(vovworld) - ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ ແມ່ນເຂດດິນສັນດອນຢູ່ປາກແມ່ນ້ຳຂອງທີ່ກວ້າງໃຫຍ່ ແລະ ອຸດົມສົມບູນ ລວມມີ 13 ແຂວງ, ນະຄອນ ດ້ວຍເນື້ອທີ່ປະມານ 40.000 ຕາລາງກິໂລແມດ. ເຂດທົ່ງພຽງແມ່ນ້ຳຂອງ ໄດ້ຮັບຖືວ່າ ແມ່ນອູ່ເຂົ້າໃຫຍ່ສຸດຢູ່ ຫວຽດນາມ ດ້ວຍທິວທັດທຳມະຊາດສວຍງາມຫລາຍແຫ່ງ. ມາຢ້ຽມຢາມ ເຂດທົ່ງພຽງແມ່ນ້ຳຂອງ ນັກທ່ອງທ່ຽວໄດ້ເຫັນປະຈັກຕາຊີວິດການເປັນຢູ່ຂອງປະຊາຊົນຢູ່ສວນໝາກໄມ້, ບັນຍາກາດອັນຟົດຟື້ນຢູ່ຕະຫລາດນ້ຳ, ພ້ອມກັບສວນໝາກໄມ້ທີ່ກວ້າງໃຫຍ່ຢູ່ ນະຄອນ ເກີນເທີ, ແຫລມກາເມົາ ແລະ ບັນດາວັດວາອາຮາມຂອງຊາວເຜົ່າຂະແມຢູ່ ຊອກຈັງ.
ຕະຫລາດນ້ຳຢູ່ເຂດທົ່ງພຽງແມ່ນ້ຳຂອງທາງພາກໃຕ້ ຫວຽດນາມ
ພາບ:dulich.com |
ເຂດທົ່ງພຽງແມ່ນ້ຳຂອງມີທິວທັດທຳມະຊາດເປັນເອກະລັກສະເພາະ ທັງມີເຂດທົ່ງພຽງ ແລະ ໝູ່ເກາະ, ຊຶ່ງແມ່ນເຂດແມ່ນ້ຳລຳເຊມີສິ່ງແວດລ້ອມປອດໂປ່ງ, ຊັບພະຍາກອນທຳມະຊາດອຸດົມສົມບູນ, ສວນຕົ້ນໄມ້ກິນໝາກທີ່ກວ້າງໃຫຍ່. ສະນັ້ນ ບັນດາບໍລິສັດທ່ອງທ່ຽວລ້ວນແຕ່ສ້າງລາຍການທ່ອງທ່ຽວຢ້ຽມຢາມເຂດທົ່ງພຽງແມ່ນ້ຳຂອງມີຈຸດພິເສດສະເພາະ. ທ່ານ ຫງວຽນຕວນແອງ ຜູ້ອຳນວຍການບໍລິສັດທ່ອງທ່ຽວ Anh Duong ໃຫ້ຮູ້ວ່າ: ປີ 2012, ທາງບໍລິສັດໄດ້ສ້າງລາຍການທ່ອງທ່ຽວເຖິງສະຖານທີ່ໃຫມ່ຫລາຍແຫ່ງ, ໃນນັ້ນ ມີລາຍການທ່ອງທ່ຽວຄົ້ນຫາເຂດທົ່ງພຽງແມ່ນ້ຳຂອງ.
“ສະຖານທີ່ທຳອິດທີ່ນັກທ່ອງທ່ຽວມາຢ້ຽມຢາມນັ້ນແມ່ນນະຄອນເກີນເທີ. ຢ້ຽມຢາມ ສາລາບ້ານບູຮານ ບີ່ງທູຍ , ຊຶ່ງແມ່ນຫນຶ່ງໃນບັນດາສາລາບ້ານບູຮານຂອງປະຊາຊົນດຳລົງຊີວິດຢູ່ທາງທິດຕາເວັນຕົກພາກໃຕ້ ຫວຽດນາມ. ຫລັງຈາກນັ້ນ ນັກທ່ອງທ່ຽວໄປຢ້ຽມຢາມ ເຈົາດົກ, ຢ້ຽມຢາມວັດພະແມ່ ຊື ຄ້າຍຄືວັດພະແມ່ ຄໍ ຢູ່ ພາກເຫນືອ. ນອກນັ້ນ ໄປຢ້ຽມຢາມປ່າຄາມຈ່າຊື, ຊຶ່ງແມ່ນຫນຶ່ງໃນບັນດາປ່າຄາມທີ່ມີມາແຕ່ດົນນານ ແລະ ມີຄວາມງາມແບບທຳມະຊາດທີ່ເປົ່າຫວ່າງ ຊຶ່ງປະຊາຊົນທາງທິດຕາເວັນຕົກພາກໃຕ້ຍັງຄົງຮັກສາໄດ້.”
ນະຄອນ ເກີນເທີ ຕັ້ງຢູ່ໃຈກາງເຂດທົ່ງພຽງແມ່ນ້ຳຂອງ ມີແມ່ນ້ຳລຳເຊຫລາຍສາຍ. ຕະຫລາດນ້ຳ ກາຍຣັງ ກໍແມ່ນຫນຶ່ງໃນບັນດາສະຖານທີ່ທ່ອງທ່ຽວຊຶ່ງນັກທ່ອງທ່ຽວນິຍົມຄົ້ນຫາ. ໂດຍຫ່າງຈາກນະຄອນ ເກີນເທີ ປະມານ 5 ກິໂລແມດ, ນັກທ່ອງທ່ຽວສາມາດໄປມາດ້ວຍທາງບົກຫລືທາງນ້ຳຢ່າງສະດວກ. ການດຳລົງຊີວິດຂອງປະຊາຊົນຢູ່ 2 ຟາກຝັ່ງແມ່ນອຸດົມສົມບູນ ແຕ່ສະຫງົບງຽບ. ຈາກນະຄອນ ເກີນເທີ ມີສະຖານທີ່ທ່ອງທ່ຽວຫລາຍແຫ່ງນັກທ່ອງທ່ຽວເລືອກເຟັ້ນ.
ນັກທ່ອງທ່ຽວຢ່ຽມຢາມເຂດທົ່ງພຽງແມ່ນ້ຳຂອງ
ພາບ: internet
|
ເມື່ອໄປຢ້ຽມຢາມແຫລມກາເມົາ, ແມ່ນຕອນໃຕ້ຂອງປະເທດຊາດ, ມາຮອດແຫ່ງນີ້ ນັກທ່ອງທ່ຽວສາມາດເຫັນປະຈັກຕາຫລັກໝາຍອະທິປະໄຕຂອງ ຫວຽດນາມ ແລະ ປ່າສະຫງວນແຫ່ງຊາດແຫລມກາເມົາກໍແມ່ນສະຖານທີ່ທ່ອງທ່ຽວສ້າງຄວາມດູດດື່ມນັກທ່ອງທ່ຽວດ້ວຍລະບົບສັດສາວາສິ່ງທີ່ອຸດົມສົມບູນ ມີຫລາຍປະເພດຖືກຈັດເຂົ້າປື້ມປົກແດງ. ອ້າຍ ເຢືອງວັນທັງ, ຜູ້ນຳທ່ຽວຂອງສູນທ່ອງທ່ຽວ ກາເມົາ ໃຫ້ຮູ້ວ່າ: ມາຢ້ຽມຢາມປ່າສະຫງວນແຫ່ງຊາດ, ນັກທ່ອງທ່ຽວລ້ວນແຕ່ຮູ້ສຶກແປກປະຫລາດໃຈຕໍ່ຄວາມງາມກໍຄືສັດສາວາສິ່ງທີ່ອຸດົມສົມບູນຢູ່ທີ່ນີ້.
“ເມື່ອມາຢ້ຽມຢາມປ່າກົງກາງແຫ່ງນີ້, ນັກທ່ອງທ່ຽວອາດຈະວາດພາບໄດ້ສ່ວນໃດສ່ວນຫນຶ່ງກ່ຽວກັບໄລຍະຕໍ່ຕ້ານ. ປ່າກົງກາງບໍ່ພຽງແຕ່ແມ່ນແຫ່ງທີ່ກ່ອນນີ້ໄດ້ຊ່ວຍ ທະຫານ ຫວຽດນາມໃນໄລຍະຕໍ່ຕ້ານ ຫາກຍັງແມ່ນແຫ່ງມີອາຫານພິເສດຫລາຍຢ່າງອີກດ້ວຍ.”
