(vovworld)- ເມື່ອໄປຢ້ຽມຢາມນະຄອນ ເຫ້ວ, ນອກຈາກໄດ້ເຂົ້າຢ້ຽມຊົມບັນດາສຸສານໃນສະໄຫມລາຊະວົງ ຫງວຽນແລ້ວ ຖ້າຫາກນັກທ່ອງທ່ຽວຜູ້ໃດບໍ່ທັນໄດ້ຂີ່ເຮືອລ່ອງລຽບຕາມແມ່ນ້ຳ ເຮືອງ ແລະ ຮັບຟັງຂັບລຳພື້ນເມືອງກ່ຽວກັບນະຄອນເຫ້ວ ກໍ່ມີໝາຍຄວາມເຊັ່ນດຽວກັນວ່າ ນັກທ່ອງທ່ຽວຜູ້ນັ້ນຍັງບໍ່ທັນມາຮອດ ເຫ້ວເທື່ອ. ເພາະວ່າ ຂັບລຳພື້ນເມືອງເຫ້ວແມ່ນຮູບການສິລະປະທີ່ເປັນເອກະລັກສະເພາະໃນໄລຍະຫນຶ່ງຂອງວົງການນັກປະພັນວັນນະຄະດີ ຫລືກາບກອນຢູ່ກຸງເກົ່າເຫ້ວ. ນັບແຕ່ເມື່ອການທ່ອງທ່ຽວ ເຫ້ວ ເລີ່ມພັດທະນາ, ຂັບລຳພື້ນເມືອງເຫ້ວໄດ້ນຳມາສະແດງຢູ່ເທິງເຮືອລ່ອງລຽບຕາມແມ່ນ້ຳເຮືອງເພື່ອໃຫ້ແຂກທ່ອງທ່ຽວໄດ້ຮັບຟັງສຽງຂັບລຳພື້ນເມືອງ, ເຮັດໃຫ້ຮູບການທ່ອງທ່ຽວນີ້ກາຍເປັນການບໍລິການພິເສດຂອງເຫ້ວ.
ກອງສິປະລະກອນຂັບເພງພື້ນເມືອງເຫ້ວ
ພາບ: nhanhac.com.vn
ປະຈຸບັນ, ບັນດາບໍລິສັດທ່ອງທ່ຽວໄດ້ຈັດຕັ້ງລາຍການທ່ອງທ່ຽວຮັບຟັງຂັບລຳພື້ນເມືອງເຫ້ວຢູ່ແມ່ນ້ຳເຮືອງ ຢ່າງຊຳນານງານ ແລະ ມີຄຸນນະພາບ. ນັກທ່ອງທ່ຽວແຕ່ລະຄົນເມື່ອເຂົ້າຮ່ວມລາຍການນີ້ , ເສຍເງິນປະມານ 150.000 ດົ່ງ/ຄືນ ກໍຈະໄດ້ຢ້ຽມຊົມທິວທັດທຳມະຊາດແມ່ນ້ຳເຮືອງ ແລະໄດ້ຮັບຟັງຂັບລຳພື້ນເມືອງເຫ້ວທີ່ດູດດື່ມໃຈ.
ເລື່ອງຮັບຟັງຂັບລຳພື້ນເມືອງເຫ້ວ ແຕ່ດົນນານມາແລ້ວໄດ້ກາຍເປັນອາຫານທາງດ້ານຈິດໃຈຂອງບໍ່ວ່ານັກທ່ອງທ່ຽວຜູ້ໃດເມື່ອມາຢ້ຽມຢາມນະຄອນເຫ້ວ. ຮອດຍາມກາງຄືນຢູ່ນະຄອນເຫ້ວ ກໍແມ່ນຈຸດເວລາເຮືອລຳຕ່າງໆອອກຈາກທ່າເຮືອ ລ່ອງຕາມແມ່ນ້ຳເຮືອງ. ເມື່ອໄປຮອດກາງລຳແມ່ນ້ຳ, ນາຍເຮືອຈະມອດຈັກເພື່ອປ່ອຍໃຫ້ເຮືອລອຍຕາມກະແສນ້ຳໃນທ່າມກາງບັນຍາກາດຄຳ່ຄືນທີ່ເພີ່ນຈິດ.
