(vovworld)-ຫນຶ່ງໃນບັນດາປັດໄຈດູດດື່ມນັກທ່ອງທ່ຽວເມື່ອມາຢ້ຽມຢາມຫວຽດນາມ ນັ້ນແມ່ນບັນດາມໍລະດົກທຳມະຊາດ ແລະ ມໍລະດົກວັດທະນະທຳທີ່ມີຮູບຮ່າງ ກໍຄືບໍ່ມີຮູບຮ່າງ ທີ່ໄດ້ຮັບການຮັບຮອງຈາກ UNESCO. ຂະແຫນງການທ່ອງທ່ຽວ ຫວຽດນາມ ພວມຊອກຫາວິທີຂຸດຄົ້ນແຫລ່ງຜົນປະໂຫຍດຈາກມໍລະດົກນີ້ຢ່າງເໝາະສົມ ແລະ ມີປະສິດທິຜົນ ເພື່ອພັດທະນາ ແລະ ດຶງດູດນັກທ່ອງທ່ຽວ.
ອ່າວ ຮ້າລອງ
ພາບ: internet
|
ແຕ່ພາກເຫນືອຕະຫລອດຮອດພາກໃຕ້, ຫວຽດນາມ ມີຫລາຍມໍລະດົກທີ່ມີຮູບຮ່າງ ແລະ ບໍ່ມີຮູບຮ່າງເຊິ່ງມີຄຸນຄ່າຄື: ອ່າວ Ha Long ຢູ່ແຂວງ Quang Ninh, ພະລາຊະວັງ Thang Long, Van Mieu Quoc Tu Giam ຢູ່ ນະຄອນ Ha Noi, Phong Nha Ke Bang ຢູ່ແຂວງ Quang Binh, ເມືອງຫລວງເກົ່າ Hue, ຄຸ້ມເມືອງເກົ່າ Hoi An ( ຢູ່ ແຂວງ Quang Nam), ຂັບ ກາຈູ, ຂັບກວານຫໍ້, ຄ້ອງ ໄຕງວຽນ ແລະອື່ນໆ. ມໍລະດົກທັງໝົດນີ້ ລ້ວນແຕ່ແມ່ນແຫລ່ງຊັບພະຍາກອນສຳຄັນ, ມີຄວາມໝາຍເປັນຕາຍສຳລັບການພັດທະນາຂອງຂະແຫນງການທ່ອງທ່ຽວ ຫວຽດນາມ. ເມື່ອເວົ້າເຖິງສິ່ງນີ້, ທ່ານ Nguyen Van Tuan, ຫົວຫນ້າກົມໃຫຍ່ທ່ອງທ່ຽວ ຫວຽດນາມ ຕີລາຄາວ່າ:
“ບັນຫາມໍລະດົກ, ປູຊະນີຍະສະຖານເວົ້າສະເພາະ ແລະ ວັດທະນະທຳເວົ້າລວມຕິດພັນ ກັບການເຄື່ອນໄຫວ ແລະ ທ່ອງທ່ຽວ ແມ່ນທ່າອ່ຽງທີ່ຈຳເປັນ. ມໍລະດົກ ແລະ ບັນດາຄຸນຄ່າວັດທະນະທຳແມ່ນຊັບພະຍາກອນທ່ອງທ່ຽວ, ຜະລິດຕະພັນທ່ອງທ່ຽວນຳມາໃຫ້ແຂກທ່ອງທ່ຽວບັນດາຮູບພາບຂອງປະເທດຫນຶ່ງ ແລະ ການທ່ອງທ່ຽວເອງໄດ້ສ້າງພະລັງຊີວິດໃຫ້ແກ່ບັນດາປູຊະນີຍະສະຖານນີ້.”
