(vovworld) - ປະຈຸບັນ, ມີຫລາຍຄົນເລືອກເຟັ້ນລາຍການທ່ອງທ່ຽວແມ່ນ້ຳແດງໃນເວລາມື້ຫນຶ່ງ. ເພາະວ່າ ລາຍການນີ້ບໍ່ຕ້ອງເສຍເວລາຫລາຍແຕ່ນັກທ່ອງທ່ຽວໄດ້ໄປຢ້ຽມຢາມໝູ່ບ້ານຢູ່ບໍລິເວນແຄມຝັ່ງແມ່ນ້ຳແດງ, ໄດ້ເຫັນປະຈັກຕາຊີວິດການເປັນຢູ່ຂອງປະຊາຊົນດຳລົງຊີວິດລຽບຕາມສອງຟາກແມ່ນ້ຳ, ພ້ອມທັງໄດ້ຢ້ຽມຢາມບັນດາວິຫານທີ່ເກົ່າແກ່ແຕ່ສັກກະລະບູຊາກໍຄືໄດ້ເຈືອຈານເຂົ້າກັບທຳມະຊາດທີ່ສວຍງາມ ແລະ ສະຫງົບງຽບ.
ໄປທ່ອງທ່ຽວບົນລຳແມ່ນ້ຳແດງດ້ວຍກຳປັ່ນ
ພາບ:internet
|
ລາຍການທ່ອງທ່ຽວມື້ຫນຶ່ງບົນລຳແມ່ນ້ຳແດງ ມີຫລາຍຮູບການເພື່ອໃຫ້ນັກທ່ອງທ່ຽວເລືອກເຟັ້ນຄື: ໄປທ່ອງທ່ຽວດ້ວຍກຳປັ່ນ, ດ້ວຍລົດໂອໂຕ, ລົດຈັກຫລື ລົດຖີບ. ເຖິງຢ່າງໃດກໍຕາມ, ລາຍການທ່ອງທ່ຽວຄົ້ນຫາແມ່ນ້ຳແດງໃນເວລາມື້ຫນຶ່ງເລີ່ມຕົ້ນຈາກນະຄອນຫລວງຮ່າໂນ້ຍດ້ວຍກຳປັ່ນແມ່ນດຶງດູດນັກທ່ອງທ່ຽວຫລາຍກວ່າໝູ່. ເພາະວ່າ ເມື່ອເຂົ້າຮ່ວມລາຍການນີ້ ນັກທ່ອງໄດ້ໄປຢ້ຽມຢາມວິຫານ ເຢີມ, ວິຫານ ດ້າຍໂລ້ຢູ່ເມືອງ ເທືອງຕີນ, ວິຫານ ຈືດົ່ງຕື໋ ຢູ່ເມືອງ ຄວາຍເຈົາ ແຂວງ ຮືງອຽນ ແລະ ສຸດທ້າຍແມ່ນແວ່ຢາມໝູ່ບ້ານປັ້ນດິນເຜົາ ບາດຈ່າງ ເພື່ອເລືອກຊື້ເຄື່ອງປັ້ນດິນເຜົາທີ່ເປັນເອກະລັກ. ທ່ານ ຫງວຽນຈີແທ່ນ, ຮອງຜູ້ອຳນວຍການບໍລິສັດລົງທຶນ ແລະ ພັດທະນາການທ່ອງທ່ຽວແມ່ນ້ຳແດງໃຫ້ຮູ້ວ່າ:
“ນີ້ແມ່ນລາຍການຊຶ່ງນັກທ່ອງທ່ຽວເລືອກເຟັ້ນຫລາຍກວ່າໝູ່. ນັກທ່ອງທ່ຽວເຂົ້າຮ່ວມລາຍການນີ້ໄດ້ໄປຢ້ຽມຢາມວິຫານຫລາຍແຫ່ງ ຊຶ່ງແມ່ນຫນຶ່ງໃນບັນດາຈຸດວັດທະນະທຳຂອງປະຊາຊົນທີ່ດຳລົງຊີວິດຢູ່ລຽມຕາມແມ່ນ້ຳແດງ. ນອກນັ້ນ ໝູ່ບ້ານປັ້ນດິນເຜົາບາດຈ່າງກໍແມ່ນສະຖານທີ່ສ້າງຄວາມປະທັບໃຈໃຫ້ແກ່ນັກທ່ອງທ່ຽວ.”
