(vovworld)- ໃນຊຸມປີມໍ່ໆມານີ້, ລາຍການໄປທ່ອງທ່ຽວສົມທົບກັບການກຸສົນໄດ້ເປີດທິດເດີນໃຫມ່ໃຫ້ແກ່ການພັດທະນາຂອງຂະແຫນງ “ອຸດສາຫະກຳປອດຄວັນ”. ບໍ່ພຽງແຕ່ຜ່ານໄລຍະທາງທີ່ຍາວໄກເພື່ອປ່ຽນບັນຍາກາດເທົ່ານັ້ນ ຫາກພາຍຫລັງແຕ່ລະລາຍການທ່ອງທ່ຽວ ນັກທ່ອງທ່ຽວຍັງເຫັນໄດ້ຄວາມໝາຍ ແລະ ຈຸດປະສົງຢ່າງແທ້ຈິງຂອງຊີວິດອີກດ້ວຍ. ຕ່າງກັບບັນດາລາຍການທ່ອງທ່ຽວທຳມະດາ, ລາຍການທ່ອງທ່ຽວສົມທົບກັບການກຸສົນແມ່ນຂົວເຊ່ືອມຕໍ່ລະຫວ່າງຜູ້ ຄົນຢູ່ທຸກແຖບຖິ່ນໃນປະເທດຫຍັບມໍ່ເຂົ້າໃກ້ກັນກວ່າ.
ນັກທ່ອງທ່ຽວມອບຂອງຂວັນໃຫ້ແກ່ເດັກນ້ອຍຢູ່ເຂດພູດອຍ
ພາບ: internet |
ນັບມື້ນັບມີບໍລິສັດທ່ອງທ່ຽວຫລາຍແຫ່ງຄື: Lua Viet, Saigontourist, Vietravel, Ha noi, Redtours…. ສ້າງບັນດາລາຍການທ່ອງທ່ຽວສົມທົບກັບການກຸສົນ ດ້ວຍຫລາຍຮູບການອຸດົມສົມບູນ. ນັບແຕ່ການລະຫລິ້ນກັບເດັກນ້ອຍຢູ່ເຂດຊົນນະບົດ, ເຂດພູດອຍ, ມອບປື້ມ, ໂສ້ງເສື້ອ, ກໍ່ສ້າງຫໍສະມຸດ, ໂຮງຮຽນຕະຫລອດຮອດການບຳລຸງຄວາມຊຳນານໃນການດຳລົງຊີວິດໃຫ້ແກ່ປະຊາຊົນຢູ່ເຂດບ້ານນາ. ອ້າຍ ເລດຶກຮົ່ງ, ຜູ້ອຳນວຍການບໍລິສັດທ່ອງທ່ຽວ ເອີນເຕື້ອງ ໃຫ້ຮູ້ວ່າ: ລາຍການທ່ອງທ່ຽວສົມທົບກັບການກຸສົມແມ່ນຫນຶ່ງໃນບັນດາລາຍການທ່ອງທ່ຽວໃຫມ່ຂອງບໍລິສັດ. ປີ 2012 ບໍລິສັດທ່ອງທ່ຽວ ເອີນເຕື້ອງ ສົມທົບກັບບັນດານັກທ່ອງທ່ຽວທີ່ມາຈາກຂະແຫນງການສຶກສາຈັດຕັ້ງລາຍການທ່ອງທ່ຽວສົມທົບກັບການກຸສົນທີ່ມີຄວາມໝາຍຢູ່ບັນດາແຂວງພູດອຍໄດ້ຫຼາຍລາຍການ.
“ບໍລິສັດພວກຂ້າພະເຈົ້າພວມຜັນຂະຫຍາຍລາຍການທ່ອງທ່ຽວໃຫມ່ ນັ້ນແມ່ນສົມທົບກັບຂະແໜງສຶກສາເຮັດການກຸສົນໃຫ້ແກ່ເດັກນ້ອຍທຸກຍາກຢູ່ເຂດພູດອຍ ແລະ ພວມປະຕິບັດລາຍການທ່ອງທ່ຽວນີ້ຢູ່ເຂດຕາເວັນອອກສ່ຽງເໜືອ ແລະ ຕາເວັນຕົກສ່ຽງເໜືອ, ຜ່ານນັ້ນນັກທ່ອງທ່ຽວທັງໄດ້ຢ້ຽມຢາມ ທັງໄດ້ຄົ້ນຫາສີສັນວັດທະນະທຳຂອງຊາວເຜົ່າມົ້ງ, ໄຕ່, ຜູ້ໄທ, ຢາວ, ຢູ່ແຂວງ ບັກກ້ານ, ຮ່າຢາງ... ນັ້ນແມ່ນບັນດາລາຍການທ່ອງທ່ຽວທີ່ພວກຂ້າພະເຈົ້າພວມຜັນຂະຫຍາຍ.”
