(vovworld) - ໝູ່ບ້ານບູຮານເດື່ອງເລີມ ຂຶ້ນກັບເທດສະບານ ເຊີນໄຕ ຮ່າງຈາກໃຈກາງນະຄອນ ຮ່າໂນ້ຍ ກວ່າ 40 ກິໂລແມດ, ແມ່ນຫນຶ່ງໃນບັນດາສະຖານທີ່ດຶງດູດນັກທ່ອງທ່ຽວມາຢ້ຽມຢາມໃນຊຸມມື້ທ້າຍອາທິດເປັນຈຳນວນຫລວງຫລາຍ. ໝູ່ບ້ານບູຮານແຫ່ງນີ້ດູດດື່ມນັກທ່ອງທ່ຽວດ້ວຍບັນດາຫລັງຄາເຮືອນບູຮານ ແລະ ຈຸດວັດທະນະທຳທີ່ເປັນເອກະລັກສະເພາະຂອງໝູ່ບ້ານຫວຽດນາມ.
ນັກທ່ອງທ່ຽວຢ້ຽມຊົມໝູ່ບ້ານບູຮານເດື່ອງເລີມ
ພາບ:internet
|
ຈາກໃຈກາງນະຄອນຫລວງຮ່າໂນ້ຍ, ຂີ່ລົດໄປປະມານຫນຶ່ງຊົ່ວໂມງ ນັກທ່ອງທ່ຽວຈະໄປຮອດໝູ່ບ້ານບູຮານ ເດື່ອງເລີມ. ບົນເສັ້ນທາງເຂົ້າໝູ່ບ້ານ, ຮູບພາບບ້ານນາດ້ວຍບັນດາທົ່ງນາ, ຫນອງບົວພວມຈໍ່ດອກບານໄດ້ເຮັດໃຫ້ນັກທ່ອງທ່ຽວຮູ້ສຶກວ່າສະພາບການຢູ່ທີ່ນີ້ມີ ຄວາມສະຫງົບງຽບ. ເມື່ອໄປຮອດປະຕູໂຂງເຂົ້າບ້ານ ມົງຟູ້, ນັກທ່ອງທ່ຽວຜູ້ໃດກໍມັກຖ່າຍຮູບເພື່ອເປັນທີ່ລະນຶກ. ປະຕູໂຂງແຫ່ງນີ້ບໍ່ພຽງແຕ່ ມີຄວາມງາມແບບທຳມະຊາດເທ່ົານັ້ນ ຫາກຍັງມີຄວາມງາມທາງດ້ານສະຖາປັດຕະຍະກຳອີກດ້ວຍ. ໃນໝູ່ບ້ານບູຮານ ເດື່ອງເລີມ, ເຮືອນແຕ່ລະຫລັງ, ເສັ້ນທາງແຕ່ລະສາຍລ້ວນແຕ່ມີລັກສະນະພິເສດສະເພາະ. ອັນໄດ້ເຮັດໃຫ້ນັກທ່ອງທ່ຽວມີຄວາມຮູ້ສຶກແຕກຕ່າງກັນ. ທ່ານ Nguyen Trong An, ຮອງຫົວຫນ້າຄະນະຄຸ້ມຄອງ ໝູ່ບ້ານບູຮານ ເດື່ອງເລີມ ໃຫ້ຮູ້ວ່າ:
“ ໃນຈຳນວນ 5 ບ້ານ ຂອງໝູ່ບ້ານບູຮານ ເດື່ອງເລີມນັ້ນ, ບ້ານ ມົງຟູ້ ແມ່ນບ່ອນທີ່ມີປູຊະນີຍະສະຖານຫລາຍແຫ່ງກວ່າໝູ່. ໃນນັ້ນ ມີບັນດາປູຊະນີຍະສະຖານສຳຄັນຄື: ສາລາ, ຫລັງຄາເຮືອນບູຮານ, ຫໍບູຊາຂອງວົງຕະກູນ, ສ່ວນ 4 ບ້ານຍັງເຫລືອກໍມີປູຊະນີຍະສະຖານສຳຄັນຫລາຍແຫ່ງ ຊຶ່ງແມ່ນສະຖານທີ່ດຶງດູດນັກທ່ອງທ່ຽວມາຢ້ຽມຢາມເປັນຈຳນວນຫລວງຫລາຍ.”
