(vovworld) - ປີໃຫມ່ສາກົນໃກ້ຈະມາຮອດແລ້ວ ແລະ ທຸກຄົນເຄີຍຕັ້ງຄຳຖາມໃຫ້ແກ່ຕົນວ່າ, ໃນຊຸມມື້ໄດ້ພັກການຈະໄປໃສ ແລະ ເຮັດຫຍັງ? ເພື່ອພັກຜ່ອນຢ່ອນອາລົມພາຍຫລັງຫນຶ່ງປີທີ່ເຮັດວຽກຢ່າງອິດເມື່ອຍ. ສະນັ້ນ, ລາຍການທ່ອງທ່ຽວແມ່ນການເລືອກເຟັ້ນຂອງຊາວຫວຽດນາມຫລາຍຄົນ. ແລະ ໃນໂອກາດນີ້, ບັນດາບໍລິສັດທ່ອງທ່ຽວໄດ້ສ້າງຫລາຍລາຍການທີ່ດູດດື່ມເພື່ອຮັບໃຊ້ໃຫ້ແກ່ນັກທ່ອງທ່ຽວ.ໃນລາຍການທ່ອງທ່ຽວພາກນີ້ ເຊີນທ່ານຊອກຮູ້ບັນດາລາຍການທ່ອງທ່ຽວໃນໂອກາດບຸນປີໃຫມ່ສາກົນຢູ່ ຫວຽດນາມ ຜ່ານບົດຂຽນຂອງນັກຂ່າວລານແອງ.
ຫາດຊາຍທະເລ ໝູຍແນ
ພາບ:internet
|
ໃນສອງສາມປີມານີ້, ທ່າອ່ຽງໄປທ່ອງທ່ຽວໃນໂອກາດບຸນປີໃຫມ່ ຫລືວັນພັກການ ໄດ້ກາຍເປັນຄວາມຊີນເຄີຍ ແລະ ແມ່ນການເລືອກເຟັ້ນຂອງປະຊາຊົນ ຫວຽດນາມ ຫລາຍຄົນ. ປີນີ້, ໃນໂອກາດບຸນປີໃຫມ່ສາກົນ, ຊາວຫວຽດນາມຈະໄດ້ພັກການ 4 ມື້ . ນີ້ແມ່ນໄລຍະເວລາຢ່າງພຽງພໍ
ເພື່ອໄປທ່ອງທ່ຽວ ແລະ ພັກຜ່ອນບຳລຸງສຸຂະພາບຢູ່ແຫ່ງ ໃດຫນຶ່ງ. ສະຖານທີ່ເຊິ່ງນັກທ່ອງທ່ຽວເຄີຍເລືອກເຟັ້ນໃນໂອກາດນີ້ແມ່ນ ຊາປາ, ພູຫລວງ ແທນຮວາ, ດາຫນັງ, ກົນດ໋າວ, ຟູກວັກ... ທ່ານນາງ ຫງວຽນທິຕຽນຫ່າວ, ຜູ້ອຳນວຍການບໍລິສັດເຟືອງນາມ Sun Travel ໃຫ້ຮູ້ວ່າ: ປີໃຫມ່ສາກົນ 2013 ບໍລິສັດຂ້າພະເຈົ້າໄດ້ສ້າງລາຍການທ່ອງທ່ຽວໄປຢ້ຽມຢາມ ຊາປາ, ດາຫນັງ, ກົນດ໋າວ ແລະ ດາຫນັງຍັງຄົງແມ່ນການເລືອກເຟັ້ນຕົ້ນຕໍຂອງນັກທ່ອງທ່ຽວຫລາຍຄົນໃນໂອກາດບຸນປີໃຫມ່ສາກົນ 2013.
“ດາຫນັງໄດ້ຮັບຖືວ່າ ແມ່ນສະຖານທີ່ທ່ອງທ່ຽວທີ່ເໝາະສົມໃນໂອກາດນີ້. ດາຫນັງມີຫລາຍຮູບການບໍລິການຄື: ມີພູ, ມີທະເລ, ມີປູຊະນີຍະສະຖານປະຫວັດສາດ. ຄ່າບໍລິການກິນດື່ມກໍບໍ່ຄ່ອຍແພງ. ຊາວ ດາຫນັງ ແມ່ນຜູ້ໃກ້ຊິດສະຫນິດສະຫນົມ ແລະ ຮັກແພງແຂກຄົນ. ຍ້ອນເຫດນັ້ນ ນັກທ່ອງທ່ຽວມັກໄປຢ້ຽມຢາມ ດາຫນັງຫລາຍກວ່າໝູ່.”