ພາຍຫລັງຂີ່ກຳປັ່ນເທິງແມ່ນ້ຳແດງໃນເວລາ 2 ຊົ່ວໂມງ, ຮອດ 9 ໂມງເຊົ້າ, ສະຖານທີ່ທຳອິດນັກທ່ອງທ່ຽວໄດ້ແວ່ຢາມແມ່ນວິຫານເຢີມ, ວິຫານ ດ້າຍໂລ້. ຫ່າງຈາກນະຄອນບໍ່ໄກປານໃດ, ບັນຍາກາດຢູ່ທີ່ນີ້ແມ່ນສະຫງົບງຽບ ແລະ ຍັງຄົງຮັກສາຈຸດດັ້ງເດີມໄດ້ ຄື: ນ້ຳສ້າງ, ສາລາບ້ານ, ຕົ້ນໄຮ ວິຫານເຢີມກໍແມ່ນສະຖານທີ່ທ່ອງທ່ຽວດ້ານຈິດວິນຍານອັນດູດດື່ມ. ນັກທ່ອງທ່ຽວສາມາດເລາະຫລິ້ນໃນບໍລິເວນວິຫານທີ່ກວ້າງຂວາງ ແລະ ໄດ້ດຶ່ມນ້ຳຊາ, ກິນເຂົ້າຫນົມພິເສດຂອງເຂດນີ້. ທຸກສິ່ງທຸກຢ່າງໄດ້ເຮັດໃຫ້ນັກທ່ອງທ່ຽວທຸກຄົນມີຄວາມຮູ້ສຶກສະບາຍ ແລະ ສະຫງົບງຽບ. ອ້າຍ ຮ່າອານ ນັກທ່ອງທ່ຽວມາຈາກຮ່າໂນ້ຍ ໃຫ້ຮູ້ວ່າ:
“ພາບພົດບ້ານນາຢູ່ທ່ີນີ້ໄດ້ເຮັດໃຫ້ຂ້າພະເຈົ້າມີຄວາມຮູ້ສຶກສະບາຍໃຈ ແລະ ສະຫງົບງຽບ. ຮູບພາບຂອງນ້ຳສ້າງ, ສາລາບ້ານຫລືເສັ້ນທາງນ້ອຍໃນບ້ານລ້ວນແຕ່ສ້າງຄວາມປະທັບໃຈໃຫ້ນັກທ່ອງທ່ຽວ. ຂ້າພະເຈົ້າຖ່າຍຮູບໄດ້ຫລາຍແຜ່ນທີ່ງາມຕາ.”
ໃນເວລາກວ່າເຄິ່ງຊ່ົວໂມງຍ່າງຫລິ້ນທົ່ວບ້ານນາ, ສະຖານທີ່ທ່ອງທ່ຽວແຫ່ງທີສອງຊຶ່ງນັກທ່ອງທ່ຽວໄດ້ຢ້ຽມຊົມແມ່ນເມືອງ ຄວາຍເຈົາ ແຂວງ ຮືງ ອຽນ, ຊຶ່ງແມ່ນແຫ່ງທີ່ມີວິຫານ ຕຽນຮືງ ຈືດົ່ງຕື໋. ວິຫານແຫ່ງນີ້ຕັ້ງຢູ່ແຄມແມ່ນ້ຳແດງ. ເລື່ອງລາວກ່ຽວກັບຄວາມຮັກລະຫວ່າງ ນາງຕຽນຢູງ ແລະ ຈືດົ່ງຕື໋ ກໍແມ່ນຈຸດທີ່ດຶງດູດນັກທ່ອງທ່ຽວ. ທ່ານ ຫງວຽນຈີແທ່ນ ໃຫ້ຮູ້ວ່າ:
“ວິຫານແຫ່ງນີ້ແມ່ນຕິດພັນກັບເລື່ອງລາວ ຕຽນຢູງ ຈືດົ່ງຕື໋. ພວກຂ້າພະເຈົ້າຕັ້ງຊື່ໃຫ້ສະຖານທີ່ນີ້ແມ່ນວິຫານບູຊາຄວາມຮັກ, ເພາະວ່າ ຄວາມຮັກລະຫວ່າງຜູ້ບ່າວຈືດົ່ງຕື໋ຜູ້ທຸກຍາກກັບທິດາຕຽນຢູງ. ນີ້ກໍແມ່ນຈຸດວັດທະນະທຳຂອງຊາວ ຫວຽດນາມ. ສະຖານທີ່ນີ້ມີທິວທັດສວຍງາມ, ບໍລິເວນໃນວິຫານກໍກວ້າງຂວາງຊຶ່ງເຮັດໃຫ້ນັກທ່ອງທ່ຽວຮູ້ສຶກສະບາຍທີ່ສຸດ.”