ຈາກຄວາມມຸ່ງຫວັງຢາກມີຫລາຍຄົນຮ່ວມແຮງຮ່ວມໃຈຊ່ວຍເຫລືອຜູ້ທຸກຍາກ, ດັ່ງນັ້ນ ບັນດາລາຍການທ່ອງທ່ຽວສົມທົບກັບການກຸສົນຂອງບໍລິສັດທ່ອງທ່ຽວເອີນເຕື້ອງ ລ້ວນແຕ່ບໍ່ສ້າງກຳໄລ. ເພາະສະນັ້ນ, ນັກທ່ອງທ່ຽວເຂົ້າຮ່ວມລາຍການທ່ອງທ່ຽວນີ້ບໍ່ຕ້ອງຈ່າຍເງິນຫຼາຍເມື່ອທຽບໃສ່ລາຍການທ່ອງທ່ຽວທຳມະດາ. ເຖິງຢ່າງໃດກໍຕາມ, ບັນດາຜູ້ເຂົ້າຮ່ວມລາຍການທ່ອງທ່ຽວສົມທົບກັບການກຸສົນ ນອກຈາກໄດ້ໄປມອບຂອງຂວັນ, ຢື້ຢາມຖາມຂ່າວປະຊາຊົນບັນດາເຜົ່າຢູ່ເຂດພູດອຍທີ່ປະສົບກັບຄວາມຫຍຸ້ງຍາກແລ້ວ ເຂົາເຈົ້າຍັງຄົງໄດ້ພັກຜ່ອນຢ່ອນອາລົມ ແລະ ຢ້ຽມຊົມທິວທັດທຳມະຊາດທີ່ສວຍງາມຢູ່ເຂດພູດອຍອີກດ້ວຍ. ອ້າຍຮ່ົງໃຫ້ຮູ້ວ່າ:
“ສຳລັບລາຍການທ່ອງທ່ຽວຄືແນວນີ້ ທາງບໍລິສັດບໍ່ຄິດໄລ່ເຖິງເລື່ອງສ້າງກຳໄລ. ກຳໄລທີ່ຫາໄດ້ແມ່ນເພື່ອຫນູນຊ່ວຍຄ່າລົດ, ຄ່າຂົນສົ່ງນັກທ່ອງທ່ຽວເຮັດວຽກງານກຸສົນ. ຈຸດປະສົງຂອງລາຍການແມ່ນເພື່ອເຮັດໃຫ້ນັກທ່ອງທ່ຽວເຂົ້າໃຈໄດ້ສີສັນວັດທະນະທຳຂອງບັນດາເຜົ່າຢູ່ເຂດພູດອຍ. ທີສອງແມ່ນເຮັດວຽກງານການກຸສົນ.”
ການທ່ອງທ່ຽວສົມທົບກັບວຽກງານກຸສົນແມ່ນທ່າອ່ຽງຂອງນັກທ່ອງທ່ຽວ
ພາບ:baocongthuong.vn
|
ເມື່ອສ້າງລາຍການທ່ອງທ່ຽວສົມທົບກັບການກຸສົນ, ບັນດາບໍລິສັດທ່ອງທ່ຽວລ້ວນແຕ່ປາດຖະຫນາຢາກເປັນຂົວເຊື່ອມຕໍ່ເພື່ອສົ່ງນັກທ່ອງທ່ຽວຜູ້ໃຈບຸນໃຈກຸສົນໄປຍັງເຂດຫ່າງໄກສອກຫລີກ ແນໃສ່ສ້າງຄວາມເບິກບານມ່ວນຊື່ນໃຫ້ແກ່ປະຊາຊົນຜູ້ທຸກຍາກ. ດ້ານອື່ນ, ເຂົາເຈົ້າກໍມີຄວາມເຊື່ອໝັ້ນວ່າ ບັນດາລາຍການທ່ອງທ່ຽວຄືແນວນີ້ຈະສ້າງຄວາມປະທັບໃຈທີ່ດີໃນປະຊາຄົມ. ອ້າຍ ຟ້າມຕຽນຢູ໋ງ ຜູ້ອຳນວຍການບໍລິສັດ Golden Tour ໃຫ້ຮູ້ວ່າ:
“ຜ່ານບັນດາລາຍການທ່ອງທ່ຽວ ພວກຂ້າພະເຈົ້າຢາກຮຽກຮ້ອງນັກທ່ອງທ່ຽວ ກໍ່ຄືໝູ່ເພື່ອນຂອງເຂົາເຈົ້າປະກອບສ່ວນເຂົ້າໃນລາຍການ ດ້ວຍການມອບປື້ມ, ອຸປະກອນຮັບໃຊ້ການຮຽນ, ມອບໂສ້ງເສື້ອໃຫ້ແກ່ນັກຮຽນທີ່ທຸກຍາກເຂດຕາເວັນອອກສ່ຽງເໜືອ ແລະ ຕາເວັນຕົກສ່ຽງເໜືອ.”
