(vovworld) - ກາວບັ່ງ ແມ່ນແຂວງ ຊາຍແດນທີ່ຂຶ້ນກັບເຂດຕາເວັນອອກສຽງເຫນືອ ຫວຽດນາມ. ທາງທິດຕາເວັນຕົກ ແມ່ນຕິດກັບແຂວງ ຕວຽນກວາງ ແລະ ຮ່າຢາງ, ທາງທິດໃຕ້ແມ່ນຕິດກັບແຂວງ ບັກກ້ານ ແລະ ລ້າງເຊີນ, ທາງທິດເຫນືອ ແລະ ທາງທິດຕາເວັນອອກແມ່ນຕິດກັບແຂວງ ກວາງສີ ຂອງຈີນ. ອາດຈະເວົ້າໄດ້ວ່າ, ກາວບັ່ງແມ່ນແຂວງພູດອຍທາງທິດເຫນືອ ຫວຽດນາມ ມີພູຜາປ່າໄມ້ທີ່ກວ້າງໃຫຍ່ໄພສານ ແລະ ແມ່ນ້ຳລຳເຊຫລາຍສາຍ. ໃນລາຍການທ່ອງທ່ຽວພາກນີ້ ເຊີນທ່ານຄົ້ນຫາແຂວງ ກາວບັ່ງ ຜ່ານບົດຂຽນຂອງນັກຂ່າວ ລານແອງ.
ຈາກ ນະຄອນຫລວງ ຮ່າໂນ້ຍໄປເຖິງແຂວງ ກາວບັ່ງ, ນັກທ່ອງທ່ຽວສາມາດໄປຕາມເສັ້ນທາງຫລວງເລກ 3 ຜ່ານແຂວງ ທາຍງວຽນ, ບັກກ້ານ ຫລື ຕາມເສັ້ນທາງຫລວງເລກ 1 ຈາກ ແຂວງ ລ້າງເຊີນ ຜ່ານ ເທີດເຄ, ດົງເຄ ເຖິງກາວບັ່ງ. ໃນແຕ່ລະລະດູ, ກາວບັ່ງ ພັດມີຄວາມງາມສະເພາະ. ສະນັ້ນ ອີງຕາມແຕ່ລະຈຸດໝາຍ ນັກທ່ອງທ່ຽວສາມາດເລືອກເຟັ້ນ ໄລຍະເວລາເໝາະສົມໃຫ້ແກ່ຕົນເອງ. ແຕ່ເຖິງຢ່າງໃດກໍຕາມ, ນັກທ່ອງທ່ຽວຫລາຍຄົນຖືວ່າ ຊ່ວງເວລາງາມກວ່າໝູ່ເພື່ອຢ້ຽມຢາມ ກາວບັ່ງ ແມ່ນເດືອນ 8 - 9 ເມື່ອນ້ຳຕົກຕາດ ບ້ານຢົກ ໄຫລຂຽວງາມ ແລະ ເດືອນ 11 -12 ເມື່ອດອກໄມ້ເບັ່ງບານໃນທົ່ວພູຜາປ່າໄມ້. ຢູ່ ກາວບັ່ງ ມີທັດສະນີຍະພາບແຫ່ງຊາດຫລາຍແຫ່ງຄື: ນ້ຳຕົກຕາດ ບ້ານຢົກ, ຖ້ຳ ເງື່ອມງາວ, ຫນອງ ທາງແຮນ. ນາງ ຮ່ວາງທີ່ງອກແອງ, ຊາວກາວບັ່ງໃຫ້ຮູ້ວ່າ:
“ເມື່ອນັກທ່ອງທ່ຽວມາຢ້ຽມຢາມ ກາວບັ່ງ, ສະຖານທີ່ທຳອິດທີ່ພົບເຫັນແມ່ນນ້ຳຕົກຕາດ ບ້ານຢົກ. ນ້ຳຕົກຕາດແຫ່ງນີ້ ງາມກວ່າໝູ່ແມ່ນໃນເດືອນ 10, ເວລານັ້ນ ນ້ຳໄຫລແຮງສ້າງເປັນຮູບພາບທີ່ສວຍງາມ. ນອກນັ້ນ ນັກທ່ອງທ່ຽວສາມາດຕຶກປາຢູ່ບ່ອນນ້ຳຕົກຕາດໄດ້.”
