ງານບຸນຢູ່ຕາມຖະໜົນຈັດຂຶ້ນຢູ່ແຂວງ Quang Ninh
ພາບ:dantri.com.vn
|
(vovworld) - ສັບປະດາທ່ອງທ່ຽວ Ha Long - Quang Ninh 2012 ດ້ວຍຂອບຂະຫນາດໃຫຍ່ຖືກຈັດຂຶ້ນແຕ່ວັນທີ 24/4 - 2/5 ຢູ່ແຄມຝັ່ງທະເລເຂດອ່າວ Ha Long ຊຶ່ງແມ່ນມໍລະດົກທຳມະຊາດຂອງໂລກ ໄດ້ດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດມາຢ້ຽມຊົມນັບໝື່ນຄົນ. ແຂວງ Quang Ninh ມີອ່າວ Ha Long ທີ່ສວຍງາມສ້າງຄວາມປະທັບໃຈໃຫ້ແກ່ນັກທ່ອງທ່ຽວເປັນຈຳນວນຫລວງຫລາຍ ແລະ ສັບປະດາທ່ອງທ່ຽວ Ha Long 2012 ນີ້ ຍິ່ງສະແດງໃຫ້ເຫັນບັນດາຄຸນຄ່າດ້ານວັດທະນະທຳທີ່ເປັນເອກະລັກສະເພາະຂອງທ້ອງຖິ່ນ.
ສັບປະດາທ່ອງທ່ຽວ Ha Long - Quang Ninh ແມ່ນເຫດການຖືກຈັດຂຶ້ນ ປະຈຳປີ ເປີດສາກໃຫ້ແກ່ການເຄື່ອນໄຫວທ່ອງທ່ຽວໃນລະດູຮ້ອນ 2012. ນີ້ກໍແມ່ນໂອກາດເພື່ອເພີ່ມທະວີວຽກງານໂຄສະນາພາບພົດຂອງຂະແຫນງທ່ອງທ່ຽວ Quang Ninh, ເຊີດຊູຄຸນຄ່າອ່າວ Ha Long ຊຶ່ງແມ່ນມໍລະດົກ, ສິ່ງມະຫັດສະຈັນທຳມະຊາດຂອງໂລກ ແລະ ດຶງດູດນັກທ່ອງທ່ຽວມາຢ້ຽມຢາມແຂວງ Quang Ninh. ສະຖານທີ່ຈັດຕັ້ງການເຄື່ອນໄຫວຕົ້ນຕໍໃນສັບປະດາທ່ອງທ່ຽວຖືກດຳເນີນຢູ່ເຂດໃຈກາງນະຄອນ Ha Long, ເຂດທ່ອງທ່ຽວຫາດຊາຍທະເລ Bai Chay, ເຂດທ່ອງທ່ຽວ ເກາະTuan Chau. ລາຍການຕົ້ນຕໍຂອງສັບປະດາທ່ອງທ່ຽວ ແມ່ນງານບຸນ Carnaval Ha Long ຊຶ່ງແມ່ນເຄື່ອງໝາຍການທ່ອງທ່ຽວ Quang Ninh ໄດ້ຮັບການສ້າງຂຶ້ນໃນຫລາຍປີຜ່ານມາ. ທ່ານ Hoang Quoc Thai ຮອງຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ Quang Ninh ໃຫ້ຮູ້ວ່າ:
“ງານບຸນ Carnaval ແມ່ນເພື່ອເຊີດຊູວັດທະນະທຳຂອງທ້ອງຖິ່ນ, ຊຶ່ງລວມມີ: ການດຳເນີນຊີວິດວັດທະນະທຳພື້ນເມືອງ ຈຸດທີ່ເປັນເອກະລັກສະເພາະຂອງເຜົ່າ Dao, San Chi, Cao Lan, San Diu, Tay, Kinh. ເຂົ້າຮ່ວມງານບຸນມີນັກສະແດງ ເກືອບ 1000 ຄົນຊຶ່ງແມ່ນຊາວເຜົ່າຕ່າງໆໃນແຂວງ ແລະ ຈະດຳເນີນໃນບໍລິເວນເສັ້ນທາງມີຄວາມຍາວຫຼາຍກິໂລແມດ.”