ປະຈຸບັນ ໝູ່ບ້ານບູຮານ ເດື່ອງເລີມ ມີ ເຮືອນບູຮານເກືອບ 1000 ຫລັງ ໃນນັ້ນມີເຮືອນຫລາຍຫລັງໄດ້ຮັບການກໍ່ສ້າງແຕ່ສັດຕະວັດທີ 17 ເຊິ່ງເຕົ້າໂຮມຢູ່ບ້ານ: ດົງຊ່າງ, ມົງຟູ້ ແລະ ກາມກໍ. ນັກທ່ອງທ່ຽວມາຢ້ຽມຢາມໝູ່ບ້ານບູຮານ ເດື່ອງເລີມ ເຄີຍແວ່ຢາມເຮືອນຂອງລຸງ ຮ່ວຽນ, ລຸງເລ ແລະ ລຸງຮຸ່ງ. ນັ້ນແມ່ນບັນດາເຈົ້າຂອງເຮືອນບູຮານກວ່າໝູ່ ແລະ ສວຍງາມທີ່ສຸດໃນບ້ານ ມົງຟູ້. ສິ່ງທີ່ສ້າງຄວາມດູດດື່ມທີ່ສຸດນັ້ນແມ່ນ ເມື່ອມາຢ້ຽມຢາມ ນັກທ່ອງທ່ຽວລ້ວນແຕ່ໄດ້ຮັບຟັງແນະນຳຈາກເຈົ້າຂອງເຮືອນເອງ. ໃກ້ຄຽງກັບບ້ານ ມົງຟູ້ ແມ່ນບ້ານ ດົງຊ່າງ, ມີເຮືອນບູຮານປະມານ 10 ຫລັງ, ປະຈຸບັນຍັງຄົງຮັກສາຮູບເດີມໄວ້ໄດ້. ນາງ Nguyen Thi Thu Hoai ຜູ້ນຳທ່ຽວຂອງຄະນະຄຸ້ມຄອງ ໝູ່ບ້ານບູຮານ ເດື່ອງເລີມໃຫ້ຮູ້ວ່າ:
“ໂຄງສ້າງຂອງ ໝູ່ບ້ານບູຮານ ເດື່ອງເລີມ ລ້ວນແຕ່ຄ້າຍຄືກັນ. ເຮືອນຫລັງໃຫຍ່ແມ່ນເຮືອນຂອງຜູ້ຮັ່ງມີ ຫລືອາດຍາເຈົ້ານາຍ, ສ່ວນເຮືອນຫລັງນ້ອຍແມ່ນເຮືອນມຸງຫຍ້າ. ເຮືອນຫລັງໃຫຍ່ປະກອບມີ 5 ຫ້ອງ, 2 ເທີບ. ເຮືອນຂອງອຳໝາດ, ເສນາ ມີຈຸດທີ່ແຕກຕ່າງກັນ, ເຮືອນຂອງອຳໝາດ, ເຈົ້ານາຍມີຄຳຜະຫຍາແຂ້ວນໃນເຮືອນ ສ່ວນເຮືອນຂອງ ເສນາ, ອາດຍາເຈົ້ານາຍ ສ່ວນຫລາຍແມ່ນປະດັບປະດາດ້ວຍຮູບມັງກອນ ຫລື ຮູບພາບໃນຍຸກສະໄຫມ.”
