(vovworld)- “ເຂົ້າຮ່ວມເຮັດກະສິກຳ ແລະ ການປະມົງໃນມື້ຫນຶ່ງ” ນັ້ນແມ່ນລາຍການທ່ອງທ່ຽວທີ່ເປັນເອກະລັກສະເພາະອັນໄດ້ດຶງດູດນັກທ່ອງທ່ຽວສາກົນເປັນຈຳນວນຫລວງຫລາຍເມື່ອມີໂອກາດມາຢ້ຽມຢາມຄຸ້ມເມືອງເກົ່າ Hoi An ທາງພາກກາງຫວຽດນາມ. ຈຸດພິເສດຂອງລາຍການທ່ອງທ່ຽວ ນັ້ນແມ່ນນັກທ່ອງທ່ຽວໄດ້ເຊີນເຂົ້າຮ່ວມການເຮັດສວນເຮັດນາຢູ່ເຂດບ້ານນາຄືດັ່ງຊາວກະສິກອນຢ່າງແທ້ຈິງ. ຜ່ານນີ້ ກໍເປັນການຊ່ວຍໃຫ້ນັກທ່ອງທ່ຽວມີຄວາມເຂົ້າໃຈກ່ຽວກັບພື້ນຖານອະລິຍະທຳແຫ່ງການປູກເຂົ້ານາທາມຂອງຫວຽດນາມ.
ນັກທ່ອງທ່ຽວຕ່າງປະເທດເຂົ້າຮ່ວມການດຳນາ
ພາບ:internet
|
ໂດຍໄດ້ເປັນປົກກະຕິແລ້ວ, ເວລາປະມານ 9 ໂມງເຊົ້າ ຈະເຫັນຄະນະນັກທ່ອງທ່ຽວມາຈາກຕ່າງປະເທດໄດ້ນຸ່ງສ້ົງເສື້ອ, ຖືກຸບຂອງຊາວກະສິກອນຫວຽດນາມ, ຂີ່ລົດຖີບຢູ່ເສັ້ນທາງໃນບ້ານ ແລະ ຢຸດແວ່ຢູ່ທົ່ງນາແຄມນະຄອນ Hoi An. ບັນດານັກທ່ອງທ່ຽວຕ່າງປະເທດເຫົຼ່ານັ້ນ ພວມເຂົ້າຮ່ວມລາຍການທ່ອງທ່ຽວ “ເຂົ້າຮ່ວມເຮັດກະສິກຳ ແລະ ການປະມົງໃນມື້ຫນຶ່ງ ” ໂດຍບໍລິສັດທ່ອງທ່ຽວສາກົນ Khoa Tran Hoi An Eco Tour ເປີດການບໍລິການ. ພຽງແຕ່ເສຍເງິນປະມານ 20 - 30 USD ເທົ່ານັ້ນ ນັກທ່ອງທ່ຽວຈະມີມື້ຫນຶ່ງກາຍເປັນຊາວກະສິກອນຫວຽດນາມ, ເຂົາເຈົ້າໄດ້ເຂົ້າຮ່ວມຕົກກ້າໄຖນາຢູ່ບັນດາເນື້ອທີ່ປູກເຂົ້າທົ່ງນາທາມຫລືຂີ່ເຮືອໂມ, ຈັບຫາປາຢູ່ແມ່ນ້ຳທີ່ Hoi An. ສະຖານທີ່ທຳອິດຊຶ່ງບັນດານັກທ່ອງທ່ຽວຈະມາເຮັດກະສິກຳນັ້ນແມ່ນຕູບນ້ອຍ ຊຶ່ງແມ່ນບ່ອນກະກຽມອຸປະກອນການຜະລິດກະສິກຳ. ຢູ່ຄຽງຂ້າງນັ້ນ ແມ່ນເນື້ອທີ່ນາມີຂີ້ຕົມຖ້ວມ ແລະ ມີຄວາຍສອງໂຕດຶງຄັນໄຖກຽມພ້ອມຮັບຄຳສັ່ງຂອງຈາກຜູ້ບັນຊາ. ພາຍຫລັງ 15 ນາທີໄດ້ຮັບການແນະນຳຢ່າງລະອຽດຈາກຜູ້ນຳທ່ຽວຊາວທ້ອງຖິ່ນ, ບັນດານັກທ່ອງທ່ຽວເຂົ້າຮ່ວມເຮັດກະສິກຳຈະໄດ້ລົງນາໃນທ່າມກາງສຽງໂຮ່ຮ້ອງຢ່າງຟົດຟື້ນ.