ເມື່ອໄປຢ້ຽມຢາມ ຊອກຈັງ, ນັກທ່ອງທ່ຽວຄືໄດ້ເຈືອຈານເຂົ້າກັບຊີວິດການເປັນຢູ່ຂອງຊາວເຜົ່າຂະແມ. ຊອກຈັງ ແມ່ນເຂດດິນແດນທີ່ລືຊື່ດ້ວຍບຸນຊ່ວງເຮືອ ແລະ ພິເສດ ວັດວາອາຮາມຢູ່ ຊອກຈັງ ແມ່ນຈຸດນັດພົບທີ່ຂາດບໍ່ໄດ້ໃນລາຍການຄົ້າຫາຂອງນັກທ່ອງທ່ຽວຜູ້ທີ່ມາຈາກໄກກໍຄືຢູ່ໃກ້ຄື: ວັດເຢີຍ(ເຈຍ), ວັດເດີດແຊດ, ວັດ KhLeng, ວັດແຈນ. ວັດແຕ່ລະແຫ່ງມີຄວາມງາມສະເພາະ, ແຕ່ວັດທີ່ສ້າງຄວາມດູດດື່ມນັກທ່ອງທ່ຽວກວ່າໝູ່ແມ່ນວັດເຢີຍ. ວັດແຫ່ງນີ້ແມ່ນຫ່າງຈາກໃຈກາງນະຄອນ ຊອກຈັງໄປທາງທິດຕາເວັນອອກສຽງໃຕ້ປະມານ 3 ກິໂລແມດ. ວັດເຢີຍ ແມ່ນວັດແຫ່ງຫນຶ່ງຂອງຊາວເຜົ່າຂະແມ ດ້ວຍສະຖາປັດຕະຍະກຳທີ່ເປັນເອກະລັກສະເພາະ. ວັດແຫ່ງນີ້ແມ່ນສວຍງາມກວ່າໝູ່ໃນວັດວາອາຮາມ 92 ແຫ່ງຂອງຊາວເຜົ່າຂະແມ ຢູ່ ແຂວງ ຊອກຈັງ. ພິເສດ ນັບແຕ່ຮ້ອຍປີມານີ້, ໃນເນື້ອທີ່ 3 ເຮັກຕາ ດ້ວຍຕົ້ນໄມ້ໃຫຍ່ຫລາຍຕົ້ນແມ່ນບ່ອນອາໄສຂອງໂຕເຈຍ ຊຶ່ງມີນ້ຳຫນັກກວ່າ 1 ກິໂລກາມ, ປິກຍາວກວ່າ 1,5 ແມດ, ສະນັ້ນຊາວ ທ້ອງຖິ່ນເຄີຍເອີ້ນວ່າ ວັດເຢີຍ. ເມື່ອຍາມສາຍັນ ແມ່ນຈຸດເວລາທີ່ຝູງເຈຍໄປຊອກຫາກິນຈົນຮອດຕອນເຊົ້າມື້ຕໍ່ມາຈຶ່ງກັບຄືນວັດ. ມາຢ້ຽມຢາມວັດແຫ່ງນີ້, ນັກທ່ອງທ່ຽວມີຄວາມແປກປະຫລາດໃຈຕໍ່ຄວາມງາມແບບທຳມະຊາດ. ທ່ານນາງ ຫງວຽນທິເວີນແອງ ມາຈາກແຂວງ ບີ່ງທ້ວນ ໃຫ້ຮູ້ວ່າ:
“ຢູ່ວັດມີທັດສະນີຍະພາບທີ່ສວຍງາມຫລາຍຢ່າງ, ສະຖາປັດຕະຍະກຳໃນວັດວາອາຮາມຂອງຊາວເຜົ່າຂະແມ ແລະ ມີເຈຍຫຼາຍ. ມາແຫ່ງນີ້ເຫັນວ່າມີທິວທັດທຳມະຊາດສວຍງາມ, ມີນົກ,ເຈຍ …ຂ້າພະເຈົ້າຢາກມາຢ້ຽມຢາມແຫ່ງນີ້ເພື່ອຊອກຮູ້ກ່ຽວກັບສະຖາປັດຕະຍະກຳ.”
ບໍ່ມີສິ່ງໃດທີ່ປະເສີດກວ່າເມື່ອໄດ້ເຈືອຈານເຂົ້າກັບທຳມະຊາດ, ໄດ້ສູບອາກາດປອດໂປ່ງ, ສະຫງົບງຽບ ເຮັດໃຫ້ນັກທ່ອງທ່ຽວຮູ້ສຶກສະບາຍໃຈ. ໃນລາຍການຄົ້ນຫາ 3 ແຂວງ ເກີນເທີ, ກາເມົາ, ຊອກຈັງ, ປະຊາຊົນ ແລະ ທິວທັດທຳມະຊາດຢູ່ທີ່ນີ້ຍາມໃດກໍສ້າງຄວາມປະທັບໃຈຊຶ່ງເຮັດໃຫ້ນັກທ່ອງທ່ຽວບໍ່ອາດຫລົງລືມໄດ້.
Lan Anh