ສິ່ງທີ່ແຕກຕ່າງກັນໃນຫລັງຄາເຮືອນຂອງປ້າ Vu Thi Am ຊຶ່ງແມ່ນຫນຶ່ງໃນບັນດາຫລັງຄາເຮືອນເກົ່າແກ່ຂອງບ້ານ ດົງຊ່າງ ນັ້ນແມ່ນຫ້ອງບູຊາປູ່ຍ່າຕາຍາຍ. ຢູ່ຫ້ອງບູຊາໃຫຍ່ແມ່ນໄດ້ຮັບການແກະສະຫລັກຮູບຫົວມັງກອນ. ຫລື ຫລັງຄາເຮືອນຂອງລຸງ Kieu Anh Ban ໄດ້ຮັບການກໍ່ສ້າງເມື່ອປີ 750 ໃນສະໄຫມເຈົ້າຊີວິດ Le Hien Tong ມາຮອດປະຈຸບັນຍັງຄົງຮັກສາຈຸດດັ້ງເດີມໄວ້ຢູ່. ລຸງ Ban ໃຫ້ຮູ້ວ່າ: ຫ້ອງບູຊາກໍແມ່ນຈຸດພິເສດຂອງເຮືອນຫລັງນີ້.
“ຫ້ອງບູຊາຂອງຄອບຄົວຂ້າພະເຈົ້າຍັງຄົງຮັກສາລັກສະນະບູຮານໄວ້ໄດ້, ຄືໄດ້ຮັບການແບ່ງອອກເປັນ 4 ຊັ້ນ. ຊັ້ນໃນແມ່ນວາງຮູບຜູ້ລ່ວງລັບໄປແລ້ວ, ຮ້ານບູຊາ, ຖັດມາແມ່ນແທ່ນບູຊາເພື່ອເປັນບ່ອນວາງເຄື່ອງຂອງບູຊາໃນການຈັດພິທີໄຫ້ວແຕ່ລະຄັ້ງ. ຫຼັງຈາກເສັດພິທີແລ້ວຈຶ່ງປົດພາເຄື່ອງບູຊາລົງໃຫ້ລູກຫຼານໄດ້ຮັບປະທານຂອງເປັນບຸນກຸສົນ. ນັ້ນແມ່ນພິທີບູຊາປູຍາຕ່າຍາຍຊຶ່ງຄອບຄົວຍັງຮັກສາໄວ້ໄດ້.”
ປະຕູເຂົ້າເຮືອນບູຮານຫລັງຫນຶ່ງຢູ່ໝູ່ບ້ານເດື່ອງເລີມ
ພາບ:internet
|
ນອກຈາກໄປຢ້ຽມຢາມເຮືອນບູຮານຢູ່ໝູ່ບ້ານເດື່ອງເລີມ ແລ້ວ, ນັກທ່ອງທ່ຽວຍັງໄດ້ໄປຢ້ຽມຢາມ ວັດ Mia, ສາລາ ມົງຟູ້. ຢ້ຽມຊົມອາຊີບຫັດຖະກຳທີ່ເປັນມູນເຊື້ອຢູ່ທີ່ນີ້ອີກ. ປ້າ Le Thi Kim Nhung ຊາວໝູ່ບ້ານບູຮານເດື່ອງເລີມໃຫ້ຮູ້ວ່າ:
“ໝູ່ບ້ານຫັດຖະກຳມີຜະລິດຕະພັນຫລາຍຢ່າງທີ່ລືຊື່. ເມື່ອມາຢ້ຽມຢາມເດື່ອງເລີມ ທຸກຄົນລ້ວນແຕ່ຮູ້ຈັກເຖິງອາຊີບຜະລິດເຂົ້າໜົມປະເພດຕ່າງໆ, ນອກນັ້ນແມ່ນອາຊີບທີ່ເປັນມູນເຊື້ອຄື: ອາຊີບຜະລິດເຄື່ອງເຟີນີເຈີ, ຫລອມເຫລັກ. ພວກຂ້າພະເຈົ້າກໍປາດຖະຫນາວ່າ ບັນດາອາຊີບທີ່ເປັນມູນເຊື້ອມາແຕ່ດົນນານນີ້ ຈະໄດ້ຮັບການພັດທະນາເພື່ອດຶງດູດນັກທ່ອງທ່ຽວມາຢ້ຽມຢາມໝູ່ບ້ານເດື່ອງເລີມນັບມື້ນັບຫລາຍຂຶ້ນ.”
