|
ສິລະປະຕີມວຍພື້ນເມືອງ - ພາບ:ລານແອນ
|
(vovworld) - ເທື່ອທຽນເຫ້ວ ແມ່ນເຂດດິນທີ່ງາມດັ່ງໃນຝັນຢູ່ພາກກາງຫວຽດນາມ. ດ້ວຍກຸບບ່າຍເທີ, ເສື້ອຍາວສີອິດທີ່ອ່ອນນວນ, ຫຼືທຳນອງເພງພື້ນເມືອງທີ່ອ່ອນຫວານນິ້ມນວນ, ຜູ້ໃດມີໂອກາດມາຢ້ຽມຢາມນະຄອນເຫ້ວກໍ່ລ້ວນແຕ່ມີຄວາມຮູ້ສຶກວ່າ ນີ້ແມ່ນເຂດດິນແດນແຫ່ງເມືອງຫລວງເກົ່າ ດ້ວຍປູສະນິຍະສະຖານປະຫວັດສາດແລະ ທິວທັດທຳມະຊາດທີ່ສວຍສົດງົດງາມ, ແມ່ນແຫ່ງກຳເນີີດບັນດາບົດວັນນະຄະດີ, ສິລະປະດົນຕີທີ່ມ່ວນອອນຊອນແລະອຳມະຕະເທົ່າທຸກວັນນ້ີ. ນອກນັ້ນ ນະຄອນ ເຫ້ວຍັງສ້າງຄວາມປະທັບໃຈແກ່ນັກທ່ອງທ່ຽວ ດ້ວຍຄວາມສະຫງ່າອົງອາດຂອງສິລະປະຕີມວຍພື້ນເມືອງ
ມາຢ້ຽມຢາມ ເທື່ອທຽນເຫ້ວ ນັກທ່ອງທ່ຽວເຄີຍໄດ້ເຂົ້າຮ່ວມບັນດລາຍການທ່ອງທ່ຽວຕ່າງໆຄື: ໄປຢ້ຽມຢາມພະລາຊະວັງເກົ່າ, ສຸສານ... , ລ່ອງເຮືອລຽບຕາມແມ່ນ້ຳເຮືອງເພື່ອຟັງສຽງຂັບລຳພື້ນເມືອງທີ່ອ່ອນຫວານ ແລະສຳພັດກັບຊີວິດການເປັນຢູ່ຂອງປະຊາຊົນຢູ່ Dam pha Tam Giang (ບືງ ຟາຕາມຢາງ) ຫລືໄປອາບນ້ຳຢູ່ຫາດຊາຍທະເລໃສເຢັນ ທ້ວນອານ ແລະ ປະຈຸບັນ ນັກທ່ອງທ່ຽວຍັງໄດ້ຮັບຊົມລາຍການສະແດງສິລະປະຕີມວຍພື້ນເມືອງທີ່ຈັບອົກຈັບໃຈຂອງບັນດານັກມວຍຫນຸ່ມ ຊຶ່ງແມ່ນລູກຫລານຂອງເຂດດິນແດນເທື່ອທຽນເຫ້ວ.
ບັນດານັກມວຍທີ່ເຂົ້າຮ່ວມລາຍການສະແດງສິລະປະຕີມວຍພື້ນເມືອງເພື່ອຮັບໃຊ້ນັກທ່ອງທ່ຽວລ້ວນແຕ່ຢູ່ໃນເກນອາຍຸ ແຕ່ 18 - 28 ປີ. ພວກນ້ອງເຂົ້າຮ່ວມສິລະປະປະເພດນີ້ ແລະ ໄດ້ຮັບການເຕີບໃຫຍ່ ຄືທຸກວັນນີ້ ແມ່ນຍ້ອນມີຄວາມນິຍົມ ແລະ ໄດ້ຮັບການສິດສອນຢ່າງສຸດຈິດສຸດໃຈຈາກ ອາຈານ ມວຍ ເຈືອງກວາງກີມ, ຫົວຫນ້າປະເພດ ມວຍຫວ້ານອານ ຂອງເຫ້ວ. ໃນເບື້ອງຕົ້ນ ບັນດາເພື່ອນຫນຸ່ມນີ້ ໄດ້ຮຽນນຳອາຈານມວຍ ກີມ ເພື່ອເປັນການເຝິກແອບຮ່າງກາຍ ແຕ່ຍ້ອນເມົາມົວກັບມວຍປະເພດນີ້ ສະນັ້ນ ພວກນ້ອງໄດ້ເລືອກເຟັ້ນ ແລະ ຖືມວຍປະເພດນີ້ແມ່ນວຽກງານໃນໄລຍະຍາວຂອງຕົນ. ແລະກໍເລີ່ມມາຈາກຄວາມຕ້ອງການຂອງການທ່ອງທ່ຽວ, ທ່ານ ກີມ ກໍຢາກແນະນຳກ່ຽວກັບຈຸດວັດທະນະທຳຂອງ ນະຄອນເຫ້ວ ເຖິງນັກທ່ອງທ່ຽວຢູ່ພາຍໃນ ແລະ ຕ່າງປະເທດ ສິລະປະຕີມວຍພື້ນເມືອງ.
