(vovworld) - ໄປຢ້ຽມຢາມເທດສະບານ ຊາປາ ແຂວງ ລາວກາຍ ນັກທ່ອງທ່ຽວບໍ່ພຽງແຕ່ໄດ້ຢ້ຽມຊົມທິວທັດທຳມະຊາດທີ່ໃຫຍ່ໂຕມະໂຫຖານ, ໄດ້ເຈືອຈານເຂົ້າກັບຊີວິດທາງດ້ານວັດທະນະທຳ, ຮີດຄອງປະເພນີທີ່ເປັນເອກະລັກສະເພາະຂອງປະຊາຊົນບັນດາເຜົ່າເທົ່ານັ້ນ ຫາກນັກທ່ອງທ່ຽວຍັງໄດ້ຮັບປະທານອາຫານຫຼາຍເຍື່ອງຂອງຊາວທ້ອງຖິ່ນ. ເຖິງວ່າແມ່ນເທດສະບານແຫ່ງນ້ອຍໆທີ່ມີຄວາມສູງ 1600 ແມັດເມື່ອທຽບໃສ່ຫນ້ານ້ຳທະເລກໍ່ຕາມ ແຕ່ຊາປາພັດມີອາຫານແບບເອີລົບ, ອາຊີ ທຸກເຍື່ອງ ແລະ ນັກທ່ອງທ່ຽວມາຢ້ຽມຢາມ ຊາປາ ເຄີຍເວົ້າຢອກກັນວ່າ: ຜູ້ໃດມາຢ້ຽມຢາມຊາປາແຕ່ບໍ່ທັນໄດ້ກິນເຍື່ອງອາຫານປິ້ງ ກໍໝາຍຄວາມວ່າບໍ່ທັນໄປເຖິງຊາປາ ແລະ ບໍ່ທັນຮູ້ກ່ຽວກັບ ຊາປາ.
ເທດສະບານ ຊາປາ
ພາບ: internet |
ພາຍຫລັງໄປຄົ້ນຫາໝູ່ບ້ານແຫ່ງຕ່າງໆຂອງຊາວເຜົ່າມົ້ງ, ເຜົ່າຢາວ... ຢູ່ອ້ອມແອ້ມເທດສະບານຊາປາ, ເມື່ອກັບມາໃນຍາມກາງເວັນກໍ່ແມ່ນຈຸດເວລາທີ່ນັກທ່ອງທ່ຽວໄດ້ຮັບປະທານອາຫານຫຼາຍເຍື່ອງທີ່ເປັນເອກະລັກສະເພາະຂອງ ຊາປາ ຊຶ່ງແມ່ນສະຖານທີ່ທ່ອງທ່ຽວທີ່ລືຊື່ຂອງແຂວງ ລາວກາຍ. ແລະ ຖະຫນົນຂາຍເຍື່ອງອາຫານປິ້ງແມ່ນການເລືອກເຟັ້ນທຳອິດຂອງນັກທ່ອງທ່ຽວ.
ຍ່າງເລາະລຽບຕາມຖະຫນົນ ຊວນວຽນ, ຟານຊີຟັງ, ຮ່າມຣົ່ງ, ເຂດຕະຫລາດອາຫານການກິນ, ນັກທ່ອງທ່ຽວຜູ້ໃດກໍຢາກເຂົ້າຮ້ານອາຫານປິ້ງ ຍ້ອນລົດຊາດຂອງຊິ້ນປິ້ງແມ່ນສ້າງຄວາມດຶງດູດ. ຄວາມຈິງ ບັນດາຮ້ານອາຫານປິ້ງຢູ່ທີ່ນີ້ ມີເນື້ອທີ່ຄັບແຄບຫລາຍ ສາມາດວາງໂຕະໄດ້ 3, 4 ໜ່ວຍເທົ່ານັ້ນ. ບັນດາຮ້ານອາຫານປິ້ງຢູ່ ຊາປາ ບໍ່ໄດ້ຮັບການປະດັບປະດາຄືຮ້ານອາຫານອື່ນໆ ແຕ່ສິ່ງທີ່ສ້າງຄວາມປະທັບໃຈໃຫ້ແກ່ນັກທ່ອງທ່ຽວນັ້ນແມ່ນ ໂຕະວາງຂາຍອາຫານປິ້ງນັບຮ້ອຍເຍື່ອງ ແລະ ຖ້າຫາກນັກທ່ອງທ່ຽວມີເວລາພັກຜ່ອນຢູ່ທີ່ນີ້ຫນຶ່ງສັບປະດາກໍ່ບໍ່ສາມາດຊີມໄດ້ໝົດ. ຕອນທີ່ພວມນັ່ງລໍຖ້າອາຫານປິ້ງ, ອ້າຍ ຫງວຽນຫາຍ ນັກທ່ອງທ່ຽວມາຈາກ ນະຄອນຫລວງ ຮ່າໂນ້ຍ ເວົ້າວ່າ: ອາຫານປິ້ງ ຢູ່ ຊາປາ ມີຈຸດທີ່ເປັນເອກະລັກສະເພາະ ຈາກລົດຊາດຕະຫລອດຮອດບັນຍາກາດ.