ປະຈຸບັນ, ບັນດາ ລາຍການທ່ອງທ່ຽວສົມທົບກັບການກຸສົນໄດ້ດຶງດູດນັກທ່ອງທ່ຽວເປັນຈຳນວນຫລວງຫລາຍ ຍ້ອນລັກສະນະວັດທະນະທຳມະນຸດ. ເມື່ອເຂົ້າຮ່ວມລາຍການ, ນັກທ່ອງທ່ຽວ ກໍ່ນຳເອົາໂສ້ງເສື້ອ, ປື້ມ…ໄປນຳ ເພື່ອມອບໃຫ້ພວກນ້ອງນ້ອຍ ຫລື ຄອບຄົວທຸກຍາກ. ນອກຈາກເວລາເຮັດວຽກງານກຸສົນແລ້ວ, ນັກທ່ອງທ່ຽວຍັງມີໂອກາດໄດ້ເພື່ອຜັກພ່ອນຢ່ອນອາລົມ ແລະ ທ່ຽວຊົມທິວທັດທຳມະຊາດທີ່ສວຍງາມອີກດ້ວຍ. ເອື້ອຍ ແທນເຮືອງ ຜູ້ທີ່ຫາກໍໄປທ່ອງທ່ຽວ ຮ່າຢາງ ແບ່ງປັນວ່າ:
“ເປັນຄັ້ງທຳອິດທີ່ໄດ້ໄປຢ້ຽມຢາມ ຮ່າຢາງ, ຂ້າພະເຈົ້າເຫັນວ່າ ທິວທັດທຳມະຊາດຢູ່ທີ່ນີ້ສວຍງາມຫລາຍ. ເມື່ອເຂົ້າບ້ານຂອງຊາວມົ້ງຢູ່ ສູງລ່າ ເມືອງ ອຽນມີງ ເພື່ອມອບຂອງຂວັນໃຫ້ເດັກທຸກຍາກຢູ່ທ່ີນີ້ ຂ້າພະເຈົ້າຮູ້ສຶກຕື້ນຕັນໃຈຫລາຍ. ພາຍຫລັງການໄປທ່ອງທ່ຽວຄັ້ງນີ້ ຂ້າພະເຈົ້າໝັ້ນໝາຍກັບຕົນເອງວ່າ ຖ້າມີເງື່ອນໄຂຈະເຂົ້າຮ່ວມລາຍການທ່ອງທ່ຽວສົມທົບກັບການກຸສົນຄືແນວນີ້ຫຼາຍກວ່າ.”
ບັນດາບໍລິສັດທ່ອງທ່ຽວກໍປາດຖະຫນາວ່າ ດ້ວຍຮູບການທ່ອງທ່ຽວໃຫມ່ນີ້ ຈະນຳມາເຊິ່ງຄຸນປະໂຫຍດໃຫ້ແກ່ວົງຄະນາຍາດ ແລະ ນັບມື້ນັບມີຜູ້ເຂົ້າຮ່ວມຫລາຍກວ່າ. ດ້ວຍຄວາມໝາຍວັດທະນະທຳມະນຸດທີ່ດີງາມນີ້, ຈະມີບໍລິສັດທ່ອງທ່ຽວຫລາຍແຫ່ງສ້າງລາຍການທ່ອງທ່ຽວສົມທົບກັບການກຸສົນຄືແນວນີ້, ເພາະວ່າ ມັນບໍ່ພຽງແຕ່ປະກອບສ່ວນສ້າງຄວາມເລັກສະນະຫລາຍຮູບຫລາຍແບບ, ດູດດື່ມໃຫ້ແກ່ຜະລິດຕະພັນທ່ອງທ່ຽວເທົ່ານັ້ນ ຫາກຍັງນຳມາເຊິ່ງຜົນປະໂຫຍດແທດຈິງໃຫ້ແກ່ວົງຄະນະຍາດອີກດ້ວຍ.