“ໃນໄລຍະ 12 ປີ, ທີ່ສະແດງມວຍພື້ນເມືອງ ຂ້າພະເຈົ້າເຫັນວ່າ ທຸກຄົນລ້ວນແຕ່ມີຄວາມນິຍົມ ມວຍພື້ນເມືອງປະເພດນີ້ ສະນັ້ນ ຂ້າພະເຈົ້າຈຶ່ງມາເຫ້ວ ເພື່ອຊອກຫາພວກເດັກນ້ອຍກຳພ້າ ເພື່ອອົບຮົມສັ່ງສອນໃຫ້ພວກນ້ອງກາຍເປັນສະມາຊິກໃນກອງສະແດງສິລະປະຕີມວຍພື້ນເມືອງ. ແລະ ເຫັນວ່າ ນັບມື້ນັບມີນັກທ່ອງທ່ຽວຕ່າງປະເທດຫລາຍຄົນ ຢາກຊົມມວຍປະເພດນີ້. ບາງເທື່ອຮັບຊົມແລ້ວ ເມື່ອກັບເມືອປະເທດເຂົາເຈົ້າໄດ້ຕັ້ງກອງຕີມວຍປະເພດນີ້ຂຶ້ນອີກ. ສະນັ້ນ ຂ້າພະເຈົ້າເຫັນວ່າ ນີ້ຄວນນຳມວຍພື້ນເມືອງປະເພດນີ້ເຂົ້າໃນລາຍການທ່ອງທ່ຽວເພື່ອໂຄສະນາຜະລິດຕະພັນການທ່ອງທ່ຽວຂອງນະຄອນເຫ້ວ ແລະຂອງ ຫວຽດນາມຕື່ມອີກ.”
ໃນເບື້ອງຕົ້ນ ລາຍການສະແດງສິລະປະຕີມວຍພື້ນເມືອງ ຫວ້ານອານ ພຽງແຕ່ສະແດງຮັບໃຊ້ບັນດາຄະນະນັກທ່ອງທ່ຽວສາກົນທີ່ມາຈາກ ແດນມາກ, ຝລັ່ງ ຂອງບໍລິສັດທ່ອງທ່ຽວ ຫວຽດນາມ ຮ່າໂນ້ຍ ສາຂານະຄອນ ເຫ້ວເທົ່ານັ້ນ. ທ່ານນາງ ເຢືອງທິກົງລີ້ ພະນັກງານ ບໍລິສັດທ່ອງທ່ຽວ ຫວຽດນາມ ຮ່າໂນ້ຍ ສາຂານະຄອນເຫ້ວ ໃຫ້ຮູ້ວ່າ: ເມື່ອຢ້ຽມຊົມລາຍການຕີມວຍແລ້ວ ບັນດາຄະນະນັກທ່ອງທ່ຽວ ລ້ວນແຕ່ໃຫ້ຂໍ້ສັງເກດ ແລະຕີລາຄາວ່າມວຍປະເພດນີ້ແມ່ນ ຈັບອົກຈັບໃຈຫລາຍ. ເພາະວ່າ ມວຍ ຫວ້ານອານ ກ່ອນນີ້ ສ່ວນຫລາຍແມ່ນເພື່ອຮັບໃຊ້ໃຫ້ແກ່ລາຊະວັງ, ລາຊະວົງ ຫງວຽນ, ປົກປັກຮັກສາລາຊະວັງ ດັ່ງນັ້ນຈຶ່ງບໍ່ໄດ້ຮັບການເຜີຍແຜ່ອອກສູ່ວົງກວ້າງ. ທ່ານກີມຊອກຫາມວຍປະເພດນີ້, ອະນຸລັກຮັກສາໄວ້ ແລະ ນຳສະເໜີໃຫ້ແກ່ນັກທ່ອງທ່ຽວ. ດ້ວຍສິ່ງພິເສດນັ້ນ ຈຶ່ງເຮັດໃຫ້ນັກທ່ອງທ່ຽວທຸກຄະນະເມື່ອມາຢ້ຽມຢາມ ເຫ້ວ ລ້ວນແຕ່ຢາກເລືອກເຟັ້ນລາຍການທ່ອງທ່ຽວທີ່ມີການສະແດງສິລະປະຕີມວຍພື້ນເມືອງ. ເອື້ອຍ ລີ້ ໃຫ້ຮູ້ວ່າ:
