ໂດຍຕັ້ງຢູ່ທິດຕາເວັນອອກຂອງພາກໃຕ້ຫວຽດນາມ, ໄຕນີງ ແມ່ນສະຖານທີ່ຊຶ່ງທຳມະຊາດໄດ້ບັນດານທັດສະນີຍະພາບທີ່ສວຍງາມຫລາຍແຫ່ງຄື: ພູ ບ່າແດນ, ປ່າສະຫງວນແຫ່ງຊາດ ລໍ່ກໍ - ຊາມາດ, ພິເສດ ແມ່ນມີງານບຸນ ພູບ່າແດນ ທີ່ມີຊື່ສຽງໃນທົ່ວປະເທດ. ນີ້ແມ່ນທ່າໄດ້ປຽບ ເພື່ອໃຫ້ ໄຕນີງ ພັດທະນາບັນດາຮູບການທ່ອງທ່ຽວ, ເປັນຕົ້ນແມ່ນການທ່ອງທ່ຽວວັດທະນະທຳ ແຫ່ງຈິດວິນຍານ ແລະ ທ່ອງທ່ຽວຊີວະພາບ. ໄຕນີງ ໄດ້ ແລະ ພວມກາຍເປັນສະຖານທີ່ບໍ່ພຽງແຕ່ດຶງດູດນັກທ່ອງທ່ຽວເທົ່ານັ້ນ ຫາກຍັງດຶງດູດບັນດານັກລົງທຶນທີ່ມີຄວາມສົນໃຈເຖິງຂົງເຂດທ່ອງທ່ຽວອີກດ້ວຍ.
ໄຕນີງ ແມ່ນແຂວງຫນຶ່ງທີ່ມີຊາຍແດນທາງທິດຕາເວັນຕົກສ່ຽງໃຕ້ ຕິດກັບ ກຳປູເຈຍ, ມີເສັ້ນທາງທະລຸ ອາຊີ ເຊື່ອມຕໍ່ນະຄອນ ໂຮ່ຈິມີນ ກັບນະຄອນຫລວງ ພະນົມເປັນປະເທດກຳປູເຈຍ. ດ້ວຍຈຸດພິເສດສະເພາະນີ້, ໄຕນີງ ມີທ່າໄດ້ປຽບຢ່າງໃຫຍ່ຫຼວງເພື່ອຂຸດຄົ້ນລາຍການທ່ອງທ່ຽວ, ຈາກຫວຽດນາມໄປຍັງ ກຳປູເຈຍ ແລະ ບັນດາປະເທດ ອາຊຽນ ກໍຄືດຶງດູດນັກທ່ອງທ່ຽວ ຈາກ ກຳປູເຈຍ ແລະ ບັນດາປະເທດ ອາຊຽນມາຢ້ຽມຢາມຫວຽດນາມ. ທ່ານ ບູ່ຍບາເຟືອງ, ຜູ້ອຳນວຍການບໍລິສັດທ່ອງທ່ຽວ ຢູ່ ໄຕນີງ ໃຫ້ຮູ້ວ່າ:
“ໄຕນີງ ມີເສັ້ນຊາຍແດນຕິດກັບ ກຳປູເຈຍ ດ້ວຍຄວາມຍາວ 140 ກິໂລແມດ, ມີດ່ານຊາຍແດນສາກົນ 2 ແຫ່ງ ແລະ ດ່ານຊາຍແດນສຳຮອງ 1 ແຫ່ງ. ດ່ານຊາຍແດນສາກົນ ແມ່ນ ໂມກບ່າຍ ພວມໄດ້ຮັບການເຄື່ອນໄຫວເປັນຢ່າງດີ, ແຕ່ ໄຕນີງ ຍັງມີບັນດາດ່ານຊາຍແດນອື່ນອີກ ນັ້ນແມ່ນດ່ານຊາຍແດນ ຊາມາດ ແລະ ເຕີນບຽນ. ຈາກເທດສະບານ ໄຕນີງ ໄປຍັງດ່ານຊາຍແດນ ຊາມາດ ມີຄວາມຍາວພຽງປະມານ 30 ກິໂລແມດເທົ່ານັ້ນ, ເສັ້ນທາງໄປມາກໍສະດວກສະບາຍ ແລະ ສວຍງາມ ດ້ວຍບັນດາທົ່ງນາ, ສວນຢາງພາລາ, ນັ້ນແມ່ນທ່າໄດ້ປຽບເພື່ອພັດທະນາການທ່ອງທ່ຽວຊີວະພາບ.“