ຕາມທ່ານ Mai Tien Dung ຮອງຫົວຫນ້າພະແນກວັດທະນະທຳ ກິລາ ແລະ ການທ່ອງທ່ຽວ ນະຄອນ ຮ່າໂນ້ຍແລ້ວ, ຫນຶ່ງໃນບັນດາປັດໄຈດູດດື່ມນັກທ່ອງທ່ຽວເມື່ອມາຢ້ຽມຢາມ ຫວຽດນາມ ເວົ້າລວມ ແລະ ຮ່າໂນ້ຍ ເວົ້າສະເພາະ ນັ້ນແມ່ນບັນດາຄຸນຄ່າວັດທະນະທຳ. ຖ້າຮູ້ຈັກຂຸດຄົ້ນຢ່າງເໝາະສົມ ແລະ ມີປະສິດທິຜົນຈະນຳມາຊຶ່ງຜົນປະໂຫຍດອັນໃຫຍ່ຫລວງໃຫ້ແກ່ຂະແຫນງທ່ອງທ່ຽວ.
“ຂະແຫນງທ່ອງທ່ຽວບໍສາມາດພັດທະນາໄດ້ ຖ້າຫາກບໍ່ເສີມຂະຫຍາຍຄຸນຄ່າ ບັນດາມໍລະດົກວັດທະນະທຳໄດ້. ຢູ່ທ່ີ່ນີ້, ບັນດາມໍລະດົກວັດທະນະທຳສວມບົດບາດສຳຄັນທີ່ສຸດທີ່ສຳລັບການພັດທະນາການທ່ອງທ່ຽວຂອງ ຮ່າໂນ້ຍ. ເມື່ອມໍລະດົກຕິດພັນກັບການພັດທະນາການທ່ອງທ່ຽວຈຶ່ງສາມາດເສີມຂະຫຍາຍຄຸນຄ່າເອງໄດ້.”
ເຖິງວ່າ ມີທ່າໄດ້ປຽບຄືແນວນັ້ນ, ແຕ່ເລື່ອງຂຸດຄົ້ນບັນດາຄຸນຄ່າມໍລະດົກໃນການເຄື່ອນໄຫວການທ່ອງທ່ຽວ ຍັງມີຫລາຍສາຍເຫດ. ຕາມທ່ານ Mai Tien Dung ສາຍເຫດນີ້ບໍ່ຂຶ້ນກັບຜູ້ໃດ, ເພາະວ່າ ອົງການບໍລິຫານລັດ ກ່ຽວກັບການທ່ອງທ່ຽວກໍບໍ່ທັນວາງຍຸດທະສາດຂຸດຄົ້ນຄຸນຄ່າມໍລະດົກ ເພື່ອພັດທະນາການທ່ອງທ່ຽວເທື່ອ, ໃນຂະນະທີ່ບັນດາວິສາຫະກິດພຽງແຕ່ຂຸດຄົ້ນບັນດາສິ່ງທີ່ມີຢູ່ແລ້ວ ບໍ່ມີການລົງທຶນຄືນໃຫມ່ໃຫ້ແກ່ບັນດາມໍລະດົກວັດທະນະທຳ. ໃນຂະນະນັ້ນ ການຮ່ວມສຳພັນລະຫວ່າງທ້ອງຖິ່ນທີ່ມີມໍລະດົກເພື່ອພັດທະນາການທ່ອງທ່ຽວໃນປະຈຸບັນພຽງແຕ່ສະແດງອອກໃນການລົງນາມເອກະສານຮ່ວມມືເທົ່ານັ້ນ. ທ່ານ Ho Tan Cuong ຮອງຫົວຫນ້າພະແນກວັດທະນະທຳ ກິລາ ແລະ ການທ່ອງທ່ຽວ ແຂວງ Quang Nam ຖືວ່າ: ຫວຽດນາມ ຄວນສ້າງບັນດາຜະລິດຕະພັນທີ່ເປັນເອກະລັກສະເພາະ ແລະ ແຕກຕ່າງເມື່ອຂຸດຄົ້ນຄຸນຄ່າວັດທະນະທຳເພື່ອເພີ່ມລາຍຮັບໃຫ້ແກ່ການທ່ອງທ່ຽວ.
