(vovworld)- ໃນໂອກາດທ້າຍປີ, ລາຍການທ່ອງທ່ຽວຢ້ຽມຢາມເຂດໄຕບັກ(ໝາຍເຖິງເຂດຕະເວັນຕົກສຽງເຫນືອ ຫວຽດນາມ) ແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວ. ມາຢ້ຽມຢາມໄຕບັກໃນໂອກາດນີ້ ນັກທ່ອງທ່ຽວສາມາດໄດ້ເຫັນປະຈັກຕາບັນດາສວນດອກໄມ້ນາໆຊະນິດດ້ວຍສີສັນຫລາກຫລາຍທີ່ສວຍງາມ. ໃນລາຍການທ່ອງທ່ຽວພາກນີ້ ພວກເຮົາຂໍແນະນຳບົດຂຽນຂອງນັກຂ່າວລານແອງ ທີ່ພາດຫົວຂໍ້ວ່າ: ລາຍການທ່ອງທ່ຽວເຂດໄຕບັກໃນໂອກາດທ້າຍປີ.
ສວນດອກຜັກກາດຂາວ
ພາບ:internet
|
ໄປຢ້ຽມຢາມເຂດໄຕບັກ ພວມແມ່ນທ່າອ່ຽງຂອງບັນດາເພື່ອນຫນຸ່ມ. ມາແຫ່ງນີ້ ນັກທ່ອງທ່ຽວຈະໄດ້ສູບອາກາດປອດໂປ່ງ, ຊົມທິວທັດທຳມະຊາດສວຍງາມ ແລະ ໃຫຍ່ໂຕມະໂຫຖານ ພ້ອມດ້ວຍສີສັນຫລາກຫລາຍຂອງດອກໄມ້ນາໆຊະນິດ. ນອກນັ້ນ, ບັນດາເສັ້ນທາງທີ່ຄົດລ້ຽວຢູ່ທີ່ນີ້ກໍ່ແມ່ນໜຶ່ງໃນບັນດາສາຍເຫດທີ່ດຶງດູດພວກເພື່ອນຫນຸ່ມມາທ່ອງທ່ຽວພະຈົນໄພ. ສະນັ້ນ, ເພື່ອຕອບສະຫນອງຄວາມຕ້ອງການຂອງນັກທ່ອງທ່ຽວ, ບໍລິສັດດວງດາວໃຫມ່ ໄດ້ຈັດລາຍການທ່ອງທ່ຽວຄົ້ນຫາໄຕບັກໃນວັນອາທິດ. ທ່ານນາງ ໂດ໋ທິເຟືອງຖາວ, ພະນັກງານໂຄສະນາຂອງບໍລິສັດທ່ອງທ່ຽວດວງດາວໃຫມ່ໃຫ້ຮູ້ວ່າ:
“ປະຈຸບັນ ບໍລິສັດພວກຂ້າພະເຈົ້າພວມຍູ້ແຮງລາຍການທ່ອງທ່ຽວຢ້ຽມຢາມ ໄຕບັກ ໃນໂອກາດທ້າຍປີ. ເພາະວ່າ ທິວທັດທຳມະຊາດຢູ່ ໄຕບັກ ໃນຍາມນີ້ສວຍງາມຫລາຍ. ລາຍການທ່ອງທ່ຽວເຖິງ ໄຕບັກ ແມ່ນເລີ່ມອອກເດີນທາງໃນວັນທ້າຍອາທິດ ແລະ ຍາມໃດນັກທ່ອງທ່ຽວກໍສັ່ງຈອງເຂົ້າຮ່ວມເປັນຈຳນວນຫລວງຫລາຍ. ພິເສດໃນໂອກາດບຸນປີໃຫມ່ສາກົນ ແລະ ວັນບຸນຄຼິດສະມາດ ຈຳນວນນັກທ່ອງທ່ຽວນິຍົມລາຍການນີ້ເພີ່ມຂຶ້ນຫລາຍ. ລາຍການທ່ອງທ່ຽວຢ້ຽມຢາມ ໄຕບັກ ໃນເວລາ 5 ວັນ 4 ຄືນ ດ້ວຍຄ່າບໍລິການພຽງ 4.500.000 ດົ່ງ/ຄົນ.”
