພົ້ນເດັ່ນໃນປີທ່ອງທ່ຽວທະເລ ດາຫນັງ ນັ້ນແມ່ນ ພວກຂ້າພະເຈົ້າໄດ້ຂຸດຄົ້ນການບໍລິການທ່ອງທ່ຽວດຳນ້ຳຊົມຫີນປະກາລັງ, ນີ້ແມ່ນການບໍລິການທ່ອງທ່ຽວທີ່ໃຫມ່ອ່ຽມ. ຂ້າພະເຈົ້າປາດຖະຫນາວ່າ ໃນປີ 2012 ຈະແມ່ນການບໍລິການທີ່ດຶງດູດນັກທ່ອງທ່ຽວມາຢ້ຽມຢາມນະຄອນ ດາຫນັງນັບມື້ນັບຫລາຍ.”
ກະເຊົ້າລອຍຟ້າ ບ່ານ່າ ຄອງ 2 ສະຖິຕິຂອງໂລກ
ກ່ຽວກັບຄວາມສູງ ແລະ ຄວາມຍາວ
ພາບ: internet
|
ເຖິງວ່າ ປະຈຸບັນ ຄວາມຫຍຸ້ງຍາກໃນວິວັດການສ້າງເຄື່ອງໝາຍທ່ອງທ່ຽວຂອງນະຄອນ ດາຫນັງ ແມ່ນບໍ່ທັນເສີມຂະຫຍາຍບັນດາແຫລ່ງກຳລັງສັງຄົມໃນການເຄື່ອນໄຫວທ່ອງທ່ຽວຢ່າງສຸດຂີດໄດ້, ເພື່ອປະກອບສ່ວນເປີດກວ້າງຂອບຂະຫນາດ ແລະ ລະດັບການທ່ອງທ່ຽວ ຢູ່ ນະຄອນ ດາຫນັງ. ຄຽງຄູ່ກັນນັ້ນ ການບໍລິການທ່ອງທ່ຽວຫລາຍຢ່າງຍັງປະຖົມປະຖານບໍ່ທັນດຶງດູດນັກທ່ອງທ່ຽວໄດ້. ທ່ານ ຮູ່ນມີນເຍີນ ຮອງຫົວຫນ້າພະແນກວັດທະນະທຳ, ກິລາ ແລະ ການທ່ອງທ່ຽວ ນະຄອນ ດາຫນັງ ເວົ້າວ່າ:
“ຍັງມີຫລາຍວຽກງານຈະຕ້ອງເຮັດ, ປະຈຸບັນ ນະຄອນ ດາຫນັງ ມີພຽງທ່າກຳປັ່ນເສດຖະກິດ, ຍັງບໍ່ທັນມີທ່າກຳປັ່ນທ່ອງທ່ຽວເພື່ອຕ້ອນຮັບນັກທ່ອງທ່ຽວທີ່ເດີນທາງທ່ອງທ່ຽວດ້ວຍທາງນ້ຳ, ທາງທະເລ ແລະ ຍັງຂາດການບໍລິການໃນຍາມຄຳ່ຄືນກໍຄື ສູນການຄ້າຂະຫນາດໃຫຍ່ ແລະ ບໍ່ທັນໄດ້ມາດຕະຖານສາກົນ. ດັ່ງນັ້ນ ບໍ່ທັນດຶງດູດນັກທ່ອງທ່ຽວມາຢ້ຽມຢາມຫລາຍປານໃດ.”
ເຖິງວ່າຍັງປະສົບກັບຄວາມຫຍຸ້ງຍາກໃນວິວັດການສ້າງເຄື່ອງໝາຍທ່ອງທ່ຽວ ແລະ ຢັ້ງຢືນເຄື່ອງໝາຍທ່ອງທ່ຽວກໍຕາມ, ແຕ່ຂະແຫນງທ່ອງທ່ຽວ ດາຫນັງ ພວມສ້າງການບໍລິການທ່ອງທ່ຽວໃຫມ່, ຊອກຫາທິດກ້າວເດີນສະເພາະ ເພື່ອສ້າງເປັນເຄື່ອງໝາຍທ່ອງທ່ຽວທີ່ລືຊື່ບໍ່ພຽງແຕ່ພາຍໃນປະເທດຮູ້ຈັກເຖິງເທົ່ານັ້ນ ຫາກນັບທັງພາກພື້ນແລະ ໂລກອີກດ້ວຍ./.