ປີ 2012 ຈະສ້າງບາດກ້າວບຸກທະລຸໃຫ້ແກ່ຂະແຫນງທ່ອງທ່ຽວຂອງນະຄອນເຫວ້ ດ້ວຍ 2 ເຫດການ: ປີທ່ອງທ່ຽວແຫ່ງຊາດ 2012 ພາຍໃຕ້ຫົວຂໍ້ວ່າ “ທ່ອງທ່ຽວມໍລະດົກ“ ແລະ Festival ເຫວ້ - ຊຶ່ງແມ່ນເຫດການວັດທະນະທຳລະດັບຊາດ ແລະ ມີລັກສະນະສາກົນ. ປີທ່ອງທ່ຽວແຫ່ງຊາດ 2012 ແມ່ນກາລະໂອກາດທີ່ດີ ເພື່ອໃຫ້ນະຄອນເຫວ້ ແນະນຳ ແລະ ໂຄສະນາບັນດາຄຸນຄ່າວັດທະນະທຳບໍ່ມີຮູບຮ່າງ ແລະ ມີຮູບຮ່າງ, ລະບົບບັນດາມໍລະດົກວັດທະນະທຳ, ທຳມະຊາດທີ່ເປັນເອກະລັກ ໄດ້ ຮັບການສ້າງຂຶ້ນໃນວິວັດແຫ່ງການສ້າງຕັ້ງ ແລະ ພັດທະນາຂອງບັນດາເມືອງຫລວງຫວຽດນາມ ຜ່ານແຕ່ລະໄລຍຸກສະໄຫມ ໃນນັ້ນ ມີກຸງເກົ່າເຫວ້ ກັບເພື່ອນມິດສາກົນ.
ເພື່ອກະກຽມໃຫ້ແກ່ປີທ່ອງທ່ຽວແຫ່ງຊາດ 2012,ທ່ານ ຟານຕຽນຢູງ ອຳນວຍການພະແນກວັດທະນະທຳ, ກິລາ ແລະ ການທ່ອງທ່ຽວແຂວງເທື່ອທຽນເຫວ້, ກຳມະການປະຈຳ ຄະນະຈັດຕັ້ງ ໃຫ້ຮູ້ວ່າ: ແຂວງເທື່ອທຽນເຫວ້ ພວມຜັນຂະຫຍາຍວຽກງານໂຄສະນາ ຢ່າງຕັ້ງຫນ້າ. ໃນໄລຍະຈະມາເຖິງ, ແຂວງ ເທື່ອທຽນເຫວ້ ຈະເຂົ້າຮ່ວມງານຕະຫລາດນັດການທ່ອງທ່ຽວສາກົນຢູ່ ຍີ່ປຸ່ນ ແລະ ໄທ ເພື່ອໂຄສະນາ ບັນດາລາຍການຂອງປີທ່ອງທ່ຽວ 2012 ຢ່າງກວ້າງຂວາງ. ນອກນັ້ນ, ທາງແຂວງກໍຈະຈັດຕັ້ງການແນະນຳນະຄອນເຫວ້ ຢູ່ ນະຄອນ ໂຮ່ຈິມີນ, ຮ່າໂນ້ຍ, ເຫງ້ອານ. ພື້ນຖານໂຄງລ່າງດ້ານການທອ່ງທ່ຽວ ແລະ ບໍລິການການທ່ອງທ່ຽວ ກໍໄດ້ຮັບຄວາມເອົາໃຈໃສ່ເປັນພິເສດຈາກແຂວງເທື່ອທຽນເຫວ້ ດ້ວຍການເຄື່ອນໄຫວຫລາຍຢ່າງຄື: ປະດັບປະດາເຂດຕົວເມືອງ ເພື່ອສ້າງເງື່ອນໄຂສະດວກທີ່ສຸດໃຫ້ແກ່ນັກທ່ອງທ່ຽວເມື່ອເຂົ້າມາຢ້ຽມຊົມເຫວ້. ທ່ານ ຟານຕຽນຢູງ ອຳນວຍການພະແນກວັດທະນະທຳ ກິລາ ແລະ ການທ່ອງທ່ຽວ ແຂວງ ເທ່ືອທຽນເຫວ້ ໃຫ້ຮູ້ວ່າ:
“ປະຈຸບັນ, ແຂວງເທື່ອທຽນເຫວ້ ໄດ້ກໍ່ສ້າງສຳເລັດໂຄງການປະດັບປະດາຕົວເມືອງ ແລະ ຍົກລະດັບບັນດາຫນ້າວຽກຢູ່ສະຫນາມບິນ ຟູບ່າຍ, ສະນັ້ນ ທຸກລະບົບ ສາຍການບິນໄປຍັງເຫວ້ ໄດ້ຮັບການຕິດຕັ້ງຮັບປະກັນຄວາມປອດໄພ ແລະ ຕອບສາມາດຮອງຮັບບັນດາສາຍການບິນພາຍໃນປະເທດ ແລະ ສາກົນ. ສ່ວນທ່າ ກຳປັ່ນ ເຈີນເມີຍ ເຊິ່ງແມ່ນທ່າກຳປັ່ນໃຫຍ່ ແລະສາມາດຮັບກຳປັ່ນທີ່ບັນທຸກສິນຄ້າໄດ້ 30.000 ໂຕນເຂົ້າທຽບທ່າກໍ່ໄດ້ຮັບການລົງທຶນ. ສະເພາະເດືອນ 12, ມີກຳປັ່ນເຂົ້າທຽບທ່າ 25 ຖ້ຽວ, ຂົນສ່ົງຜູ້ໂດຍສານ ແຕ່ 1500 - 2300 ຄົນ/ລຳ ເພື່ອເຊື່ອມຈອດບັນດາທ່າກຳປັ່ນໃຫຍ່ພາຍໃນປະເທດ ແລະ ຕ່າງປະເທດ.“
ສະຖານທີ່ພັກເຊົາ ກໍແມ່ນຫນ້າວຽກຊຶ່ງແຂວງເທ່ືອທຽນເຫວ້ມີຄວາມເອົາໃຈໃສ່ລົງທຶນ. ທ່ານ ຟານຕຽນຢູງ ຢືນຢັນວ່າ: ຄ່າຫ້ອງພັກໃນໂຮງແຮມຢູ່ ເຫວ້ ບໍ່ມີການປ່ຽນແປງປານໃດໃນໂອກາດງານບຸນໃຫຍ່ ແລະ ສາມາດຮອງຮັບຈຳນວນນັກທ່ອງທ່ຽວມາຢ້ຽມຢາມ ເຫວ້ ໃນປີທ່ອງທ່ຽວ 2012 ໄດ້.
“ປະຈຸບັນ ມີໂຮງແຮມກວ່າ 200 ແຫ່ງ ດ້ວຍຈຳນວນຫ້ອງພັກ 8000 ຫ້ອງ, ເຮືອນພັກ 140 ແຫ່ງ ດ້ວຍຫ້ອງພັກ 3000 ຫ້ອງ. ເປັນອັນວ່າ ແຂວງເທື່ອທຽນເຫວ້ ມີ ຫ້ອງພັກທັງໝົດ 11.000 ຫ້ອງ ສາມາດຮັບປະກັນບ່ອຍພັກໃຫ້ແກ່ນັກທ່ອງທ່ຽວ ຢ່າງພຽງພໍໃນງານບຸນໃຫຍ່ຕ່າງໆ.“
ກ່ຽວກັບການກຳນົດທິດຍຸດທະສາດພັດທະນາບໍລິການທ່ອງທ່ຽວ ໄລຍະ 2011 -2020, ເທື່ອທຽນເຫວ້ ສຸມໃສ່ບູລິມະສິດແກ່ການພັດທະນາບັນດາລາຍການທ່ອງທ່ຽວທີ່ດຶງດູດນັກທ່ອງທ່ຽວມາຢ້ຽມຢາມເທື່ອທຽນເຫວ້ ຜ່ານສາຍ: ຮ່າໂນ້ຍ - ເຫວ້, ເກີນເທີ - ນະຄອນ ໂຮ່ຈິມີນ - ເຫວ້, ເສັ້ນທາງບົກເຊື່ອມຕໍ່ອາຊີ. ຄຽງຂ້າງນັ້ນ ເທື່ອທຽນເຫວ້ ກໍເອົາໃຈໃສ່ເຖິງບັນດາຜະລິດຕະພັນ, ບໍລິການທ່ອງທ່ຽວທີ່ເປັນເອກະລັກ ຂອງແຂວງ ເພື່ອສ້າງຄວາມແຕກຕ່າງກັນ, ສ້າງເຄື່ອງໝາຍທ່ອງທ່ຽວສະເພາະ.
ພິເສດ ປີທ່ອງທ່ຽວແຫ່ງຊາດ 2012 ແມ່ນຕິດພັນກັບ Festival ເຫວ້ ດ້ວຍຫົວຂໍ້ວ່າ: ມໍລະດົກວັດທະນະທຳ ກັບການເຊື່ອມໂຍງ ແລະ ພັດທະນາ ແມ່ນຈຸດນັດພົບບັນດາຕົວເມືອງປະຫວັດສາດ. ແມ່ນກາລະໂອກາດໃຫຍ່ເພື່ອໂຄສະນານະຄອນເຫວ້ ຊຶ່ງແມ່ນນະຄອນວັດທະນະທຳ ມໍລະດົກ Festivval ທັງແມ່ນນະຄອນທີ່ເປັນເອກະລັກສະເພາະຂອງຫວຽດນາມ. ທ່ານ ຫງວຽນຢູຍກຮ່ຽນ ອຳນວຍການສູນ Festival ເຫວ້ ໃຫ້ຮູ້ວ່າ: Festival ເຫວ້ ປີ 2012 ໄດ້ເຕົ້າໂຮມຫລາຍລາຍການສິລະປະທີ່ພົ້ນເດັ່ນຂອງຫວຽດນາມ ແລະ ຂອງປະຊາຊາດອື່ນ.