ໃນຈຳນວນແຂວງຢູ່ທິດຕາເວັນອອກຂອງພາກໃຕ້ຫວຽດນາມນັ້ນ, ໄຕນີງ ແມ່ນແຂວງຫນຶ່ງທີ່ມີທັດສະນີຍະພາບສວຍງາມ, ມີກິດຈະກຳສະຖາປັດຕະຍະກຳ, ປູຊະນີຍະສະຖານທີ່ລືຊື່ ຫລາຍແຫ່ງ ໃນທົ່ວປະເທດ. ໂດຍຫ່າງຈາກເທດສະບານ ໄຕນີງ ໄປທາງທິດຕາເວັນອອກປະມານ 4 ກິໂລແມດ, ໂບດສາສະຫນາ ກາວດ່າຍ ໄຕນີງ ແມ່ນກິດຈະກຳສະຖາປັດຕະຍະກຳທີ່ລືຊື່ ຊຶ່ງໄດ້ຮັບການກໍ່ສ້າງເມື່ອປີ 1426. ໂບດແຫ່ງນີ້ໄດ້ຮັບການກໍ່ສ້າງຂື້ນໃນເນື້ອທີ່ 1 ກິໂລຕາລາງແມດ ແລະ ກໍແມ່ນກຸ່ມປູຊະນີຍາສະຖານແຫ່ງສະຖາປັດຕະຍະກຳຂອງວັດວາອາຮາມ ສາສະຫນາ ກາວດ່າຍ. ກິດຈະກຳແຫ່ງນີ້ ແມ່ນສະແດງໃຫ້ເຫັນຄວາມກົມກຽວລະຫວ່າງສະຖາປັດຕະຍະກຳຂອງຝ່າຍຕາເວັນອອກ ແລະ ສະຖາປັດຕະຍະກຳຝ່າຍຕາເວັນຕົກ ດ້ວຍຫລັງຄາເຮືອນແບບກົ່ງກົ່ງ ປະດັບປະດາດ້ວຍລວດລາຍທີ່ຄ່ອງແຄ້ວ, ລະອຽດລະອໍ. ນະທີ່ນີ້ ຍັງມີກິດຈະກຳບາງແຫ່ງໄດ້ຮັບການກໍ່ສ້າງດ້ວຍສະຖາປັດຕະຍະກຳສວຍງາມ ແລະ ໃຫຍ່ໂຕມະໂຫຖານຄື: ບັນດາທາດ, ຫໍບູຊາ ພະພຸດທະເຈົ້າ ແລະ ພະແມ່…. ກຸ່ມປູຊະນີຍະສະຖານແຫ່ງ ຈິດ ວິນຍານທີ່ໃຫຍ່ກວ່າໝູ່ຢູ່ເຂດຕາເວັນອອກສຽງໃຕ້ແມ່ນ ປູຊະນີຍະສະຖານ ພູບ່າແດນ, ຫ່າງຈາກເທດສະບານ ໄຕນີງ ໄປທາງທິດຕາເວັນຕົກປະມານ 11 ກິໂລແມດ. ຜ່ານຫລາຍສັດຕະວັດ, ພູບ່າແດນ ແມ່ນບ່ອນບູຊາຂອງປະຊາຊົນໃນເຂດ, ຢູ່ເທິງພູ ມີວັດເວີນເຊີນ. ເສັ້ນທາງຂຶ້ນພູມີທິວທັດທຳມະຊາດທີ່ສວຍງາມດັ່ງໃນຝັນ, ທາງທິດຕາເວັນອອກມີພູເກົ້າ, ທາງທິດຕາເວັນຕົກສຽງເໜືອມີພູ ແຮ່ວ ແລະ ພູຟູ້ງ. ງານບຸນຕ້ອນຮັບລະດູບານໃຫມ່ ພູບ່າແດ່ນ ແມ່ນແກ່ຍາວແຕ່ວັນທີ 15 - 18 ເດືອນຈຽງຕາມຈັນທະປະຕິທິນ ແລະ ແມ່ນງານບຸນທີ່ມີຜູ້ເຂົ້າຮ່ວມຢ່າງຄັບຄາຫນານແຫນ້ນທີ່ສຸດຢູ່ພາກໃຕ້ຫວຽດນາມ. ຍັງມີທິວທັດທຳມະຊາດສວຍງາມແຫ່ງຫນຶ່ງອີກຢູ່ແຂວງ ໄຕນີງ ນັ້ນແມ່ນ ປ່າສະຫງວນແຫ່ງຊາດ ລໍ່ກໍ ຊາມາດ. ນີ້ແມ່ນປ່າທີ່ຮົກເຮື້ອເປົ່າຫວ່າງ ດ້ວຍລະບົບສັດສາວາສິ່ງທີ່ເປັນສັນຍາລັກໃຫ້ທັງເຂດ. ດ້ວຍເນື້ອທີ່ກວ່າ 18.000 ເຮັກຕາ, ປ່າສະຫງວນແຫ່ງຊາດ ລໍ່ກໍ ຊາມາດ ມີບັນດາຄູນຄ່າພິເສດຂອງທຳມະຊາດ ດ້ວຍປ່າຕົ້ນປາມ, ປ່າຊາຍເລນ ແລະ ຊາດໄມ້, ສັດສາວາສິ່ງ, ພິເສດຫລາຍຊະນິດຂອງຫວຽດນາມ. ດ້ວຍລະບົບເສັ້ນທາງປ່າເຂົາທີ່ຍາວປະມານ 50 ກິໂລແມດ, ພູມ ມີສັນຖານຮາບພຽງ, ປ່າລໍ່ກໍ ຊາມາດແມ່ນເໝາະສົມໃຫ້ແກ່ການທ່ຽວຊົມທັດສະນີຍະພາບ ແລະ ຄົ້ນຄ້ວາ. ນີ້ແມ່ນເງື່ອນໄຂເພື່ອພັດທະນາການທ່ອງທ່ຽວຊີວະພາບ, ຍ່າງ ຫລື ຖີບລົດໃນປ່າ ຫຼືຂີ່ເຮືອນ້ອຍໄປຕາມຫ້ວຍນ້ຳ ຫລື ຕັ້ງຄ້າຍຢູ່ບັນດາທົ່ງຫຍ້າ. ທ່ານ ຫງວຽນດີ່ງຊວນ, ຜູ້ອຳນວຍການປ່າສະຫງວນແຫ່ງຊາດ ລໍ່ກໍ ຊາມາດ ໃຫ້ຮູ້ວ່າ:
“ຢູ່ທີ່ນີ້ ມີປ່າໄມ້, ມີຫ້ວຍນ້ຳລຳເຊ, ມີຍ່ານເຫນືອຂອງແມ່ນ້ຳ ຫວ່າມກໍດົງ ດ້ວຍນົກ ແລະ ແມງໄມ້ທຸກຊະນິດ. ນີ້ແມ່ນອູ່ທຳມະຊາດທີ່ຮົກເຮື້ອ, ແມ່ນຈຸດມີ່ເປັນເອກະລັກສະເພາະທີ່ດູດດື່ມການທ່ອງທ່ຽວຊີວະພາບ, ທ່ອງທ່ຽວພະຈົນໄພ, ທ່ອງທ່ຽວສົມທົບກັບການຄົ້ນຄ້ວາວິທະຍາສາດ ແລະ ການສຶກສາ. ຂ້າພະເຈົ້າຄິດວ່າ ປ່າສະຫງວນແຫ່ງຊາດ ລໍ່ກໍ ຊາມາດ ປຽບເໝືອນໄຂ່ມຸກໃນກ້ອນຫີນໃຫຍ່ ຖ້າພວກເຮົາມີການລົງທຶນຢ່າງຖືກທິດ ຈະສ້າງເປັນເຄື່ອງໝາຍໃຫ້ແກ່ຂະແຫນງທ່ອງທ່ຽວ.“