ທຳອິດນັກທ່ອງທ່ຽວໄດ້ຮັບການແນະນຳວິທີໄຖນາ, ຄາດດິນ, ບາງເທື່ອກໍມີຊາວກະສິກອນຈັບຄັນໄຖນາໄປຕາມ ແລະ ຫລັງຈາກນັ້ນ ນັກທ່ອງທ່ຽວຈຶ່ງບັນຊາດ້ວຍຕົນເອງໄດ້. ໃນເບື້ອງຕົ້ນນັກທ່ອງທ່ຽວບໍ່ຮູ້ຈັກວິທີໄຖນາຄືແນວໃດ ພຽງແຕ່ຈັບຫາງຄວາຍຊື່ໆ ແລະ ປະປ່ອຍໃຫ້ຄວາຍດຶງໄປ ແຕ່ຫລັງຈາກນັ້ນ ເຂົາເຈົ້າກໍຄ່ອຍໆໄຖນາເປັນ ເຖິງວ່າເວລານັ້ນທັງຮ່າງຄີງກໍຖືກຂີ້ຕົມໝົດ ແຕ່ນັກທ່ອງທ່ຽວທຸກຄົນຕ່າງ ກໍມີຄວາມມ່ວນຊື່ນຫລາຍ. ເອື້ອຍ Sue Archibald ນັກທ່ອງທ່ຽວມາຈາກ ການາດາ ເວົ້າວ່າ:
“ພວກຂ້າພະເຈົ້າເຂົ້າຮ່ວມລາຍການທ່ອງທ່ຽວນີ້ ດ້ວຍຈຸດປະສົງຢາກຊອກຮູ້ຊີວິດການເປັນຢູ່ຂອງຊາວກະສິກອນຫວຽດນາມຢ່າງແທ້ຈິງ, ແທນທີ່ໄປທ່ອງທ່ຽວ ແລະ ພັກຜ່ອນຢູ່ບັນດາເຂດພັກຜ່ອນບຳລຸງສຸຂະພາບຢູ່ຫາດຊາຍທະເລ. ທຸກສິ່ງທຸກຢ່າງທີ່ຂ້າພະເຈົ້າເຫັນປະຈັກຕາຢູ່ທີ່ນີ້ ແມ່ນບັນດາທົ່ງນາ, ຕົ້ນໄມ້ໃບຫຍ້າ ແລະ ໂຕຄວາຍ, ວິທີການຜະລິດເຂົ້າ. ອາດຈະເວົ້າໄດ້ວ່າ ນີ້ແມ່ນບັນດາປະສົບການທີ່ສ້າງຄວາມປະທັບໃຈທີ່ສຸດ ແລະ ມັນແຕກຕ່າງກັບສິ່ງທີ່ຂ້າພະເຈົ້າຮູ້ຈັກຢູ່ ການາດາ.”