ສວນຊາຢູ່ ມົກເຈົາ
ພາບ:internet
|
ມົກເຈົາ ແລະ ເຊີນລາ ແມ່ນສອງແຫ່ງທຳອິດໃນການຄົ້ນຫາເຂດໄຕບັກ ຂອງນັກທ່ອງທ່ຽວ. ເດືອນ 12 ເມື່ອຍາມດອກ ”ຕາມຢາກແມກ” ຢູ່ ຮ່າຢາງ ຜ່ານໄປແລ້ວ, ນັກທ່ອງທ່ຽວກໍ່ມັກໄປມົກເຈົາ ເພື່ອຢ້ຽມຊົມສວນດອກໄມ້ທີ່ກ້ວາງໃຫຍ່ຢູ່ແຫ່ງນີ້. ບັນດາສວນດອກຜັກກາດ, ດອກຊາ, ປ່າໝາກຝູງ ແລະ ອື່ນໆທີ່ມີສີຫລາກຫລາຍແມ່ນສະຖານໄດ້ສ້າງຄວາມດຶງດູດໃຫ້ແກ່ນັກທ່ອງທ່ຽວ. ທ່ານນາງໂດ໋ທິເຟືອງຖາວ ໃຫ້ຮູ້ວ່າ:
“ໃນຈຸດເວລານັ້ນ, ນັກທ່ອງທ່ຽວຈະໄດ້ຮັບຊົມຄວາມງາມຂອງດອກຜັກກາດຢູ່ລຽບຕາມສອງຟາກທາງ. ນັ້ນແມ່ນສະຖານທີ່ດຶງດູດນັກທ່ອງທ່ຽວ, ພິເສດແມ່ນໄວຫນຸ່ມ, ພວກເພື່ອນຜູ້ໃດກໍ່ຢາກມີຮູບຖ່າຍທ່ີສວຍງາມພາຍຫລັງສິ້ນສຸດການຄົ້ນຫາໄຕບັກ. ຫລັງຈາກນັ້ນ ນັກທ່ອງທ່ຽວຈະໄດ້ໄປຢ້ຽມຊົມໂນນເຂົາປູກຊາ, ເພື່ອຊອກຮູ້ກ່ຽວກັບຂັ້ນຕອນຂອງການຜະລິດຊາ. ນອກນັ້ນ ແມ່ນໄປຢ້ຽມຢາມບັນດາຟາມລ້ຽງງົວພັນນົມ ກໍຄືຂັ້ນຕອນຜະລິດນ້ຳນົມ.”
ສະຖານທີ່ຢ້ຽມຢາມຕໍ່ໄປຂອງນັກທ່ອງທ່ຽວນັ້ນແມ່ນ ດ້ຽນບຽນ. ມາແຫ່ງນີ້ ນັກທ່ອງທ່ຽວຈະໄດ້ຮັບຟັງ ແລະ ເຫັນປະຈັກຕາຮ່ອງຮອຍປະຫວັດສາດຄື: ໂດນ A1, ຂຸມເດີກາດ, ສຳນັກບັນຊາບັ້ນຮົບດ້ຽນບຽບຝູ, ຂຸມພົນເອກ ຫວໍງວຽນຢາບ. ດ້ຽນບຽນ, ກໍແມ່ນແຫ່ງທີ່ຊ່ວຍໃຫ້ນັກທ່ອງທ່ຽວຄົ້ນຫາກ່ຽວກັບຊີວິດການເປັນຢູ່ຂອງຊາວເຜົ່າຜູ້ໄທ.
