(vovworld) - ໃນຊຸມປີມໍ່ໆມານີ້ ບັນດາລາຍການທ່ອງທ່ຽວວົງຄະນາຍາດຢູ່ ກາດບ່າ ເມືອງກາດຫາຍ ນະຄອນ ຫາຍຟ່ອງ ນັບມື້ນັບດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເປັນຈຳນວນຫລວງຫລາຍ. ມາທ່ອງທ່ຽວຢູ່ແຫ່ງນີ້, ນັກທ່ອງທ່ຽວສາມາດເຂົ້າຮ່ວມການປູກປ່າ, ເກັບໝາກໄມ້. ນອນນັ້ນ, ນັກທ່ອງທ່ຽວຍັງໄດ້ໄປຄົ້ນຫາໝູ່ບ້ານ, ເຫັນປະຈັກຕາຊີວິດການເປັນຢູ່ຂອງປະຊາຊົນຢູ່ໝູ່ເກາະຫລືຢ້ຽມຊົມທິວທິວທັດທຳມະຊາດທີ່ສວຍງາມໃນປ່າສະຫງວນແຫ່ງຊາດ ກາດບ່າ.
ຫາດຊາຍທະເລ ຢູ່ ກາດບ່າ
ພາບ: internet
|
ລະບົບຄົມມະນາຄົມຮັບໃຊ້ການທ່ອງທ່ຽວແມ່ນພັດທະນາດີພໍສົມຄວນ, ປະຈຸບັນ ນັກທ່ອງທ່ຽວໄປຢ້ຽມຢາມ ເກາະ ກາດບ່າ ແມ່ນສະດວກຫລາຍ ດ້ວຍຍານພາຫະນະໄປມາຫລາຍປະເພດ ແຕ່ກຳປັ່ນແມ່ນພາຫະນະເຄີຍໄດ້ນຳໃຊ້ຫລາຍສຸດ. ຈາກນະຄອນ ຫາຍຟ່ອງ, ນັກທ່ອງທ່ຽວຂີ່ເຮືອດ່ວນປະມານ 1 ຊົ່ວໂມງຈະໄປຮອດເກາະງອກ - ກາດບ່າ. ທ່າແຮງຂອງການທ່ອງທ່ຽວກາດບ່າ ແມ່ນບັນດາເກາະນ້ອຍດ້ວຍຫາດຊາຍຂາວສະອາດ ແລະ ຍາວຢຽດ ສະນັ້ນການທ່ອງທ່ຽວທະເລຍັງຄົງແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວ. ປະຈຸບັນ ນັກທ່ອງທ່ຽວມາຢ້ຽມຢາມກາດບ່າ ຍັງໄດ້ຄົ້ນຫາທິວທັດທຳມະຊາດ, ໄດ້ສູບອາກາດປອດໂປ່ງ ກໍຄືຊອກຮູ້ຊີວິດການເປັນຢູ່ຂອງປະຊາຊົນຢູ່ບັນດາຕາແສງໃນເຂດໝູ່ເກາະແຫ່ງນີ້ ຄື: ຫວຽດຫາຍ, ຊວນດາມ, ຮຽນຫ່າວ, ຢາລ້ວນ.. ທ່ານ ບູ່ຍຈຸງເຫງ໋ຍ, ປະທານຄະນະກຳມະການປະຊາຊົນເມືອງ ເກາະ ກາດຫາຍ ໃຫ້ຮູ້ວ່າ: ເພື່ອຕອບສະຫນອງຄວາມຕ້ອງການຂອງນັກທ່ອງທ່ຽວ, ບັນດານັກລົງທຶນ ແລະ ປະຊາຊົນເມືອງເກາະ ກາດບ່າເອງ ໄດ້ຮ່ວມແຮງຮ່ວມໃຈເຮັດບໍລິການທ່ອງທ່ຽວ.
“ຮູບແບບພັດທະນາວົງຄະນາຍາດກໍໄດ້ຮັບການພັດທະນາໃນຊຸມປີມໍ່ໆມານີ້ ແລະ ບັນລຸປະສິດທິຜົນດິພໍສົມຄວນ. ຢູ່ສະຫະພັນເຄື່ອນໄຫວທ່ອງທ່ຽວແບບວົງຄະນາຍາດ ພຽງຕອບສະຫນອງການທ່ອງທ່ຽວພະຈົນໄພ, ປີນພູ, ຢ້ຽມຊົມຫ້ວຍໂກຍ ແລະ ຊົມໃຊ້ບໍລິການທ່ອງທ່ຽວຕ່າງໆຢູ່ແຫ່ງນີ້. ໃນອະນາຄົດ ສະຖານທີ່ທ່ອງທ່ຽວ ຫ້ວຍໂກຍ, ຊວນດາມ ແມ່ນເຂດໃຈກາງພັດທະນາການທ່ອງທ່ຽວຊີວະພາບ.”