ດ້ວຍຫົວເລື່ອງວ່າ: “Quang Ninh ສະຖານທີ່ເຕົ້າໂຮມ ແລະ ແຜ່ຂະຫຍາຍ” ງານບຸນ Carnaval Ha Long 2012 ແມ່ນສະຖານທີ່ສະແດງໃຫ້ເຫັນສີສັນວັດທະນະທຳ, ຄວາມສາມາດບົ່ມຊ້ອນດ້ານທ່ອງທ່ຽວ ແລະ ເຊີດຊູຄຸນຄ່າມໍລະດົກຂອງທ້ອງຖິ່ນ. ຈຸດທີ່ແຕກຕ່າງກັບງານບຸນ Carnaval 5 ຄັ້ງກ່ອນ, ງານບຸນຢູ່ຕາມຖະໜົນປີນີ້ໄດ້ຮັບການກະກຽມຈາກອຳນາດການປົກຄອງແຂວງ Quang Ninh ດ້ວຍຂອບຂະຫນາດໃຫຍ່ສຸດ ແລະ ສ້າງຄວາມແຕກຕ່າງກັນຢ່າງເຫັນໄດ້ຊັດ ໂດຍມີການເຂົ້າຮ່ວມຂອງ 3.800 ຄົນ, ໃນນັ້ນນັກສິລະປິນສະໝັກຫຼິ້ນ 3.200 ຄົນ ແລະ ປະຊາຊົນບັນດາເຜົ່າ ແລະ ຕົວແທນບັນດາເຂດໃນແຂວງ. ໃນໂອກາດນີ້ ນັກທ່ອງທ່ຽວຈະໄດ້ເຫັນປະຈັກຕາບັນດາການລະຫລິ້ນໃນງານບຸນລະດູບານໃຫມ່, ງານດອງ, ຮີດຄອງປະເພນີຂອງຊາວປະມົງ Ha Long. ໂດຍໄດ້ເຂົ້າຮ່ວມງານບຸນ, ນາງ Thanh Lan ນັກທ່ອງທ່ຽວມາຈາກ ນະຄອນຫລວງ Ha Noi ໄດ້ແບ່ງປັນວ່າ:
“Ha Long ດຶງດູດພວກຂ້າພະເຈົ້າດ້ວຍຄວາມງາມແບບທຳມະຊາດ ແລະ ເປັນຄັ້ງທຳອິດທີ່ໄດ້ເຂົ້າຮ່ວມບັນດາການເຄື່ອນໄຫວທ່ອງທ່ຽວ. ຂ້າພະເຈົ້າຮູ້ສຶກປະທັບໃຈເມື່ອໄດ້ເຫັນວ່າ ຖະໜົນຫົນທາງໄດ້ຮັບການປະດັບປະດາຢ່າງສວຍງາມ, ຊາວທ້ອງຖິ່ນຕ້ອນຮັບແຂກດ້ວຍຄວາມຈິງໃຈຮັກແພງ. ການເຄື່ອນໄຫວເຕັມໄປດ້ວຍລັກສະນະຊົນເຜົ່າ ແລະ ບັນດາຄຸນຄ່າທີ່ເປັນມູນເຊື້ອ ດ້ວຍຮູບການທັນສະໄໝ ແລະ ສະທ້ອນໃຫ້ເຫັນສີສັນຂອງທ່ອງທ່ຽວຫວຽດນາມ.”
ການເຄື່ອນໄຫວໃນສັບປະດາທ່ອງທ່ຽວ Ha Long
ພາບ: internet
|
ໃນສັບປະດາທ່ອງທ່ຽວ Ha Long 2012, ຂະແຫນງທ່ອງທ່ຽວແຂວງ Quang Ninh ຄາດວ່າ ຈະດຶງດູດນັກທ່ອງທ່ຽວນັບໝື່ນໆຄົນ. ສັບປະດາທ່ອງທ່ຽວ Ha Long, ພິເສດ ແມ່ນງານບຸນ Carnaval ໄດ້ກາຍເປັນເຄື່ອງໝາຍ, ແມ່ນຜະລິດຕະພັນການທ່ອງທ່ຽວດຶງດູດນັກທ່ອງທ່ຽວມາຢ້ຽມຢາມ Ha Long ນັບມື້ນັບຫລາຍຂຶ້ນ. ທ່ານ Nguyen The Hue ຜູ້ອຳນວຍການບໍລິສັດທ່ອງທ່ຽວບໍລິການ Huu Nghi ໃຫ້ຮູ້ວ່າ:
“ໃນຫລາຍປີມານີ້ ງານບຸນ Carnaval ແມ່ນຈຸດສຳຄັນສຳລັບຂະແຫນງທ່ອງທ່ຽວ ເປັນຕົ້ນແມ່ນບັນດາບໍລິສັດທ່ອງທ່ຽວ ນີ້ແມ່ນກາລະໂອກາດທີ່ດີເພື່ອໃຫ້ບໍລິສັດໂຄສະນາ, ດຶງດູດນັກທ່ອງທ່ຽວຕ່າງປະເທດ. ແລະ ທາງບໍລິສັດຕ້ອນຮັບນັກທ່ອງທ່ຽວມາຈາກຈີນເປັນຈຳນວນຫລວງຫລາຍ. ປະຈຸບັນທ່າອ່ຽງນັກທ່ອງທ່ຽວຕ່າງປະເທດມາຫວຽດນາມສ່ວນຫລາຍແມ່ນຢ້ຽມຢາມ Ha Long.”
ໃນໂອກາດສັບປະດາທ່ອງທ່ຽວ Ha Long, ຄະນະກຳມະການປະຊາຊົນແຂວງ Quang Ninh ໄດ້ຈັດຕັ້ງພິທີຮັບນາມະຍົດອ່າວ Ha Long ກາຍເປັນສິ່ງມະຫັດສະຈັນທຳມະຊາດແຫ່ງໃຫມ່ຂອງໂລກ ຊຶ່ງຖືກຈັດຂຶ້ນໃນວັນທີ 1/5 ຢູ່ ເຂດທ່ອງທ່ຽວ Bai Chay ໂດຍອົງການ New7 Wonders ມອບໃຫ້. ໃນໄລຍະດຳເນີນສັບປະດາທ່ອງທ່ຽວ, ນັກທ່ອງທ່ຽວຈະໄດ້ເຂົ້າຢ້ຽມຊົມແລະທ່ອງທ່ຽວ ອ່າວ Ha Long ໂດຍບໍ່ເສຍຄ່າຜ່ານປະຕູ.
ລານແອງ