ເຍື່ອງອາຫານພິເສດຂອງເດື່ອງເລີມແມ່ນ ນ້ຳເຕົ້າຈ້ຽວ ຫລື ບັນດາເຍື່ອງອາຫານໂດຍແມ່ນຊາວບ້ານປຸງແຕ່ງເອງ ກໍໄດ້ສ້າງຄວາມດູດດື່ມໃຫ້ນັກທ່ອງທ່ຽວເປັນຈຳນວນຫລວງຫລາຍ. ນາງ Aiko ຜູ້ນຳທ່ຽວອາສາສະໝັກທີ່ມາຈາກ ຍີ່ປຸ່ນ ເປັນຜູ້ນິຍົມບັນດາເຍື່ອງອາຫານຢູ່ທີ່ນີ້.
“ເມື່ອມາຢ້ຽມຢາມ ເດື່ອງເລີມໃນຄັ້ງທຳອິດ ຂ້າພະເຈົ້າເຫັນວ່າ ທິວທັດທຳມະຊາດຢູ່ທີ່ນີ້ສວຍງາມຫລາຍ ແຕ່ຊາວບ້ານບໍ່ທັນຮູ້ຈັກເຖິງວິທີນຳທ່ຽວ, ແຕ່ປະຈຸບັນ ພາລະກອນຂອງຄະນະຄຸ້ມຄອງ ແລະ ປະຊາຊົນຢູ່ໝູ່ບ້ານເດື່ອງເລີມໄດ້ຮູ້ຈັກເຖິງການນຳທ່ຽວແລ້ວ. ເດື່ອງເລີມມີເຮືອນບູຮານຫລາຍຫຼັງ ໂດຍສະເພາະປະຊາຊົນຢູ່ທີ່ນີ້ມີຄວາມເຂົ້າໃຈແຈ້ງກ່ຽວກັບວັດທະນະທຳ, ຮີດຄອງປະເພນີຂອງໝູ່ບ້ານ ສະນັ້ນ ເຂົາເຈົ້າສາມາດແນະນຳຢ່າງລະອຽດໃຫ້ນັກທ່ອງທ່ຽວໄດ້ຮັບຊາບ. ຂ້າພະເຈົ້າຮູ້ສຶກປະທັບໃຈທີ່ສຸດແມ່ນບັນດາເຍື່ອງອາຫານຢູ່ເດື່ອງເລີມ, ຊາວບ້ານເດື່ອງເລີມແຕ່ງກິນແຊບຫລາຍ ແລະ ເຂົ້າຫນົມປະເພດຕ່າງໆໂດຍຊາວບ້ານເດື່ອງເລີມຜະລິດກໍແຊບເຊັ່ນກັນ.”
ເສັ້ນທາງໄປມາກໍສະດວກ ແລະ ໃກ້ກັບນະຄອນຫລວງ ຮ່າໂນ້ຍ, ສະນັ້ນ ນັກທ່ອງທ່ຽວລ້ວນແຕ່ໄປກັບໃນມື້ດຽວໄດ້. ມາແຫ່ງນີ້ ນັກທ່ອງທ່ຽວ ສາມາດຍ່າງໄປ ຫລືຈ້າງລົດຖີບໄປຊອກຮູ້ບັນດາເສັ້ນທາງທີ່ປູດ້ວຍດິນຈີ ຫລື ເຂົ້າຢ້ຽມຊົມເຮືອນບູຮານກໍ່ໄດ້. ມາຢ້ຽມຢາມໝູ່ບ້ານເດຶອງເລີມໃນເວລາພຽງມື້ຫນຶ່ງ, ແຕ່ຈະຊ່ວຍໃຫ້ນັກທ່ອງທ່ຽວມີຄວາມຮູ້ສຶກຫຼາຍຢ່າງກ່ຽວກັບໝູ່ບ້ານບູຮານຂອງຫວຽດນາມ.
ລານແອງ