ໂດຍມີພູມສັນຖານພິເສດສະເພາະ ດ້ວຍໂນນພູສະຫຼັບກັບບັນດາເຂດຊຸມຊົນ ນັ້ນ ແມ່ນເງ່ືອນໄຂສະດວກເພື່ອໃຫ້ປະຊາຊົນບັນດາຕາແສງຢູ່ເມືອງກາດບ່າຄື ເຈີນເຈົາ, ຢາລ້ວນ, ຊວນດາມ ຜັນຂະຫຍາຍຮູບແບບທ່ອງທ່ຽວວົງຄະນາຍາດ, ທ່ອງທ່ຽວຊີວະພາບ. ກາດບ່າ ບໍ່ພຽງແຕ່ແມ່ນສະຖານທີ່ທ່ອງທ່ຽວທີ່ດູດດື່ມ ດ້ວຍການທ່ອງທ່ຽວທະເລເທົ່ານັ້ນ, ຫາກການທ່ອງທ່ຽວເຂົ້າປ່າ, ຂຶ້ນພູ ຢູ່ຫ້ວຍໂກຍ ກໍແມ່ນບໍລິການທ່ອງທ່ຽວໃຫມ່ທີ່ດຶງດູດນັກທ່ອງທ່ຽວເປັນຈຳນວນຫລວງຫລາຍອີກດ້ວຍ. ເມື່ອເວົ້າເຖິງບັນດາບໍລິການຢູ່ຫ້ວຍໂກຍ, ທ່ານ ຟ້າມແມ້ງຫາຍ ຢູ່ ຕາແສງ ຊວນດາມ ໃຫ້ຮູ້ວ່າ: ຢູ່ ຫ້ວຍໂກຍ ມີເຂດ resort ແຫ່ງຫນຶ່ງດ້ວຍເນື້ອທີ່ກວ່າ 7 ເຮັກຕາ, ມີເຮືອນຮ້ານກວ່າ 10 ຫລັງໄດ້ຮັບການກໍ່ສ້າງຕາມແບບເຮືອນບູຮານຂອງຫວຽດນາມ.
“ນີ້ແມ່ນຜະລິດຕະພັນການທ່ອງທ່ຽວທຳອິດຂອງຕາແສງ ຊວນດາມ ທີ່ຂຶ້ນກັບເຂດທ່ອງທ່ຽວຂອງໝູ່ເກາະກາດບ່າ. ສະນັ້ນ ບັນດາບໍລິການດັ່ງກ່າວໄດ້ນຳມາຊຶ່ງປະສິດທິຜົນດີພໍສົມຄວນ. ເຖິງວ່າປະຊາຊົນຢູ່ທີ່ນີ້ບໍ່ເຄີຍເຮັດບໍລິການທ່ອງທ່ຽວກໍ່ຕາມ ແຕ່ຜ່ານຮູບແບບນີ້ທຸກຄົນກໍມີຄວາມຮັບຮູ້ບັນດາຜະລິດຕະພັນການທ່ອງ ທ່ຽວ ແລະ ໄດ້ນຳມາຊື່ງປະສິດທິຜົນທາງດ້ານເສດຖະກິດສູງ. ຄວາມຈິງແລ້ວ, ເຂດທ່ອງທ່ຽວນີ້ນຳເຂົ້າເຄື່ອນໄຫວໄດ້ແກ້ໄຂວຽກເຮັດງານທຳໃຫ້ແກ່ພໍ່ແມ່ປະຊາຊົນທ້ອງຖິ່ນເປັນຈຳນວນຫລາຍ.”
ເຂດພັກຜ່ອນບຳລຸງສຸຂະພາບຢູ່ ກາດບ່າ
ພາບ: innernet |
ຢາກເຮັດໃຫ້ນັກທ່ອງທ່ຽວມີຄວາມຮູ້ສຶກກ່ຽວກັບຄວາມຈິງຢູ່ທີ່ນີ້, ສະນັ້ນ ເມື່ອກໍ່ສ້າງເຂດພັກຜ່ອນບຳລຸງສຸຂະພາບຫ້ວຍໂກຍ, ນັກລົງທຶນເກືອບຄືວ່າຮັກສາລະບົບຊີວະພາບທັງໝົດໄດ້ ນອກນັ້ນ ກໍປູກຫຍ້າ, ເຮັດສວນດອກໄມ້, ຕົ້ນໄມ້ປະດັບເອ້ໃນບໍລິເວນເຮືອນພື້ນສູງອີກ. ທ່ານ ຫງວຽນແມ້ນຮືງ, ເຈົ້າຂອງການລົງທຶນເຂດທ່ອງທ່ຽວຫ້ວຍໂກຍໃຫ້ຮູ້ວ່າ: ພວກຂ້າພະເຈົ້າຢາກກໍ່ສ້າງທິວທັດທຳມະຊາດຢູ່ທີ່ນີ້ໃຫ້ສວຍງາມເພື່ອດຶງດູດນັກທ່ອງທ່ຽວມາຢ້ຽມຢາມແຫ່ງນີ້.