ປ່າສະຫງວນແຫ່ງຊາດ ລໍ່ກໍ - ຊາມາດ ກໍແມ່ນເຂດທີ່ມີປະຊາຊົນຊົນເຜົ່າຂະແມດຳລົງຊີວິດເປັນຈຳນວນຫລວງຫລາຍ. ນັກທ່ອງທ່ຽວມາຢ້ຽມຢາມແຫ່ງນີ້ ອາດຈະມີໂອກາດຢ້ຽມຊົມ, ຊອກຮູ້ກ່ຽວກັບຊີວິດທາງດ້ານວັດທະນະທຳ, ປະເພນີທີ່ເປັນເອກະລັກສະເພາະຂອງຊົນເຜົ່າຂະແມ, ເຂົ້າຮ່ວມບັນດາງານບຸນ ແລະ ຮັບປະທານບັນດາເຍື່ອງອາຫານພິເສດຂອງຊົນເຜົ່າຂະແມ. ດ້ວຍທ່າໄດ້ປຽບກ່ຽວກັບທຳມະຊາດ ແລະ ເສັ້ນທາງຄົມມະນາຄົມທີ່ສະດວກສະບາຍນັ້ນ, ແຕ່ລະປີ ໄຕນີງ ໄດ້ດຶງດູດນັກທ່ອງທ່ຽວມາຢ້ຽມຢາມປະມານ 2.500.000 ເທື່ອຄົນ. ທ່ານ ຮ່າວັນຊຽວ, ຫົວຫນ້າສະຖາບັນຄົ້ນຄ້ວາການທ່ອງທ່ຽວໃຫ້ຮູ້ວ່າ:
“ການບໍລິການທ່ອງທ່ຽວຈຳນວນຫນຶ່ງຊຶ່ງ ໄຕນີງ ມີທ່າແຮງ ນັ້ນແມ່ນທ່ອງທ່ຽວວັດທະນະທຳແຫ່ງຈິດວິນຍານ ຕິດພັນກັບປູຊະນີຍະສະຖານ ພູ ບ່າແດນ, ຕິດພັນກັບລະບົບຊີວະພາບຂອງປ່າສະຫງວນແຫ່ງຊາດ ລໍ່ກໍ - ຊາມາດ ແລະ ບັນດາຄຸນຄ່າວັດທະນະທຳຂອງທ້ອງຖິ່ນ.“
ດ້ວຍຄວາມສາມາດບົ່ມຊ້ອນຫລາຍຢ່າງທີ່ມີຢູ່ແລ້ວ, ໄຕນີງ ພວມເປີດກາລະໂອກາດຫລາຍຢ່າງເພື່ອໃຫ້ແກ່ນັກລົງທຶນພັດທະນາການທ່ອງທ່ຽວ ຕິດພັນກັບການທອງທ່ຽວການຄ້າຢູ່ດ່ານຊາຍແດນ ດຶງດູດແຂກທ່ອງທ່ຽວຈາກຕະຫລາດໄທ, ກຳປູເຈຍ ເຂົ້າຫວຽດນາມຕາມເສັ້ນທາງບົກ. ຈາກນັ້ນ ນັກທ່ອງທ່ຽວກໍສາມາດເຂົ້າຮ່ວມບັນດາລາຍການທ່ອງທ່ຽວລະຫວ່າງແຂວງຄື: ໄຕນີງ - ທິດຕາເວັນອອກຂອງພາກໃຕ້, ແຄມທະເລທາງທິດໃຕ້ຂອງພາກກາງ, ໄຕນີງ - ເຂດທົ່ງພຽງແມ່ນ້ຳຂອງ. ນີ້ແມ່ນບັນດາເງ່ື່ອນໄຂສະດວກເພື່ອໃຫ້ຂະແໜງການທ່ອງທ່ຽວ ໄຕນີງ ບືນຕົວຂຶ້ນ ແລະ ພັດທະນາໃນໄລຍະຈະມາເຖິງ./.
ໂຕຕວັນ.