ນ້ຳຕົກຕາດ ບ້ານຢົກ
ພາບ:internet
|
ນ້ຳຕົກຕາດບ້ານຢົກ ແມ່ນແຫ່ງໃຫຍ່ທີ 4 ຢູ່ ໃນໂລກ ແລະ ແມ່ນນ້ຳຕົກຕາດທຳມະຊາດໃຫຍ່ກວ່າໝູ່ຢູ່ພາກພື້ນ ອາຊີຕາເວັນອອກສຽງໃຕ້. ນີ້ກໍແມ່ນຫນຶ່ງໃນບັນດານ້ຳຕົກຕາດທີ່ສວຍງາມກວ່າໝູ່ຢູ່ ຫວຽດນາມ ແລະ ກໍແມ່ນທັດສະນີຍະພາບລືຊ່ືຂອງແຂວງ ກາວບັ່ງ. ນ້ຳຕົກຕາດແຫ່ງນີ້ ມີຄວາມງາມແບບດັ້ງເດີມ ແລະ ໃຫຍ່ໂຕມະໂຫຖານທີ່ເປັນຫນ້າແປກປະຫລາດ. ຫ່າງຈາກນ້ຳຕົກຕາດປະມານ 3 ກິໂລແມັດ ແມ່ນຖ້ຳ ເງື່ອມງາວ ດ້ວຍຄວາມງາມແບບຮົກເຮື້ອເປົ່າຫວ່າງ ອັນໄດ້ດຶງດູດນັກທ່ອງທ່ຽວເປັນຈຳນວນຫລວງຫລາຍ.
ຫ້ວຍ ເລນີນ ແມ່ນຫ້ວຍລຳຫນຶ່ງໂດຍແມ່ນປະທານໂຮ່ຈິມິນ ຕັ້ງຊື່ໃຫ້ ແລະ ຖ້ຳປັກບໍແມ່ນເຂດຮ່ອງຮອຍປະຫວັດສາດທີ່ມີຊື່ສຽງ, ຊຶ່ງແມ່ນສະຖານທີ່ປະທານໂຮ່ຈິມິນ ເລືອກເຟັ້ນເປັນບ່ອນເຮັດວຽກ ແລະ ນຳພາການປະຕິວັດຫວຽດນາມ ໂດຍກົງ ພາຍຫລັງ 30 ປີເຄື່ອນໄຫວຢູ່ຕ່າງປະເທດ. ຫ້ວຍ ເລນີນ,ຖ້ຳປັກບໍ ແມ່ນສອງແຫ່ງທີ່ຊີນເຄີຍສຳລັບຊາວ ຫວຽດນາມ ແຕ່ລະຄົນ ແລະ ປະຈຸບັນ ກໍແມ່ນສະຖານທີ່ທ່ອງທ່ຽວຂາດບໍ່ໄດ້ສຳລັບນັກທ່ອງທ່ຽວເມື່ອມາຢ້ຽມຢາມ ກາວບັ່ງ.
ຫ້ວຍເລນີນ
ພາບ:internet
|
ເມື່ອມາຢ້ຽມຢາມ ປັກບໍ, ນັກທ່ອງທ່ຽວຈະຖືກດຶງດູດດ້ວຍ ນ້ຳຂຽວສະອາດ ແລະ ງາມຕາຂອງຫ້ວຍເລນີນ. ປະຈຸບັນ ປັກບໍກາຍເປັນສະຖານທີ່ຊີນເຄີຍຂອງໄວຫນຸ່ມທີ່ນິຍົມການຄົ້ນຫາ ແລະ ຢາກຊອກຮູ້ກ່ຽວກັບປະຫວັດສາດຂອງປະເທດຊາດ. ມາແຫ່ງນີ້, ໄວຫນຸ່ມບໍ່ພຽງແຕ່ໄດ້ຮັບຊົມພູຜາປ່າໄມ້ທີ່ໃຫຍ່ໂຕມະໂຫຖານເທົ່ານັ້ນ ຫາກຍັງມີຄວາມເຂົ້າໃຈກ່ຽວກັບປະຫວັດສາດອັນສະຫງ່າອົງອາດຂອງຊາດອີກດ້ວຍ.