ໄປດາຫນັງ, ນັກທ່ອງທ່ຽວສາມາດໄປຢ້ຽມຢາມຄຸ້ມເມືອງເກົ່າ ໂຮ້ຍອານ, ຢ້ຽມຢາມເທວະສະຖານ ໝີ້ເຊີນ, ບ່ານ່າ, ທະເລ ໝີ້ເຄ. ຍານພາຫະນະໄປມາກໍສະດວກ, ຄ່າຂົນສົ່ງກໍຖືກ. ຜູ້ໃດຢາກຫລີກລ້ຽງອາກາດຫນາວຢູ່ພາກເຫນືອ ຄວນໄປຢ້ຽມຢາມ ດາຫນັງ, ສ່ວນຜູ້ໃດຢາກສູບອາກາດຫນາວຈັດຄວນເລືອກເຟັ້ນ ຊາປາ. ທ່ານນາງ ຫງວຽນທິຕຽນຫ່າວ ໃຫ້ຮູ້ວ່າ:
“ຊາປາ ໄດ້ຮັບການຂະຫນານນາມປຽບທຽບປາຣີ ຢູ່ ພາກເຫນືອ ຫວຽດນາມ. ນອກນັ້ນ,ຊາປາຍັງຄົງຮັກສາຄວາມງາມແບບທຳມະຊາດຂອງຊາວຊົນເຜົ່າຢູ່ທີ່ນີ້ໄວ້. ດັ່ງນັ້ນ, ນັກທ່ອງທ່ຽວມາຢ້ຽມຢາມຫວຽດນາມມັກໄປທ່ຽວ ຊາປາທີ່ສຸດ. ສຳລັບນັກທ່ອງທ່ຽວພາຍໃນປະເທດ, ຊາປາ ແມ່ນສະຖານທີ່ ທີ່ມີອາກາດປອດໂປ່ງ, ເຢັນສະບາຍ ແລະ ເມື່ອໄປຢ້ຽມຢາມ ຊາປາ ນັກທ່ອງທ່ຽວຍັງໄດ້ຮັບປະທານອາຫານພື້ນເມືອງຂອງຊາວເຜົ່າຫຼາຍເຍື່ອງ, ກໍຄືຊອກຮູ້ຮີດຄອງປະເພນີຂອງປະຊາຊົນຢູ່ເຂດພູສູງນີ້ອີກດ້ວຍ.”
ຊາປາ ໃນຍາມອາກາດຫນາວ
ພາບ:dulichsapa.vn |
ຍາມໃດບໍລິສັດວິໄສທັດ ຫວຽດນາມ ກໍ່ສ້າງບັນດາລາຍການທ່ອງທ່ຽວທີ່ເຂັ້ມຂົ້ນໄປດ້ວຍສີສັນ ຫວຽດນາມ, ເພາະສະນັ້ນໃນໂອກາດບຸນປີໃຫມ່ສາກົນປີນີ້ ນັກທ່ອງທ່ຽວຈະໄດ້ໄປຢ້ຽມຊົມ ແລະ ຄົ້ນຫາບັນດາສະຖານທີ່ໃຫມ່ຄື: ພູຫລວງ - ແທນຮວາ. ກ່ອນທີ່ນຳບໍລິການທ່ອງທ່ຽວນີ້ມາໃຫ້ນັກທ່ອງທ່ຽວ, ນາງ ຈີ້ງທິຮ່າ, ພະນັກງານ maketing ໄດ້ໄປສຳຫລວດຢູ່ສະຖານທີ່ທ່ອງທ່ຽວດັ່ງກ່າວເສຍກ່ອນ ເພື່ອສ້າງຜະລິດຕະພັນທ່ອງທ່ຽວດີສຸດໃຫ້ແກ່ນັກທ່ອງທ່ຽວ.