“ປະຈຸບັນ, ບັນດາເຂດທ່ອງທ່ຽວຢູ່ ກາດບ່າ ເຄີຍສຸມໃສ່ຂຸດຄົ້ນທ່າແຮງຂອງທະເລ, ສ່ວນພວກຂ້າພະເຈົ້າແມ່ນບັນດາຫົວຫນ່ວຍຂຸດຄົ້ນທ່າແຮງຂອງປ່າ, ເຂດຊີວະພາບ ແລະ ທ່ອງທ່ຽວວົງຄະນາຍາດ. ຈາກນັ້ນ ພວກຂ້າພະເຈົ້າຂຸດຄົ້ນບັນດາຜະລິດຕະພັນຕິດພັນກັບທຳມະຊາດ ແລະ ສິ່ງແວດລ້ອມ, ນອກນັ້ນ ຖືມາດຕະຖານອະນຸລັກຮັກສາເພື່ອພັດທະນາ.”
ບັນດາບໍລິການທ່ອງທ່ຽວຄື: ຖີບລົດຖີບຂຶ້ນພູ, ເຂົ້າຮ່ວມການປູກປ່າ, ເກັບໝາກໄມ້ພ້ອມກັບຊາວກະສິກອນໄດ້ດຶງດູດນັກທ່ອງທ່ຽວເປັນຈຳນວນຫລວງຫລາຍ. ທ່ານນາງ Benedicte ນັກທ່ອງທ່ຽວມາຈາກ ຝລັ່ງ ໃຫ້ຮູ້ວ່າ:
“ຂ້າພະເຈົ້າແມ່ນເຊື້ອຊາດ ຫວຽດນາມ ແຕ່ໄດ້ກຳເນີດ ແລະ ເຕີບໃຫຍ່ຢູ່ຕ່າງປະເທດ, ພາສາ ຫວຽດນາມ ເວົ້າບໍ່ເປັນ. ສະນັ້ນເມື່ອກັບຄືນເມືອ ຫວຽດນາມຄັ້ງນີ້ ຂ້າພະເຈົ້າໄດ້ເລືອກເຟັ້ນເຂດທ່ອງທ່ຽວນີ້ ແລະ ເຫັນວ່າທິວທັດທະມະຊາດຢູ່ທີ່ນີ້ສວຍງາມແທ້ຈິງ. ບັນດາການເຄື່ອນໄຫວຄືແນວນີ້ແມ່ນມີຄວາມໝາຍສຳລັບຂ້າພະເຈົ້າ ເພາະວ່າ ມື້ນີ້ຂ້າພະເຈົ້າໄດ້ເຮັດວຽກງານຂອງຊາວກະສິກອນຜູ້ຫນຶ່ງ, ແລະຮູ້ສຶກວ່າວຽກງານນີ້ມີປະໂຫຍດເພື່ອຮັກສາສິ່ງແວດລ້ອມຢູ່ທີ່ນີ້. ”
ຮອດຕອນແລງ, ບັນດາການເຄື່ອນໄຫວຊຶ່ງນັກທ່ອງທ່ຽວນິຍົມແມ່ນຖີບລົດຖີບຢູ່ລຽບຕາມເສັ້ນທາງແຄມຫ້ວຍໂກຍໃຕ້ໂນນພູ. ບໍ່ມີສຽງລົດຈັກ, ລົດໂອໂຕ, ມີພຽງແຕ່ສຽງນົກຮອ້ງທີ່ເປັນໜ້າອອນຊອນ, ຢູ່ສອງຟາກທາງມີທິວທັດທຳມະຊາດສວຍງາມດັ່ງໃນຝັນ. ນອກນັ້ນ ນັກທ່ອງທ່ຽວສາມາດໄປຄົ້ນຫາບັນດາສະຖານທີ່ທ່ອງທ່ຽວແຫ່ງອື່ນຂອງປ່າສະຫງວນແຫ່ງຊາດ ຫລືເຂົ້າຢ້ຽມຊົມສວນສາທາລະນະ ກໍຄືເຂົ້າເຮືອນປະຊາຊົນແຫ່ງໃດຫນຶ່ງເພື່ອຊອກຮູ້ຊີວິດກາເປັນຢູ່ຂອງເຂົາເຈົ້າ. ບັນດາລາຍການທ່ອງທ່ຽວ ວົງຄະນາຍາດຢູ່ບ້ານນາ ໃນເກາະກາດບ່າ ທີ່ໃຫມ່ອ່ຽມ ໃນເບື້ອງຕົ້ນໄດ້ດຶງດູດນັກທ່ອງທ່ຽວເປັນຈຳນວນຫລວງຫລາຍ ດ້ວຍທິວທັດທຳມະຊາດແບບດັ້ງເດີ່ມ ກໍຄືຄວາມຮັກແພງແຂກຄົນຂອງປະຊາຊົນຢູ່ທີ່ນີ້./.