ສະຖານທີ່ຕໍ່ໄປເມື່ອມາຢ້ຽມຢາມ ກາວບັ່ງ ແມ່ນການຄົ້ນຫາໝູ່ບ້ານ ຟຸກແຊນ. ປະຊາຊົນຢູ່ທີ່ນີ້ ແມ່ນຊົນເຜົ່ານຸ່ງດ້ວຍຊຸດອາພອນພື້ນເມືອງສີຄາມທີ່ເປັນເອກະລັກສະເພາະ. ເມື່ອມາຢ້ຽມຢາມ ຕາແສງ ຟຸກແຊນ, ສິ່ງທຳອິດທີ່ນັກທ່ອງທ່ຽວພົບເຫັນແມ່ນສຽງຄ້ອນຕີ ສຽງເປົ່າຖ່ານເຜົາເຫຼັກ.... ຂອງຊ່າງຕີເຫລັກ. ນີ້ແມ່ນອາຊີບທີ່ເປັນມູນເຊື້ອມີໄດ້ນັບຮ້ອຍປີ. ນາງງອກແອງ ໃຫ້ຮູ້ວ່າ:
“ຢູ່ບ້ານ ຟຸກແຊນ ຍັງຮັກສາຈຸດດັ້ງເດີມ ແລະ ປະຊາຊົນຍັງຄົງນຸ່ງຊຸດພື້ນເມືອງຂອງເຜົ່ານຸ່ງ. ນັ້ນແມ່ນຊຸດສີຄາມປະຈຳເຜົ່າ ຊຶ່ງຂັ້ນຕອນຜະລິດຊຸດພື້ນເມືອງນັ້ນ ຕ້ອງເສຍເວລາຫລາຍ. ນອກນັ້ນ ປະຊາຊົນຢູ່ທີ່ນີ້ຍັງເຮັດອາຊີບຕີມີດ. ຊາວເຜົ່ານຸ່ງຢູ່ທີ່ນີ້ຍັງຄົງເອົາມີດຈາກ ຟຸກແຊນ ໄປຂາຍຢູ່ຕົວເມືອງ. ມີດຜະລິດຢູ່ຟຸກແຊນ ໂດຍປະຊາຊົນເຮັດດ້ວຍມື ສະນັ້ນມັນມີຄຸນນະພາບດີກວ່າເມື່ອທຽບໃສ່ມີດຢູ່ບອ່ນອື່ນ. ”
ພາຍຫລັງຄົ້ນຫາ ກາວບັ່ງໃນເວລາມື້ຫນຶ່ງ, ຕອນຄຳ່ກັບຄືນນະຄອນ, ນັກທ່ອງທ່ຽວຈະໄດ້ຮັບປະທານບັນດາເຍື່ອງອາຫານພິເສດຂອງປະຊາຊົນຢູ່ທີ່ນີ້. ຢູ່ ກາວບັ່ງຍັງມີສະຖານທີ່ທ່ອງທ່ຽວຫລາຍແຫ່ງດ້ວຍຄວາມງາມແບບຮົກເຮື້ອເປົ່າຫວ່າງດັ້ງເດີ່ມຄື: ຫນອງ ທາງແຮນ, ບັນດາໝູ່ບ້ານຂອງຊາວຊົນເຜົ່າ ພວມລໍຖ້ານັກທ່ອງທ່ຽວມາຄົ້ນຫາ.