“ຢາກຄົ້ນຫາພູຫລວງ ນັກທ່ອງທ່ຽວຄວນຍ່າງໄປ, ເພາະວ່າ ຢູ່ທີ່ນີ້ມີບ້ານຊາວເຜົ່າໄທດຳລົງຊີວິດຫລາຍແຫ່ງ. ທິວທັດທຳມະຊາດຢູ່ພູຫລວງກໍ່ສວຍງາມດັ່ງໃນຝັນ. ນັກທ່ອງທ່ຽວເອີລົບເຄີຍໄປຢ້ຽມຢາມພູຫລວງ . ເພາະວ່າເມື່ອທຽບໃສ່ບັນດາລາຍການທ່ອງທ່ຽວອື່ນໆ, ພູຫລວງ ມີຄວາມດູດດື່ມສະເພາະ, ມີນາຂັ້ນໄດ, ຮູບພາບບ້ານຊາວເຜົ່າໄທຕັ້ງຕິດກັນໄດ້ສ້າງຄວາມປະທັບໃຈໃຫ້ແກ່ນັກທ່ອງທ່ຽວ. ຢູ່ ພູຫລວງ ມີເຂດອະນຸລັກຮັກສາສັດສາວາສິ່ງ. ສະນັ້ນ ນັກທ່ອງທ່ຽວຜູ້ໃດມັກທ່ອງທ່ຽວພະຈົນໄພຄວນໄປໃນເວລາ 5 ວັນ, ຖ້າໄປທ່ອງທ່ຽວທຳມະດາແມ່ນໄປໃນເວລາ 3 ວັນ”
ໃນໂອກາດບຸນປີໃຫມ່ສາກົນ 2013, ບໍລິສັດວິໄສທັດຫວຽດນາມ ໄດ້ຕ້ອນຮັບນັກທ່ອງທ່ຽວມາຈາກ ລັດເຊຍ ຫລາຍພໍສົມຄວນ. ນັກທ່ອງທ່ຽວລັດເຊຍ ເຄີຍເລືອກເຟັ້ນບັນດາແຂວງທີ່ມີທະເລ ຈາກພາກກາງຕະຫລອດຮອດພາກໃຕ້ເພື່ອພັກຜ່ອນບຳລຸງສຸຂະພາບໃນໄລຍະຍາວ. ນອກຈາກບັນດາສະຖານທີ່ທ່ອງທ່ຽວທີ່ລືຊື່ຄື: ຍາຈາງ ແຂວງ ແຄງຮ່ວາ, ໝູຍແນ ຟານທຽດ, ກົນດ໋າວ ບ່າເຣ້ຍຫວູງເຕົາແລ້ວ, ກູຍເຍີນ ກໍແມ່ນສະຖານທີ່ຊຶ່ງນັກທ່ອງທ່ຽວມາຈາກລັດເຊຍມີຄວາມນິຍົມຫຼາຍ. ທ່ານ ເລກວາງດ໋າວ, ຜູ້ອຳນວຍການບໍລິສັດທ່ອງທ່ຽວວິໄສທັດ ຫວຽດນາມ ໃຫ້ຮູ້ວ່າ:
“ກູເຍີນມີຫາດຊາຍທະເລທີ່ສວຍງາມ, ອາກາດເຢັນສະບາຍຄ້າຍຄືຢູ່ ຍາຈາງ. ນັກທ່ອງທ່ຽວລັດເຊຍ ມາຫວຽດນາມ ມັກໄປຢ້ຽມຢາມໝູຍແນ, ຍາຈາງ, ຟູກວກ, ກົນດ໋າວ, ເຖິງຢ່າງໃດກໍຕາມ, ກູຍເຍີນກໍແມ່ນສະຖານທີ່ ທີ່ສ້າງຄວາມອັນດູດດື່ມ ດ້ວຍໂຮງແຮມ 5 ດາວຫລາຍແຫ່ງ ເພື່ອຕ້ອນຮັບນັກທ່ອງທ່ຽວຈາກລັດເຊຍມາພັກຜ່ອນບຳລຸງສຸຂະພາບໃນເວລາຫລາຍມື້. ”
ໃນໂອກາດບຸນປີໃຫມ່ສາກົນ 2013 ມີສະຖານທີ່ທ່ອງທ່ຽວຫລາຍແຫ່ງເພື່ອໃຫ້ນັກທ່ອງທ່ຽວເລືອກເຟັ້ນ. ບັນດາຫາດຊາຍທະເລທີ່ຂຽວສະອາດ, ເຂດດິນສວຍງາມແບບທຳມະຊາດແລະອື່ນໆ ແມ່ນຈຸດນັດພົບຂອງນັກທ່ອງທ່ຽວໃນໂອກາດບຸນປີໃຫມ່ສາກົນ. ຫວັງວ່າທຸກຄົນຈະເລືອກເຟັ້ນສະຖານທີ່ທ່ອງທ່ຽວທີ່ເໝາະສົມໃຫ້ແກ່ຕົນ ແລະ ຄອບຄົວ ເພື່ອໃຫ້ຊຸມມື້ໃນໂອກາດບຸນປີໃຫມ່ສາກົນມີຄວາມໝາຍຢ່າງແທ້ຈິງ.