ວິຫານຈືດົ່ງຕື໋ ຢູ່ ຮືງອຽນ
ພາບ: internet
|
ຕາມທ່ານ ຫງວຽນຈີແທ່ນແລ້ວ, ບັນດາລາຍການທ່ອງທ່ຽວເທິງແມ່ນ້ຳແດງຂອງບໍລິສັດໄດ້ສ້າງຂຶ້ນມາເປັນເວລາກວ່າ 10 ປີແລ້ວ. ບັນດາລາຍການທ່ອງທ່ຽວເທິງແມ່ນ້ຳແດງໄດ້ແນະນຳບັນດາຈຸດວັດທະນະທຳທີ່ເປັນເອກະລັກສະເພາະຂອງປະຊາຊົນດຳລົງຊີວິດຢູ່ລຽບຕາມແມ່ນ້ຳແດງ. ປະຈຸບັນ ບໍລິສັດມີ 10 ລາຍການທ່ອງທ່ຽວໄປລຽບຕາມແມ່ນ້ຳແດງ ແລະ ແມ່ນ້ຳດວງ, ພານັກທ່ອງທ່ຽວໄປຢ້ຽມຢາມທັດສະນີຍະພາບບາງແຫ່ງຢູ່ລຽບຕາມແມ່ນ້ຳແດງ ແລະ ແມ່ນ້ຳດວງຄື: ຢ້ຽມຢາມວິຫານຈືດົ່ງຕື໋ ຢູ່ ຮືງອຽນ, ຄຸ້ມເມືອງຮຽນ ຢູ່ ຮືງອຽນ, ວັດເຝີດຕີກ ແລະ ວິຫານໂດ. ນອກນັ້ນນັກທ່ອງທ່ຽວຍັງໄດ້ແວ່ຢາມທັດສະນີຍະພາບບາງແຫ່ງຂອງຮ່າໂນ້ຍ, ຂອງແຂວງບັກນີງ ແລະ ຮືງອຽນອີກດ້ວຍ. ສິ່ງສຳຄັນນັ້ນແມ່ນ ລາຄາບໍລິການສຳລັບລາຍການທ່ອງທ່ຽວແບບນີ້ແມ່ນເໝາະສົມທີ່ສຸດ. ລາຄາຕ່ຳສຸດສຳລັບລາຍການຢ້ຽມຢາມແມ່ນ້ຳແດງໃນເວລາມື້ຫນຶ່ງແມ່ນ 350.000 ດົ່ງ, ສູງສຸດແມ່ນ 595.000 ດົ່ງສຳລັບລາຍການທ່ອງທ່ຽວໄປໄກກວ່າ. ສະນັ້ນ ພວກເຮົາຄວນຍາດເວລາເພື່ອເຂົ້າຮ່ວມລາຍການທ່ອງທ່ຽວແບບນີ້ເພື່ອພັກຜ່ອນຢ່ອນອາລົມພາຍຫລັງເຮັດວຽກຢ່າງອິດເມື່ອຍໃນອາທິດຫນຶ່ງ.