ນັກຮ້ອງ 5 ຄົນ ພ້ອມກັບນັກເສບດົນຕີ 3 ຄົນ ນຸ່ງຊຸດອາພອນພື້ນເມືອງອອກມາຂ່ຳນັບ ແລະ ທັກທາຍສະບາຍດີແຂກທ່ອງທ່ຽວ ແລ້ວ, ລາຍການຂັບລຳເພງພື້ນເມືອງເຫ້ວເລີ່ມຕົ້ນ.
ລະຫວ່າງບັນຍາກາດສະຫງົບງຽບຂອງຄຳ່ຄືນ, ສຽງພິນຊະນິດຕ່າງໆໄດ້ປະສານກັນສ້າງເປັນບັນດາບົດດົນຕີມ່ວນທີ່ສຸດ. ດົນຕີໃນລາຊະວັງເຫ້ວ 4 ບົດ ນຳສະແດງນັ້ນໄດ້ເຮັດໃຫ້ນັກທ່ອງທ່ຽວຮູ້ສຶກວ່າຕົນເອງໄດ້ຫວນຄືນໄລຍະກ່ອນນີ້. ຂັບລຳພື້ນເມືອງເຫ້ວເຕັມໄປດ້ວຍສີສັນຂອງນະຄອນເຫ້ວ, ບໍ່ພຽງແຕ່ດູດດື່ມໃຈນັກທ່ອງທ່ຽວຍ້ອນຈຸດທີ່ເປັນເອກະລັກສະເພາະຂອງມັນ, ຮູບພາບ ແມ່ນ້ຳເຮືອງຢາງ ທີ່ສວຍງາມເທົ່ານັ້ນ ຫາກບັນດານາງສາວເຫ້ວ ດ້ວຍຄຳເວົ້າທີ່ອ່ອນຊອນ, ນຸ່ງຊຸດອາພອນພື້ນເມືອງທີ່ສວຍງາມໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວອີກດ້ວຍ.
ແມ່ນ້ຳເຮືອງ ຢູ່ ນະຄອນ ເຫ້ວ
ພາບ:internet
|
ປະຈຸບັນ, ແຕ່ລະຄຳ່ຄືນມີວິສາຫະກິດ 13 ແຫ່ງ ດ້ວຍ ເຮືອທ່ອງທ່ຽວກວ່າ 100 ລຳ ພ້ອມກັບນັກສິລະປິນ 400 ຄົນທີ່ເຂົ້າຮ່ວມລາຍການສະແດງຂັບລຳພື້ນເມືອງເຫ້ວ ບົນແມ່ນ້ຳເຮືອງ. ໃນຈຳນວນສິລະປິນດັ່ງກ່າວ ເຂົາເຈົ້າສ່ວນຫລາຍແມ່ນເຮັດວຽກຢູ່ໂຮງລະຄອນໃດຫນຶ່ງ ຫລືກອງສິລະປະກອນຂອງແຂວງເທື່ອທຽນເຫ້ວ, ໃນນັ້ນ ບາງຄົນ ມີນ້ຳສຽງດີ, ຮອ້ງເພງມ່ວນກໍໄດ້ຮັບເຂົ້າກອງສິລະປະດັ່ງກ່າວ. ນາງ ໂຕນຫນືທິຮວາ, ຫົວຫນ້າຫນ່ວຍຂັບລຳພື້ນເມືອງເຫ້ວ ໃຫ້ຮູ້ວ່າ:
“ນີ້ແມ່ນສະໂມສອນຊຶ່ງບັນດາຜູ້ນິຍົມເພງພື້ນເມືອງເຫ້ວຈັດຕັ້ງເອງ ແລະ ໄປເຮັດວຽກເພີ່ມ, ນອກຈາກວຽກງານປະຈຳວັນ. ໄປຮ້ອງເພງຄືແນວນີ້ກໍບໍ່ຫຍຸ້ງຍາກລຳບາກ ມີແຕ່ຮູ້ສຶກວ່າ ເມົາມົວກັບອາຊີບ, ຮັກຊີວິດກວ່າ.”