ຍ້ອນບໍ່ເຄີຍລົງນາຈັກເທື່ອ, ສະນັ້ນ ນັກທ່ອງທ່ຽວເມື່ອເຂົ້າຮ່ວມການໄຖນາກໍຮູ້ສຶກອິດເມື່ອຍໄວ ແລະ ຖືກແນະນຳຜັກພ່ອນເພື່ອແທນໃຫ້ຜູ້ອື່ນລົງນາ. ເຖິງວ່າຖືກອິດເມື່ອຍຫລາຍກໍຕາມ ແຕ່ຫລາຍຄົນຍັງໂຮ່ຮ້ອງຢ່າງມ່ວນຊື່ນ. ເອື້ອຍ Naz Husain ນັກທ່ອງທ່ຽວຜູ້ຫນຶ່ງເປີດເຜີຍວ່າ:
“ຂ້າພະເຈົ້າມີຊື່ວ່າ NAZ ມາຈາການາດາເຊັ່ນດຽວກັນ, ຂ້າພະເຈົ້າໄດ້ເຂົ້າຮ່ວມລາຍການທ່ອງທ່ຽວນີ້ ແລະ ເຫັນວ່າ ນີ້ແມ່ນສິ່ງປະທັບໃຈທີ່ສຸດທີ່ຂ້າພະເຈົ້າໄດ້ເຮັດ. ເບື້ອງຕົ້ນ, ຂ້າພະເຈົ້າກໍມີຄວາມຄິດງໍ້ ແຕ່ຄວາມຈິງແມ່ນກົງກັນຂ້າມ, ຂ້າພະເຈົ້າເຫັນວ່າທຸກສິ່ງທຸກຢ່າງແມ່ນໃຫມ່ອ່ຽມ, ຊ້ຳບໍ່ໜຳ ຂ້າພະເຈົ້າໄດ້ຂ່ີຄວາຍ, ຈັບຫາງຂອງມັນ ຫລືໄດ້ອາບຂີ້ຕົມ ຂ້າພະເຈົ້າຮູ້ສຶກປະທັບໃຈທີ່ສຸດ. ຖ້າມີໂອກາດມາຢ້ຽມຢາມຫວຽດນາມໃນຄັ້ງຫນ້າ ຂ້າພະເຈົ້າກໍຈະເລືອກເຟັ້ນເອົາລາຍການທ່ອງທ່ຽວນີ້.”
ອ້າຍ Nhien ຊາວກະສິກອນຜູ້ຫນຶ່ງຢູ່ Hoi An ມີຄວາຍຮັບໃຊ້ລາຍການທ່ອງທ່ຽວ ລາວມີຫລາຍເລື່ອງມ່ວນໆເພື່ອເລົ່າໃຫ້ນັກທ່ອງທ່ຽວຟັງ. ຍົກຕົວຢ່າງຄື: ເລື່ອງສັ່ງໃຫ້ຄວາຍຢຸດ, ຊາວກະສິກອນ ຢູ່ Hoi An ເຄີຍຮ້ອງວ່າ: ເຢີ່, ເຢິ່, ແຕ່ມີນັກທ່ອງທ່ຽວຕ່າງປະເທດຜູ້ຫນຶ່ງພັດຈັບຫາງ ແລະ ດຶງແຮງ ພ້ອມທັງຮ້ອງຄຳວ່າ Stop, Stop ແຕ່ຄວາຍຍັງຄົງດຶງຄາດແລ່ນໄປ, ເຮັດໃຫ້ພວກນັກທ່ອງທ່ຽວພວມຢືນຊົມເບິ່ງຜູ້ໃດກໍ ໂຮ່ຮ້ອງຢ່າງມ່ວນຊື່ນ. ບໍ່ພຽງແຕ່ໄດ້ຮັບການແນະນຳວິທີການໄຖນາເທົ່ານັ້ນ ເຂົາເຈົ້າຍັງໄດ້ແນະນຳວິທີຕ່ຳເຂົ້າ, ເປົາໄຟຫຸ້ງເຂົ້າ, ໄດ້ຮັບປະທານບັນດາເຍື່ອງອາຫານປຸງແຕ່ງຈາກກຸ້ງ, ປາ ໂດຍແມ່ນເຂົາເຈົ້າຫາໄດ້ຢູ່ແມ່ນ້ຳ ແລະ ໄດ້ຮັບປະທານບັນດາເຍື່ອງອາຫານພິເສດຢູ່ເຂດບ້ານນາຫວຽດນາມ.