“ເພື່ອເສີມຂະຫຍາຍຄຸນຄ່າວັດທະນະທຳທີ່ມີຢູ່ແລ້ວຂອງແຕ່ລະທ້ອງຖິ່ນທີ່ມີມໍລະດົກວັດທະນະທຳຂອງໂລກໃຫ້ໄດ້, ກ່ອນອື່ນໝົດພວກເຮົາຕ້ອງມີການຕິດພັນໃນການຮ່ວມມືເພື່ອສ້າງຜະລິດຕະພັນ. ທີສອງ ຕ້ອງຕິດພັນການຮ່ວມມືເພື່ອໂຄສະນາສົ່ງເສີມ. ຜ່ານນັ້ນ, ພວກເຮົາຈະຊ່ວຍໃຫ້ການໂຄສະນາແຕ່ລະເທື່ອເຂັ້ມຂົ້ນໄປດ້ວຍສີສັນວັດທະນະທຳກວ່າ.”
ຄຸ້ມເມືອງເກົ່າ ໂຮ້ຍອານ ໃນຍາມກາງຄືນ
ພາບ: internet
|
ບັນດາມໍລະດົກໂລກຢູ່ ຫວຽດນາມ ໄດ້ຮັບຖືວ່າ ແມ່ນຊັບພະຍາກອນການທ່ອງທ່ຽວທີ່ມີຄຸນຄ່າພິເສດເພື່ອຂຸດຄົ້ນສ້າງບັນດາຜະລິດຕະພັນການທ່ອງທ່ຽວອັນດູດດື່ມ, ມີກຳລັງແກ້ງແຍ້ງສູງ. ແຕ່ເພື່ອຂຸດຄົ້ນບັນດາຄຸນຄ່າທ່ອງທ່ຽວຈາກມໍລະດົກນັ້ນໃຫ້ມີປະສິດທິຜົນ ຍັງມີຫລາຍບັນຫາຕ້ອງແກ້ໄຂ ແລະ ຕ້ອງມີການປະສານສົມທົບຢ່າງຄົບຊຸດລະຫວ່າງບັນດາຂະແຫນງການກ່ຽວຂ້ອງ. ພິເສດຄຽງຄູ່ກັບວຽກງານອະນຸລັກຮັກສາຄຸນຄ່າຂອງບັນດາມໍລະດົກນັ້ນ,ການເຄື່ອນໄຫວສົ່ງເສີມໂຄສະນາກໍໄດ້ຮັບການຕີລາຄາວ່າ ແມ່ນສຳຄັນທີ່ສຸດ ພິເສດ ແມ່ນບັນດາລາຍການໂຄສະນາ, ສົ່ງເສີມການທ່ອງທ່ຽວຢູ່ຕ່າງປະເທດ ເພື່ອໃຫ້ການທ່ອງທ່ຽວຫວຽດນາມ ນັບມື້ນັບພັດທະນາ. ເພາະສະນັ້ນ ກົມໃຫຍ່ທ່ອງທ່ຽວ ຫວຽດນາມ ໄດ້ເລືອກເຟັ້ນຫົວເລື່ອງການທ່ອງທ່ຽວມໍລະດົກໃຫ້ແກ່ປີທ່ອງທ່ຽວແຫ່ງຊາດຢູ່ເຂດແຄມທະເລຕອນເຫນືອ ພາກກາງຫວຽດນາມ ປີ 2012 ເພື່ອໂຄສະນາ ແລະ ພັດທະນາໃຫ້ແກ່ຮູບການທ່ອງທ່ຽວທີ່ເປັນເອກະລັກສະເພາະ ແລະ ດູດດື່ມນີ້. ປີທ່ອງທ່ຽວແຫ່ງຊາດເຂດແຄມທະເລຕອນເຫນືອພາກກາງ ປີ 2012 ເລີ່ມຕົ້ໜດ້ວຍບັນດາການເຄື່ອນໄຫວຂອງ Festival Hue ໃນຊຸມມື້ຈະມາເຖິງ ແນ່ນອນວ່າ ຈະແມ່ນບັນດາຜະລິດຕະພັນການທ່ອງທ່ຽວໃຫມ່ ແລະ ດູດດື່ມ ໂດຍອີງໃສ່ຄຸນຄ່າຂອງບັນດາມໍລະດົກວັດທະນະທຳຢູ່ ຫວຽດນາມ.
ນັກຂ່າວ ມາຍລານ