“ປະຈຸບັນ ບັນດາບໍລິສັດທ່ອງທ່ຽວໃນແຂວງ ແລະ ທົ່ວປະເທດ ລ້ວນແຕ່ພານັກທ່ອງທ່ຽວສາກົນມາຢ້ຽມຢາມເຫ້ວ. ມາແຫ່ງນີ້ ເຂົາເຈົ້າໄດ້ຮັບຊົມບັນດາລາຍການ ສະແດງຕີມວຍພື້ນເມືອງພິເສດຂອງນະຄອນເຫ້ວ. ນອກຈາກໄດ້ຢ້ຽມຊົມບັນດາຫໍໂຮງ, ສວນອຸດທະຍານຂອງຂຸນນາງການເມືອງແລ້ວ. ປະຈຸບັນ ນັກທ່ອງທ່ຽວທີ່ມາແຫ່ງນີ້ ຍັງສາມາດເຂົ້າຢ້ຽມຊົມເຂດຫໍໂຮງຂອງຂຸນນາງຝ່າຍທະຫານ ເພື່ອມີຄວາມເຂົ້າໃຈຕື່ມກ່ຽວກັບຂຸນນາງສະໄໝບູຮານ ຮັບໃຊ້ລາຊະວົງຫງວຽນຄືແນວໃດ ແລະ ເຂົາເຈົ້າກໍຈະໄດ້ຮັບຊົມລາຍການສະແດງມວຍພື້ນເມືອງ ຊຶ່ງ ບໍ່ເຄີຍໄດ້ຊົມຈັກເທື່ອ.”
ເມື່ອເວົ້າເຖິງສິ່ງທີ່ແຕກຕ່າງກັນກັບມວຍພື້ນເມືອງ ກີງຫວ້ານອານ. ທ່ານ ກິມໃຫ້ຮູ້ວ່າ
“ ມວຍປະເພດນີ້ແມ່ນອີງຕາມລີລາທ່າທາງຂອງສັດຊະນິດຕ່າງໆ, ຄົນລຸ້ນກ່ອນ ນຳໃຊ້ມວຍປະເພດນີ້ເພື່ອປ້ອງກັນຕົວ ແລະ ຕ້ານສັດຕູຜູ້ຮຸກຮານ. ມວຍຂອງພວກຂ້າພະເຈົ້າແມ່ນແຕກຕ່າງກັບມວຍປະເພດອື່ນໆຫລາຍຢ່າງ. ໂດຍໄດ້ຮັບການສະຫນັບສະຫນູນຈາກແຂກເຂົ້າຊົມ, ສະນັ້ນພວກເຮົາຍິ່ງຮັບໃຊ້ແຂກເຂົ້າຊົມຢ່າງສຸດຈິດສຸດໃຈ. ”
ຮຽນມວຍພື້ນເມືອງເພື່ອເປັນການເຝິກແອບຮ່າງກ່າຍ, ເຝິກໃຫ້ຈິດໃຈກ້າແກ່ນແລະມີຄວາມເຊື່ອໝັ້ນຕົນເອງ ນັ້ນບໍ່ພຽງແຕ່ແມ່ນຄວາມປາດຖະຫນາຂອງ ຫງວຽນຫງອກຕີ ເທົ່ານັ້ນ ຫາກນັກມວຍທຸກຄົນກໍ່ເຊັ່ນດຽວກັນ. ເມື່ອ ມວຍພື້ນເມືອງປະເພດນີ້ ກາຍເປັນລາຍການສະແດງທີ່ດຶງດູດນັກທ່ອງທ່ຽວພາຍໃນ ແລະ ຕ່າງປະເທດ ແລ້ວ, ນັກມວຍແຕ່ລະຄົນກໍຕ້ອງພະຍາຍາມຍິ່ງກວ່ານີ້ອີກ.