“ບັນດາລາຍການສິລະປະທີ່ເປັນເອກະລັກສະເພາະເຂັ້ມຂົ້ນໄປດ້ວຍສີສັນວັດທະນະທຳຂອງ ກອງສິລະປະກອນກວ່າ 30 ຄະນະ ແລະ ນັກສິລະປີນທີ່ມີຊຶ່ສຽງຂອງນັບ 10 ປະເທດ ທີ່ມາຈາກ 5 ທະວີບ ຈະເຕົ້າໂຮມກັນ ຢູ່ Festival ເຫວ້ ປີ 2012.“
ກະຊວງການຕ່າງປະເທດ ຊຶ່ງແມ່ນຫົວຫນ່ວຍສົມທົບກັນຊີ້ນຳການຈັດຕັ້ງ Festival ເຫວ້ ນັບແຕ່ຄັ້ງທຳອິດເມື່ອປີ 2000. ດ້ວຍຈຳນວນບັນດາປະເທດໃນໂລກເຂົ້າຮ່ວມນັບມື້ນັບຫລາຍ, Festival ເຫວ້ ໄດ້ກາຍເປັນສະຖານທີ່ເຕົ້າໂຮມພື້ນຖານວັດທະນະທຳທີ່ເປັນເອກະລັກສະເພາະຂອງບັນດາປະຊາຊາດ, ຊົນເຜົ່າທີ່ແຕກຕ່າງກັນ. ສະນັ້ນ ກະຊວງການຕ່າງປະເທດ ກໍລະດົມບັນດາອົງການທູຕານຸທູດ, ອົງການວັດທະນະທຳ ການທ່ອງທ່ຽວຂອງປະເທດຕ່າງໆ ນຳເຜີຍແຜ່ພາບພົດ Festival ເຫວ້ ອອກສູ່ໂລກ.
“ປີ 2012, ກະຊວງການຕ່າງປະເທດ ມີຂໍ້ລິເລີ່ມນຳ Festival ເຫວ້ ກາຍເປັນການເຄື່ອນໄຫວພິເສດໃນຂອບເຂດເວທີປາໄສວັດທະນະທຳຂອງອາຊີຕາເວັນອອກ ແລະ ອາເມລິກາລາຕີນ. ບັນດາປະເທດສະມາຊິກ ຂອງສອງພາກພື້ນນີ້ ລ້ວນແຕ່ສະຫນັບສະຫນູນ ແລະ ປາດຖະຫນາຢາກເຂົ້າຮ່ວມ Festival ເຫ້ວ. ອາດຈະເວົ້າໄດ້ວ່າ: Festival ເຫວ້ ໄດ້ສ້າງເປັນຂີດໝາຍ ທັງແມ່ນຈຸດນັດພົບຂອງຫລາຍປະເທດທີ່ມີຄວາມປາດຖະຫນາຢາກພົບປະແລກປ່ຽນນຳກັນ.“
ປີ 2012, ເທ່ືອທຽນເຫວ້ ຄາດວ່າ ຈະຕ້ອນຮັບແຂກທ່ອງທ່ຽວກວ່າ 2 ລ້ານເທື່ອຄົນ, ເພີ່ມຂຶ້ນ 17% ເມື່ອທຽບກັບໄລຍະດຽວກັນຂອງປີ 2011, ໃນນັ້ນ ມີນັກທ່ອງທ່ຽວສາກົນ 900.000 ເທື່ອຄົນ, ເພີ່ມຂຶ້ນ 15% ເມື່ອທຽບກັບໄລຍະດຽວກັນຂອງປີກາຍ ແລະ ນັກທ່ອງທ່ຽວພາຍໃນປະເທດ 1.3 ລ້ານເທື່ອຄົນ, ເພີ່ມຂຶ້ນ 18% ເມື່ອທຽບໃສ່ໄລຍະດຽວກັນຂອງປີກ່າຍ. ຍອດລາຍຮັບຈາກການທ່ອງທ່ຽວປີ 2012 ຄາດວ່າ ຈະບັນລຸກວ່າ 2.200 ຕຶ້ດົງ, ເພີ່ມຂຶ້ນ ກວ່າ 30% ເມື່ອທຽບໃສ່ປີ 2011./.
ລານແອງ