ນັກທ່ອງທ່ຽວຜູ້ຫນຶ່ງບໍ່ຮູ້ວິທີໄຖນາພັດຈັບຫາງຄວາຍ
ພາບ:internet
|
ເຖິງວ່າ ຂອບຂະຫນາດການທ່ອງທ່ຽວແມ່ນນ້ອຍ ແລະ ຫາກໍ່ໄດ້ຮັບການຈັດຕັ້ງໃນໄລຍະພຽງ 5 ປີ ເທົ່ານັ້ນ ແຕ່ລາຍການທ່ອງທ່ຽວເຮັດກະສິກຳນັບມື້ນັບດຶງດູດນັກທ່ອງທ່ຽວມາຈາກທຸກປະເທດ ເມື່ອມີໂອກາດມາຢ້ຽມຢາມ Hoi An . ອ້າຍ Tran Van Khoa ຜູ້ອຳນວຍການບໍລິສັດທ່ອງທ່ຽວສາກົນ Khoa Tran Hoi An Eco Tour ໃຫ້ຮູ້ວ່າ:
“ຂ້າພະເຈົ້າສ້າງລາຍການທ່ອງທ່ຽວນີ້ເລີ່ມມາຈາກຄວາມຕ້ອງການຕົວຈິງຂອງ Hoi An, ນັ້ນແມ່ນສ້າງນະຄອນທ່ອງທ່ຽວວັດທະນະທຳ. ຈາກນັ້ນ ຂ້າພະເຈົ້າຄິດວ່າ ຕ້ອງສ້າງບໍລິການທ່ອງທ່ຽວໃຫມ່, ນັ້ນແມ່ນບັນດາລາຍການທ່ອງທ່ຽວປູກເຂົ້ານາທາມ, ແນະນຳບ້ານນາຊີວະພາບທີ່ເຂັ້ມຂົ້ນໄປດ້ວຍສີສັນວັດທະນະທຳຂອງຫວຽດນາມ ໃຫ້ເພື່ອນມິດສາກົນຮັບຊາບ. ລາຍການທ່ອງທ່ຽວຊີວະພາບນີ້ແມ່ນອີງໃສ່ວຽກງານເຮັດສວນເຮັດນາໃນແຕ່ລະມື້ຂອງຊາວກະສິກອນຄື: ຕົກກ້າ, ດຳນາ, ປູກຜັກ... ນັ້ນແມ່ນວຽກງານທຳມະດາຂອງຊາວກະສິກອນຫວຽດນາມ ແຕ່ສຳລັບບັນດານັກທ່ອງທ່ຽວມາຈາກຝ່າຍຕາເວັນຕົກ ແມ່ນສິ່ງທີ່ໃຫມ່ອ່ຽມບໍ່ທັນເຫັນຈັກເທື່ອ.”
ເພາະສະນັ້ນ ພາຍຫລັງເຂົ້າຮ່ວມລາຍການທ່ອງທ່ຽວເຮັດກະສິກຳ, ມີນັກທ່ອງທ່ຽວຫລາຍຄົນຮູ້ສຶກຈັບອົກຈັບໃຈກ່ຽວກັບພື້ນຖານອະລິຍະທຳປູກເຂົ້ານາທາມຂອງຫວຽດນາມ. ເອື້ອຍ Barbara Mahony ນັກທ່ອງທ່ຽວຜູ້ຫນຶ່ງໄດ້ເວົ້າວ່າ: ມື້ນີ້ມ່ວນຫລາຍ, ພວກເພື່ອນແມ່ນຜູ້ສະຫນິດສະຫນົມທີ່ສຸດ. ພາຍຫລັງໄດ້ເຂົ້າຮ່ວມບັນດາວຽກງານອັນຫຍຸ້ງຍາກຂອງຊາວກະສິກອນຫວຽດນາມ, ຂ້າພະເຈົ້າມີຄວາມປະທັບໃຈຫລາຍ ພິເສດແມ່ນລາຍການທ່ອງທ່ຽວແບບນີ້. ເມື່ອທົ່ງນາສຸກ ພວກຂ້າພະເຈົ້າຈະກັບຄືນເພື່ອເກັບກ່ຽວ. ຂອບໃຈພວກເພື່ອນ.
ໂຕຕວັນ