“ນີ້ແມ່ນບາດກາ້ວບຸກທະລຸ. ມວຍປະເພດອື່ນບໍ່ສາມາດຈັດຕັ້ງແບບນີ້ໄດ້. ສະເພາະມວຍກີງຫວ້ານອານ ແມ່ນເລີ່ມມີມາແຕ່ສະໄໝລາຊະວົງ ຫງວຽນ ສະນັ້ນ ຈຶ່ງນຳເຂົ້າຮັບໃຊ້ໃນການທ່ອງທ່ຽວຢ່າງງ່າຍດາຍກວ່າ. ມວຍປະເພດນີ້ ມີສິ່ງທີ່ແຕກຕ່າງພິເສດ ແລະ ເປັນເອກະລັກສະເພາະ ບໍ່ຄືກັນກັບມວຍປະເພດອື່ນ.”
ນັກທ່ອງທ່ຽວຫລາຍຄົນມີຄວາມຮູ້ສຶກແປກປະຫລາດເມື່ອໄດ້ຮັບຊົມບັນດາລາຍການສະແດງສິລະປະຕີມວຍພື້ນເມືອງຂອງນາງສາວຫນຸ່ມ. ເຂົາເຈົ້ານຳໃຊ້ອາວຸດຢ່າງຊຳນິຊຳນານ, ສະແດງຢ່າງງາມຕາ ບໍ່ຕ່າງຫຍັງກັບເພດຊາຍ. ຍ້ອນໄດ້ຮັບຊົມລາຍການຕີມວຍພື້ນເມືອງນັ້ນ ນັກທ່ອງທ່ຽວຕ່າງປະເທດຫລາຍຄົນຈຶ່ງມີຄວາມເຂົ້າໃຈກ່ຽວກັບພື້ນຖານສິລະປະຕີມວຍຂອງຫວຽດນາມກວ່າອີກ. ນັກທ່ອງທ່ຽວຕ່າງປະເທດຜູ້ຫນຶ່ງໃຫ້ຮູ້ວ່າ:
“ຍ້ອນພື້ນຖານວັດທະນະທຳທີ່ແຕກຕ່າງກັນ ແລະ ສ້າງຄວາມປະທັບໃຈນັ້ນຂ້າພະເຈົ້າຈຶ່ງມາຢ້ຽມຢາມແຫ່ງນີ້. ກ່ອນທີ່ຈະຊົມການສະແດງສິລະປະຕີມວຍພື້ນເມືອງນີ້ ຂ້າພະເຈົ້າ ຄິດວ່າ ມວຍປະເພດຕ່າງ ລ້ວນແຕ່ມີແຫຼ່ງກຳເນີດຈາກຈີນ ແລະ ຍີປຸ່ນເທົ່ານັ້ນ, ສ່ວນຫວຽດນາມ ບໍ່ແມ່ນແຫຼ່ງກຳເນີດສິລະປະຕີມວຍຄືແນວນີ້.”
ດ້ວຍລາຄາບໍ່ຮອດ 100 USD/ ຄະນະຫນຶ່ງ, 2 USD/ຄົນ ນັກທ່ອງທ່ຽວຈະໄດ້ຮັບຊົມລາຍການສະແດງສິລະປະຕີມວຍພື້ນເມືອງທີ່ແກ່ຍາວແຕ່ 30 - 45 ນາທີ່ ດ້ວຍ ສິບໆລາຍການ. ແລະເມື່ອສະແດງຕີມວຍແຕ່ລະເທື່ອ, ນັກມວຍກໍ່ຕ້ອງຄົ້ນຄິດ, ຊອກຫາ, ເຝິກແອບ ເພື່ອເຮັດໃຫ້ລາຍການສະແດງອຸດົມສົມບູນ ແລະ ດຶງດູດໃຫ້ແກ່ນັກທ່ອງທ່ຽວກວ່າອີກ./.
ລານແອງ