ປະຈຸບັນ ບັນດາເພື່ອນຫນຸ່ມເຄີຍເລືອກເຟັ້ນລາຍການທ່ອງທ່ຽວຄົ້ນຫາເສັ້ນທາງຄົດລ້ຽວແລະທຸລະກັນດານ ເຂດໄຕບັກ. ພາຫະນະທີ່ເຂົາເຈົ້າເຄີຍໃຊ້ແມ່ນລົດຈັກ. ຮ່ວາງລີງ, ຊື່ງແມ່ນຜູ້ຫນຶ່ງທີ່ນິຍົມຄົ້ນຫາເຂດໄຕບັກໃຫ້ຮູ້ວ່າ: ສິ່ງທີ່ລີງ ມັກທີ່ສຸດແມ່ນໄປລຽບຕາມກີ່ວ ໂອກີໂຮ່, ກີ່ວເຊື່ອມຕໍ່ແຂວງ ລາຍເຈົາ ແລະ ລ່າວກາຍ.
“ໃນລາຍການທ່ອງທ່ຽວຄັ້ງນີ້ ນ້ອງມັກຂີ່ລົດຈັກລຽບຕາມກີ່ວ ໂອກີໂຮ່ ເພາະວ່າ ກີ່ວນີ້ຍາວ, ທຸລະກັນດານ ແຕ່ກໍສວຍງາມ. ໃນລະດູຫນາວ, ຢູ່ແຫ່ງນີ້ທິວທັດທຳມະຊາດແມ່ນສວຍງາມຫລາຍ, ເມກປົກຄຸມໄປທົ່ວຮ່ອມພູ.”
ສ່ວນ ຢູຍຫວຽດ, ລາຍການທ່ອງທ່ຽວເຖິງໄຕບັກເຄີຍສົມທົບກັບວຽກງານກຸສົນອີກ. ຢູຍຫວຽດ ໃຫ້ຮູ້ວ່າ: ນ້ອງພ້ອມກັບໝູ່ເພື່ອນພວມຈັດຕັ້ງລາຍການທ່ອງທ່ຽວຢ້ຽມຢາມເຂດຊົນເຜົ່າ ຮ່າຍີ່ ແລະ ເຂດຊາຍແດນ ເພື່ອຊອກຮູ້ການດຳລົງຊີວິດຂອງປະຊາຊົນຢູ່ທີ່ນີ້.
ໄປທ່ອງທ່ຽວໄຕບັກ, ນັກທ່ອງທ່ຽວຈະມີໂອກາດໄດ້ຮັບຊົມບັນດາ ນາຂັ້ນໄດຂອງຊາວເຜົ່າມົ້ງ ແລະ ໄປຢ້ຽມຢາມຕະຫລາດຢູ່ເຂດພູສູງໃນບັນຍາກາດທີ່ຟົດຟຶ້ນ.
ເມື່ອໄດ້ໄປຢ້ຽມຢາມໄຕບັກນັກທ່ອງທ່ຽວບໍ່ສາມາດຫລົງລືມທິວທັດທຳມະຊາດທີ່ສວຍງາມ ກໍຄືອາລົມຈິດອັນສະໜິດສະໜົທຂອງຊາວເຜົ່າຢູ່ທີ່ນີ້ໄດ້. ມົກເຈົາ ເຊີນລາ, ເມືອງພັງ ດ້ຽນບຽນ, ບັກຮ່າ ລ່າວກາຍ .... ແມ່ນບັນດາສະຖານທີ່ດູດດື່ມນັກທ່ອງທ່ຽວເປັນຈຳນວນຫຼວງຫຼາຍ, ດ້ວຍສວນດອກໄມ້ສວຍງາມນາໆຊະນິດທີ່ມີສີສັນຫລາກຫລາຍ. ທັດສະນີຍະພາບທີ່ສວຍງາມຂອງ ໄຕບັກ ໃນໂອກາດທ້າຍປີ ພວມລໍຖ້ານັກທ່ອງທ່ຽວມາຢາມ.