“ເມື່ອກິນອາຫານປິ້ງຢູ່ທີ່ນີ້ ສິ່ງທີ່ສ້າງຄວາມປະທັບໃຈນັ້ນແມ່ນນັ່ງຢູ່ກາງແຈ້ງ ໄດ້ເຈືອຈານກັບທຳມະຊາດ. ບາງເທື່ອອາກາດຫນາວຈັດ, ນ້ຳໝອກຫລາຍ ແຕ່ໄດ້ນັ່ງຄຽງຂ້າງເຕົາຖ່ານ ດື່ມເຫລົ້າກິນອາຫານປິ້ງແມ່ນສະບາຍທີ່ສຸດ. ພວກຂ້າພະເຈົ້າເລືອກເອົາໄກ່ປິ້ງຂອງຊາວເຜົ່າມົ້ງ ແລະ ຜັກປິ້ງ. ບັນດາເຍື່ອງອາຫານນີ້ມີພຽງຢູ່ ຊາປາ.”
ອາຫານປິ້ງ ຢູ່ ຊາປາ
ພາບ: internet |
ອາຫານການກິນຂອງ ຊາວຊາປາ ແມ່ນເຍື່ອງອາຫານເຜັດ ແລະ ມີນ້ຳມັນ. ເພາະສະນັ້ນ ອາຫານປິ້ງແມ່ນການເລືອກເຟັ້ນທຳອິດຂອງນັກທ່ອງທ່ຽວ. ນອກນັັ້ນ ຍັງມີເຍື່ອງອາຫານປະເພດຕ່າງໆກໍລ້ວນແຕ່ຖືກປິ້ງໝົດ. ອາຫານປິ້ງນັບຮ້ອຍເຍື່ອງນັ້ນ ແຕ່ລະເຍື່ອງມີລົດຊາດສະເພາະ. ເອື້ອຍ ແທນເຮືອງ ນັກທ່ອງທ່ຽວຜູ້ຫນຶ່ງໃຫ້ຮູ້ວ່າ:
“ອາຫານປິ້ງເຍື່ອງໃດກໍແຊບ, ແຕ່ບໍ່ສາມາດຮັບປະທານທຸກເຍື່ອງໄດ້. ຕ້ອງໄປຊາປາຫລາຍເທື່ອຈຶ່ງຊີມໝົດໄດ້. ທິວທັດທຳມະຊາດຢູ່ ຊາປາ ແລະ ອາຫານການກິນຢູ່ທີ່ນີ້ແມ່ນດຶງດູດນັກທ່ອງທ່ຽວຫລາຍ.”
ນັ່ງຂ້າງເຕົາຖ່ານ, ປິ້ງອາຫານເຍື່ອງທີ່ແຊບນົວ ດ້ວຍລົດຊາດສະເພາະ ໃນອາກາດເຢັນສະບາຍຢູ່ ຊາປາ ແມ່ນສິ່ງທີ່ດຶງດູດນັກທ່ອງທ່ຽວ ແລະ ຍ້ອນເຫດນັ້ນ ນັກທ່ອງທ່ຽງຈຶ່ງມາຢ້ຽມຢາມ ຊາປານັບມື້ນັບຫລາຍ, ເປັນຕົ້ນໃນວັນສຸກວັນເສົາ. ອ້າຍ ຮ່ວາງເທືອງ, ຜູ້ນຳທ່ຽວໃຫ້ຮູ້ວ່າ:
“ຂ້າພະເຈົ້າເປັນຜູ້ນຳທ່ຽວໃນຫລາຍປີແລ້ວ, ແລະ ເທື່ອໃດມາຢ້ຽມຢາມຊາປາ ກໍເຫັນວ່ານັກທ່ອງທ່ຽວທຸກຄົນໃຜໆກໍນິຍົມອາຫານການກິນຢູ່ທີ່ນີ້. ເປັນຕົ້ນໃນຍາມກາງເວັນ, ເມື່ອພານັກທ່ອງທ່ຽວເຂົ້າຮ້ານອາຫານປິ້ງ ເຫັນວ່າເຂົາເຈົ້າມັກກິນທຸກເຍື່ອງ.”
ຈຸດທີ່ເປັນເອກະລັກສະເພາະຂອງອາຫານການກິນຢູ່ເຂດພູສູງ, ພິເສດແມ່ນອາຫານປິ້ງ ໄດ້ ແລະ ພວມສ້າງເປັນວັດທະນະທຳພິເສດສະເພາະຂອງຂະແຫນງທ່ອງທ່ຽວ ຊາປາ. ນັກທ່ອງທ່ຽວຜູ້ໃດມາຢ້ຽມຢາມຊາປາ ແລະ ຮັບປະທານອາຫານຢູ່ທີ້ນີ້ແລ້ວ ຍາກທີ່ຈະຫລົງລືມໄດ້. ອາຫານປິ້ງຂອງຊາປາຄ່ອຍໆກາຍເປັນເຄື່ອງໝາຍການຄ້າ, ມີຄວາມດຶງດູດນັກທ່ອງທ່ຽວເມື່ອມາຢ້ຽມຢາມແຫ່ງນີ້.