ບັນດາບົດຂັບລຳພື້ນເມືອງເຫ້ວແມ່ນເຕັມໄປດ້ວຍສີສັນຂອງທ້ອງຖິ່ນ ຂອງກຸງເກົ່າເຫ້ວ ແມ່ນມີຄວາມໃກ້ຊິດສະຫນິດສະຫນົມ. ນັກຮ້ອງແທນເວີນ ຜູ້ທີ່ເຂົ້າຮ່ວມການຂັບລຳພື້ນເມືອງເຫ້ວຢູ່ແມ່ນ້ຳເຮືອງ ມາເປັນເວລາກວ່າ 10 ປີ ແລ້ວ ໃຫ້ຮູ້ວ່າ: ເຖິງວ່າລາຍຮັບຈາກການຂັບຮ້ອງໃນແຕ່ລະຄຳ່ຄືນກໍ່ບໍ່ຫລາຍ ແຕ່ຍ້ອນເມົາມົວກັບອາຊີບ ສະນັ້ນ ນາງເອງ ແລະ ເພື່ອນຮ່ວມງານຍາມໃດກໍພະຍາຍາມ.
ເຖິງວ່າ ບັນດານັກຮ້ອງລ້ວນແຕ່ປະກອບອາຊີບນີ້ໃນເວລາຫນ້ອຍສຸດແຕ່ 3 - 5 ປີກໍຕາມ, ແຕ່ສຳລັບເຂົາເຈົ້າແລ້ວ ຮຽນເອົາບົດເພງໃຫມ່ ແລະ ຝຶກແອບ ແມ່ນວຽກງານປະຈຳວັນບໍ່ອາດຂາດໄດ້. ແທນຕູ໋ ນັກຮ້ອງຜູ້ຫນຶ່ງໃຫ້ຮູ້ວ່າ: ຖ້າເປັນນັກຮ້ອງຄົນຫນື່ງຕ້ອງຂັບລຳທຳເພງຂອງເຫ້ວໄດ້ຫລາຍຫລາຍທຳນອງ ເພື່ອຮັບໃຊ້ນັກທ່ອງທ່ຽວ. ນາງ ຕູ໋ ເວົ້າວ່າ:
“ໄປຂັບຮ້ອງຄືແນວນີ້ ສິ່ງສຳຄັນທີ່ສຸດຕ້ອງເມົາມົວກັບວຽກງານ, ຮູ້ສຶກປະທັບໃຈເມື່ອຂັບຮ້ອງບົດເພງນັ້ນ ແລະ ຖືວ່າ ນີ້ແມ່ນຊີວິດຂອງຕົນ ນອກຈາກເປັນການສ້າງລາຍຮັບ. ກ່ອນທີ່ຈະໄປຂັບຮ້ອງ ພວກຂ້າພະເຈົ້າຕ້ອງເຂົ້າຮຽນຢູ່ບັນດາໂຮງຮຽນ, ຊຸດຮຽນ. ”
ປະຈຸບັນ ຍ້ອນຄວາມຕ້ອງການຮັບຟັງຂອງຜູ້ຟັງ, ບັນດານັກຮ້ອງເຄີຍນຳເອົາບົດເພງກ່ຽວກັບເຫ້ວຄື: ຝົນຕົກຢູ່ນະຄອນເຫ້ວ, ເຫ້ວທີ່ຮັກແພງ, ມາຮັບໃຊ້ແຂກທ່ອງທ່ຽວ. ສະນັ້ນ ລາຍການທ່ອງທ່ຽວຮັບຟັງເພງພື້ນເມືອເຫ້ວ ຍິ່ງສ້າງຄວາມປະທັບໃຈຫລາຍຢ່າງໃຫ້ແກ່ນັກທ່ອງທ່ຽວ ແລະ ທຸກຄົນກໍຫວັງວ່າ ຈະມີໂອກາດກັບຄືນເຂດດິນແດນທີ່ສວຍງາມນີ້ອີກຄັ້ງຫນຶ່ງເພື່ອໄດ້ຮັບຟັງຂັບລຳພື້ນເມືອງທີ່ອ່ອນຊອນຂອງກຸງເກົ່າເຫ້ວ.